مراجعة

Expeditions – A MudRunner

لو انت gamer ممكن تكون جربت في حياتك انواع مختلفه من الالعاب زي العاب الشوتر او الاستراتجي او الالعاب الرياضيه و غيرها من الانواع المختلفه

و كل نوع من دول بيكون ليه الناس اللي بتحبه و بتستني اي لعبه جديده من النوع ده

و لكن في نوع معين من الالعاب يعتبر جديد نسبيا و مكنش منتشر اوي في البدايه و لكن مع تطور الالعاب النوع ده ظهر

و مع الوقت ابتدي ينزل العاب كتير اوي من النوعيه دي و هي العاب المحاكاه و هنا انا مش بتكلم تحديدا عن الالعاب اللي بيكون فيها محاكاه فزيائيه معقده و لكن مثلا تلاقي العاب زي Cooking Simulator او internet cafe simulator و غيرها من الالعاب اللي تعتبر العاب محاكاه و لكنها مش معقده بالشكل اللي ممكن تشوفه في بعض الالعاب الاخري

و لكن المره دي احنا هنتكلم عن لعبه من الالعاب اللي ممكن نقول عنها انها معقده و بتهتم بكل تفصيله ممكن بحيث انها تبقي واقعيه بقدر الامكان و اللعبه اللي بنتكلم عنها حاليا هي Expeditions – A MudRunner Game

و اللي تعتبر جزء جديد من سلسله مشهوره نزل منها اجزاء قبل كده زي SnowRunner

فتعالوا نشوف سوا هل اللعبه فعلا قدرت انها تبقي واقعيه و تبقي علي نفس المستوي المتوقع منها من fans السلسله ؟

ده اللي هنعرفه في مراجعتنا !

الجيم بلاي

اللعبه فكرتها سهله و بسيطه و هي انك بيكون معاك طلبيه معينه محتاج انك تستلمها و توصلها لمكان تاني و لكن طبعا الموضوع مش بالسهوله دي

و لأن هنا بيقابلك التحدي الاكبر و الاساسي في تجربه اللعبه و هو الطريق و صعوباته

لان هنا انت بتلعب في مناطق مختلفه في منها الصحراء مثلا و في منها المناطق اللي بيغلب عليها الخضره اكتر و لكن في نفس الوقت تضاريس اي منطقه من اللي هتروحها بتكون صعبه جدا في التعامل معاها اثناء القياده بسبب وجود الجبال و الصخور و الاشجار و برك المياه و غيرها من الصعوبات

و هنا بقي دورك انك تتغلب علي الصعوبات دي و توصل الطلبيه بنجاح

تقتدر طبعا تختار العربيه بتاعتك بين مجموعه كبيره من العربيات و اللي بيكون معاك جزء منهم في بدايه اللعبه و لكن الباقي بتحتاج تلعب و تجمع فلوس علشان تشتريه

و لكن انت مش كل العربيات تنفع لكل المهمات يعني مثلا في عربيات تقدر تشيل الحاجات الخفيفه و الصغيره بس و لكن في عربيات تقدر تشيل الحمولات الثقيله فا لازم تختار العربيه المناسبه لكل مهمه

بس في نفس الوقت انت تقدر تلعب بأكتر من عربيه في نفس المهمه يعني مثلا ممكن تروح بعربيه صغيره و حركتها خفيفه في البدايه تستكشف بيها الطريق و تشيل لو في بعض العقبات اللي ممكن تتشال زي مثلا جذوع الاشجار و كده

و مع لحظه اختيارك للعربيه فأنت حرفيا بيتفتحلك كل تفاصيل العربيه و بتبقي قادر علي التحكم فيها من اول السواقه و اللي مش مثلا بتدوس علي حرف الw او تحرك الانالوج و تتحرك بس لا الموضوع معقد اكتر من كده بكتير

لانك بتتحكم في العربيه كأنك بتسوق في الحقيقه بظبط !

و لازم تخلي بالك من استخدام البنزين و في بعض الخصائص في العربيه لو استخدمها هتزود من استخدام البنزين فا بالتالي لازم تكون عارف تستخدمها امتي و برضو لازم تكون واخد جيركن بنزين معاه زياده و لكن دي رفاهيه مش هتكون عندك طول الوقت بسبب انك ممكن ميكنش معاك مساحه بسبب الحاجات اللي بتنقلها او بعض المعدات اللي شايلها في العربيه و اللي بتكون مهمه جدا لاكمال التوصيله بتاعتك و اللي هنتكلم عنها قريب

و برضو لازم تخلي بالك من العربيه بتاعتك و انت سايق يعني متخبطش في حاجه مثلا لان الحاجات دي كلها بتأثر علي قطع العربيه من المحرك للعجلات لتانك البنزين و غيره و بيكون معاك موارد محدوده علشان تصلح القطع دي اثناء المهمه فلو خلصت انت هتحتاج تكمل المهمه بعربيه بايظه مش هتديلك الاداء الكامل

او مين عارف العربيه ممكن تبوظ خالص اصلا و متعرفش تتحرك بيها !

و خلينا نتكلم بقي شويه عن الادوات اللي معاك بيكون في بعض الادوات في العربيه زي الونش اللي تقدر تشيل بيه بعض العقبات او ادوات بتشيلها في العربيه زي مثلا اداه بتستخدمها علشان ترفع الكاوتش بتاع العربيه لو غرز منك في وسط الطريق و غيرها من الادوات

ده غير طبعا الادوات اللي بتشيلها انت كسواق زي الdron اللي بتتحكم فيها عن بعد علشان تشوف المكان حواليك بشكل عام و تضاريسه عامله ازاي علشان يكون عندك فكره عن احسن طريق ممكن تاخده قبل ما تتحرك

او المنظار و اللي تقدر تشوف بيه الحاجات البعيده بوضوح و غيرها من الادوات

او مثلا في اداه بتعرف بيها عمق المياه بحيث تعرف هل من الامن انك تسوق في المياه دي ولا هتبتدي تخرب العربيه

او مثلا في اداه تانيه لما العربيه بتتقلب بيك تقدر تعدل بيها العربيه هو صحيح الموضوع يعتبر غش شويه بس يعني بتفيدك في كثير من الاحيان

و دي كلها ادوات بتحاول تسهل عليك التحدي اللي بيواجهك و لكن حتي مع الادوات دي فاللعبه لسه صعبه

و من الحاجات الكويسه هنا ان المراحل تعتبر مش خطيه يعني مش خط مستقيم او حته صغيره انت محدود الحركه فيها لازم تمشي فيها لكن اللعبه تعتبر بتتقسم لعوالم مفتوحه صغيره و كل عالم طبعا مختلف عن التاني

و ده بيديلك الحريه الكامله في اختيار الطريق الاسهل ليك انك تاخده

من الاخر هو بيديلك البضاعه و بيقلك اتصرف وصلها باي شكل ممكن

و اللعبه المهمات فيها احينا بيكون فيها بعض الاختلافات يعني مش كلها بتقلك انقل بعض الحاجات في مهمه مثلا كان فيها انك بتبحث عن احفوره ديناصور في احدي الاماكن

او مثلا مهمات بتقلك روح اكتشف مكان معين و هكذا

و لكن بصراحه علشان نكون صرحاء مع بعض فاللعبه في بعض الاحيان بتحس انها بتكرر نفسها في نقطه المهمات دي يعني انا شايف ان كان ممكن يبقي في تنوع اكتر في الطلبات اللي بتطلبها منك المهمه

و من الواضح ان المطورين واخدين بالهم من الموضوع ده و هم مركزين علي حاجه تانيه في اللعبه و هي ده نقطه الاساس و هي الفزيائيه !

و الفزيائيه في اللعبه دي فحته تانيه حرفيا

انت اي حاجه قدامك في الطريق هتاثر عليك يعني حتي لو صخره صغيره انت ممكن تكون مخدتش بالك منها او قلت العربيه ممكن تعدي من عليها عادي ممكن تلاقي العربيه اتقبلت بسببها !

او مثلا العربيه و هي بتعافر علشان تحاول تخرج من المنطقه اللي فيها طين بشكل كثيف

او الشجر و اللي بيمثل عائق كبير ليك في كتير من الاوقات

او المياه و اللي بيكون من الصعب برضو انك تمشي فيها بسبب ان التيار ممكن يجرفك معاه او حتي انت ممكن متقدرش تعدي بشكل كامل بسبب ان المياه عمقها كبير و لو عديت هيكون في تاثير سلبي علي قطع العربيه

و ده بيخلي قدامك خيارات مختلفه لو انت مثلا طريقك فيه نهر و لازم تعدي من خلاله انك مثلا تضحي بصحه عربيتك و تقول انا ممكن اصلحها و تحط حاجه زي hook في صخره او شجره كبيره علي الضفه التانيه من النهر و تبتدي تتحرك بالعربيه ببطء من خلال النهر

او انك تشوف طريق اطول و انك تلف مثلا حوالين النهر او البحيره او تشوف حته يكون اتساع النهر فيها مش كبير و تعدي

و ده مثال بسيط تقدر تضربه علي العديد من المواقف اللي هتقابلك اثناء لعبك للعبه و اللي هتكون محتاجه منك وقت للتفكير

و طبعا لو فضلت اتكلم عن تفاصيل الفزيائيه في اللعبه دي احنا ممكن المراجعه دي متخلصش انهارده فأنا هخلي بقيه التفاصيل تكتشفوها بنفسكم اثناء لعبكم للعبه !

و كمان اللعبه فيها انك تقدر تشتري زي فريق تقني ليك و اللي هيديلك شويه buffs و انت بتلعب و الموضوع بيكون اختياري هل انت حابب تضحي بجزء من الربح بتاعك في مقابل انك تسهل اللعبه علي نفسك شويه ولا تخليها صعبه عليك و تخوض التجربه لوحدك ؟

و طبعا انت تقدر انك تعدل علي حاجات في العربيه بتاعتك و لكن الموضوع بيكون مكلف شويه في بعض الاحيان

و اللعبه حاليا فهي single player فقط و لكن عنصر اللعب التعاوني هينزل قريب ان شاء الله

و كمان في حاله انك محتاج تجرب حاجات مختلفه في اللعبه فاللعبه ليها كميه mods كبير من دلوقتي و يدوب اللعبه لسه نازله

اغلبها بتضيف بعض العربيات اللي مش في اللعبه و لكن في حاجات حلوه تستحق التجربه بصراحه

و حاجه اخيره حابب اتكلم عنها قبل ما اخلص كلام عن الجيمبلاي و هي ان في ناس معتقده انها ممكن تبقي لعبه فرعيه من السلسله و كده و لكن اللعبه لوحدها فهي ممتازه جدا و ليها عمر طويل خصوصا لو هتخلص كل المهمات الاساسيه و الجانبيه و غير طبعا ان اللعبه هيبتدي ينزلها محتوي مع الوقت و الmods اللي هتغير التجربه بشكل كامل و في حاله ان حد بيسئل فاللعبه مختلفه برضو عن snowrunner الاتنين فيهم بعض الجوانب المتقاربه و لكن التجربه ككل فهي مختلفه بشكل كامل

و نصيحه لو هتلعب اللعبه علي pc العب افضل بcontroller هيسهل عليك التجربه بشكل كبير و لكن احينا هتقابلك مشاكل و انت بتتنقل في قوائم اللعبه الcontroller ممكن يقرفك في النقطه دي فقط او لو عندك steering wheel ساعتها اللعبه هتكون في حته تانيه خالص

و بس كده اظن اني اتكلمت كده بما فيه الكفايه عن الجيم بلاي او علشان نكون دقيقين فا انا اتكلمت عن اهم الحاجات في الجيم بلاي لان في حاجات كتير جدا في اللعبه دي بس من الافضل انك تستكشفها بنفسك يا صديقي !

و خلينا دلوقتي نشوف جانب تاني من اللعبه و هو الجرافكس

الجرافكس

بصراحه جرافكس اللعبه دي كويس جدا و مليان بالتفاصيل و البيئات متصممه بشكل ممتاز جدا هيخلي كل حاجه واضحه قدامك و كأنك بتخوض الرحله دي في العالم الحقيقي
و ده بيساعدك اكتر في الانغماس في تجربه اللعبه مع الوقت و طول فتره لعبي محستش ان في جزء معين في اللعبه تفاصيله سيئه

و كان تصميم العربيات برضو ممتاز و مليء بالتفاصيل

الجانب التقني

و بما اننا اتكلمنا علي الجرافكس فكان لازم اتكلم عن الجانب التقني و اللي هو كمان كان كويس جدا و اللعبه مصقوله بشكل ممتاز و مفيهاش مشاكل قابلتني ولا glitches خلال فتره لعبي ليها

و كمان متطلبات تشغيل اللعبه كانت كويسه و مش عاليه ولا محتاجه جهاز بيطلع نار من بقه

الجانب الصوتي

برضو صوتيات اللعبه مقدرش اقول عليها اي حاجه كانت ممتازه من ناحيه اصوات البيئه و العربيه و تفاعل العربيه مع البيئه من خلال التضاريس المختلفه و لكن بصراحه الموسيقي اللي كانت في اللعبه مكانتش احسن حاجه بالنسبه ليا و لكن هي اذواق ممكن تعجبك و انا لا و هكذا

الخلاصة

expeditions: a mudrunner انا احب اشبه اللعبه دي بالpuzzle الكبير جدا و اللي انت بتحاول تتقدم فيه عن طريق اكتشاف اسهل طريق و انك ازاي تسلك الطريق ده بأسهل طريقه ممكنه

هنا مفيش اعداء ولا وحوش يواجهوك و يخلو اللعبه صعبه و لكن العدو الحقيقي ليك هو الطبيعه و تضاريس الارض و اللي مش هترحمك طول فتره اللعب

لو انت عايز تجرب تجربه جديده فأنت لازم تجرب اللعبه دي

و لو انت من عشاق النوع ده من الالعاب فأنت مستني ايه يلا روح اشتري اللعبه من جيمزاوي و ابتدي في رحلتك !

التقيييم النهائي

8.5 من 10 !