لو عندك Xbox Series/Xbox One SX، أكيد بتستمتع بأداء الجهاز الجبار وتجربة اللعب الممتازة. بس زي أي جهاز إلكتروني، ممكن تحصل مشاكل. من أشهر المشاكل اللي بتواجه ناس كتير هي مشكلة شريحة HDMI Retimer IC. في المقال ده، هنتكلم عن دور الشريحة دي، ليه ممكن تتلف، إزاي تحافظ عليها، وإيه الحل لو حصلت المشكلة!

يعني إيه شريحة HDMI Retimer IC؟

شريحة HDMI Retimer IC هي مكوّن صغير بس مهم جدًا في جهاز الـ Xbox. دورها الأساسي إنها:

• تقوي إشارة الـ HDMI بين الجهاز والشاشة.
• تضمن جودة الصورة العالية زي 4K أو 1080p من غير أي تقطيع أو مشاكل.

ليه شريحة HDMI Retimer IC بتتحرق؟

• حرارة الجهاز العالية: لو الجهاز شغال لفترات طويلة في مكان مقفول أو التهوية مش كويسة.
• استخدام كابلات HDMI رديئة: الكابلات الرخيصة بتعمل مشاكل في الإشارة أو ممكن تسبب تيارات كهربية تضرب الشريحة.
• مشاكل في الكهرباء: التيار المتذبذب أو انقطاعه فجأة بيأثر على الشريحة. ممكن كمان كابل الكهربا الواصل للجهاز يكون رديء أو غير ثابت. حتي الكهربا الخارجة من الـ Power Supply ممكن لو فيه مشكلة يكون بيخرج كهربا غلط بتأثر على الشريحة.
• فتح الجهاز بطريقة غلط: لو حاولت تفك الجهاز بنفسك من غير معرفة أو أدوات مناسبة، ممكن تتلف الشريحة.
• قفلة على البوردة (Short Circuit): أي قفلة كهربائية على لوحة الدوائر المطبوعة (PCB) ممكن تسبب سخونة زائدة أو تيار كهربائي عالي يضرب الشريحة.
• سوء استخدام الجهاز: فصل أو توصيل كابل HDMI أثناء تشغيل الجهاز قد يسبب شرارة كهربائية تؤثر على الشريحة.
• مشاكل تصنيعية نادرة: في بعض الحالات النادرة، تكون المشكلة بسبب عيب تصنيعي في الشريحة أو طريقة تركيبها.

إزاي تعرف إن الشريحة فيها مشكلة؟

• الجهاز شغال بس الشاشة مش جايبة أي صورة.
• رسالة “No Signal” بتظهر على الشاشة لما توصل الكابل.
• الصورة بتقطع أو الشاشة بتمشي وتفصل لوحدها.
• جودة الصورة بقت سيئة أو فيها تشويش.

إزاي تحافظ على شريحة HDMI Retimer IC؟

1. استخدم كابلات HDMI محترمة: اشتري كابلات بجودة عالية وماركات معروفة.
2. خلّي الجهاز في مكان مهوي: حط الجهاز في مكان مفتوح، ونظف فتحات التهوية.
3. احمي الجهاز من الكهرباء: استخدم مثبت تيار أو UPS.
4. اعمل صيانة دورية: خد الجهاز عند مركز صيانة متخصص كل فترة.