مراجعة Dragon’s Dogma 2

( ليس الصعب أن تبني عالما، إنما الصعب أن تجعله حيا )

دي مقولتي الشخصية اللي بستفتح بيها أي لعبة RPG جديدة، وتقريبا كابكوم سمعتني وركزت مع الموضوع أوي ، لانها بعد عشر سنين من اصدار Dragon Dogma 1 أعلنت ان الجزء التاني هيكون ثورة حقيقية من ناحية ميكانيكس العالم المفتوح المتفاعل، كمان قالوا ان العالم هيبقى أكبر من العالم الأصلي بـ ٤ مرات ودا رقم كبير جدا لأن الجزء الأول كان ضخم أصلا، وكابكوم استديو شاطر أوي اظهر بعض من امكانياته وعودته للطريق الصحيح لما عمل ريميك ريزدنت ايفيل ٤ اللي كان مبهر على جميع المستويات ، ياترى بقى هيبقوا قد الضغط وتوقعات الملايين بخصوص Dragon’s Dogma 2 ، دا اللي هنعرفه النهاردة في مراجعتنا للعبة.

القصة بدون حرق 

القصة بتبدأ بشخص مسجون بيصحى على صوت بيقوله ( اصحى أيها المستنير وواجهني ) ، وبيظهرلنا ان ده صوت التنين الحاكم والمستنير دا هو بطلنا المسجون واللي بيكون فاقد الذاكرة .. وهنا بتيجي بقى واحدة من أمتع الحاجات في اللعبة وهو تخصيص الشخصية، كان ممكن أتكلم عليه في نقطة لوحده لو كان اتقدم بشكل تقليدي زي باقي الالعاب لكنه اتقدم  جوا القصة نفسها، لانه بيكون متاح امامك وانتا في السجن والسجان بيطلعك شخصيات كتير متعدلة من اللعبة نفسها وشخصية واحدة لافة ضهرها وهو دا الاختيار لو انتا حابب تخصص بنفسك.

بص انا مش عايز اصدمك بس انا لو لعبت خمسين ساعة مثلا فمنهم حوالي خمس ساعات بصمم الشخصية، ومتحاولش بقى تقول لا أنا مابيفرقش معايا وهدوس أي حاجة وخلاص لانك مش هتعرف ، كابكوم ابتكرت أحسن نظام تخصيص شخصيات أنا شفته في حياتي، كمية التفاصيل اللي تتقدر تتحكم بيها والجودة اللي بتطلع بيها بيديك مساحة تقريبا غير محدودة انك تصمم أي شخصية بتحلم بيها، ودا كان بروموشون ذكي جدا من كابكوم انهم نزلوا للاعبين ال PC على ستيم امكانية التخصيص دي ولو اشتروااللعبة الشخصية هتفضل معاهم ، وظهرلنا الاف الشخصيات على النت لممثلين او شخصيات من العاب تانية زي كريتوس حاجة في منتهي الابداع فعلا، وكمان لازم تعرف ان التخصيص مش مجرد شكل بس لا هو كمان هيفرق معاك في الجيمبلاي نفسه ، لان الشخصية الضخمة بتقدر تشيل وزن أكتر لكن حركتها بتكون بطيئة والعكس الشخصية الصغيرة بتشيل وزن أقل لكنها سريعة ، حط في بالك ان عداد التحمل هنا ( الستامينا ) و تظبيط الوزن هم من أهم ميكانيكس اللعبة واللي يا يخلوا تجربتك جامدة يا تزهق لان نظامهم قاسي ولازم تتابع كل شوية ان وزنك يبقى معتدل وتنظم الانفنتوري بتاعتك فبالتالي ركز كويس وانتا بتصمم شخصيتك.

رجوعا للقصة بينطلق المستنير بمساعدة البيادق ( أوال Pawns ) واللي هنتكلم عنهم في نقطة لوحدهم اكيد.. في رحلة طويلة محفوفة بالمخاطر عشان يسترجع ذاكرته ويحدد مصيره قدام التنين ، القصة بشكل عام مش ثورية لكنها حلوة جدا ومتقدمة بنفس نظام الدن رينج اللي هو انتا بتكلم حد من الNBCs بيقعد يديك معلومات عن كذا حاجة وتروح تعملهم وهكذا ، وبتكون محاور القصة الرئيسية هم بلدتين ( فيرموند ) ودي مدينة البشر اللي مفروض المستنير يكون حاكمها لكنه بسبب فقدان الذاكرة ومكر بعض الناس الطمعانين في الحكم بيكون في حد مزيف هو اللي حاكم ،والمدينة التانية هي ( باتال) مدينة الوحوش اللي بيكرهوا البشر والبيادق 

القصة بتعدي الخمسين ساعة مش هتحس فيهم باي ملل لان المهمات متنوعة وبتفكرنا كدا بأجواء زا ويتشر اللي بعتبرها افضل لعبة قدمت مهمات في التاريخ ، مشكلتي الوحيدة في النقطة دي واللي ممكن تخلي اللعبة دي متنفعش مع كل الناس ان المهمات مش واضحة ، يعني مش هتختار المهمة تلاقي طريق بيوديك تعملها وخلاص لا اللعبة ابعد ما يكون عن كدا وفي مهمات كتير هتبقى متروكة لبديهتك، ولانك تسال الناس حواليك وهم يدلوك ، او تسال البيادق نفسهم، او كمان تستني الوقت يعدي لان في مهمات مبتتعملي غير بالليل وهكذا ، فهي الفكرة كلها ان اللعبة قاصدة تعيشك التجربة بس بشكل تقيل جدا ف لازم لو هتلعب اللعبة دي تبقى فاهم انها مختلفة عن اي لعبة لعبتها وانك لازم تلعبها من غير زهق ولا مقارنات  والا مش هتكون مناسبة تماما ليك.

البيادق رفاق الرحلة وكنزها 

لما بتشوف العرض الدعائي للعبة زي دراجون دوجما ٢ أول حاجة هتيجي في بالك دي أكيد فيها طور لعب تعاوني، الموضوع دا أصلا مبقاش مجال للنقاش في الاف اللاعبين بيحددوا هيشتروا اللعبة أو لا على أساس الموضوع دا ، والصدمة جت لما عرفنا ان اللعبة مفهاش كو اوب مع ان النوع دا من الالعاب متعته بتزيد اضعاف لما بتلعبهمع صحابك، بس كابكوم كانت عايزة تظهر قوتها في نظام البيادق الجديد ودا مش هيحصل لو الناس هتلعب مع صحابها طيب ايه بقى هم البيادق عشان دي قصة كبيرة لوحدها 

البيادق دول هم كائنات مهمتها الوحيدة هي مساعدتك في رحلتك ، بيكون معاك بيدق رئيسي دا صاحبك وحبيبك وكفاءة اللي مبتستغناش عنه وبرضو بتخصصه زي ماعملت مع نفسك ، وفي اتنين كمان دول بتستاجرهم بقى من مكان اسمه الصدع بتتجمع فيه كل البيادق دي وبتختار منهم أو بتقابلهم في الطريق وبيعرضوا انهم يساعدوك وبيقولولك مميزاتهم وهكذا ، طيب هل الموضوع وقف عند كدا أكيد لا، كابكوم اخدت الريسك ومن رأيي انها نجحت فيه وفعلا نظام البيادق خلاني مركزش أوي مع ان مفيش كو اوب ، مع ان بالنسبالي مبحبش لما الاستديو يجبر اللاعب على شئ انا شايف يكون في كو اوب عادي وبرضو الناس اللي بتحب تلعب لوحدها البيادق موجودة ، بس مش مشكلة تجربتي كانت ممتعة جدا معاهم لانك هتحس انهم حقيقين بشكل مرعب ، اولا بيكون ليهم شخصيات مختلفة يعني هتلاقي بيدق طيب دا بيهتم بيك اوي وفي المعركة حمايتك اولويته ، في بيدق حكيم بيعمل ستراتيجيات في بيدق مندفع وبيحب المغامرة وهكذا ، تاني حاجة بقى وهو ان البيادق اللي بتقابلها دي بتكون بيادق لاعبين تانيية اصلا ، يعني هي اللعبة مفهاش كو اوب بشكل مباشر اه بس البيادق نفسها بتتبدل بين اللاعبين ودي حركة في منتهى الصياعة من كابكوم لانهم ظبطوها اوي وخلوا البيدق بتاعي لو عديت معاه في مكان وحفظناه وقتلنا وحش كبير فيه وبعدين بعته مهمه وحد استعان بيه وجم يعدوا من نفس المكان ، ساعتها اابيدق بتاعي هيكون عنده الخبرة وهيدله وهيقوله عالوحش انتوا متخيلين ، حاجة رهيبة مدية بعد كبير للجيمبلاي وهيخليك كل شوية لازم تستعين ببيادق جديدة عشان ليفيلك بيعلى وهتحتاج خبرات اكتر ، كمان بيساعدوك في مهمات القصة لو انتا تهت وبيهزروا معاك ولو في كنز قدامك مش واخد بالك منه بيدلوك عليه ، وبسبب موضوع البيادق دا كابكوم خلت ان اللاعب ملوش غير Save slot واحدة بس عشان السيرفرات تستحمل كمية البيادق اللي موجودة ولو الناس عملت كذا سيف البيادق هتتضاعف بشكل ممكن يبوظ السيرفرات دي برضو نقطة كانت لازم توضح عشان في ناس كتير بتعمل كذا save slot خصوصا في العاب الrpg اللي بتتاثر بقراراتك بس هنا مش هتعرف تعمل دا اخرك ممكن تقفل اللعبة وتعيد تحميل من نقطة الاستراحة في الاوتيل مش نقطة الحفظ التلقائي دا لوعكيت في حاجة مثلا وحبيت تعدلها ..هسبلك بقى وانتا بتلعب تستكشف بقية امكانياتهم عشان محرقش عليك كل حاجة لانهم فعلا مبهرين وكابكوم تفوقت ع نفسها في النقطة دي.

الجيمبلاي

الجيمبلاي هنا معمول عشان يرضيك حتى لو رضاك صعب ، بداية من اختيار الكلاس بتاعك وانتا بتصمم الشخصية هيكون عندك اربع كلاسات هم المحارب والساحر ورامي القوس واللص ، كل كلاس له مميزاته وعيوبه واسلحته ودروعه وهكذا ، كمان انتا بتخصص الكلاس بتاع البيدق بتاعك وهقولك نصيحة على جنب لازم تخلي الفريق بتاعك فيه كلاسات متنوعة واهم حاجة الساحر لانه مسؤول عن حماية الفريق وزيادة الصحة وهيكون نقطة فارقة معاك في معارك كتير، بالنسبة للمحارب فدا معروف بيكون معاه السيف والدرع ولمحبين القتال القريب العنيف ، اللص بيكون معاه خنجرين .. واحد في ايده اليمين وواحد في الشمال وبيكون خفيف جدا وبيعتمد مباشره على التسلق فوق الوحوش وقتلها ، ورامي القوس من اسمه بيعتمد عالقوس والسهم والساحر نفس الحكاية ، كل دا قد يكون عادي ومكرر بس اللي ضافته كابكوم ان في كلاسات تانية بتتفتح مع الوقت بتكون كلاسات هجينة او مطورة ، وكمان انتا بتقدر تغير الكلاس بتاعك كل شوية زي متحب عشان تقدر تجرب كل الكلاسات من رابطة الحرف واللي منها برضو هتقدر تطور قدراتك وتخصص الاربع مهارات بتوعك واللي بالمناسبة في مهارات كتير جدا جدا في اللعبة مبهرة على مستوى قوتها او متعة اللعب بيها ، يعني في كلاس اسمه الرماح السحري م دا من اقوى الكلاسات وبيكون ميكس من السحر والرمح وبيتفتح قدام مع القصة ، بيكون عنده قدرة انك بتشد الوحش اليك كدا بعدين تضربه بيروح مسافة بعيدة جدا ، غير ان الوحوش بقى متنوعة بشكل رهيب وكل وحش له نقط قوة وضعف وطريقة هزيمة فانتا طول الوقت هتكون مستمتع سواء بتلعب القصة او المهمات الجانبية او بتستكشف او حتى بتدور على وحوش تحاربها وتجرب كلاسات مختلفة عليها. ،عيب بس معجبنيش وهو ان الفاست ترافيل شبه مش موجود هو بيكون باحجار معينة نادرة جدا جدا جدا وكابكوم كانت قاصدة والمطور قال انه انا تعبت في العالم بتاعي وفي كل خطوة هتلاقي حاجة تعملها فعايز اللاعبين تاخد التجربة كاملة ، كلام جميل بس نرجع لنفس النقطة متجبروش اللعيبة على شئ لان مش كل الناس زي بعض ، انتا متخيل انك ممكن تمشي تستكشف ساعتين تلاتة وبعدين محتاج ترجع الفندق ترتاح او تظبط اسلحتك وكدا مضطر ترجع كل دا مشي ، هو اه في وسيلة تنقل على عربية ثيران بس دي ليها اماكن معينة وتوقيتات معينة في اليوم ، فدي برضو نقطة ممكن متعجبش ناس كتير خصوصا لو بيحبوا يلعبوا ساعة ساعتين في اليوم هيضيع نصهم في التمشية عشان المطور يحلل العالم بتاعه اللي تعب فيه

حاجة كمان نظام الستامينا والوزن هنا قاسي جدا كنت قلتلك في الاول تخلي بالك وانتا بتصمم شخصيتك عشان الموضوع دا مزعج فعلا انتا كل ما بتجري طوتين لازم تقف تريح عشان ااستامينا ولو معاك وزن زيادة كمان هتبقى ابطأ وبتتعب اسرع وفعلا الليميت بتاع الوزن قليل مقارنة بوزن الحاجات وان فعلا في لوت كتير في العالم هتعوز تجمعه ، ضيف ع كدا انك عشان تخزن وتفضي الانفنتوري لازم تروح الفندق وانتا اصلا بتطلع تستكشف فبتبعد جدا ومش كل شوية هترجع مشي تخزن وتكمل فلا مكانوش موفقين في الحتة دي وقد ينزل ابديت يظبط الموضوع دا هنشوف.

 وبرضو لو مت مثلا او طلعتوا من حرب عنيفة بار الصحة بتاعك بينقص ومش بيتملي غير لما ترتاح في فندق او تخيم ودي حاجة في الاول كانت مزعجة بس بعد كدا خصوصا بعد المعارك الشرسة بتحسها منطقية وبتدي هيبة لكل معركة وانك لما تخلص تريح وتظبط امورك قبل ما تكمل رحلتك بس خلي بالك عشان النار بتلم الوحوش وممكن وانتا مخيم انتا وفريقك في امان الله تلاقي مجموعة وحوش هجموا عليك والاخطر لو زعيم بنفسه ساعتها الموضوع بيبقى صعب جدا يعني مش نايم كويس والدنيا ضلمة وهيلثك قليل مش محتاج اقولك هيحصل ايه فيك انتا والشلة 

نختم بقى نقطة الجيمبلاي بامتع حاجة في اللعبة كلها وهي حرب الزعماء ، مزيكا حماسية شغالة طول الوقت وادرينالين رش وانتا بتعمل كومبوهاتك ومركز مع فريقك كله مين بيعمل ايه ومين محتاج مساعدة وبتديهم اوامرك بناءا عاللي شايفه في المعركة  وان المعركة نفسها مش متكروتة و بتفضل بقى وقت ممكن يوصل ليوم كامل في اللعبة شغالة حسب صعوبة الزعيم بنفس الجودة والمتعة وعدم الملل، فشكرا كابكوم انتي اسطورية 

عالم مفتوح وخيالي كما قال الكتاب

تصميم العالم كان رائع بصراحة، تنوع في البيئات بشكل كبير واجواء كدا تخليك عايز تستكشف كل شبر من غير ملل ، ودي اللي قلتها في اول المراجعة الشطارة انك تصنع عالم مفتوح حيوي مش ممل اقدر اقضي ساعات كتير واما بس عايز استكشف والموضوع هنا معمول بحرفنة هو فعلا زي ما كابكوم قالت اكبر اربع مرات من الجزء الاول وفعلا مفيش شبر مفهوش حاجة تتعمل يا اما لوت هتلاقيه يا حد هتساعده يا وحش يا منظر بديع ، انتا كمان ممكن تلاقي اتنين زعما بيحاربوا بعض وانتا تخش ثيرد بارتي تقش الاتنين او تتفرج عليهم وهم بيحاربوا بعض حاجة تحفة بجد والرسومات نفسها كانت معمولة كويس جدا بس هنيجي لاكبر عيب في اللعبة واللي لحد دلوقتي انا مش فاهم ازاي كابكوم تبوظ تحفة اسطورية زي دي بعيب مش منطقي كدا ، اللعبة مبتعديش ال٣٠ فريم واحنا في سنة ٢٠٢٤ وبنلعب جيل جديد وكمان ال٣٠ مش ثابتين خصوصا عالكونسول، بص هكون صريح معاك هو موضوع مزعج ففعلا بس انتا بتتعود مع الوقت ومع متعة الجيمبلاي الدنيا بتمشي بس مقدرش انكر انه مزعج وبيبوظ التجربة واني في اوقات كدا تخيلت بس دي لو ٦٠ فريم يعني فعلا هتبقي واحدة من اعظم الالعاب في التاريخ لان عندها كل العناصر الي تساعدها على دا بس هو الحلو مابيكملش معروفة وكابكوم يعني امرها عجيب ومن حسن حظها ان اللعبة فيها حاجات كتير تشفعلها

كمان من كتر اهتمام كابكوم بتفاصيل العالم خلت دور الليل والنهار مش بس بيحدد قوة الوحوش بالليل او المهمات اللي بتحتاج توقيت معين دا كمان بيأثر على اللوت بتاعك يعني لو معاك تفاحة وعدي عليها وقت بتلاقيها تعفنت وبقت مسمومة فديانيميكية الليل والنهار خلت العالم يبقى واقعي وممتع اكتر بكتير 

بالنسبة للصوتيات فالمزيكا جميلة جدا ومناسبة للاجواء وبتبقى رهيبة وحماسية في معارك الزعماء خصوصا في الاجزاء الاخيرة من اللعبة ، والتمثيل الصوتي كاني كويس برضو مش مميز لكنه مقبول جدا.

دعم اللغة العربية

قولا واحدا مكنش ينفع اصلا لعبة زي دي متبقاش متعربة بالكامل وتعريب صحيح متقن ، كابكوم عكت في كذا حاجة اهمها الفريمات بس هي عارفة كويس ان لعبة بالحجم والمحتوى دا مينفعش متتعربش بشكل احترافي ودا اللي عملته ببساطة اللعبة معربة بالكامل قوائم وترجمة ومقابلنيش اي مشاكل في فهم اي حاجة بتحصل بالعكس انا كنت مستمتع وانا بقرا اي حوارات خصوصا ان في اماكن بيبقى الانجليزي بتاع اللعبة تقيل شوية من ناحية المصطلحات بس التعريب المتقن مش هيخلي في مشكلة عند اي حد في فهم اي حاجة بتحصل جوا اللعبة سواء في القصة او براها.

نيجي بقى لمميزات وسلبيات اللعبة ورأينا عنها 

المميزات

نظام تخصيص شخصية ممتع ومليان تفاصيل ويعتبر الافضل في تاريخ الالعاب 

وجود البيادق ادى بعد كبير وممتع للجيمبلاي وعوض غياب نظام اللعب التعاوني 

العالم المفتوح مصمم بعناية تخليه متفاعل وحيوي طول الوقت واستكشافه متعة بحد ذاتها 

قتال الزعماء هو الامتع في كل اللعبة وبتجتمع فيه كل عناصر المتعة اللي تخليك مش عايز تسيب ولا وحش في اللعبة من غير ما تحاربه

تنوع الكلاسات او الحرف وسهولة التغيير بينها كل شوية وتطويرها

تعاقب الليل والنهار وتأثيره على عالم اللعبة وعلى المهمات

السلبيات

اللعبة بتدعم ٣٠ اطار فقط غير ثابتة على الكونسولز واوقات بتنزل لحد ١٢ كمان 

عناصر RPG تقيلة بتخلي اللعبة متنفعش لكل الناس

اللعبة مابتتدعمش طوراللعب التعاوني  

التقييم النهائي

٩/١٠

ننصحك تشتريها بـ ٧٠ دولار ؟

اكيد طبعا  الا لو كنت حد مش غاوي RPG او بيزهق بسرعة لان نظام اللعبة والميكانيكس اللي فيها متصلحش لكل اللاعبين.

كابكوم بتوفي بوعدها وبتقدملنا جزء جديد من دراجون دوجما مبهر على كل المستويات ، كانت محتاجة ٣٠ فريم زيادة بس وتحجز مكانها كواحدة من افضل الالعاب في التاريخ.