مراجعة لعبة Dead Island 2
مراجعة لعبة
Dead Island 2
سنة 2014 تم الاعلان عن جزء جديد من لعبة dead island 2 و كلنا اتحمسنا جدًا عشان نكمل السلسلة ديه. بس للأسف تمر السنين و تتنسي اللعبة و نفقد الأمل اننا نشوفها. لحد ابريل 2023 اللي شوفنا فيها اللعبة أخيرًا. و طبعًا الكل كان متخوف ان اللعبة متطلعش لعبة حلوة بسبب التطوير المتعثر اللي مرت بيه. فهل قدرت تخالف التوقعات ديه؟ ده اللي هنعرفه في مراجعتنا للعبة Dead Island 2.
القصة و عالم اللعبة
لعبة Dead Island دايمًا مكانتش القصة أكتر حاجة بتميزها, يعني مثلًا ألعاب تانية زي Dying Light كان القصة عنصر أساسي فيها و سبب كبير من أسباب نجاحها. لكن Dead Island 2 جت عشان تقدم قصة احداثها متوقعة جدًا لكن ده كان مقصود من الأساس.
قصة لعبة Dead Island 2 بتتكلم عن مدينة لوس انجلوس اللي اجتاحها الزومبي و مسابش فيها مكان مطالوش الخراب. و بتبدأ الأحداث علي متن طيارة خارجة من مطار لوس انجلوس و مليانة اشهر فنانين هوليوود و أغنيائها. و طبعًا مش محتاج اقولك انهم مشهورين في اللعبة بس.
بيحصل منعطف خطير و الطيارة ديه مبتوصلش وجهتها بسلام و بتقع وسط المدينة. عشان يبدأ بطلنا رحلته في مدينة لوس انجلوس هو و الممثلة Emma و مدير أعمالها Michael و شخص آخر, و اللي هتقابلهم كلهم بعد الحادثة علطول و تتجه معاهم للمدينة عشان تلحقو تستخبو من الزومبي اللي جاي من كل حتة علي صوت سقوط الطيارة.
قصتها مش بس بتتمحور حوالين النجاة في المدينة ديه و الرغبة في الوصول لمكان أمان عشان تحمي الممثلة و بقيت الناس اللي معاك. لكن القصة بيحصل فيها منعطف تاني و المرادي مش خطير ولا حاجة. لأن بيظهر سبب بيدي أمل للبشرية من تاني و بتبدأ هدفك الاساسي في قصة اللعبة.
القصة شبه أفلام هوليوود الأمريكية جدًا جدًا. و بمجرد ما تلعب أول كام ساعة هيمر قدامك شريط أفلام الزومبي اللي شوفتها كلها و ده أكيد لو انت بتحب النوع ده من الأفلام. لأن القصة بطريقة أخراجها و بشخصياتها بتحاول تحاكي فيلم هوليوودي عن طريق التغيرات في الاحداث و كمان الحوارات.
أحداث اللعبة بتحصل في مدينة لوس أنجلوس مدينة الشهرة. و ده كان الهدف منه انهم يوروك مشاهير هوليوود هيعملو ايه عشان ينجو بحياتهم لما كل الرفاهية اللي حواليهم ديه تتدمر. و من خلال ده هتقدر تلف في لوس انجلوس كأنك موجود فيها في الحقيقة بس في ظروف أسوأ بكتير.
هتقدر تخش حي Beverly Hills اللي بيعيش في معظم مشاهير هوليوود و تشوف القصور اللي عايشين فيها عاملة ازاي من جوا و من برا. كمان في بعض أجزاء القصة هتخش أماكن زي البوليفارد و تعدي من عند البوكس اوفيس و تمشي علي السجادة الحمرا.
اما بقي عن الشخصيات اللي في اللعبة فهم كانو اكتر حاجات ميزت القصة. زي شخصية Emma و اللي بنشوف ازاي كارثة الزومبي رجعتها لشخصيتها الطبيعية الغير مصطنعة. او مايكل مدير اعمالها و هتشوف ازاي حمايتها بقي امر صعب جدًا عليه. ده غير شخصيات كتير هتقابلها كان ليهم دور قوي في ان القصة تطلع حلوة.
عشان كدة قصة Dead Island 2 بالرغم من انها قصة عادية مش مليانة تفاصيل كتير بس هي حلوة من ناحية انها قدرت توصل أجواء هوليوود للاعب بالحوارات اللي كانت ممتازة جدًا و اخراج المشاهد اللي كان ممتع جدًا برضو.
اسلوب اللعب
اما بقي عن الكومبات فلعبة Dead Island 2 هي لعبة قتالية بتقوم علي محاربة الزومبي في مدينة لوس انجلوس بكل اشكالهم. و عندك بدل الطريقة طرق كتير تقدر تعمل بيها ده بس قبل ما نتكلم عن الطرق ديه لازم نتكلم عن اول حاجة هتعملها اول ما تبدأ New Game و هي انك تختار الSlayer اللي هتلعب بيه.
الـ Slayers و اللي بيمثلو بطل اللعبة موجود منهم 6. كل واحد منهم عنده ميزة و شخصية غير التاني. وجود ال6 شخصيات دول مهم و بيفيد فكرة الإعادة و انك تلعب اللعبة اكتر من مرة بكذا شخصية مختلفة.
بالنسبة لخريطة اللعبة فهي فمدينة لوس انجلوس متقسمة لمناطق. كل منطقة عشان توصلها قدامك طريقتين, يا اما عن طريق البوابات اللي بتنقلك للمنطقة اللي جمبك علطول, أو عن طريق السفر السريع و ده بيبقي من خلال نقاط السفر السريع اللي متوزعا في خريطة اللعبة.
الجزء الأول من Dead Island كان في امكانية انك تسوق عربية و تتنقل بيها. لكن ده مش موجود في الجزء ده انا شايفه ميزة مش عيب. لأن من مزايا اللعبة هي بعض لحظات الرعب و اللي بتحس بيها خصوصًا بليل. و وجود عربيات في لعبة زي ديه غير انه هيحتاج عالم كبير و هيأثر علي التجربة فهو هيلغي عامل الخوف و متعة النجاة في وسط حشود الزومبي اللي في كل مكان.
بما انك هتتنقل علي رجلك معظم الوقت فكان لازم شوية حركات زيادة و شوية باركور بسيط. و ده كان موجود بشكل كويس جدًا زي الجري و الزحلقة و التسلق و اللي ساعد جدًا في المعارك.
عالم اللعبة قدر يمنع الملل تمامًا. فمعظم الوقت هتبقي يا إما في مهمة اساسية يا اما في مهمة جانبية. المهمات الاساسية كانت مميزة جدًا و مفيهاش تكرار. يعني مرة هتلاقي نفسك في بيت واحد من المشاهير بتدور علي حاجة معينة. و مرة هتلاقي نفسك في مجاري المدينة بتدور علي مخرج.
تصميم المهمات ديه منقدرش نقول عليه عبقري ولا حاجة لكنه نجح في مهمته و هي انه يخليك دايمًا مشدود و مركز. اما بقي المهمات الجانبية ففي عليها شوية كلام. في بعض المهمات هتلاقي نفسك بتنقذ واحد من مشاهير هوليوود عشان تضمه لمجموعتك. النوع ده من المهمات كان عظيم جدًا و بيوصلك اكتر فكرة اللعبة اننا في فيلم هوليوودي زي ما قولتلك.
النوع التاني من المهمات و هي مهمات الانقاذ او انك تروح تجيب حاجة لحد معين من مكان مليان زومبي. و ديه مكانتش فيها شيء مميز غير بعض الالغاز البسيطة و كانت متعتها الوحيدة هي الاستكشاف لأنها هتدلك اماكن جديدة.
اللعب الجماعي
اللعب الجماعي كان من المفروض انه هيبقي مكون من 8 لاعبين بينطلقو في عالم اللعبة. لكن للأسف بعد اطلاق اللعبة اتفاجئنا انهم 3 بس. يعني تقدر تلعب انت و 2 من صحابك. و ده شيء غريب خصوصًا ان اللعبة فيها 6 شخصيات بحالهم. بس يمكن لانها مش لعبة عالم مفتوح زي Dying Light مثلًا فمفيش مساحة للعدد ده من اللاعبين.
عشان كدة 3 عدد كويس جدًا هيبقي في نشاطات متنوعة تقدرو تعملوها ما بين بعض المهمات و التحديات بينكو و بين بعض و شوية تقطيع في الزومبي.
الكومبات
عشان تحارب الزومبي انت محتاج اسلحة, الأسلحة في Dead island 2 بتنقسم لنوعين. النوع الاول و هي الأسلحة اليدوية و اللي هي عبارة عن سيوف و سكاكين و سواطير و أسلحة من نوع ده. و في كمان أسلحة عشوائية بتلاقيها في عالم اللعبة زي المواسير أو عصاية البلياردو مثلًا.
الاسلحة ديه بعضها بتلاقيها في عالم اللعبة سواء في صناديق او اللي بيوقعهم الزومبي المميز اللي هنتكلم عنه بعد شوية. أو كمان تقدر تشتريها من التاجر اللي بيبقي موجود في مكان محدد علي الخريطة.
المميز في الأسلحة اليدوية مش بس التنوع الكبير اللي موجود فيها و مع تقدمك في اللعبة اكتر هتقابل اسلحة جديدة. المميز اكتر هو تأثير الأسلحة ديه علي الزومبي زي ان ضربتك في اي مكان في جسم الزومبي هتسيب أثر واضع. و لو ضربت الزومبي في نفس المكان تاني هتلاقي ان جرحه بيزداد عمق لحد ما تقطعه تمامًا.
و مع كل سلاح بيظهر تأثير مختلف, يعني الجرح اللي بتسببه السكينة اصغر كتير من الجرح اللي بيسببه سيف الكاتانا مثلًا. و كمان في سواطير و اللي برضو ليها تأثيرتها المختلفة. كمان الأسلحة الغير حادة زي الهامر او عصاية البيسيبول و دول ضربتهم بتكسر جسم الزومبي و بتشوف تأثير ده قدامك واضح علي جسم الزومبي.
النوع التاني من الأسلحة و اللي هتتفتحلك في وقت متأخر شوية من اللعبة هي الاسلحة النارية. و اللي في منها تنوع مش وحش برضو زي المسدسات و البنادق و حتي مسدس المسامير. الأسلحة ديه لما تتفتحلك هتغيرلك اسلوب لعبك تمامًا لإنها بتساعدك جدًا في انك تسيب مسافة بينك و بين الزومبي و متسمحلوش يضربك كتير. و هتساعدك كتير قصاد الزعماء و هتسهل عليك اللعبة أكتر. لاني نسيت اقولك ان اللعبة ديه مش سهلة خالص.
كمان في نظام المهارات اللي بيبقي عبارة عن كروت بعضها هتلاقيها في عالم اللعبة و بعضها بتتفتحلك مع كل لفل بتتقدمه. و ديه كانت حل حلو لمواقف معينة لما يتلم عليك الزومبي مثلًا. زي انك تضرب ضربة في الارض تطيرهم كلهم.
و امتع حاجة في الطرق اللي تقدر تقتل بيها الزومبي هي العالم اللي حواليك. زي انك تفجر فيهم انبوبة غاز او تولع جركن بنزين و ترميه عليهم. او انك تعمل اكتر حاجة ممتعة في اللعبة انك توقعهم في حمام سباحة و ترمي فيه بطارية عشان تكرهربهم كلهم. و ديه كانت حاجة مفيدة جدًا خصوصًا قصاد الاعداد الكبيرة من الزومبي.
تنوع الزومبي ادي للعبة صعوبة و كمان ساعد علي التنوع. زي ان في زومبي سريع و زومبي عادي و في الزومبي المميزين زي اللي بيصرخ و يلم عليك الزومبي و زي الزومبي الضخم اللي بتقعد تضرب فيه طول عمرك عشان تموته.
ده خلي طريقتك اللي هتستخدمها عشان تموت الزومبي بتتغير كل شوية. مرات هتلاقي نفسك بتستخدم الاسلحة عشان تكهرب الزومبي الضخم لحد ما تشل حركته و تهجم عليه. او انك تضرب الزومبي السريع طلقة عشان سرعته تقل و تقدر تضربه براحتك.
ده غير الحاجات اللي بتقدر ترميها زي القنابل. فانت من الأخر تقدر تعمل الكومبو اللي انت عايزه بالاسلحة اللي انت عايزها. انا عن نفسي كنت برمي قنبلة بتجذبهم ناحية أي ماية حوليا و بضرب طلقة من المسدس الصاعق اللي معايا في الماية عشان اكهربهم كلهم و اقعد اتفرج عليهم من بعيد, احساس رهيب.
الجرافيك
عشان اللعبة تعيشك في أجواء و مناظر لوس انجلوس الجميلة, مكانش ينفع كل ده ميبقاش متصمم بشكل بالجودة العظيمة اللي شوفناها. و ده ظهر من أول تصميم الشوارع اللي كانت مليانة تفاصيل و كل حتة فيها واخدة حقها. كمان هتشوف ده في تصميم الشخصيات و تفاصيل الوجوه و ازاي من كتر التفاصيل هتحس انك بتتفرج علي فيلم.
كمان من اجمد الحاجات اللي ظهر فيها قوة الجرافيك هي الزومبي. انا عارف انك هتستغرب بس سيبني اقولك ليه. الزومبي في اللعبة متنوع ده غير انك هتعدي علي مناطق مختلفة زي الشاطئ او منطقة الجيش أو مستشفي ميدانية اللي بتبقي عبارة عن خيم. و عشان الواقعية هتلاقي ان كل منطقة ليها زومبي مختلف بملابس ملائمة للمنطقة اللي انت فيها و كمان جسمهم بيختلف.
الأداء التقني
متطلبات لعبة Dead Island 2 متوسطة و معظم الأجهزة المتوسطة هتقدر تشغلها على اعدادات قليلة بدون مشاكل. و بعض الاجهزة المتوسطة ممكن ترفع من الاعدادات من غير ما تقابلها تقطيع.
لكن مهم جدًا انك تحاول تفهم اعدادات الجرافيك و اللي للأسف مكانتش فيها أي تفاصيل تساعدك عشان تفهمها. لان بعض الاعدادات ممكن تخسرك فريمات كتير من غير داعي. فنصيحة مني حاول تجرب لحد ما توصل لأحسن صورة تناسبك و في نفس الوقت أداء مرُضي.
مفيش التعريب
مع الأسف لعبة Dead Island 2 مش متعربة. و ده مش موجود ولا في قوائم اللعبة ولا في ترجمة حوارات الشخصيات. و ده شيء مؤسف لأننا شوفنا ألعاب كتير جدًا كبيرة و ضخمة كانت فيها ترجمة و بعض الألعاب كان فيها دبلجة كمان زي لعبة Days Gone. لكن Dead Island مشافتش ده شيء مهم. رغم انه كان هيضيف كتير للقصة بالنسبة لينا و هيخلينا نفهمها اكتر و نندمج مع الاحداث.
التقييم النهائي
9\10
