مراجعة

Crash Team Rumble

سلسلة كراش بتعيش أيام عظيمة في السنين الأخيرة، فـ بعد صمت طويل من Activision بخصوص واحدة من أكتر السلاسل الناجحة عندهم، اتعمل ريميك للثلاثية الأولى من السلسلة في 2018 وبعدها ريميك للعبة السباق Crash Team Racing وبعدين.. اممم.. ريميك كمان للجزء الرابع It’s About Time؟.. بعد نافورة الـ Remakes دي كنا مستنيين لعبة جديدة بقى في عالم كراش، وهنا أقصد لعبة بفكرة جديدة ومحتوى جديد بدل ما نقعد نعمل ريميك للأجزاء القديمة.. عشان كدة لما عرفنا إن الجزء الجديد هيكون لعبة جديدة ومش ريميك، انبسطت، لكني كنت قلقان بردو، فـ سلسلة كراش ليها مكانة خاصة عندي من أيام بلايستيشن 1 لحد ما اتعلن إن الجزء الجديد هيبقى لعبة أونلاين مالتي بلاير!!

ودي حاجة كافية تخليك تقلق ومتنامش من كتر التفكير..إن سلسلة كراش تتحول لـ … لعبة خدمية.. وخصوصًا إنها تحت إيد Activision.. بس خليني اقولك إن بعد ما لعبت اللعبة في الأيام اللي فاتت، مخاوف كتير عندي اتغيرت.. بس للأسف ظهرت مخاوف تانية

خلينا نخش في المراجعة

Crash Team Rumble هي لعبة أونلاين تنافسية PvP بيلعب فيها فريقين 4 ضد 4 والهدف هو تجميع 2000 من فاكهة الوامبا وتحطها في المكان بتاع فريقك..

اللعبة تصنيفها غريب شوية، يعني ولا هي لعبة موبا بعناصر الموبا المعروفة، لأن ناقصها عناصر RPG وطريقة التحكم في الشخصيات، وحتى منظور الكاميرا مش منظور أفقي بالكامل، وبردو اللعبة مش Platformer أوي فـتقدر تقول إنها ميكس بين الاتنين وحاطة نفسها في تصنيف خاص بيها، بس الأكيد إنها فيها كتير من عناصر الـ Platformer بتاعت ألعاب كراش

الجيمبلاي

زي ما قلتلك الفكرة الأساسية للماتشات تجميع 2000 من فاكهة الوامبا وتحطها في مخزن فريقك بس الموضوع مش بالبساطة دي، لأن فيه عناصر تانية في الخريطة بتأثر على سير الماتش بشكل كبير.. زي الـ Boost اللي بيزود عدد الفاكهة  اللي زمايلك يقدروا يشيلوها وحاجات تانية بنفس الأفكار دي..

بالنسبة للجيمبلاي نفسه فـ أقدر أقول إن DNA ألعاب كراش موجود وبقوة، اللعبة فعلًا ممتعة والجري والتنطيط في الخريطة ليهم إحساس حلو جدًا، وحركة الشخصيات سلسة والأنميشنز متجاوبة من غير تأخير أو تُقل من أي نوع

كل ده كلام جميل بس استنا معايا شوية كمان عشان هنرجع للنقطة دي تاني..

التصنيفات Classes

كراش تيم رامبل بتقدم 3 أنواع من الشخصيات

الهداف Scorer

وده دوره تجميع أكبر عدد من فاكهة الوامبا وتسجيلها في مستودع الفريق

المحفز Booster

ودوره تجميع الـ Boost الموجودة في الخريطة عشان يساعد فريقه في إنهم يتحركوا أسرع أو يجمعوا فاكهة أكتر.. وهكذا

المانع Blocker

ده بقى الكبير، دوره يقف عند المستودع ويسد الطريق على الـ Scorer ويمنعه إنه يسجل.. طبعًا بيكون حجمه كبير وقوته أعلى بحيث يكون صعب هزيمته

يعني كل تصنيف ليه قدرات خاصة بيه عشان يحقق الهدف بتاعه، وبما إنها لعبة قايمة على اللعب الجماعي وتعاون الفريق، لازم كل واحد يعرف دوره إيه ويطبقه عشان تاخد أحسن تجربة.

 بس مشكلتي مع التصنيفات هي مشكلة في الجانب التنافسي شوية، مشكلة موازنة لقدرات الشخصيات والتصنيفات، لأن فيه شخصيات أضعف من اللازم وحرفيًا وجودها زي قلتها مع وجود شخصيات تانية تقدر تعوضها وتخليها ملهاش لزمة.

مثلًا فيه شخصيات من الـ Booster بتتحرك أسرع وتجري أكتر في الخريطة أكتر من الـ Scorer نفسه بمعنى تاني تقدر تستخدم شخصية Booster كأنها  Scorer ومش هتحس بأي فرق، فمشكلة زي دي محتاجة حل لو اللعبة عايزة تكمل وتبني قاعدة كبيرة من اللاعبين لأن موازنة القدرات والشخصيات في أي لعبة أونلاين تنافسية هو أولوية مهمة لأي لعبة عايزة تكمل.

المحتوى

محتوى اللعبة من أهم النقاط اللي محتاجين نتكلم عنها في كراش تيم رامبل

اللعبة نازلة بـ 9 خرايط و 10 شخصيات موزعين بين الـ 3 تصنيفات، بالنسبة للخرايط هو عدد كويس جدًا بالنسبة للعبة لسة نازلة، اما عدد الشخصيات، مع وجود 3 أو 4 شخصيات في كل تصنيف، كان المفروض يكون أكتر من كدة وده ليه؟ لأن محتوى اللعبة الفعلي من مودات ومحتوى إضافي محتوى فقير جدًا، اللعبة مبتقدمش أي مودات تانية غير المود الأساسي واللي هو ممتع بالمناسبة زي ما قلتلك من شوية

لكن المشكلة.. اللعنة اللي بتطارد أي لعبة خدمية..

هي التكرارية، بعد 8 أو 10 ساعات من اللعب بدأت أحس إني زهقت من اللعبة برغم إنها ممتعة، وده طبيعي لما لعبة أونلاين تنزل لازم تكون مجهزة بأكتر من مود ومحتوى يخليك متزهقش بسهولة لأن نقطة البداية للنوع ده من الألعاب دايمًا مهمة جدًا.

بـ 30 دولار؟!

كراش تيم رامبل هي من نوعية الألعاب اللي لما تبصلها هتفتكر إنها لعبة أونلاين مجانية جديدة، لكن للأسف لا اللعبة نازلة بـ 30 دولار، على الرغم من فقر المحتوى اللي اتكلمنا فيه.

فـتقدر تقول إن بالسعر ده، اللعبة فعليًا نازلة ناقصة وكانت محتاجة وقت أطول في التطوير..

الاستوديو بيقول إن هيكون فيه محتوى مجاني طوال فترة دعم اللعبة بين شخصيات جديدة وخرايط وباتل باس ومودات مؤقتة، لكن كل ده هيبدأ من الشهر الجاي لسة طبعًا دي نقطة تُحسب للاستوديو إن المحتوى الجاي كله هيكون مجاني، لكن المحتوى وقت الإطلاق مهم جدًا زي ما قولت، خصوصًا لما تكون لعبتك بـ 30 دولار.

يعني لو سألتني أنا شايف إنه كان أفضل كتير لو اللعبة نزلت مجانية، والمحتوى الإضافي من باتل باس وغيره يكونوا بفلوس عادي زي أغلب الألعاب الأونلاين حاليًا، لأن بردو خد بالك دي لعبة أونلاين فقط يعني وارد جدًا في وقت من الأوقات الناس تبطل تلعبها والسيرفرات تكون فاضية، وساعتها هتكون ضيعت 30 دولار في الهوا..

وحاجة كمان ممكن متكونش مهمة أوي لناس كتيرة بس القوايم وواجهة المستخدم بتوع اللعبة وحشين أوي يا جماعة

مش لعبة بـ 30 دولار خالص!!

 كالعادة.. أجندات وحاجات

للأسف فقرة أجندات وحاجات بقينا نستخدمها في أكتر من مراجعة الفترة الأخيرة، واللي آخرها كانت فاينل فانتاسي 16، والمرة دي الدور على كراش تيم رامبل..

اللعبة بتدعم الجماعة إياهم بشكل صريح مع وجود شخصية Non binary يعني شخصية ملهاش نوع، شخصية مبتعترفش إنها ذكر أو أنثى مش عارف دا روبوت يعني ولا ايه؟

واللي بردو زي ما بقول كل مرة، دا فيه إهانة وعدم اهتمام واضح لمجتمعنا العربي، وكأن الاستوديو بيقول احنا مش شايفنكوا واخبطوا دماغكوا في الحيط عكس ألعاب تانية بتحجب المحتوى ده أو بتغيره خالص في نسخة الشرق الأوسط من اللعبة..

 كل ده بياخدنا للتقييم النهائي للعبة

6.5 من 10