مراجعة Civilization 7: نقلة جديدة في عالم الألعاب الاستراتيجية 🎮

مقدمة: الانتظار الطويل يستحق التجربة 🕰️

أخيراً، لعبت Civilization 7، واحدة من الألعاب القليلة التي كنت أتطلع إليها بفارغ الصبر منذ إعلانها العام الماضي. كعاشق للسلسلة، قضيت ساعات لا تحصى في الجزء الخامس، بينما الجزء السادس كان تجربة خفيفة. لذلك، كنت متحمساً جداً لرؤية التغييرات التي يقدمها الجزء السابع، والتي سنتحدث عنها بالتفصيل في هذه المراجعة. سنحاول أيضاً شرح جوانب كثيرة في اللعبة بشكل مبسط لأولئك الذين يجربون السلسلة لأول مرة.

أسلوب اللعب: بين الفردي والجماعي 🎲

اللعبة، مثل أي لعبة استراتيجية، لا تحتوي على طور قصة. بدلاً من ذلك، هناك طوران رئيسيان: اللعب الفردي ضد الذكاء الاصطناعي، واللعب الجماعي عبر الإنترنت. قضيت معظم وقتي في طور اللعب الفردي، حيث تبدأ اللعبة باختيار الزعيم الذي ستلعب به. كل زعيم يتمتع بميزات وقدرات خاصة تعطيه أفضلية في جوانب معينة من اللعبة.

العصور: من القديم إلى الحديث 🏛️

اللعبة بتبدأ فيها من العصر القديم Antiquity Age و بعد كده عصور الاستكشاف Exploration Age والعصور الحديثة  Modern Age أخر حاجة والجديد في الجزء ده واللي محبتوش بالمناسبة انك لما بتنتقل من عصر للتاني بتحتفظ بالمدن الخاصة بيك ولكن بتخسر في المقابل كذا حاجة زي المباني اللي بتقعد تبني فيها طوال العصر وبيفضل بس المباني الـ Ageless دي بتبقى مستمرة معاك من عصر للتاني ، وكمان بتخسر معظم جنودك و اللي شكلهم بيتغير تلقائي أول ما تنتقل للعصر الجديد.  وكل عصر بيكون في سمة مميزة منفردة بتخلي الجيم بلاي فيه مختلف عن العصر اللي قبله او اللي بعده ، ومش بتكلم عن المباني الجديدة و اختلاف الجنود والاسلحة اللي بتتغير في كل عصر ، ولكن هنا بقصد أشياء بتختص بيها العصور لنفسها ومش بتلاقيها في العصور التانية زي مثلا في العصر البدائي اللي بتركز فيه على توسيع نفوذ حضارتك وحدودك وتبدأ تستشكف اماكن جديدة لبناء مدن جديدة عليها من خلال انك تنشئ أفراد الـsettlers اللي بتقدر بيهم تنشئ مدينة جديدة مجاورة للمدينة الرئيسية الخاصة بيك ، وكمان تقدر تنشئ الكشافين أو الـ scouts واللي دورهم بيكون مهم جداً في بداية اللعبة بالعصر القديم لانهم من خلال حركتهم السريعة على الماب بتقدر تتعرف وتحدد أماكن خصومك الحضارات التانية عشان تقدر تكون معاهم علاقات.

الدين والاستكشاف: أدوات جديدة للتفوق 🌍

وفي عصر الاستكشاف بتبدأ تكتشف دين الدولة واللي بتقدر تحدده من عدة ديانات بتختار منهم وكمان بيكون فيه زي الرهبان أو المبشرين  بتقدر تنشئهم في أي مدينة تابعة ليك وتبعتهم للمدن التانية لتغيير ديانتهم للديانة اللي حددتها لشعبك وبتقدر تتفوق بالطريقة دي على الحضارات التانية اللي بتلعب معاك في الخريطة بدون ما تلجئ للحرب معاهم. وعندك برده في نفس ذات العصر إمكانية استشكاف المحيط وده لان بقى بإمكانك في العصر ده الابحار وانشاء السفن والموانئ ، فالمحيط يعتبر جزء كبير جدا من الخريطة واللي هتظل مقفولة في العصر القديم لان مكنش لسه حد وصل لإستكشاف السفن وعبور المحيط.

العصر الحديث: التكنولوجيا والسياسة 🚀

في العصر الحديث، يتميز أنك تقدر تنشئ فيه أفراد المستشكفين Explores وهم عبارة عن أفراد مش جنود مهمتهم البحث والتنقيب عن الاثار الخاصة بالحضارات القديمة عن طريق انهم يحفروا ويبحثوا عن القطع دي واللي بتبدأ تظهر في العصر ده بس وتنتشر في أرجاء الخريطة ، وكمان في العصر ده بتبدأ تحدد الإيديولوجية  الخاصة بحضارتك عن طريق انك تختار بين أنظمة  الديمقراطية، أو الفاشية، أو الشيوعية  ، وكل نظام بيكون له شجرة تقدم لتطويرها منفصلة عن التاني ومينفعش تختار إلا نظام واحد هتكمل بيه لنهاية اللعبة. والعصر ده برده في ميزة مهمة جدا وهي السكك الحديد أو الـ rail roads  وهي عبارة عن شبكة طرق بتنشئها في كل مدينة ليك وفايدتها انها بتسهل لجنودك انهم ينتقلوا من مدينة للتانية في نفس اللحظة بدون ما تستنى لعدد أدوار معين ، ولو انت جديد هنا على السلسلة وملعبتش ألعاب Civilization قبل كده فانت اكيد مش عارف يعني ايه عدد أدوار فخليني اشرحلك جيم بلاي اللعبة بشكل مختصر يسهل فهمه.

أساسيات اللعبة: النقود، التأثير، السعادة، الثقافة، العلوم، والإنتاج 💰

الجيم بلاي في سلسلة Civilization هو عبارة عن دور أو turns  ، كل دور بتقدر تنفذ فيه عدد من الأوامر اللي بتطلبها منك اللعبة او اي شئ انت عايز تنفذه فيها سواء بناء مبنى او شن حرب او عايز تبقى حليف مع خصم ليك في اللعبة فتقدر تنفذ اكتر من امر في نفس الدور أو الـ turn  ولكن مش شرط يخلص في نفس الدور ، فمثلاً انت عايز تبنى مبنى جديد وليكن الاهرامات فهتحتاج مثلاً لحوالي 20 turns عشان تنتهي من بنائها، طب لو انت عايز تقلل عدد الـ turns شوية اللي بتحتاجهم في البناء فانا هنا محتاج اشرحلك شوية اساسايات في الجيم بلاي.

الجيم بلاي في civ 7 بيعتمد على 6 اساسيات منهم 5 ظاهرين على الشاشة أعلى شئ ناحية اليسار زي ما واضح في الصور  وهما

1- النقود: واللي بتقدر تشتري بيهم جنود وتنشئ مباني على الفور في نفس الدور أو الـ turn بدون الحاجة لانتظار وقت انتهائهم لو هتنشئهم بالشكل العادي دون نقود (الخيارين  متاحين فقط لو عندك مدينة city  اما لو بلدة town فانت مش هيبقى ظاهر ليك غير خيار شراء المباني والجنود بالنقود فقط ) وكمان من ميزة النقود انك تقدر تحول البلدة الصغيرة إلى مدينة كبيرة واللي بتاخد منك حوالي 1000 من عملة اللعبة.

2-التأثير: واللي بيها بتقدر تمارس بيها الدبلوماسية والسياسة مع خصومك الـذكاء الاصطناعي في اللعبة فتقدر بعدد معين تختار عدة اختيارات للتعامل مع خصومك زي فتح طريق تجارة معاهم او تحالف لغرض معين زي فتح اسواق الحضارتين على بعض واللي معاه بتزود عدد النقود اللي بتدخلك طول ما التحالف مستمر(بيستمر ل10 ادوار فقط ولازم تجدده من تاني) او انك تتجسس على خصومك وتسرق منهم ما وصولوا إليه من اختراعات فتقدر تاخدها منهم على الجاهز بدل من أنك تبدأ في البحث والتطوير وطبعاً في إمكانية واحتمال كبير ان الخصم ياخد باله من محاولة الاستيلاء دي ولكن للاسف اللعبة مش بتعاقبك بالشكل الكافي لما ده يحصل ، وبتتكتفي بس بإن العلاقة ما بين الحضارتين تتدهور وتقل بعض نقاط العلاقة ما بينهم لعدد  معين من الأدوار القادمة وبعد كده تبدأ تتحسن تلقائي من تاني ولا كأن حصل حاجة!

3-السعاده: وهي السعادة الخاصة بالافراد والمواطنين وبتستفيد بيها من ان كل مبنى بتبنيه في الغالب بيستغل عدد معين من سعادة الأفراد عندك و في بعض الاوقات بيستغل عدد معين من السعادة والنقود مع بعض ، فعشان كده بتحتاج انك دايماً تزود عدد السعادة للأفراد عندك عشان تقدر تتقدم في اللعبة أكتر وعشان لو السعادة قلت بالسالب هيثور أفراد المدينة عليك وفي بعض الأوقات ممكن تلاقي المدينة انفصلت عن حضارتك وبقت مستقلة بذاتها تحكم نفسها او ممكن تنضم لامبراطورية تتبع حضارة تانية من خصوم الذكاء الاصطناعي.

الأساسية الرابعة والخامسة: حابب اتكلم عليهم مع بعض وهم أهم أساسيتين باللعبة والركيزة الاساسية اللي بتحركها وهما الثقافة والعلوم ، فمع بداية كل عصر بتكون في شجرة تطوير منفصلة واحدة للثقافة وواحدة للعلوم ، وزي ما واضح في الصورة أدناه انك بتختار الشئ اللي حابب تركز عليه في حضارتك بالعصر ده لان في الغالب مش هتقدر تفتح كل التطويرات في عصر واحد سواء في الثقافة او العلوم وده لان كل تطوير بياخد عدد أدوار معين عشان ينتهي ، عشان كده لازم تهتم بزيادة معدل الثقافة والتكنولوجيا او العلوم في حضارتك لان كل ما زادوا كل ما كانت التطويرات بتاخد وقت اقل عشان تنتهي منها وبالتالي تقدر تطور الشئ المتقدم اللي بعده وهكذا.

6-الانتاج: اللي كل ما زاد عدده قل وقت الـ turns اللي هتحتاجها عشان تنتهئ من بناء المباني اللي عايزها في مدنك والمباني دي مهمتها في انها بتزود من الاساسيات اللي ذكرتها فوق سواء  النقود او التكنولوجيا او الثقافة ، فالجيم بلاي كله حلقة واحدة بتكمل بعض محتاج تركيز اللاعب فيه عشان تقدر تستمتع فيه وصدقني لما تستمتع هتدمن الجيم بلاي بسهولة وهتقول بعدها الجملة الشهيرة one more turn!

الفوز في اللعبة: مسارات الإرث 🏆

بعد ما اتكلمنا عن اساسيات اللعبة ، فايه الهدف من اللعبة او ازاي تفوز فيها ، أولاً لازم تعرف الجيم بلاي في الخريطة الواحدة بياخد ساعات طويلة واوقات أيام على حسب طريقة لعبك وتخطيطك فعشان تقدر تفوز بالجيم محتاج تكون المركز الاول على خصومك من ناحية الـ Legacy “مسارات الإرث” والمسارات دي عبارة عن 4 أنواع وهم الإنجازات العسكرية (باللون الأحمر) والاقتصادية (باللون الأصفر) والعلمية (باللون السماوي) والثقافية (باللون الأرجواني) زي ما هو واضح في الصورة أدناه ، وكل انجاز من الأربعة له أهداف مختلفة في كل عصر ، واللعبة مش بتعاقبك نهائياً على تغيير الانجاز اللي حابب تخلص فيه ، فممكن في اي وقت تحول وتغير طريقة لعبك. ولكن عشان تكون  الفائز بالجيم لازم تتفوق على خصومك الذكاء الاصطناعي في أنك تحقق إجمالي نقاط إرث أكتر منهم في نهاية العصر الحديث في الأربع مجالات اللي ذكرتهم وده عن طريق انك تكمل أكبر عدد ممكن من الأهداف في أكبر عدد ممكن من الفئات دي ولما بتقدر تخلص الأهداف دي بتاخد زيادة محترمة و Boost قوي للوقت اللي هتحتاجه عشان تفتح العصر التالي بالإضافة إلى إن اللعبة بتديك نقط تطوير لشخصيتك تقدر تطور بيها جانب معين منها سواء حابب تطوره من ناحية الاقتصاد او العلوم او الحروب وهكذا بعد إكمالك للأهداف اللي بتكون على شكل مهام،  كمان اللعبة بتاخد بإيدك وبتديك إرشادات عشان تقدر تحقق الأهداف دي واللي بتقودك في الأخر زي ما وضحت إلى الفوز فيها.

المعارك: التخطيط والاستراتيجية ⚔️

المعارك في اللعبة بصراحة هي الجانب المفضل لدى طوال مدة لعبي وذلك لأن كل حضارة ولها جنودها الخاصة بها ، في العصر البدائي بتكون كل الجنود متشابهة القوة والعتاد ولكن مع دخول العصور الوسطى والحديثة تبدأ تتشكل ملامح القوات الخاصة بكل حضارة ، كمان بتقدر توصل لتطويرات لاحقة بتخليك تقدر تعمل ترقية للجنود لجنود بمستوى أعلى ، والحضارة الحديثة هي الامتع في نظري من ناحية الحروب والمعارك وده لان بتقدر تدخل في اكثر من نوع معركة سواء من خلال جنود مشاه و دبابات وأسلحة ثقيلة او في المحيط بالسفن واللى بتقدر تطورها في وقت لاحق لسفن حربية عملاقة او عن طريق تطوير الطائرات وتقاتل خصومك وتباغت مدنهم بشكل جوي وبتبقى لحظة مميزة خصوصا لو انت أول واحد في الجيم توصل لاختراع الطائرات الحربية فبتستغل الميزة دي لصالحك وتقدر تاخد مدن جديدة لصالحك بعد ما تحطهم دفاعها بكل سهولة وده لان الخصم لسه معرفش يتوصل لهجوم مضاد للطائرات اللي عندك. ولكن لازم تخلي بالك انك متتخطاش عدد المدن اللي عندك في حضارتك لان لو تخطيت العدد المتاح عندك سعادة الافراد بتتأثر وتبدأ تقل لحد ما توصل للسالب. نقطة اخيرة حابب اتكلم عليها في المعارك وهي ان كل مجموعة من الجنود او وحدة قتالية زي المدفع والدبابة بتنشئها فهي بتاخد حيز مربع كامل اي مدينة كاملة ، فالافضل انك تنشئ الاول قائد سواء لكتيبة او أسطول يضم تحتيه مجموعة من السفن يتحركوا كمجموعة واحدة وفي نفس الوقت يشغلوا مربع واحد وأول ما تواجه الخصم تبدأ تفكك الجيش لمجموعات على اكثر من مربع وبعدها تقدر توجه ضربات لخصمك من كل الجنود المتواجدين حوليه طالما معاك قائد للكتيبة هو اللي بيصدر أوامر الضربات ، فعشان كده محتاج توظف وتدير الجنود بشكل صحيح عشان تقدر تتفوق على خصمك في المعركة ، كمان تقدر تطور مهارات الجنود عن طريق قائد الجيش والي بيكسب قدرات جديدة كل ما تهزم خصوم جدد. والقدرات بتتنوع ما بين قدرات دفاعية وهجومية وقدرات تانية بتزود سرعة الجنود اللي بيتحكم فيهم على الخريطة او قدرات تقلل ثمن نقود انشائهم وصيانتهم.

الشعوب الحرة: الدبلوماسية أو الحرب 🕊️

أخر حاجة في الجيم بلاي هتكلم عليها وهي الشعوب الحرة واللي حلوا محل البرابرة في الأجزاء السابقة، وعندك طريقتين لما تصادف أماكنهم على الخريطة إما إنك تحاربهم وتبيدهم بشكل نهائي أو تستعمل الدبلوماسية  معاهم من خلال استخدام نقاط التأثير أو الـ influenceعشان تبدأ  تكون صداقات وتحالفات معاهم وممكن كمان لما العلاقة ما بينكم تزدهر تقدر تدمجهم في حضارتك تحت قيادتك.

الذكاء الاصطناعي: بين الإيجابيات والسلبيات 🤖

نقطة أخيرة ومهمة جداً حابب اتكلم عنها في ريفيو اللعبة وهي جزئية الذكاء الاصطناعي ، واللي يعتبر في رأيي العامود اللي بيشيل الألعاب الاستراتيجة على أكتافه ويخليها تعيش لسنين قدام ، هنا في Civilization 7 نقدر نقول انه كان كويس بالمعنى العادي مش الوحش اللي تذكر له عيوب أو الثوري زي ما كنت متوقع انه هيكون طفرة شوية عن الأجزاء السابقة ، ولكنه عادي وفي أوقات كمان أقل من العادي ، يعني شئ كويس ان مثلاً ان تكون داخل في تحالف مع واحد من القادة اللي بيتحكم بيهم الذكاء الاصطناعي ولو أعلنت الحرب على خصم تاني ، هنا تلقائي الذكاء الاصطناعي الحليف ليك بيبدأ يهاجم تلقائي مستوطنات ومدن الخصم اللي أعلنت عليه الحرب وكمان بتوصل أنه يحتل مدنه ويخدها لنفسه فده شئ كويس انه بيتصرف بنفسه الذكاء الاصطناعي بتدون تدخل منك ، ولكن في بعض الاوقات تحسه غبي او معطوب زي انك لما تقرر او الخصم يقرر انه يدخل في معاهدة سلام معاك فيعرض عليك السلام بدون مقابل او يتنازل ليك عن مدينة من المدن التابعة ليه ، هنا انت ممكن تطمع وتختار مدينة زيادة في الصفقة ، الغريب هنا انك لو اخترت مدينة كبيرة بجانب المدينة اللي هو عارضها عليك بيوافق وفي المقابل لو اخدت جزيرة صغيرة مكانها بيرفض مع ان المفروض العكس ، فاعتقد مشاكل الـ AI هتتحل في الباتشات بالتحديثات اللي هتنزل الفترة الجاية للعبة.

التقييم النهائي

7.5/10

إيجابيات اللعبة 🌟

+ لو كنت لاعب جديد هتلاقي اللعبة سهلة نسبياً وده لانهم بسطوا أنظمة اللعبة بشكل كبير عن السابق رغم ان مفيش تعليمات كافية تاخد بايدك تعرفك على كل حاجة باللعبة ولكن سهل الموضوع يتصلح بأبديت جديد.
+ الرسومات واقعية وتوجه مختلف وأفضل في رأيي  عن الجزء السادس اللي كان مصحوب بتوجه كارتوني للعالم والشخصيات ، شكل التضاريس والجنود والمباني على الخريطة حلو جدا ومليان تفاصيل غنية بالألوان.
+ الجيم بلاي سلس وإدماني كما هي العادة مع السلسلة.
+ اجواء الحروب ونظام المعارك متعوب عليها ومعمولة كويس في الجزء ده.
+ طور الاونلاين ممتع جدا وبيخلق عدد ساعات لعب كتيرة لو زهقت شوية من اللعب لوحدك مع الذكاء الاصطناعي في الطور الفردي.
+ موسيقى تصويرية مميزة كعادة ألعاب السلسلة  مليانة بالتأثيرات والألحان الممزوجة من مختلف الثقافات زي العربية والأوروبية والشرق أسيوية.

سلبيات اللعبة ⚠️

– معجبتنيش فكرة انك تختار حضارة جديدة مع نهاية كل عصر ، كنت افضل إني ألعب بنفس الحضارة كما هي دون تغيير من العصر القديم وحتى العصر الحديث زي الاجزاء القديمة  ، فمش معقول إنك تلعب بالحضارة المصرية القديمة ثم العصر العباسي ثم الثورة الفرنسية بنفس المدن ونفس القائد! فعلى عكس الاجزاء القديمة القائد اللي بتتحكم بيه مبقاش مرتبط بالمكان الخاص بيه.

– الظواهر أو الكوارث الطبيعية كانت من أبرز الميزات اللي روجتها اللعبة في عروضها الدعائية وكنت متوقع انها هتغير الجيم بلاي بشكل كبير ، حرفيا ولا ليها اي تاثير وسهل انك تصلح المباني اللي افسدتها الظواهر عن طريق بعض النقود وصراحة تكرارها مع الوقت أصبح ممل وعائق أمام اللاعب لا أكثر ولا أقل.

– واجهة اللعب والقوائم ناقصة شوية اختصارات بتسهل التجربة  زي الاجزاء السابقة وكمان  في معلومات وشروحات كتير مش موجودة او موجزة بشكل مختصر جدا.

– نظام التقدم Legacy معجبنيش الحقيقة لان هي نفسها الأهداف اللي بتطلب منك اللعبة تحققها مع كل القادة و مش بتتغير إطلاقا!

– مفيش دعم للغة العربية (اللعبة بتعتمد بشكل أساسي على النصوص والقوائم) ليه بيتم تهميش لغة مهمة في سوق متعطش للنوع ده من الالعاب ولكن بشرط انها تكون معربة.

الخلاصة: لعبة واعدة ولكنها تحتاج للمزيد 🛠️

في النهاية ألعاب Civilization دايماً بفترة الإطلاق بتديني شعور بأنها ناقصة عن الإصدارات السابقة وفي العادة بمرور الوقت بعد إصدار كل الإضافات والتوسعات المخطط ليها من المطورين، بنحصل وقتها على التجربة الكاملة التي لطالما أرادها المطور في البداية ، عشان كده انا مش متفاجئ من عدم وجود مزايا جديدة كتيرة (في مزايا جديدة وذكرتها لكن مش كتيرة برده لسه) تبرر سعر اللعبة المرتفع 70 دولار أمريكي وهتحس بأن في أشياء مفقودة باللعبة هيتم إضافتها في وقت لاحق وأتمنى ده يحصل لأن اللعبة أساسها قوي ومحتاجة دعم بالمحتويات الإضافية من المطور.