مراجعة لعبة

The Last Case Of Benedict Fox

بالنسبالي لعبة The Last Case Of Benedict Fox من أهم ألعاب الشهر لإني بحب الألعاب المستقلة وخصوصًا لو لعبة تحقيق، لكن هتعمل إيه يا وحش لو قولتلك إن اللعبة دي كمان لعبة Metroidvania باتجاه فني من اللي قلبك يحبه، وكمان موجودة على الجيم باس؟

كل اللي بينك وبين اللعبة دي هو الجيجات اللي هتحملها حرفيًا، ومع ذلك هي تستحق التجربة حتى لو كنت هتشتريها وخليني انهاردة أقولك ليه في مراجعة اللعبة

لعبة The Last case of benedict fox هي لعبة 2.5D بتحصل في العشرينات، قصتها عن محقق بيحقق في قضية قتل معقدة أبعادها كانت باينة في الأول واضحة ولكن مع مرور الوقت بيظهر تعقيدات كتير فيها، وبيتضح إن ليها علاقة بموت والد benedict بشكل مباشر، وعشان كده الموضوع بيتقلب شخصي بالنسبة للبطل، ولكن عشان الألعاب مينفعش تكون قصصها سهلة وعادية…ففي جانب خارق للطبيعة بيتضاف للعبة من خلال قدرة خاصة بيكتسبها  بيندكت بتخليه قادر يدخل عقول الناس عن طريق التفاعل مع جثثهم، وفي العالم الخيالي ده بيشوف تجسيدات لأفكارهم وذكرياتهم في شيء يشبه شوية لعبة Psychonauts 2 أو Persona 5 ولو أنت لعبتهم هتفهم قصدي كويس أوي هنا.

من هنا بيجي الأعداء اللي ممكن لبندكت يقابلهم، وهنتكلم أكترعن الكومبات في جزئية الجيم بلاي بس خليني الأول أكلمك عن رأيي في القصة اللي حسيت إنها مفيهاش تفاصيل كتير، بس على قد ما هي مش طويلة على قد ما الغموض اللي فيها أثار فضولي جدًا، وطريقة السرد تحس إنك في فيلم Noir جميل ومش هتكون عايزه يخلص. اللعبة دي من الألعاب اللي مش بنشوف زيها كتير زي مثلا 12 minutes أو Death’s door والحاجات اللي اتجاهها الفني بيخليك منجذب ليها لحد ما تخلص. الأداءات الصوتية كمان كانت عظيمة وبترسخ أكتر لغموض القصة، وهنتكلم عن الصوتيات وتاثيرها في القصة في آخر المراجعة. بس دلوقتي خلينا نتكلم في الجيم بلاي.

الجيم بلاي متقسم 3 حاجات. ألغاز، platforming ، كومبات. وخلينا نمسك عنصر عنصر كده نتكلم فيه عشان كل واحد فيه مميزات وعيوب.

الأول الكومبات، وده بيكون ضد الكائنات الموجودة في البعد الآخر واللعبة هنا بتقدملك كومبات من سلاحين فقط وهم السكينة والـflare gun اللي بيتشحن من خلال الضربات الmelee وكانت فعلا حركة ذكية من المطورين إنهم ميخلوكش تدور على ذخيرة وتشغل بالك بالحاجات دي، لا السلاح هنا ليه Cooldown تقدر تضرب بعده، والكول داون ده طويل شوية بس على الناحية التانية المسدس ده يعتبر one hit kill، فهي صفقة كسبانة بالنسبة لي على الأقل.

في سلاح تالت وهو القدرات الخارقة اللي بيكتسبها بيندكت من خلال كيان روحي بيتلبسه وبيساعده في قضيته. اسمتعت بالحوارات بينه وبين الكيان ده ولكن كمان الكيان ده مؤثر بشكل عظيم على أسلوب اللعب، وبما إن اللعبة متصممة بطريقة الـmetroidvania فالقدرات دي كمان بتساعد جدًا في التنقل وفتح مناطق جديدة.

في القتال، القدرات دي بتقدملك زي درع تقدر تحمي بيه نفسك، وبتقدر من خلالها برضو تمسك الأعداء وتشدهم عليك عشان تضربهم، وفي التنقل بتقدر تعمل الـDOUBLE jump وتضرب الأرض عشان تكسر الأجزاء الضعيفة منها وتتنقل من خلالها وأنت مش متخيل قد إيه القدرتين دول بس بيفتحوا ما يقارب 60% من بيئات اللعبة قدامك للاستكشاف.

طيب هل الاستكشاف له لازمة أصلا؟ أيوة، وهنا بتيجي أحد مميزات وعيوب اللعبة في نفس الوقت. مميزات لإن اللعبة متصممة بشكل عبقري بيئيًا، وفي موارد كل ما تجمع منها أكتر كل ما بتقدر تعمل تاتوهات تضيفلك قدرات من skill tree عظيمة للعبة.

وفي نقاط متوزعة على البيئة اسمها anchor ودي بتبقى زي save points تقدر تحفظ عندها لعبك، وتقدر كمان تعمل fast travel منها أو ليها في أي وقت تحبه. لو مت وانت معاك موارد بتضيع عليك، بس لو وصلت لنقطة الأنكور دي تقدر تحفظ مواردك وتفضل معاك آمنة من غير ما تكون تحت تهديد فقدانها.

عيوب التنقل بقى بتظهر أكتر حاجة في المطاردات، واللي بتكون سريعة الوتيرة والكنترولز فيها مش متجاوبة بنفس الrate. بتحس إن الكنترولز بطيئة وممكن تتسبب أوقات في فقدانك للسيطرة وبالتالي الموت. الdouble jump هي واحدة من أبسط الحاجات اللي بتنجح 90% من الألعاب تقديمها لكن لسبب لا يعلمه إلا ربنا والمطور…اللعبة هنا قدمته بشكل متواضع.

العيب التاني للتنقل هو عدم وجود خريطة واضحة على الشاشة، كنت حابب جدًا يكون في minimap عشان أقدر أتابع تقدمي في البيئة، ولكن الخريطة اللي بناخدها في اللعبة خريطة تقدر تخشلها من المنيو فقط، وده بيجبرك توقف لعب وطبعًا دي حاجة مزعجة ومش مريحة خصوصًا في لعبة قايمة على الاستكشاف بإرياحية.

طيب كده يتبقى الألغاز، والألغاز هنا من أعقد وأمتع الألغاز اللي شوفتها في لعبة قبل كده…لازم تشغل دماغك كويس عشان تعرف تحلها ولما تنجح هتحس فعلًا إنك محقق كبير. في أوبشن في اللعبة بيخليك تقدر تقفل الألغاز نهائيًا أو تتحكم في صعوبتها، لكن مفيش أوبشن إنك تفتح الهينتات مثلًا وزي لعبة return to monkey island مثلًا.

لو بتحب الألغاز، هتنبسط أوي منها هنا، وهتشغل دماغك كتير وهتحس إنك شارلوك هولمز في نفسك كده…ومالي مركزك! لو مش بتحبها، فممكن تتجاهلها تمامًا لكن في كل الأحوال شابوه للمطور إنه قدر يصمم حاجة زي كده في لعبته، وفعلا واضح إنها متعوب فيها.

وهنا خليني أقف شوية يا جماعة وأكلمكم عن سر حبي للألعاب الإندي أو المستقلة…السر إن المطور المستقبل مش بيخاف يحط أفكار جريئة وhardcore في ألعابه، هو مش خايف على مبيعاته لإنه بيستهدف شريحة محددة من الجيمرز وبيحاول يخاطب الناس الصح لكل لعبة بيعملها…عكس الشركات الكبيرة. بقيت أحس إن الشركات الكبيرة بتعمل ألعابها بحيث تناسب الكل وبطلوا يعملوا ألغاز صعبة وأسلوب لعب عايز تشغيل دماغ. وده ظهر أوي مع سوني في God of war ragnarok مثلًا.. أه لعبة عظيمة وكل حاجة بس اللعبة بتخاف تسيبك 3 دقايق على بعض تفكر أحسن تزهق. لأ هنا اللعبة بقى بتسيبك عادي عشان هي عايزة تقدم النوع ده من الجيم بلاي…وهنا حلاوة المطورين المستقلين.

الإتجاه الفني أقل ما يتقال عنه فن حقيقي ممتع للعين والودان…موسيقى أداء صوتي، وبصريات على مستوى عظيم تحسه طالع من visual novel جميل، ينفع يتاخد منه صور تتعلم لوحات…والأداء الصوتي مساعد على الأجواء دي الصراحة وكمان الموسيقى بتتحكم في إيقاع اللعب بشكل ممتاز. اللعبة دي بتمثل لي أكتر حاجة بحبها في الألعاب عمومًا…إبداع الرسامين في نقل العالم الافتراضي اللي بتحصل فيه اللعبة من وصف على الورق لحاجة حية وموجودة بشكل افتراضي قابل للاستكشاف قدام عينك.

أعظم ما في لعبة The last case of benedict fox هو إنها متوفرة على خدمة الجيم باس من اليوم الأول، وشم محتاج تشتريها عشان تلعبها بسعرها الكامل. هي لعبة ممتعة وفنيًا لعبة عظيمة بأفكار ممتعة وكباكدج على بعضها أنصحك ماتفوتهاش…لكن ده مش معناه إنها من غير عيوب..اللعبة دي ممكن تعصبك ساعات لدرجة تسيبها وتمشي..بس هتحس إنك عايز ترجعها من كتر ما أجواءها وعالمها جذابين. تقييمنا ليها 8/10، وبنرشحهالك لحد ما الألعاب الكبيرة تنزل.

التقييم النهائي

8/10

بمناسبة الجيم باس… تعرف إن جيمزاوي هو أحسن مكان تقدر تشتري من هجيم باس في مصر والوطن العربي؟ كل طرق الدفع موجودة وأحسن سعر..كلمنا على صفحتنا في فيسبوك عشان تعرف تفاصيل أكتر.