مراجعة Back 4 Blood

بعد مرور 12 سنة على إصدار لعبة Left 4 Dead 2، السلسلة برتجعلنا مرة تانية في 2021 بتجربة جديدة تحت عنوان Back 4 Blood ومن تطوير استوديو Turtle Rock الي قدم الجزء الأول في 2008. لعبة Back 4 Blood كان عليها طموحات وأماني كبيرة انها تعيد نفس تجربة الاجزاء الي فاتت للجيل الجديد، والنهاردة هنعرف إذا كانت اللعبة نجحت فعلاً في انها تعمل كدة ولا لا.

اللعبة يعتبر ملهاش قصة فعلية، هي اه بتقدم مجموعة من المشاهد السينمائية عشان تشرحلك قصة الشخصيات والعالم بس هي مش قصة عملاقة إطلاقًا. لو لعبت اللعبة على صعوبة متوسطة فا هتقدر تخلص القصة كلها مع أصحابك في حوالي 10 ساعات تقريبًا. اللعبة كمان بتقدملك مجموعة من المهمات الجانبية الي تقدر تلعبها وتنهيها مع أصحابك عشان تواجه فيهم أعداء منوعة من الوحوش والمتحولين.

نقطة إن اللعبة ملهاش قصة كبيرة ديه مش حاجة سلبية إطلاقًا لأن ده نفس الحال الي كانت عليه سلسلة Left 4 Dead. السلسلة ديه دايمًا معروفة بإنها بتركز أكتر على اللعب التعاوني والاستمتاع مع الأصدقاء، مش بإنها تقدملك قصة سينمائية.

Back 4 Blood هي تجربة منظور شخص أول بالكامل بتديك الامكانية انك تلعبها لوحدك أو بشكل تعاوني مع أصحابك. قصة اللعبة فيها مجموعة كبيرة من المهمات والي بتخلصها بشكل متتالي عشان تواجه مختلف الزعماء وتقضي على تفشي الزومبيز في العالم. قصة تقليدية من أي لعبة زومبي وده منطقي لأن زي ما قولت فاللعبة مش بتركز أصلاً على انها تقدملك قصة ضخمة.

الجيم بلاي ممتع وسريع وفي خطورة كبيرة، اي حركة غلط ممكن تقضي على فريقك لو مش مركزين. الأسلحة ليها استخدامات ضد زومبيز مُعينة ومن السهل انك تبدل بين كم ضخم من الأسلحة في كل مهمة عشان تتناسب مع كل موقف انت هتقف قدامه خلال تجربتك للعبة.

الأعداء نفسهم مُنوعين بشكل كبير، يعني مثلاً في عدو بيقذف عليك سم، وعدو تاني بيقدر انه يصرخ ويجمع حشد كبير من الزومبيز ويطلقه عليك وعلى أصحابك. كل زومبي هتواجهوا هيكون له أسلوب مُعين في القتال ولازم تتعلم تخلص من أنهي وحوش الأول عشان متوقعش نفسك في الخطر.

Back 4 Blood بتقدم نظام كروت أو نقدر نسميه تخصيصات للشخصيات. الكروت ديه بتقدملك قدرات لكل شخصية انت هتلعب بيها، في قدرات بتساعد الفريق وبتقدملكم إضافات حلوة لأسلوب اللعب، وفي قدرات تانية تقدر تقول انها ملهاش لازمة. نظام الكروت مش أحسن حاجة ومحتاج شغل اكتر عليه عشان يكون مُجزي فعلاً للتجربة. لو لعبت اللعبة لوحدك فالتجربة هتكون صعبة نسبيًا حتى لو على اقل صعوبة، فننصحك انك تستمتع بيها مع اصحابك إلا لو كنت من مُحبي الألعاب الصعبة.

آخر حاجة أسلوب اللعب بيقدمها هو تجربة أونلاين حلوة. هتخش مع صحابك في مجموعة من المهمات، وهتلاقي ان عدد كبير من الوحوش الي قدامك هما ناس زيكم بيتحكموا فيهم. هتحس ان اللعبة قلبت على تجربة PVP اثناء ما أنت بتلعب أصلاً PVE وده بيزود من الحماس والمتعة في نفس الوقت.

الجرافيك بتاع اللعبة محترم جدًا، مش أعظم حاجة في الكون ولكنه ممتاز ومحرك Unreal Engine 4 عامل شغل عالي في اللعبة. المؤثرات البصرية والدم وتصميم الزومبيز والأسلاح ممتازين واستوديو Turtle Rock مفقدش لمسته الابداعية إطلاقًا.

تجربتي للعبة كانت على منصة Xbox Series S وقدمتلي أداء مرضي. اللعبة شغالة بدقة Dynamic 1440p مع 60 إطار في الثانية. لو حابب تاخد تجربة أفضل فإحنا بننصحك تجرب اللعبة على Xbox Series X أو PlayStation 5 عشان تاخد دقة Dynamic 4K. طبعًا الأداء المثالي هيكون على منصة الحاسب الشخصي عشان هتستمتع بتجربة بتقدم فريمات أعلى من كدة بكتير.

الاداء التقني على الحاسب الشخصي ممتاز واللعبة مش محتاجة جهاز عملاق عشان تشتغل معاك بشكل كويس. اللعبة نجحت كمان في انها تقدم موسيقى ومؤثرات صوتية ممتازة، بس خلي بالك لو ناوي تسجل فيديوهات أو تطلع بثوث مباشرة فإحنا بننصحك تقفل الموسيقى عشان عليها حقوق نشر وده هيؤدي إلى ان قناتك تاخد حظر سواء من يوتيوب او تويتش.

الخلاصة :

لعبة Back 4 Blood تقدر تعتبر انها Left 4 Dead 3، لو كان نفسك تعيش تجربة Left 4 Dead القديمة مرة تانية فأنصحك انك تشتري Back 4 Blood فورًا وتستمتع بيها مع أصحابك. اللعبة بتدعم اللعب المشترك وفيها مميزات كتير حلوة. اه اللعبة مش خالية من العيوب تمامًا، بس بشكل عام انا متأكد انك هتحبها خاصةً لو كنت من مُحبي Left 4 Dead زمان.

Back 4 Blood تقدر تشتريها دلوقتي على الحاسب الشخصي و PlayStation 4 / 5 و Xbox One / Series X|S. وبنفكرك ان اللعبة كمان موجودة على خدمة Xbox Game Pass وتقدر تحملها وتستمتع بيها فورًا. اشترك في الخدمة من هنا.

التقييم النهائي : 8/10