مراجعة وتقييم لعبة

Armored Core 6: Fires of Rubicon

جزء جديد من سلسلة Armored Core نزل أخيرًا في الأيام اللي فاتت، بعد غياب أكتر من 10 سنين واختفاء للتصنيف دا عموما من الألعاب أرمورد كور هي واحدة من أقدم سلاسل استوديو From Software.

قبل حتى ألعاب السولز والستايل المعروف عن الاستوديو دلوقتي، هي لعبة Action Mecha يعني بالبلدي روبوتات بتضرب وتطير وتتحرك بسرعة وكدة، وهو تصنيف كان ميت إكلينيكيًا لأن آخر لعبة كبيرة من التصنيف ده كانت Titanfall 2 اللي نزلت في 2016، ودلوقتي قرر استوديو فروم سوفتوير إنه يعيد إحياء السلسلة والتصنيف كله من تاني مع أرمورد كور 6

فـ يا ترى اللعبة تستحق ولا لا؟

مبدئيًا خد بالك إن اللعبة دي أو التصنيف ده عموما مش لكل الناس زي ألعاب السولز بالظبط، فـ لو بتحب نظام الروبوتات والأسلحة والأجواء الأسطورية في المواجهات الأكشن بنظام تركيب كل قطعة في الروبوت بتاعك وتحديد نظام لعبك بالظبط زي ما انت عايز حط عينك على اللعبة دي ومش هتندم.

وتعالى أقولك ليه في مراجعة Armored Core 6: Fires of Rubicon

القصة

قصة ارمورد كور 6 بتاخدنا لكوكب Rubicon 3 كوكب استعمره البشر، وكانوا عايشين عليه لسنين طويلة لغاية ما اكتشفوا مصدر طاقة جديد اسمه Coral وطبعًا بطبيعة البشر بدأوا يعملوا أبحاث عليه ويحاولوا يستغلوه لصالحهم.

لحد ما الموضوع خرج عن السيطرة وحصلت كارثة كبيرة جدًا دمرت الكوكب كله وزي ما اللعبة بتقول الكارثة دي “حرقت النجوم”، بعد 50 سنة من الكارثة دي بتبدأ أحداث لعبتنا لما بتكون شركات ضخمة بتصارع بعض على الكوكب وبتحاول تستولى على مادة الـ Coral لما عرفوا إنه مصدر طاقة مهم جدًا وهيجبلهم مكاسب رهيبة وهنا بتيجي أنت، بطل اللعبة

الروبوت Six Two One

والشخص المسؤول عنه Walter وبتقتحموا الكوكب بشكل سري وبتبدأ تشتغل روبوت مرتزقة وتكون علاقات مع الشركات المختلفة شوية هنا وشوية هناك، لكن إيه الغرض الحقيقي اللي والتر جابنا عشانه الكوكب هنا؟ لسة منعرفش.

خد بالك بس من حتة بسيطة في القصة إن الروبوتات دي مش مجرد روبوتات دي اسمها Augmented Human أو إنسان معزز، وهي باختصار عملية جراحية بتخلي الإنسان متصل عصبيا وبكل حواسه بالروبوت بتاعه وبيتحكم بيه بشكل كامل، ولو الروبوت اتدمر، بيكون فيه خطر كبير على الإنسان ده إنه يموت عشان كدة كل الروبوتات اللي هتشوفهم في اللعبة – وده لأنك مش هتشوف غير روبوتات اصلا هما في الحقيقة بشر عاديين بس متصلين بالروبوت بتاعهم دي.

بس حتة بسيطة في القصة مش مشروحة في اللعبة بس هتفرق معاك في فهم الأحداث لأنه عموما الجزء ده مش بيشرح عالم اللعبة وخلفيته بشكل عميق لأن زي ما خدت بالك من الاسم، دا الجزء السادس من السلسلة بس متقلقش القصة نفسها ملهاش علاقة بالأجزاء اللي فاتت وتقدر تلعبها من غير ما تكون عارف حاجة عن الألعاب التانية عادي..

القصة هتكمل معاك في حدود 20 ساعة أو أكتر أو أقل على حسب هتموت أد إيه وتقعد تعيد البوص فايت كام مرة لأن صدقني البوص فايتس هنا صــــعبة القصة فيها 5 فصول بنظام المهمات والـ 5 فصول عبارة عن 40 مهمة تقريبًا.. دا لو هتختم اللعبة مرة واحدة

أه نسيت أقولك إن اللعبة دي لازم تختمها أكتر من مرة.. وهقولك ليه كمان شوية

القصة عمومًا حلوة جدًا وخصوصًا الأداء الصوتي بالرغم من إن مفيش مشاهد سينمائية أو وشوش بشر بتتكلم حتى الموضوع كله رسايل صوتية قبل المهمات وبعدها لكن لقيت نفسي بتعلق بالشخصيات فعلًا ومهتم بالحوارات ومصير كل شخصية وفعليًا كنت متردد جدًا في الاختيار الأخير في القصة اللي هيحدد مصير الشخصيات والعالم كله.

الجيمبلاي

مبدئيًا كدة خليني أقولك إن جيمبلاي أرمورد كور 6 هو من أمتـــع الجيمبلايز اللي عدت عليا في حياتي بص أنت بتطير وبتـ Dodge وبتسرع وبتبطأ كل ده وأنت شغال ضرب بأربع أسلحة أنت اللي بتختارهم سواء رشاشات أو صواريخ أو مدافع ليزر ومدافع طاقة أو حتى سيف وأسلحة يدوية وبتقدر تحطهم في الإيد اليمين والشمال والكتف اليمين والشمال وكل سلاح له زرار.

بس خليني أتكلم شوية عن سلاسة الجيمبلاي وإن إزاي كل حاجة متجاوبة وبتحصل بنعومة غريبة في لعبة زي دي فيها حاجات كتير بتحصل في نفس الوقت على الشاشة السلاسة وتجاوب كل حركة وكل أنميشن بيحصل قدامك هما أهم حاجة في الجيمبلاي، فـ زي ما قلتلك إن أنت بتضرب وبتطير وتجري وبتتفادى الضربات فـ كل عدو قدامك على الشاشة بيعمل نفس الحاجات دي والمطلوب منك إنك تفهم هو بيعمل إيه، تحلل الموقف، وتتصرف على أساسه فـ أنت بتراقب.

كمية الذخيرة اللي باقية معاك

هيلث الروبوت بتاعك

كمية الطاقة اللي باقية معاك وقدامها اد ايه عشان تشحن

عدد الأعداء وأماكنهم وأنواع ضرباتهم

والعظيم بقى إن كل ده بيحصل زي السكينة في الحلاوة بجد الموضوع سلسل وممتع بشكل رهيب والأهم إن الجيمبلاي بيخليك تعمل حاجات شكلها جامد و روش سواء الضربات أو لما تعمل دودج في آخر لحظة أو حتى الطيران نفسه جامد جدًا وده بفضل الأنميشنز الأسطورية لكل حركة وكل ضربة بتحصل في اللعبة دي والاهتمام بأدق التفاصيل في كل حاجة، يعني لو ركزت هتشوف أماكن الصواريخ وهي بتفتح عشان تضرب لما تستعد للهجوم وبعد الضرب هتلاقيها قفلت وعملت حركة مختلفة عشان الريلود وكمان لما بتعمل Boost قوي لقدام الروبوت بينزل زي ماسك كدة على وشه عشان مقاومة الهواء هي حاجات صغيرة وبسيطة بس كلها مع بعضها بتخليك مندمج بأقصى شكل ممكن مع الحاجات الكتير أوي اللي بتحصل قدامك على الشاشة.

التخصيص وبناء الروبوت

لو سألتني عن أهم حاجة واحدة في تجربة ارمورد كور بشكل عام واللي كفيلة إنها تشقلبلك التجربة 180 درجة هقولك هو بناء الروبوت بتاعك واختيار المكونات بتاعته في أرمورد كور مفيش روبوت صح و روبوت غلط أو مكونات حلوة ومكونات وحشة لكن الموضوع هو، أنت عايز تلعب ازاي عايز تكون سريع وخفيف في الحركة بس الهيلث بتاعك هيبقى قليل وسهل تموت، ولا عايز تبقى دبابة .. حرفيا تقدر تكون دبابة وهيلثك هيبقى عالي جدا ونادرًا ما هتموت بس هتكون بطيء وحركتك محدودة بشكل كبير..

ولا عايز توازن بين الاتنين على طريقتك وتقعد تجرب لحد ما تظبط معاك هي متعة من نوع خاص بصراحة لكل اللي بيحب التصنيف ده من الألعاب عندك فيه أنواع كتير جدًا جدًا جدًا من المكونات اللي تقدر تحطها في الروبوت بتاعك كفاية أقولك إني بعد 50 ساعة تقريبًا من اللعب ختمت فيهم اللعبة 3 مرات لسة مجربتش معظم الأسلحة والمكونات عموما واللي فيها تنوع عظيم بالمناسبة وتقدر تلعب بطرق كتير مختلفة..

غير الأسلحة تقدر تغير كل حاجة تانية في الروبوت من الرجل والدراعات والراس والجسم والـ Generator وكل حاجة منهم بتتحكم في حاجة بتأثر بشكل مباشر على الجيمبلاي.. غير المكونات كمان تقدر تلون الروبوت بألوان كتير وحرفيا تقدر ترسم في اللعبة يعني نظام التخصيص هنا ولا أجدعها لعبة عربيات

مودات اللعب

مع مود القصة بنظام المهمات

فيه مود كمان اسمه Arena بتحارب فيه روبوتات تانيين بنظام 1 ضد 1 ولما بتكسب بتاخد شرائح تقدر تطور بيها قدرات الروبوت بتاعك كمان فيه مود أونلاين ممتع جدًا بنظام 1 ضد 1 و 3 ضد 3 بس الأهم بقى في المودات

هو مود الـ New Game Plus

اللي هو بعد ما تخلص اللعبة بتعيدها تاني من الأول بس بكل الحاجات اللي معاك بس الموضوع هنا مختلف شوية لأن بعد ما تختم القصة أول مرة وترجع تلعبها من الأول هيكون فيه مهمات جديدة في القصة واختيارات جديدة وتفاصيل بسيطة كدة هتظهرلك وسط المهمات وطبعًا فيه بوص فايتس جديدة وفي النهاية هتاخد نهاية مختلفة عن النهاية اللي جاتلك في الأول.

بس الموضوع مبينتهيش هنا لما تختم اللعبة للمرة التــــــالتة اه بالظبط كدة للمرة التالتة هيبقى فيه كمان مهمات جديدة تمامًا أعداء جديدة اختيارات جديدة وبوص فايتس جديدة وجامدة جدًا وبصراحة إن التختيمة التالتة دي بتضيف للقصة بشكل كبير وبتوضح حاجات مكانتش مفهومة في الأول.

والمهمات بتاعتها هي من الأفضل في اللعبة كلها فـ لو هتلعب أرمورد كور 6 اوعى تلعبها مرة واحدة وكمل للتختيمة التانية والتالتة وصدقني مش هتزهق لأن فيه محتوى جديد كتير التختيمة التالتة دي فيها شابتر كامل جديد مكانش موجود في التختيمتين اللي قبلها وطبعًا فيه أسلحة كتير جديدة ومكونات هتتفتحلك في مع كل تختيمة وأسرار ومفاجآت بطريقة From Software المعتادة.

الأداء التقني

لعبة أرمورد كور 6 من أجمل الألعاب من ناحية الأداء التقني اللعبة خفيفة على الأجهزة وشغالة بسلاسة من غير مشاكل في استغلال قدرات الجهاز أو جليتشات أو كراشات وكمان دي أول لعبة من From Software تدعم 120 فريم بعد ما ألعابهم كان آخرها 60 فريم في إيلدن رينج فـ بشكل عام الأداء التقني ممتاز ومفيهوش غلطة.

أرمورد كور 6 هي مفاجأة عظيمة من From Software وواحدة من أفضل ألعاب السنة وبدون شك هي أمتعهم بس خد بالك لو داخل ومتوقع إنها لعبة سولز بشكل كامل لأنها على الرغم من صعوبة البوص فايتس فيها زي ألعاب السولز ويمكن أكتر فـ هي مش سولز خالص هي لعبة أكشن سريعة حماسية، والأهم، إنها من تصنيف الـ Mecha واللي ليه أسس معينة كدة لازم تتحط ف عين الاعتبار لما تحكم على لعبة من التصنيف ده.

وعشان كدة تقييمنا لـ

Armored Core 6: Fires of Rubicon

هو..

9.5 من 10