مراجعة Resident Evil 3

بعد سنة واحدة من إصدار ريميك Resident Evil 2 ، شركة Capcom مستمرة في تقديم الـ Remakes والمرة ديه مع الجزء الثالث من سلسلة Resident Evil فهل اللعبة قدرت توصل لنفس مستوى اللعبة الأصلية ومستوى ريميك Resident Evil 2 ولا للأسف أقل منهم ؟ ده الي هنجاوب عليه النهاردة في مراجعتنا الكاملة للعبة Resident Evil 3.

” قبل ما أكمل كلام لازم أوضح إن ديه مراجعة للقصة بس بدون التطرق لطور الأونلاين Resident Evil Resistance “

القصة :

قصة لعبة Resident Evil 3 بتبدأ قبل أحداث الجزء الثاني وبتنتهي بعده ، بتبدأ القصة بشخصية Jill وهي بتحاول تهرب من مدينة Raccoon City بعد إنتشار الفيروس الي أدى لتحويل معظم المدينة إلى زومبيز والي لسة متحولوش بيحاولوا ينجوا بحياتهم في فترة بسيطة جداً.

على عكس ريميك Resident Evil 2 الي كنت بتقدر فيه تلعب اللعبة مرتين كل مرة بشخصية مختلفة زي Leon و Claire فالمرة ديه مفيش إختيار بل هتركز اللعبة بشكل أساسي على شخصية Jill مع وجود بعض المراحل الي هتلعب فيها بشخصية Carlos وبصراحة الشخصيتين كويسين جداً والاتنين بيقدموا الدور بشكل ممتاز.

العدو الرئيسي في القصة هو شخصية Nemesis الشهير جداً في عالم Resident Evil والي تم تصنيعه لهدف واحد فقط وهو القضاء على عملاء STARS والي Jill من ضمنهم.

للأسف شخصية  Nemesis مش هتظهر كتير ومش هتطاردك كتير زي Mr.X في Resident Evil 2 بل ظهوره هنا محكوم ببعض اللقطات السينمائية والي عايزاك تمشي في إتجاه واحد أو في Boss Fights مختلفة طول فترة اللعبة والي هتكون 4 مرات تقريباً. ده بالنسبالي يعتبر عيب لإنه محسسنيش إنه خطر مستمر زي Mr.X بل الشركة بتقدموا عشان تدخلك في مواجهة معاه ولازم تقضي عليه في المواجهة ديه ومتقدرش تهرب مثلاً.

أسلوب اللعب :

اللعبة من منظور الشخص الثالث زي Resident Evil 2 ولكن فيها بعض التغييرات الطفيفة ، الرصاص هنا بقى أكتر والأعداء أكتر من RE2 لإن اللعبة بتمزج بين الرعب والأكشن بشكل مميز جداً وده الي عملته اللعبة الأصلية لما صدرت في 1999.

الشخصيات بتركض بشكل بطئ زي RE2 وده اتعودنا عليه خلاص ولكن مع إمكانية Nemesis للركض وراك فا هنا بيجي دور حركة الـ Dodge الجديدة والي إذا نفذتها صح فالصورة هتبقى Slow motion لفترة بسيطة هتقدر فيها إنك تضرب طلقة Critical هتوقع Nemesis على الأرض ثواني أو هتقضي على الزومبيز العاديين.

زي ما قولت فاللعبة هنا بقت بتعتمد على الأكشن بشكل كبير وبالتالي مبقاش في اللعبة حل للألغاز أو إعتماد فعلي عليها ، اللعبة خطية أكتر من Resident Evil 2 عشان كدة هتلاقي نفسك مش بترجع للأماكن السابقة كتير عشان تستكشف فيها لإنها مفيهاش تفاصيل كتير زي RE2.

اللعبة بتقدملك مجموعة كبيرة من الأسلحة والطلقات لإنك هتلاقي نفسك في مواجهة أعداد كبيرة من الزومبيز في بعض الأحيان ولكن على الرغم من كدة فاللعبة فيها لقطات مرعبة كويسة جداً وخضات حلوة هتخليك مستمتع طول فترة الـ 7 ساعات لعب بالمزيج المرعب والحماسي.

حاجة كتيرة ناس كتير انتقدتها في اللعبة وهي عمر اللعبة ، شخصياً أنا لعبت اللعبة على صعوبة Standard وخلال تجربتي إستكشفت تقريباً 90% من كل المناطق ومكنتش بسيب معظم المناطق إلا لما أكون مجمع كل حاجة فيها ، بالشكل ده اللعبة أخدت مني 7 ساعات لعب وأنا شايف إنه كويس إلى حدٍ ما مقارنةً بـ RE2 الي اخدت مني 8 ساعات أول مرة.

أنا ملعبتش الجزء الأساسي بتاع 1999 ولكني شفت حاجات كتير جداً عنه أونلاين وإتفاجئت إن الشركة شالت مناطق كتير زي برج الساعة والمقبرة والمصنع الأخير ، لو الاماكن ديه كانت موجودة في اللعبة كان ممكن عمرها يطول لـ 10 ساعات أو أكثر وأكيد ناس كتير كانت هتفضل تلعب وقت قصة أطول بدلاً من تجربة أونلاين شوفنا زيها قبل كدة كتير في ألعاب تانية ومبتقدمش حاجة جديدة.

الرسومات والأداء :

زي Resident Evil 7 و Resident Evil 2 فاللعبة مبنية على محرك RE Engine والي يعتبر واحد من أفضل المحركات حالياً لتقديمه رسومات حلوة مع أداء ممتاز خاصةً على منصة الحاسب الشخصي.

رسومات اللعبة مفيهاش تغيير ضخم عن Resident Evil 2 ولكن في حاجات هتلاحظها زي إن اللعبة بقى فيها مجموعة بيئات مختلفة وحلوة جداً كل بيئة تحس إنها بتحكيلك قصة معينة أو فيها فكرة خاصة بيها على عكس RE2 الي كانت محكومة 90% من الوقت في الـ Police Station والمعمل الأخير.

جرافيك الشخصيات زي Jill و Carlos بيوضح اد ايه Capcom إهتمت بالتفاصيل خاصةً في وش الشخصيات وتعابيرهم وطريقة كلامهم الي اتحسنت عن Resident Evil 2 بشكل ملحوظ وده جعل المشاهد السينمائية أكثر متعة في اللعبة.

نيجي لنقطة الأداء ، أنا جربت اللعبة على جهاز PlayStation 4 عادي ، اللعبة شغالة على دقة 1080p و 60 فريم في الثانية ولكن للأسف اللعبة مش ثابتة أو حتى قريبة من 60 ، في معظم الأحيان هتلاقي الأداء بيقل لـ 40 و50 فريم في الثانية ، لو معاك منصة PlayStation 4 Pro فأنت هتاخد أداء أفضل واللعبة هتبقى فوق الـ 50 معظم الوقت بس لو عايز أفضل تجربة ممكنة من ناحية الأداء فأنصح بشراء اللعبة على منصة الحاسب الشخصي خاصةً لو معاك جهاز مواصفاته كويسة.

الأصوات :

المشاهد السينمائية في RE3 أكتر من 2 فا عشان كدة أكيد لازم هيبقى فيه إهتمام بالشخصيات بشكل كبير جداً ، الممثلة الصوتية لشخصية Jill وممثل شخصية Carlos أبدعوا في كل مشاهدهم السينمائية بشكل أفضل من شخصيتي Leon  و Claire.

الأهم من التمثيل الصوتي هي الموسيقى وهنا الموسيقى حماسية بشكل خرافي خاصةً موسيقى Nemesis الي هتدخلك في مود المطاردات الي بتحصل في أول اللعبة ومختلف الـBoss Fights الي هتخش قدامه فيه طول فترة اللعبة ، لو لعبت RE3 الأصلية فاه تحس إن موسيقى Nemesis مش غريبة عليك وده لإنهم أخدوا القديمة وحسنوا عليها بشكل كبير.

أصوات الأسلحة والزومبيز في كل البيئات ممتازين جداً وشايف تحسن عن Resident Evil 2 ولكنه مش تحسن ضخم بشكل عام.

الخلاصة :

لعبة Resident Evil 3 هي تجربة أكشن ورعب ممتازة ، للأسف لما هتخلص هتحس إنك كنت عاوز التجربة تكون أطول لإنها ممتعة جداً خاصةً في أخر كام مرحلة ، رسومات وموسيقى ممتازين مع طور أونلاين إضافي بيتقدملك بشكل مجاني.

على الرغم من المميزات ديه إلا إن عيوب اللعبة زي عدم ظهور Nemesis كتير وإزالة مجموعة كبيرة من بيئات اللعبة الأصلية ومشاكل الأداء ( الي لو كان الإستوديو إستنى شوية كان هيحلها ) مخلتش اللعبة ممتازة زي RE2، لو اللعبة كانت نزلت أخر السنة أو في أوائل 2021 فأنا متأكد إنها كانت هتبقى تجربة أفضل وأمتع ولكن من الواضح إن Capcom إستعجلت في إصدار اللعبة بعد النجاح الضخم الي شهدته مع ريميك RE2 السنة الي فاتت.

التقييم النهائي : 8/10