مراجعة Mass Effect Legendary Edition

Mass Effect Legendary Edition اللعبة اللي بتجمع الجزء الاول والثاني والثالث بهيئة Remaster في Package واحدة هل لو انت لعبت السلسة قبل كده هل تستحق فعلا انك تجربها من أول وجديد بجرافكس نوعاً ما أفضل شوية ؟ ولو أنت ملعبتش السلسة او متعرفش عنها أي حاجة هل هو ده الوقت المناسب لتجربة اللعبة ؟ 

المميز في النسخة دي إنها عبارة عن 3 ألعاب موجودين على نفس الـLauncher أول ما تخش اللعبة بتظهرلك شاشة كده تختار منها الجزء الأول او الثاني او الثالث تقدر تخش على أي جزء أنت عايزه وتلعبه على طول مش شرط تبدأ من الجزء الأول يعني لو عايز تلعب الجزء التاني على طول مثلاً ده الجزء المفضل بالنسبالك فا تقدر تبدأه على طول مش شرط تبدأ بالأول وفي خاصية حلوة جداً في الجزء الثاني والثالث لو دخلت عليهم على طول بيظهرلك مشهد كده بـStyle الـComicbook عشان يقولك ايه اللي حصل في الجزء اللي قبله وتبقا فاهم ومتابع اللي بيحصل.

من المزايا اللي هتوفرلك وقت كبير جداً وهي الUnified Character Creation ودي بتخليك تصمم شخصيتك براحتك مره واحدة تعمل فيها كل اللي أنت عايزه وتفضل محتفظ بالتصميم ده في كل الجزاء مش شطر مع كل جزء تخش عليه تصمم شخصية من أول وجديد.

من الخواص اللي انا شايف أنها لازم تبقا موجودة في كل الالعاب الصراحة وهي خاصية التصوير Photo Mode تقدر تاخد صور من اللعبه براحتك وتعدل عليها تعديل بسيط.

نقطة مهمة جداً لازم تبقا عارفها ليها علاقه بموضوع نقل البيانات من جهازك الحالي لجهاز الجيل الجديد فا لو انت بتلعب على الـ Xbox One وجيت جبت Xbox Series X او  Series Sجهاز جيل جديد يعني، كل الحفظ بتاعك في اللعبة هيتنقل مفيش فيها أي مشاكل وتقدر تكمل لعبك على جهازك الجديد عادي جداً، لكن على الـPlayStation الوضع مختلف، لو انت بتلعب على  PlayStation 4 وجبت PlayStation 5 فالحفظ بتاعك مش هيتنقل ولا حاجة فا خلي بالك من الموضوع ده.

نقطة شايفها من أهم الأسباب اللي تخليك تلعب اللعبة تاني وهي إن كل الـDLCs بتاعت السلسة كلها موجوده في النسخة دي بتاع 40 DLC موجودين كلهم في لعبة واحدة وكمان كل الأسلحة وكل الـarmor موجودين كلهم في نسخة Mass Effect Legendary Edition وأنا شايف أن ده deal محترمه جدا، يعني بتقدملك محتوى ضخم تلت ألعاب بالـDLCs بتاعتهم مقابل 60 دولار حوالي 80 ساعة لعب فا محتوى كبير تقضي عليه وقت طويل مقارنة مع الpackages التانية اللي بتعمل نفس الفكرة بس بيكون مفيهاش نفس كمية المحتوى ده مجرد Remaster وخلاص، فا أنا شايفه سعر مناسب جداً للنسخة دي.

هبدأ في كلامي عن Mass Effect الجزء الأول، اللي طبعاً هو أضعف جزء في الجرافيكس طبعاً عشان هو الجزء الأقدم حتى لو تلاحظ الفريق أشتغل وبذل مجهود أكبر بكتير على الجزء ده أكتر من الأجزاء التانيه عشان طبعاً يرفعوا بمستوى اللعبة عشان تبقا قريبة من شكل الجزء التاني والتالت فا في تطور كبير طبعاً في الإضاءة والـtexture وكل حاجة مقارنة مع النسخة الأصليه، الـcontrols بدره تحسها غريبة شوية في حاجات غريبة كده زي مثلاً مينفعش تبص حواليك وانت بتجري فا ممكن يكون صعب شويه انك تتعود عليها بسرعة.

بالنسبة للجزء التاني فا هو طبعاً الأفضل في كل حاجة مفيش كلام كتير يتقال عنه أصلاً يعني الصراحة أنا بعتبر الجزء ده من أفضل ألعاب الRPG في التاريخ فا هم عملوا شغل محترم جداً مع الجزء ده، في تطور برده ملاحظ في الجرافيكس فا أنا بحترم أوي الجزء ده.

الجزء التالت طبعا هو الأفضل في الجرافيكس مقارنة مع الأجزاء التانيه طبعا والـcontrols لأنه طبعا أجدد جزء، في أصلاً بعض المشاهد اللي حسيت أنها لعبة مختلفة في تطور وأختلاف رهيب ما بينه ومابين الجزء الأصلي يعني حتى عشان تفهمني أكتر ممكن تشوف مقارنات على اليوتيوب هتلاخظ التطور الكبير في الجرافيكس.

بالنسبة للمشاكل والأخطاء التقنية فا هي تعتبر مش متواجدة وبيحصل مجرد frame drops كل فين وفين، من ناحية الأداء التقني فاللعبة شغالة بدقة 1080p على PlayStation 4 و Xbox One وبتاخد 30 أو 60 فريم على حسب إختيارك من إعدادات اللعبة. على PS4 Pro و Xbox One X و Xbox Series S بتقدر تختار بين 4K و30 فريم أو 1440p و 60 فريم.

أجهزة الجيل الجديد الأقوى فيها إختلاف، على منصة PlayStation 5 اللعبة بتشتغل بدقة 4K و60 فريم مش ثابتة ولو عايز فريمات ثابتة لازم تقلل الدقة لـ  1440p، وأخيراً على Xbox Series X والي هو بيقدم أفضل أداء تقني للعبة فبتشتغل على دقة   4K و60 فريم أو 1440p و120 فريم.

ثلاثية Mass Effect Legendary Edition أنا شايفها package محترم جداً 3 ألعاب مع كل الـDLCs بجرافيكس أفضل وكل ده بسعر مناسب جداً فهي تستحق التجربة للمرة التانية لو انت لعبتها قبل كده وللمرة الأولى لو انت ملعبتهاش قبل كده وده الوقت المناسب عشان تاخد التجربة الكاملة و بأفضل شكل ممكن.