بترجع سلسلة ألعاب ياكوزا بجزء رئيسي جديد بعد الجزء السابع بعام 2020 والذي قام بتغيير بطل اللعبة وأيضاً غير طريقة اللعب بشكل كلي من أسلوب القتال الحر إلى طريقة تعاقب الأدوار على غرار ألعاب الأربيجي اليابانية، مع تخلي السلسلة بشكل رسمي في هذا الجزء عن الاصدار المرقم وترك ورائها الاسم الشهير ياكوزا ، والمضي قدماً تحت مسمى like a dragon  ، فهنتعرف مع بعض في مراجعة اللعبة هل هتنجح مرة تانية خلطة السلسلة المعاد تصميمها من الجزء السابق ولا كانت ضربة حظ مش اكتر في الجزء اللي فات.

القصة

قبل ما نبدأ احداث القصة في اللعبة لازم تعرف ان اللعبة بتعتمد بشكل كبير على احداث ألعاب ياكوزا السابقة وبالأخص الجزء السابع لانه اللعبة هنا بتكمل احداث الجزء السابع مباشرة بعد مرور كذا سنة، لكن المطور ما زال حاطط كم فلاش باك هنا وهناك عشان اللي ملعبش الجزء اللي فات على الاقل يبقى فاهم شوية ايه اللي بيحصل في الاحداث هنا ، طبعا بجانب الجزء السابع في جزء فرعي صدر من كم شهر فاتوا اسمه Like a Dragon Gaiden: The Man Who Erased His Name واللي بدوره عملنا مراجعة ليه تقدر تشوفها من الرابط هنا واللي بدوره بتدور احداثه في نفس الفترة اللي حصلت فيها احداث الجزء السابع ولكن ببطولة بطل السلسلة القديم والمشهور كازوما كيريو والذي يعود في الجزء الثامن هنا كأحد الشخصيات الرئيسية مع بطل اللعبة اللي بتتحكم بيه وهو  اتشيبان كاسوجا واللي بيبدأ هنا أحداث اللعبة كعامل بأحد مكاتب التوظيف بمدينة يوكوهاما اليابانية اللي دارت فيها احداث الجزء السابق وهو بيحاول يساعد أعضاء الياكوزا السابقين يلاقي ليهم وظايف محترمة بعد احلال كل عصابات الياكوزا اللي في المدينة مع نهاية احداث الجزء السابع، وطبعاً مش حاجة سهلة انك تشغل عندك رجل عصابات ياكوزا سابق فرغم ان المهمة كانت صعبة حبتين على اتشيبان لكن كان قدها وقدر يوزع طاقات رجال الياكوزا قدر الامكان على الاعمال الشريفة ولكن في يوم يتدبرله مكيدة، وتطلع اخبار انه بيشغل رجال عصابات الياكوزا السابقين لصالحه في اعمال غير مشروعة، وبناء عليه بيتم فصله من الشغل ويرجع عاطل تاني لحد ما يبدأ الحدث الرئيسي في الجزء ده وهو انه يسافر لجزيرة هواي في الولايات المتحدة وده بعد ما وصل له أنباء أن مامته الحقيقية ما زالت عايشة وباعتة ليه جواب بعنوانها وعايزة تشوفه لمرة واحدة وأخيرة، ولكن اول ما يحط رجله في جزيرة هواي تبدأ احداث اللعبة تتصاعد وتبقى مثيرة لأنه ورغم أنه مش بيلاقي مامته في عنوان البيت اللي كانت باعتاه ولكن بيلاحظ اختفاءها وأنه مش الوحيد اللي رايح يشوفها .. ده كمان عصابات الياكوزا وعصابات المافيا في هواي باعتين ناس يدوروا عليها، فليه ده كله ده اللي بنعرفه طوال احداث اللعبة في شابترتها الطويلة اللي بتمتمد لـ 13 شابتر بحوالي 45 – 50 ساعة ده لو انت بتجري في اللعبة وعايز تعرف قصتها بس لكن لو عايز تختم كل حاجة فيها بمحتواها الجانبي واللي هنتكلم عليه دلوقتي فانت هتحتاج لاكتر من 100 ساعة.

المحتوى الجانبي

وهنتكلم عن المحتوى  الجانبي قبل الجيم بلاي وده لان المحتوى الجانبي كان وجوده مهم جداً جنب إلى جنب مع القصة ، لان لو فكرت تلعب القصة بس بدون ما تلعب المحتوى الجانبي فانت فقدت نص متعة اللعبة، وده لان محتوى الجانبي في لعبة ياكوزا انفنينت ويلث مش مصمم عشان حشو ساعات اضافية وخلاص ، بالعكس ده اتصمم عشان يخدم اللاعب ويفتحله ادوات وقدرات جديدة يقدر من خلالها يتقدم في اللعبة بشكل اسلس واريح من لو كنت لعبت القصة علطول، المحتوى الجانبي ممكن نقسمه لقسمين، المهمات الجانبية واللي بتبقى عبارة عن ايقونة رسالة بيضا على الخريطة اسمها sub quest  واللي بدورها بتفتح ليك حاجات مفيدة بتساعدك في تقدمك للقصة زي مثلاً انك تفتح سكوتر متنقل تقدر تتنقل بيه في خريطة اللعبة بجزيرة هواي الكبيرة وعدد المهمات دي مش هين كتير جدا والحقيقة معظمهم ممتع ومش بياخد وقت ، والنوع التاني من المحتوى الجانبي وهو الانشطة الجانبية وهي عبارة في الغالب عن العاب جانبية ومش بتكلم هنا عن العاب الاركيد اللي معروف سلسلة العاب ياكوزا بتقدمها مع كل اصدار، ولكن احنا بنتكلم عن ألعاب جانبية مقتبسة من سلاسل العاب مشهورة زي بوكيمون و انيمال كروسنج معمولة بستايل لعبة ياكوزا، مثلا في لعبة شبه العاب البوكيمون بتجمع فيها مقاتلين من الجزيرة وتقدر تنافس بيهم في البطولة الخاصة باللعبة دي وتتحدى المدربين التانيين المنتشرين بالجزيرة، اما اللعبة اللي شبه انيمال كروسنج فدي اسمها Dondoko island فدي بقى حوار لوحدها لان ممكن حرفيا تسييب اللعبة الاساسية وتقضي في اللعبة الجانبية دي ساعات طويلة بدون مبالغة وده لانها معمولة صح والفكرة نفسها حلوة ولايقة كتير على جو لعبة ياكوزا واحداث اللعبة، انت هنا بتحاول تعمر جزيرة من اول وجديد عشان تجذب ليها السياح من تاني على نفس طريقة اللعب بلعبة نينتندو المشهورة انيمال كروسنج، في العاب تانية جانبية قدمتها برده اللعبة بس تجنبا للحرق وعشان منطولش عليكم نسيبكم افضل تستشكفوا باقي الامور الجانبية بنفسكم، ويالا بينا علطول نتكلم على طريقة اللعب.

أسلوب اللعب

اللعبة زي ما ذكرنا في الاول على نفس اسلوب الجزء السابع ، اللعبة بتقدم اسلوب لعب الاربيجي الياباني بنظام تعاقب الادوار واللي بيخلي طريقة اللعبة استراتيجية مع وجود شوية اضافات جديدة خلت طريقة اللعب مش مملة بالعكس بقى فيها حماس واكشن اكتر وده لان رتم المعركة مع الاعداء بقى اسرع من الجزء السابع مع إضافة جديدة لاول مرة وهي انك تقدر تتحرك باللاعب بتاعك وصحابه في البارتي لاي اتجاه عكس الجزء السابع واللي كان مقيد في مكانه متقدرش تحركه، الاضافة دي لوحدها غيرت بشكل كبير من استراتيجية اللعبة وخلت الواحد يِفضّل ينقل مكانه جنب الحاجات اللي يقدر يتفاعل معها اللاعب ودي الاضافة الجديدة التانية وانك تقدر تتفاعل مع اكتر من حاجة حوليك وتضرب بيها الخصم زي العاب ياكوزا القديمة . ميزة الوظايف او الـjobs  ترجع من تاني من الجزء السابع المرة دي مع وظايف اجدد واكتر والـjob  هنا عبارة عن مجموعة من الـ skills او المهارات بيكتسبها اللاعب مع زيادة كل ليفل للـ job الخاصة بيه، والشئ الجميل في اللعبة هنا انك مثلا لو وصلت لليفل عالي في job معينة وفتحت job جديدة تقدر تاخد معاك عدد لا بأس به من المهارات اللي فتحتها في الـjob القديمة وتنقلها للـ job الجديدة.

جانب تاني مهم من الجيم بلاي مش متعلق بالمعارك ولكنه ضروري عشان تقدر تطور نفسك في معارك الاعداء والزعماء وهو تكوين روابط او bonds  مع صحابك اللي في البارتي باللعبة ففي كذا طريقة تزود بيها ليفل البوند معاهم زي مثلا تديهم هدايا معينة مناسبة لشخصياتهم او تفتح معاهم محادثات معينة منتشرة في خريطة اللعبة، او تقضي معاهم وقت مخصص في النادي واللي بتعتبره اللعبة بيت اللاعب. فاول ما توصل البوندز دي لليفل معين بتفتح طرق جديدة للتفاعل بين وصحابك في البارتي أثناء المعارك زي ضربات الكومبو وضربات الفينشر. من كلامنا الكتير عن الجيم بلاي ممكن يبان ليك معقد، هو ممكن يبان عميق حبتين ولكنه في المقابل لو اتقنته صح هيتحول معاك لجيم بلاي ادماني.

أخيراً حديثاً عن الجرافيكس والأداء التقني

فاللعبة كعادة العاب ياكوزا الاخيرة واللي بتستعمل محرك Dragon Engine  ، فاللعبة بتقدم رسومات واقعية وبدقة عالية ومع ذلك المحرك مش بيتطلب عتاد قوي لتشغيل اللعبة على اعلى الاعدادات ، وده ميزة المحرك الجديد اللي شغال بيه استوديو التطوير انه خفيف على عتاد أجهزة الكمبيوتر واللي جربنا عليها اللعبة ومواجهتناش اي مشاكل تقنية على الاطلاق، بالعكس اللعبة اداءها كان ممتاز بمعدل اطارات ثابت طول الوقت. العيب الوحيد اللي ممكن الوم عليه مطورين اللعبة وأنه محظاش بالاهتمام الكافي منهم وهو ان اصوات بعض الشخصيات الجانبية باللعبة كانت مش لايقة تماماً على وشوش اصحابها، مش عارف هل ده بسبب ان اللعبة معمولة في الاصل باللغة اليابانية واللغة الانجليزية كانت لغة تانية ، فمهتموش بالاداء الصوتي للكاست الانجليزي بالشكل الكافي، الحقيقة مش عارف ولكنه ما زال عيب لانه في بعض الاوقات كان بيفصلني من اللعبة.

تقييمي النهائي

9.5/10

ياكوزا انفنينت ويلث هي التتمة المثالية للجزء السابع ومعتقدش كان ممكن يتقدم تقديم تتمة أفضل من كده بالسلسلة، اللعبة علت على الجزء السابع في كل حاجة قصة بمحتوى دسم سواء قصصي او جانبي ، تعمق اكتر بالشخصيات ، نهاية مستحقة ووداع مثالي لبطل اللعبة القديم كاريو كازومي ، والقصة مش استثناء ، الجيم بلاي كمان شهد تحسينات مرحب بيها وأعتقد اللعبة أثبتت نفسها بأن مستقبل السلسلة في الخطوة الصحيحة.

و تقدر تطلب اللعبة من خلال موقع جيمزاوي او اي لعبه تانيه تحبها و هتوصلك في اسرع وقت ممكن و بس كده اتمنى تكونوا استمتعتم بالمراجعة !