Frostpunk 2 هي تكملة للجزء الأول اللي صدر في 2018 في تجربة فاجأت الكل لما نزلت واللي كانت تعتبر فكرة جديدة وقتها اننا نشوف لعبة استراتيجية مع ادارة موارد مفيهاش غير عدو واحد بس وهو الصقيع فهل هتقدر تبني مدينتك وتتغلب عليه ولا هو اللي يغلبك وتنتهي رحتلك في بناء المستعمرة ، وفي الحقيقة لما جربت اللعبة وقتها الصقيع فعلاً غلبني وطبعاً ده كان بسبب اني أخدت بعض القرارات الخاطئة وانا بلعب ، فلما رجعت العبها تاني بدأت فعلاً أفهم اللعبة بشكل أفضل ووصلت معايا مرحلة لعبها لدرجة الادمان ، فهل الجزء الثاني نجح في انه يرجعلي نفس الشعور ، فده اللي هنشوفه في مراجعة اللعبة.

رغم إن أجواء اللعبة ما زالت هي نفسها أجواء Frostpunk  ، ولكن Frostpunk 2 فيها اختلاف كبير عن جزئها الاول ، اللعبة بتقدم معها طورين للعب طور القصة بيمتد معاك لخمسة فصول و طور يوتوبيا utopia وده الساند بوكس او الفري مود الخاص اللعبة ، واللي تقدر تبني فيه مستعمرتك براحتك بدون قيود، اللعبة بشكل اساسي بتقدم من خلال طور قصتها تجربة بقاء ضد الصقيع ، فكرة الجيم بلاي كلها بتتمحور حول مولد الطاقة الضخم والوحيد في مستعمرتك واللي بينقذ الافراد من الصقيع القارص عن طريق انه يوصل التدفئة في البيوت اللي بتنشئها في المستعمرة والمباني المختلفة اللي بتحتاج تبنيها لسد احتياجتهم، اللعبة تقدر تبني فيها مباني اساسية اسمها districts  ودي اللي بتبدأ معاك باللعبة وهي عبارة عن بلوك لحوالي 6 مباني جنب بعض اول ما بيتبني على مورد طبيعي من الموارد اللي بتقدمها اللعبة بيستخرجه زي الغذاء والفحم او البترول اللي عبارة عن مصدر طاقة المولد والخشب اللي بتسميه اللعبة materials والحديد واللي اسمه في اللعبة prefabs ، وطبعا عشان تقدر تشغل المباني فهي بتحتاج طاقة من المولد وكمان بتحتاج ايد عاملة واللي توفرها عن طريق انك تزود عدد الافراد في المستعمرة وتبني بيوت اكتر تكفي عدد الاشخاص اللي عندك في المستعمرة .

طبعاً ده باختصار شرح لاساسيات اللعبة وازاي تقدر تبدأ تلعبها بشكل صح . ولكن بعد كده هتلاقي ان اللعبة بتتشعب لحاجات تانية بجانب ادارة الموارد وبناء  الحاجات الاساسية لافراد المستعمرة ، وهي انك محتاج تتوسع .. فاللعبة بقت تقدم نفسها على انها لعبة grand strategy مش مجرد بناء مباني فردية وخلاص بتسد احتياجات الافراد زي الجزء الاول، و ده لان في  انواع مباني تانية قدمتها اللعبة معاها في الجزء التاني منها  زي logistics ،وده بتحتاج تبنيه في اماكن معينة بس في المستعمرة واللي بتقدر منهم تجند اشخاص ترسلهم خارج المستعمرة سواء هيكتشفوا ليك موارد او يفتحوا أماكن جديدة ممكن تعمل منها مدينة جانبية مع مستعمرتك الأساسية واللي بيبقى اسمها colonies وتربطهم ببعض من خلال طريق بري وكمان طريق جوي لو قدرت تستشكفه في قائمة البحث والتطوير idle tree ، واللي توسعت هي كمان في الجزء ده فبقت تشمل معاها مباني جانبية ودي مباني بتضيفها على المباني الاساسية اللي اتكلمنا عنها فوق، زي مثلا مبنى بيحول الفحم لبترول ده بتقدر تضيفه على المبني الاساسي اللي بيستخرج الفحم، فيحوله علطول من جوه المبني نفسه لبترول مسال ، كمان ممكن تبحث طرق جديدة لزيادة كمية الموارد اللي بتستخرجها من المستعمرة.

واخر حاجة ممكن تستحدثها من شجرة البحث والتطوير قوانين جديدة ، وهنا القوانين الجديدة يإما تقدر تفتحها عن طريق شجرة البحث والتطوير او عن طريق الاحداث العشوائية بين الاشخاص وبعض داخل المستعمرة وده بيسبب في اللعبة شئ سلبي اسمه tension وده تحاول تقلله قدر الامكان لإنه لو زاد  بيسبب ذعر الافراد في المستعمرة خاصة لو مفيهاش قوانين أقرتها لبعض المواقف المعينة والحساسة زي ادارة عمالة الاطفال والرعاية الصحية ، الخ.. اللي عجبني في اللعبة هنا بنقطة القوانين انك بعد ما تفتح قانون بشجرة البحث والتطوير لازم تبني حاجة اسمها city hall ودي بيكون فيها الكونجرس او اعضاء مجلس الشعب واللي بدورهم بيصوتوا على القانون اللي انت فتحته من شجرة التطوير وبيعرضلك زي ما واضح في الصورة تحت نسبة القبول والرفض في التصويت ، وبما إن المجلس بينعقد  كل 10 اسابيع باللعبة ، فلو مقترح القانون اترفض فبتستنى 10 اسابيع جداد، لو اتقبل بيطبق تلقائي في وقتها.

وهنا نبص لنقطة تانية قدمتها اللعبة بشكل جميل وهي الـfactions او الجماعات والفرق اللي موجودة في المستعمرة ممكن يوصل لعددهم لـ 4 او اكتر على حسب انت ممكن تكون إستكشفت factions جديدة او لاء ، طبعا كل جماعة بيبقى ليهم عدد معين من اجمالي عدد افراد المستعمرة وكل ما عددهم زاد كل ما كان تأثيرهم اكبر في مجلس الحكم اللي بيأثر على تمرير القوانين ، وكمان في بعض الخيارات اللي بتقدر تكسب ثقتهم فيها عن طريق منحهم فلوس او اعطائهم حق اختيار القانون اللي عايزين يمرروه في جلسة انعقاد المجلس الجاية او مثلا تلغي قانون كنت قررته قبل كده وطلع مش من مصلحتهم ، وهكذا كل جماعة بيبقى ليها نظرة مختلفة عن التانية لطريقة ادارة المستعمرة والقوانين اللي عايزينها ومباني البحث والتطوير وأولويتها.

الموسيقي التصويرية فهي روعة زي الجزء الاول ظاهرة ومميزة فيها طابع اللعبة الطابع الكئيب اللي بيحسسك بجو الصقيع والوحدة ، بالنسبة للرسومات فتعتبر زي الجزء الاول محستش باي اختلاف كبير او ملحوظ ، ولكن عندي بعض الملاحظات في الجزئية دي وهو ان مش بقدر اعمل زوم بحرية على المباني ، يعني المباني مفيهاش تفاصيل تقدر تشوف حياة العمال فيها وهما بينتجوا ، انت ممكن بس تعمل زوم على المبني نفسه او على الواجهة من اعدادات المبنى. فغياب التفاصيل دي خلت المباني بالنسبة لي مفيهاش روح شوية ، مجرد بس مباني بتبنيها وخلاص وده راجع لكسل المطور بعض الشئ انه مشتغلش على تفاصيل المباني بشكل كافي .

وفي عيب كمان حابب اذكره ممكن محدش يلاحظه الا لو لعب الجزء الاول، انا كتبت فوق ان اجواء اللعبة ما زالت هي Frostpunk بس ما زال الجزء الاول برده افضل من ناحية الاجواء لانه كان بيخليك تهتم اكتر بالافراد اللي معاك بالمستعمرة وده لان عددهم كان اقل بكتير من اللي بنشوفهم هنا في الجزء التاني ، حتى موت الشخصيات كان شئ كبير ومؤثر في الجزء الاول ، بالجزء التاني هيجيلك اشعارات كل فترة ان في ناس كتير بالعشرات او ممكن في بعض الحالات بالمئات ماتوا بسبب البرد او المرض او بسبب ضغط العمل لو انت فعلت حالة الـ emergency او الطوارئ في المباني عشان تنتج اكثر ، والحل هنا بسيط فتقدر تعوضهم عن طريق مباني الـ housing. وكمان في مشكلة واجهتها اتمنى تتحل بتحديث جديد وهو ان لو في faction قررت تغير قانون سبق وانت أقريته ، المفترض تظهر ليك شاشة تبينلك القانون الجديد والقانون القديم ومزايا وعيوب الاتنين ، لكن انت بتقرر قانون عشان تراضي faction معينة تكتشف انه بدل وحل مكان قانون قديم كان مكانه.

أخر سلبية او ملحوظة، وهي بتبدأ تظهر في اخر اللعبة لو بتلعب طور القصة  ، فانا كنت بلعب على الصعوبة العادية المتوسطة مش السهلة اقل حاجة ومع ذلك حسيت بعد الفصل الثالث اني فتحت كل حاجة تقريبا باللعبة واللعبة بتتلعب بنفسها بدون تدخل مني فمش حاسس اني محتاج اكمل غير بس عشان اشوف الايفنتات أوالاحداث العشوائية اللي بتظهر باللعبة ، رغم ان اللعبة عايزاك تكمل لكن زي ما واضح في الصورة تحت ان كل حاجة في اللعبة أصبح متوفر منه معايا وبزيادة ، طبعا الكلام ده يتحل لو زودت الصعوبة شوية بس كان نفسي يكون في balance  أو توزان شوية بالصعوبة العادية اللي معظم الناس بتلعب عليها .

التقييم النهائي

8/10

في النهاية رغم المشاكل القليلة اللي ذكرتها في نهاية المراجعة، إلا إن Frostpunk 2 حبيتها جداً وكانت تجربة مميزة لما جربت طور القصة وهتبقى تجربة مميزة اكتر لما ابدء العبها تاني بحرية اكبر بدون قيود القصة في  طور  الفري بلاي utopia ، الجزء الثاني من لعبة Frostpunk نجح في إنه يصنع تجربة منفصلة خاصة بيه و  مختلفة اختلاف كبير عن الجزء الاول. وفعلاً تحسه  جزء جديد sequel مش مجرد إضافة أو تحسينات عن الجزء اللي فات ، ورغم النجاح الطاغي اللي حققه الجزء الاول كان ممكن المطور يكمل عليه في الجزء التاني بتغييرات بسيطة ويمشي على خطاه، ولكن تحية للمطور انه قرر يمشي في شئ جديد بتوجه مختلف في الجزء الثاني.