مراجعة Elden Ring، موعدنا مع Skyrim الجديدة

Elden Ring هي من تصنيف الألعاب أكشن أربيجي و تعتبر امتداد طبيعي لأجزاء Dark Souls وتقدر تسميها دارك سولز 4، لو لعبت أي أجزاء من السولز هتلاقي نفسك مندمج علطول في اللعبة من غير أي مقدمات .. ومع ذلك اللعبة قدمت تغييرات كبيرة تكاد تكون هي الأكبر والأجرأ على الإطلاق بتاريخ ألعاب الأستوديو الياباني FromSoftware  .. اللعبة نقلت نفسها من مجرد لعبة خطية ببيئة شبه مفتوحة على بعض، إلى لعبة عالم مفتوح بالكامل ليك الحرية تعمل اللي انت عايزه وتبدأ من أي نقطة انت عايزها، حرفياً اللعبة مش ماسكة ايدك و جابراك على أي حاجة. تعالوا نبدأ مراجعة اللعبة بالكلام عن الكلاسات اللي اول حاجة هتظهرلك لما تدخل على اللعبة اول مرة.

الكلاسات في اللعبة عبارة عن حاجة واحدة تقريباً وهي نقط مهارة أو Attributes وهما حوالي 8 نقط .. الـ vigor ودي بتركز على عداد الصحة و الـ Mind بتركز على عداد السحر والـ Endurance بتركز على عداد اللياقة أو Stamina والـ Strength فايدة تطويرها انك بتقدر تلعب بأسلحة ثقيلة بتتطلب نقط معينة من الـStrength عشان تستفيد من قدراتها، والـ Dexterity نفس الكلام فيه بعض الأسلحة بتستفيد منها، ولو هتلعب بأسلحة الـmeele ركز على كلاس تكون فيه المهارتين السابقتين دول عاليين، أما لو هتلعب بالسحر فركز على تطوير النقط دي واللي هما الـ Intelligence والـ Faith والنقطة التامنة الأخيرة اللي تقدر تطورها وهي الـ Arcane ودي زي بمثابة كده الحظ بتقلل من إحتمالية موتك بالضربة القاضية أو من ضربة واحدة .. كمان لما تزودها بنسبة معينة هتظهرلك Items نادرة من الأعداء اللي بتقتلهم.

الاختلاف ما بين الكلاسات هو طريقة توزيع النقط اللي ذكرناها، فكل واحد مناسب لطريقة لعب معينة زي انك مثلاً توازن النقط و تلعب بالسحر مع melee خفيف او تلعب بشكل كامل على الـ melee وتتجنب السحر زي ما انا عملت، وده لان السحر مش هنقدر نقول ضعيف، بالعكس ده تقريباً أفضل جزء للـ souls ممكن تلعب فيه بالسحر بسبب خيارات كتيرة ومنوعة بتقدمهالك طريقة اللعب دي عن الأجزاء السابقة واللي ساهم فيها طبعاً العالم المفتوح لكن عتابي على السحر في اللعبة هو التوازن لان زي ما شرحنا ان عداد السحر أو الـFP بينقص على حسب التعويذة او السحر اللي بتستخدمه فطبيعي طالما معاك سحر استنفذ العداد بشكل أكبر مفترض يكون أقوى من السحر اللي بيستنفذ طاقة قليلة، لكن هنا لاء تقريباً مش هتحس بفرق يذكر خالص، واعتقد مشكلة التوزان في قوة الأسحار هتتحل في الباتشات الجاية للعبة. السحر رغم كده مفيد فعلاً و overpowered في بعض الأحيان لما تيجي تستخدم أسلحة الـ melee اللي بتتعمد عليه في الضربات.

لو هنتكلم عن الحاجات الجديدة في Elden Ring واللي تميزها عن ألعاب الاستوديو السابقة:

-العالم المفتوح والاستشكاف الغير محدود، انا أول تجاربي مع ألعاب السولز كانت دارك سولز 1 في 2012 تقريباً،  لعبتها بعد Elder Scroll Skyrim وكنت بستغرب واتخيل لو كانت اللعبة دي اتعملت على نفس نظام سكايرم استشكاف وحرية غير محدودة، وتقريباً بعد 10 سنين الحلم اتحقق اخيراً وفعلاً المطور FromSoftware  قدر يقدم خلطة جديدة على ألعابه بتقديم تجربة العالم المفتوح الشاسع، وممكن يبان العالم ليك فاضي من فيديوهات الجيم بلاي لكنه عكس كده تماماً، العالم متصمم بحرفية وعناية شديدة ، كل مكان في اللعبة هتلاقي موجود بيه Item مستنيك تستشكفه  او enemy  تواجهه او حتى لغز تحله، ممكن npc تكلمه ويفتحلك كويست جديد، العالم مميز بشكل كبير ومليان حاجات كتير تستكشفها من كهوف و قلاع و أماكن كده موجودة تحت الأرض بتبقى مخصصة للزعماء بس ..

 بكل سهولة تقدر تلاحظ الليفل ديزاين في اللعبة او طريقة تصميم المراحل وطريقة التقدم نفسها فعلاً حاجة تعجز دماغ واحد عادي زيي تفهمها، عبقرية بشكل مدهش كل حاجة فعلاً مدروسة .. لسه الاختصارات برده موجودة وفتح المناطق على بعض لكن مش بنفس روعة دارك سولز الأولى، لكن ما زالت حاضرة هنا وبقوة. في كمان نقطة ممكن ناس متلحظهاش أن العالم ديناميكي وبيتغير من حوليك، مش مجرد تعاقب ليل ونهار وخلاص، يعني في مناطق لما تتجول فيها  بالليل هيظهرلك زعماء مش هيظهروا لو كنت في نفس المكان بالنهار.

لعبة Elden Ring بالراحة هتحط فيها من 80 لـ 100 ساعة عشان تخلص استشكاف كل حاجة فيها وصدقني هتتفاجأ انك مش هتحس بيهم بسبب الجيم بلاي اللي يعتبر بالنسبة لي ما زال أفضل جيم بلاي على الإطلاق في وقتنا الحالي .. انيميشنز وطريقة الضربات الادمانية و الـ dodge أو الـparry والتحدي اللي بيدهولك الخصوم، لان عكس أي لعبة تانية ، كل enemy هنا ليه شخصيته وهيبته مش مجرد حاجة تضربها وخلاص لازم تدرس حركاته الأول وتشوفها وبعد كده تبدأ تلعب على نقط ضعفه وده اللي بيخلي الجيم بلاي ادماني لبعض الناس زي حالاتي ومختلف 180 درجة عن الألعاب اللي من نفس الجنرا احم .. Assassin’s Creed  Valhalla.

–الحصان، بصراحة انا كنت متخوف من إضافة الحصان باللعبة لإني كنت حاسس انه هيبوظ التجربة او اضافته مجرد شيء تسليكي للتنقل عليه ، لكن عكس توقعاتي تماماً الحصان يعتبر بالنسبة لي هو أساس تجربة اللعبة، معظم الـ fights اللي خضتها كانت عليه، التحكم بالحصان نفسه حاجة كده في نفس ليفل ريد ديد شيء يخليك مستريح عليه جداً ومش عايز تسيبه، الـ Double jump اضافته كانت موفقة جداً وفعلاً أعطت  لتصميم المراحل كده انتعاشة جديدة لان في مناطق باللعبة مش هتوصلها غير انك تعمل platforming  بالحصان بمعني انك تحاول تنط من مكان لمكان من غير ما تقع.

وطبعاً السؤال اللي كتير هيسأله، هل اللعبة فعلاً بنفس صعوبة الألعاب اللي قدمها المطور ؟

بكل اختصار اللعبة مصممة انها تقدملك تحدي فانسى فكرة انك مش هتتنفخ فيها، لان اللعبة ماشية بمبدأ هتتنفخ لحد ما تتعلم 😀 وفعلاً الواحد بيتعلم وبيبقى احسن واحترافي اكتر في اللعب لدرجة بعد ما تخلصها هتبقى باصص للألعاب التانية نظرة شفقة! لكن رغم التحدي اللي بتقدمه اللعبة، فهي بكل جدارة أسهل لعبة قدمها لينا المطور واللي أضاف شوية حاجات جديدة على الجيم بلاي سهلته نوعاً ما زي:

Spirits ودي أرواح بتعملها استدعاء وبتبقى معاك علطول تساعدك، وبتستخدم شريط السحر لما تستدعيها، وفي منها أنواع كتير وكل ما كان النوع أقوى كل ما هيستهلك نسبة أكبر من شريط السحر او الـFB ، فبدون أي حاجة تانية ده لوحده كفيل انه يسهل عليك اللعبة شوية لانه بكل بساطة بيسبب للأعداء نوع من التشتيت، بحيث تعرف تضربه وتقضي عليه براحتك ده غير انك ممكن تطورها وتقوي ضرباتها.. برده زي الألعاب اللي فاتت لسه متاح انك تستدعي NPC في أوقات معينة لما تقابل بعض الزعماء الرئيسين.

Ashes of War ودي إضافة جديدة اشبه بالـSkill بتضيفها على السلاح او الدرع وبتفعلها عن طريق الـR2  أو الـRT وليها أنواع كتير ، وغالباً اكترها بتبقى ضربات كومبو زيادة مع ضربات السلاح وبتزود الـdamage على الاعداء بدرجة كبيرة، عن نفسي مكنتش بستخدمها كتير لان الـRT كنت بستخدمه في الـparry بالدرع اللي بستخدمه مع السلاح الأساسي لأن لو عملت parry قبل ما الخصم يضربك بلحظات بتعمله Stun وتقدر بعدها تعمله حركة أشبه بالـfinish بتستنزف من هيلثه جامد.

Great rune ودي إضافة جديدة ـ عبارة عن شيء كده بتاخده من الزعماء الرئيسين بالقصة لما تقتلهم ولما ترّجع لحجر الـ rune ده طاقته بيديك قوة كبيرة جداً بتختلف طبعاً قدرته من زعيم للتاني.

طبعاً في حاجات تانية مسهلة اللعب اكتر في Elden Ring عن الأجزاء السابقة نقدر نسميها “quality of life” زي أماكن توزيع نقاط الحفظ أو البون فاير زي ما معروف في أجزاء السولز أو هنا باللعبة اسمها Sites of Grace وده المكان اللي بتسترجع فيه صحتك وتقدر تعمل respawn منه لما تموت ومنه بتطور عتادك، كمان ليها ميزة ممكن كتير ميعرفهاش وهي أنها بتدلك على الطريق الصحيح للتقدم باللعبة فهتلاقي طالع منها شعاع اصفر تجاه المكان المفترض تتوجه ليه .. برده بقى موجود نظام أشبه بالـcheckpoint وهي تماثيل صغيرة اسمها Statue of Marika وغالباً بتبقى موجود قبل ما تواجه زعيم بحيث لما تموت ترجعلها علطول بدل ما ترجع للـ Sites of Grace واللي غالباً بتبقى أبعد شوية .. حاجة كمان مسهلاها اللعبة وهي الأرواح واللي اسمها هنا في اللعبة الـ runes واللي بتجمعها لما تقتل الأعداء وبتستفيد منها انك بتطور بيها نقاط الـ Attributes بتاعتك اللي شرحناها فوق ،وبتشتري بيها أي حاجة من الـnpcs التجار، وزي ما معروف في ألعاب السولز لو مت بتفقد كل الـrunes دي لكن هنا المميز انه مش بيبقوا في حوذة العدو اللي بيقتلك زي مثلاً Bloodborne واللي لازم تقتله عشان تسترجعهم أو زي الأجزاء القديمة محبوسين مع الزعيم اللي لازم تقتله عشان تاخدهم .. في Elden Ring ممكن تاخدهم قبل ما تدخل تواجه الزعيم مرة تانية ده لو كان مكان مقفول، اما لو في العالم المفتوح بسهولة معاك الحصان تقدر تاخدهم مرة تانية بسرعة وتجري بدون ما تتواجه مع الـboss لو قوي عليك. فكل الحاجات دي ممكن تبان ليك بسيطة، بس فعلاً سهلت اللعبة بشكل كبير عن الأجزاء اللي فاتت كنوع من الترحيب للاعبين الجدد على السلسلة.

بالنسبة لقصة Elden Ring فطبعاً مش حابب احرق عليكم حاجة بس هلخصها ليكم بشكل سريع، أحداث القصة بتدور في عالم خيالي اسمه The Lands Between، العالم ده بتحكمه الملكة “ماريكا” وأولادها الستة اللي يعتبروا أنصاف ألهة والعالم متقسم لـ 6 مناطق، كل واحد منهم بيحكم منطقة منهم وفي حادثة غريبة انفجر خاتم إلدن وتحول لشظايا حملت معاه قوة غامضة تناثرت في أرجاء المملكة بمناطقها الستة، وحولت ذرية الملكة ماريكا لمسوخ أو وحوش أظهرت أقبح ما فيهم، وهيجي دورك انت الـ Tarnished أو “المعتم” هترجع الأمور لوضعها الصحيح مع مواجهتك لذرية الملكة ماريكا عشان تكون انت الـelden master. أتمنى يكون الشرح دقيق لان الكلام ده رغم انه ممكن تشوفه سطحي لكنه حتى مش بيتشرح ليك في مشهد واحد على السريع او شيء من القبيل، الكلام ده بتجمعه وانت بتتقدم في اللعبة.

طبعاً لو انت لاعب سولز قبل كده فأنت مش هتتفاجئ بنظام التقدم او طريقة شرح قصة Elden Ring لانها متغيرتش زي ما هي غامضة بشكل ممتع جداً صعب تشوفوه في أي لعبة تانية، بالنسبة لو انت لاعب جديد فهنا القصة مش بتشرح نفسها، لازم انت بنفسك تكلم الـ npcs أو الشخصيات اللي هتقابلها وتعرف اكتر عن عالم اللعبة لان مفيش مشاهد سينمائية هتظهر قدامك غير تقريباً لما تواجه زعماء القصة تحديداً،بحيث تعرفك عنهم اكتر وشخصياتهم وعلى طارئ الزعماء أو الـ bosses فعددهم في اللعبة.. تقريبا ملهمش عدد حرفياً ! كتيير بشكل مش معقول في كل حتة بالخريطة هتلاقي boss وطبعاً مع كترة الـbosses هتلاقي انهم متكررين زي مثلاً التنانين هتلاقي تنين بيطلع سحر ، تنين بيطلع نار .. هكذا نفس الكلام ممكن تلاقي enemy عادي متحول لـ boss بس مع وجود قدرات أكتر وطريقة لعب أشرس بحيث ترفع التحدي أمام اللاعب لكن طبعاً ده مش معناه مش هتلاقي bosses مميزة، موجود طبعاً زعماء هتفضل تفتكرهم مع الوقت بسبب التحدي الكبير اللي بيقدموه خصوصاً زعماء القصة.

لعبة Elden Ring مش سنجل بلاير بس، ممكن تلعبها اونلاين سواء PVP ضد لاعب أو Co-op  تدخل مع حد تساعده او تستدعي حد يساعدك ورغم ان اللعب الجماعي مش بيتوفر علطول أول ما تبدأ اللعبة،  لكن بقى فيه تقدم عند أستوديو FromSoftware  في سهولة تقديم فكرته للاعب عن الألعاب اللي فاتت اللي أصدرها واللي كان ممكن تصنع قنبلة ذرية اسهل من انك تدخل تلعب مع حد أونلاين.

هنا في Elder Ring انت محتاج item اسمه Furcalling Finger Remedy لو عايز تستدعي ناس اونلاين تساعدك (بتبقى عبارة عن علامة باللون الأصفر)، و item اسمه Tarnished’s Furled Finger لو انت عايز تساعد الناس وتروح العالم بتاعهم اما لو خلصت اللعبة وشايف نفسك وعايز تدخل تحديات PVP ضد ناس تانية فهتحتاج item اسمه Duelist’s Furled Finger وكل ده بيبقى متاح معاك من بداية اللعبة اول ما تبدأ تدخل للعالم المفتوح.

لو هنتكلم عن سلبيات Elden Ring فمفيش تقريباً غير ممكن حاجة واحدة ضايقتني فيها وهو بما ان اللعبة اتحولت لعالم مفتوح كان لازم يكون فيها قايمة مخصصة للـquests، وانا متفهم انها متعة بحد ذاتها انك تكون تايه في اللعبة وتقعد تلف فيها بدون كويست معين قدامك.. لكن زي ما اتكلمنا ان اللعبة فيها npcs وشخصيات كتير هتقابلها وكل شخصية بتبقى محتاجة حاجة عشان تبدأ الكويست الخاص بيها، ده غير أنهم أوقات بيختفوا وبيظهروا في أماكن تانية ودي كانت حاجة بتميز وانا حبيتها في الأجزاء القديمة ولكن بسبب خطية الألعاب دي فكان سهل تندمج مع المهمات وسهل تتعقبها وتخلصها كمان، لكن هنا الوضع مختلف تماماً مع الاستكشاف والضياع في العالم المفتوح الواسع، بسهولة جداً هتفوت عليك المهمات دي لانك صعب تفتكر كانوا في أي جزء بالخريطة أو على الأقل كان مطلوب منك ايه تعمله! ورغم ان اللعبة بتقدملك نظام الـWaypoint (الخطوط الزرقاء اللي في الصور) ومفيدة فعلاً بس حرفياً هتلاقيها useless وملهاش لازمة مع الوقت مع ضخامة الخريطة والأماكن اللي هتبدأ تظهر عليها ومن كتر العلامات دي لو حطتها هتوهك أكتر .. فكان هيبقى حاجة كويسة لو كان فيها قايمة منفصلة للكويستات بحيث تبقى عارف راسك من رجلك في اللعبة.

بالنسبة للأداء التقني فانا لسوء حظي جربتها على أضعف جهاز ممكن “اكسبوكس ون” لكن رغم كده اللعبة كانت شغالة بشكل كويس مع أداء ثابت بدون دروب للفريمات الا في أوقات قليلة أوي لو في مجموعة  أعداء كتير بتضربهم على الشاشة.

الجرافيكس في اللعبة اكيد مش أفضل حاجة في وقتنا الحالي، بس مش دي اللعبة اللي تشتريها عشان تدقق في الجرافيكس لانها بتهتم بحاجة احسن من الجرافيكس وهو “الرسم الفني” وفعلاً اللعبة تعتبر لوحة فنية جميلة مع الألوان الزاهية والأشجار والسماء وموسيقى العالم المفتوح الهادية شغالة في الخلفية حاجة تغنيك عن أي جرافيكس ممكن تشوفه، طبعاً الألوان الجميلة دي والموسيقى الهادية بيتحولوا في لمح البصر لفيلم خيال أو فيلم رعب على حسب المنطقة اللي بتستكشفها وطبعاً مش هنحرق حاجة لان في مناطق كتير هستكشفها قدامك في اللعبة بجانب العالم المفتوح الزاهي الجميل اللي بتشوفه في الصور هنا.

تقييمي للعبة 10/9.5

هل هي أفضل ألعاب السنة؟ بكل تأكيد، أفضل ألعاب الجيل؟ بسهولة تحطها في الـTop 10، لكن أفضل لعبة أربيجي عالم مفتوح على الإطلاق؟ لا صعب .. لسه اللقب ده من نصيب سكايرم Elder Scroll V اللي بالنسبة لي تعتبر افضل لعبة عالم مفتوح مرت عليا.

للتذكير، اللعبة مش موجود فيها لغة عربية (لحد يوم كتابة الريفيو) ولو عايز تشتريها من جيمزاوي باللينك هنا.