.svg)
مراجعة DOOM Eternal: The Ancient Gods – Part Two
بصراحة انا مش عارف أبدأ المراجعة ديه ازاي، هل أبدأ واقول ان ده أفضل محتوى DOOM اتقدم في التاريخ ولا أقول إن إستوديو id Software قدر إنه يبدع في تقديم قصة فيها Plot Twists محدش كان يقدر يتخيلها في الدنيا !
خلينا نمسك حاجة حاجة ونتكلم عليها لإن اضافة The Ancient Gods Part 2 ديه بتقدم كمية تفاصيل خرافية للعبة DOOM Eternal سواء من ناحية القصة أو أسلوب اللعب.
انا هتكلم شوية عن القصة وده معناه إن هيكون في شوية حرق للعبة DOOM Eternal وللإضافة الأولى The Ancient Gods part 1، لو فاكرين فا في نهاية الإضافة الاولى الـ DOOM Slayer أخد روح الـ Dark Lord وكان هدفه إنه يرجعه للحياة مرة تانية، طبعاً هو مش عايز يساعد الشياطين بل هو عايز يخليه قدامه عشان يقدر يقضي عليه تماماً.
إضافة The Ancient Gods Part 2 بتبدأ والـ Slayer بالفعل بيصحي الـ Dark Lord بس بما إنهم في مكان مقدس فا مينفعش إنه يقتله، الـ Dark Lord بيقوله إنه هيستناه في مدينة Immora في الجحيم. وهنا بنبدأ إننا نروح نجمع جيش ونعرف الناس خطتنا عشان نوصل لمدينة Immora ونواجه الـ Dark Lord في حرب أخيرة. لو قدرنا نقتله، كل الشياطين المتواجدة خارج الجحيم هتموت تماماً وبكدة هنطهر العالم كله منهم.
زي مالإستوديو وضح فالإضافة هي نهاية لقصة الـ DOOM Slayer الي بدأت في 2016 وخليني أقولكم إنهم فعلاً نجحوا ينهوا القصة بشكل مثالي وبقفلة محدش كان متوقعها إطلاقاً !
إضافة The Ancient Gods Part 2 بتقدملك 3 مراحل جديدة، كل مرحلة منهم ليها طابع وشكل مختلف بيميزها عن المراحل التانية، أول مرحلة هي World Spear وديه الأطول وهتاخد منك حوالي ساعة وربع أو ساعة ونص عشان تخلصها، كل مرحلة من المراحل التانية Reclaimed Earth و Immora هياخدوا منك نص ساعة لو انت محترف في اللعبة ومواجهة الـ Dark Lord هي كمان هتخلص معاك في نص ساعة تقريباً، يعني الإضافة حوالي 3 ساعات زي الإضافة الأولى بالظبط وده وقت منطقي بالنسبة لسعرها الي هو 20 دولار.
من ناحية أسلوب اللعب فالإضافة بتقدم مجموعة كبيرة من الشياطين الجديدة الي بتضيف مواجهات مختلفة وهتخليك تستخدم Mods مختلفة من الأسلحة بشكل أكبر. على سبيل المثال الإضافة بتقدم Stone Imps وبتقدر تموتهم بإستخدام الـ Auto Shotgun والمود ده مكانش في ناس كتير بتستخدمه في اللعبة الأساسية.
في شيطان بيعمل عليك لعنة ومع الوقت اللعنة ديه بتقلل من دمك تلقائي وعشان كدة لازم تقتله الأول عشان تفك اللعنة، كمان الـ Baron of Hell في نسخة جديدة منه عليه درع ولازم تكسره الأول بإستخدام الـ Plasma Rifle عشان تعرف تقتله.
في شياطين تانية بتتقدم بس هسيبكم تتفاجئوا بيها في اللعبة، كل شيطان من الشياطين الجدد بيقدم تجربة مختلفة ومنوعة في عالم DOOM Eternal وهيحتاجوا منك سرعة وتحرك مستمر كالعادة عشان تتفادى كل الضربات.
الإضافة الأكبر لأسلوب اللعب كانت في السلاح الجديد وهو الـ Sentinel Hammer، السلاح ده بيساعدك تعمل كذا حاجة، أهمهم إنك بتخلي الشياطين الي حواليك كلهم يجيلهم حالة من الدوخان وده هيساعدك تتفادى مواقف موت كتيرة، كمان هيديك الإمكانية إنك تاخد حياة ودرع ورصاص من الشياطين الي حواليك بإستخدام الـ Mods المختلفة الي بتقدمهالك اللعبة لشخصية الـ Slayer نفسه سواء برمي قنابل التلج أو حرق الأعداء بالنار.
بما إن الإضافة بتقدم مناطق جديدة في عالم DOOM فا لازم نتكلم عن التصميم الرسومي خاصةً في مرحلة Reclaimed Earth لإن ديه المرحلة الوحيدة الي في سلسلة DOOM الي كانت بالنهار على كوكب الأرض وباين من حواليك البيئة والعشب الأخضر، من وجهة نظري ده اكتر level أثبت إن محرك id Tech 7 قادر على إحياء بيئات بطرق وأشكال مختلفة ومتحمس أشوف الإستوديو هيعمل ايه بالنسخة الجديدة من المحرك.
الموسيقى التصويرية من تصميم الملحنين العبقريين Andrew Hulshult و David Levy وهما الي اشتغلوا على الإضافة الأولى، أنا شايف إن موسيقى الإضافة التانية أقوى بكتير من الإضافة الأولى وبتوضح مدى قوية الـ DOOM Slayer في لقطات معينة خاصةً في المهمة الأخيرة Immora.
ناس كتير ممكن تبقى لسة بتفضل موسيقى Mick Gordon الي كانت في اللعبة الأصلية، بس شخصياً بحب التغيير في الموسيقى بالذات والملحنين دول لا يزالوا قدموا حاجة ممتازة بالنسبة لعالم DOOM ودايماً هتفضل محسساك بالحماس طول مأنت بتقتل في كل الشياطين من حواليك.
