مراجعة وتقييم لعبة Atlas Fallen
مراجعة وتقييم لعبة
Atlas Fallen
في وقت مثالي وفي ظل الملل اللي بنعيشه في شهر يوليو و اغسطس بسبب قلة الإصدارات جه ستوديو Deck13 Interactive و خرجلنا بلعبة Atlas Fallen. الاستوديو اللي سبق و قدملنا ألعاب أكشن و فانتازيا مميزة زي ثنائية The Surge و لعبة Lords of the Fallen اللي هينزلها جزء جديد في اكتوبر اللي جاي.
من لحظة الإعلان عن اللعبة و الحماس زاد بشكل كبير عند اللاعبين و ده بسبب كمية الأكشن الرهيبة اللي شوفناها في الـ Trailer و كمان الـ Lore المثير اللي خدنا عنه لمحة بسيطة برضو من الـ Trailers ديه. احب اقولك ان الحماس ده كان في محله في جزء كبير من اللعبة, و لكنه برضو كان مبالغ فيه في جوانب تانية مهمة من اللعبة. و في المراجعة ديه هنشوف هل نجحت Atlas Fallen تكسر ملل الشهور اللي فاتت, ولا نكمل انتظار لحد ألعاب سبتمبر؟
قصة اللعبة
قبل ما يشدني أسلوب اللعب اللي شوفته في الـ Trailers فأنا لسبب ما كنت مشدود للقصة أكتر و كنت حاسس ان القصة ديه لو اتقدمت بشكل كويس هنطلع منها بلعبة مميزة جدًا.
Atlas Fallen و زي ما أسمها بيوضح كدة بتتكلم عن عصر ما بعد نهاية العالم. بعد ما جه شيء عنده قوة جبارة و اللي بيعتبروه البشر إله الشمس بالنسبالهم و هو Thelos. و اللي بظهوره دمر كل شيء على وجه الأرض بالأعاصير الشمسية و الزلازل عشان تتحول المدينة اللي بتدور عليها أحداث اللعبة لصحراء مليانة بأنقاض البيوت والمباني اللي كان بيعيش فيها البشر قبل الدمار.
و بعد دماء كل شيء رجع البشر للحياه البدائية و بدأو يتنقلوا في قوافل بتتكون من رئيس للقوافل ديه و معاه مجموعة من الجنود و باقي القافلة كانو بشر عاديين بيعيشو حياتهم في خدمة رئيس القافلة و جنوده و بيتجردوا حتى من أسمهم و بيطلق عليهم الـ “Unnamed”.
بطل اللعبة هو واحد من الـ “Unnamed” و اللي كان مجرد خادم في واحدة من القوافل لحد ما فجأة بيتعرضو لهجوم من كائنات الـ Wraiths. و ديه الكائنات اللي مبعوتة من Thelos عشان يقضوا علي باقي البشر اللي نجو من الدمار و اللي بعادوه.
بطل اللعبة بيلاقي أداة غريبة و اللي هي عبارة عن قفاز عتيق و اللي بيساعده يتواصل مع شخص ما و اللي بيكون فاقد الذاكرة و ميعرفش هو مين و كل اللي يعرفه ان القفاز ده عنده قوة رهيبة و هتنقذ حياة البطل. و من هنا بتبدأ اللعبة و بتبدأ فيها تستغل قوة الأداة اللي في أيدك عشان تساعد القوافل اللي هتقابلها في طريقك. بجانب هدفك الرئيسي و هو استغلال قوة الأداة و تلاقي طريقة تتخلص بيها من Thelos و تنقذ العالم.
زي ما قولت في البداية انا كنت حاسس ان قصة اللعبة تقدر تقدم Lore ضخم للاعب و عالم مليان قصص في كل حتة بتروحها. القصة في أساسها مثيرة جدًا و بتقدملك عناصر غموض كتير و كل ما بتتقدم كل ما بيتكشف الغموض ده و بيتقدم عناصر غموض جديدة. فانت هتفضل طول الوقت عندك فضول تعرف ايه اللي ممكن يحصل.
لكن مشكلتي الوحيدة مع القصة هي انها مختصرة حبتين. و الموضوع هنا نسبي علي حسب انت بتحب تتعمق في القصص ولا بتبقي عايز توصل لهدفك الرئيسي علطول, لكن انا كنت حابب اشوف ورق متوزع يحكيلي اكتر عن العالم قبل الدمار. اللعبة بخلاف الخط الرئيسي فهي بتقدم مهمات جانبية أغلبها بيأثر على قصة اللعبة و على الأحداث اللي بتحصل بشكل ما. و كل ما بتستثمر من وقتك في المهمات ديه كل ما بتتعرف أكتر على عالم اللعبة و على الشخصيات.
أسلوب اللعب
عالم لعبة Atlas Fallen هو باختصار صحراء ضخمة و الرمل في كل حتة. و كعادة بدايتي لأي لعبة بتقدم عالم مفتوح بسأل نفسي هل العالم ده هيخليني احس انه عالم حي حقيقي ولا مجرد فراغ كبير. للأسف عالم اللعبة صغير نوعًا ما و ده ميعيبش اللعبة لكن يعيبها ان رغم ان الخريطة صغيرة إلا ان أغلب اللي هتقابله في ساعات لعبك مكرر و قابلته قبل كدة.
قليل جدًا لما تقابل مثلًأ حد بيطلب منك مساعدة عشان تبحث عن شخص ما و بالتالي يشجعك اكتر علي الاستكشاف. رغم ان استكشاف العالم مكانش وحش إطلاقًا و كان بيكافئ اللاعب دايمًا بـ Artifact جديدة و قدرات جديدة للشخصية. لكن مع الخريطة الصغيرة فانت تقريبًأ تقدر تلفها كاملة من شرقها لغربها في و تطلع أغلب الكنوز اللي فيها.
يحسب للعبة ان بعد نصها الأول بتنقلك لمناطق جديدة مبهرة الصراحة. و مع الخلفية القصصية اللي بتتحكيلك عن الأماكن الجديدة اللي بتزورها بيزيد حماسك لاستكشافها.
اللعبة بتقدم نوعين من المهمات الجانبية و هي مهمات تجميع بتنتقل فيها من نقطة لنقطة علي الخريطة عشان تنجز هدف محدد هناك. أو مهمات ليها علاقة بالخط الرئيسي للقصة زي انك تنجز مهمة جانبية لواحدة من الشخصيات الرئيسية. و بصراحة المهمات ديه كانت بتشدني طول الوقت و بتخليني اسيب المهمة الرئيسية عشان اخلص كل المهمات الجانبية.
اللعبة قدمت قصة و عالم مش أضخم حاجة و زي ما كنت بعيب علي قلة تفاصيل العالم ده لكن عدم المبالغة أو التمطيط في القصة عشان نخلي اللعبة تعيش حاجة تحسب برضو للعبة. اللعبة هتاخد منك 15 ساعة لو هتركز علي المهمات الرئيسية بس, و ممكن توصل ل 20 ساعة كمحتوى كامل.
نيجي بقى لأسلوب اللعب. اللعبة بتقدم أسلوب Hack and Slash من منظور الشخص الثالث. حاجة God of War الغلابة كدة. القفاز اللي في أيدك بيقدر يحول الرمل اللي حواليك لأسلحة تقدر تستخدمها في المعارك. الأسلحة مش كتيرة زي مانت متخيل و فيها تشابه كبير جدًا بينها و بين لعبة God of War من حيث الأسلحة زي السلاسل و الـ Axe.
Atlas Fallen حاولت تقدم أسلوب لعب متنوع عن طريق نظام الـ Essence Stones. النظام ده بيتيح للاعب Range واسع جدًا من القدرات و التعزيزات لأسلحته و لشخصية اللاعب نفسه. زي الـ Stones اللي بتزود دفاعك أو هجومك. في منهم Stones بتفتحلك قدرات خاصة تقدر تنفذها في المعركة زي انك ترمي الـ Hummer اللي معاك في اتجاه الأعداء و ترجعلك تاني.
كل ما بتتقدم في اللعبة و بتقتل أعداء أكتر بتجمع Essence Dust و بتستخدمها في تطوير الـ Stones ديه. ده غير انك طبعًا بتحتاج تجمع أنواع معينة من المعادن و الأعشاب ديه عشان تقدر تطور بيها الـ Stones. ده بيشجعك على الاستكشاف اكتر و تجميع الموارد و انهاء المهام الجانبية اللي بتديك الموادر ديه كجوائز.
التنويع في اللعب وصل للدروع. في دروع دفاعية و ديه هتلاقي الأرقام الدفاعية بتاعتها عالية. لكن الهجومية بتبقي أرقامها الدفاعية أقل لكن الهجومية أعلي بكتير. تطوير الدروع بيزود الهجوم أو الدفاع بشكل كبير على حسب نوع الدرع. لكن كمان بيزود الأرقام الباقية برضو علي حسب نوع الدرع. زي الحظ أو سرعة استعادة الصحة.
بدل ما يبقي عندنا Stamina للاعب, Atlas Fallen قدمت العكس عن طريق الـ Momentum. الجزئية ديه أضافت كتير للعبة رغم انها مش اختراع جديد. هي باختصار كل ما تضرب اكتر كل ما الزخم بيزيد أكتر. و بمجرد ما يتملي Bar من الـ Momentum بيزيد حجم السلاح و الضرر اللي بيعمله على الأعداء, فانت كل ما بتقضي وقت أطول في المعارك كل ما بتشوف السلاح بيكبر و المعارك بتبقي حماسية أكتر و أكتر. خصوصًا لما تنفذ الـ Shatter و ديه الحركة الـ Ultimate بتاعتك.
و بمناسبة الاعداء. مشكلتي مع اللعبة كانت في توزيعهم و تنوعهم برضو. أعدائك هم الـ Wraith و دول كائنات صخرية كدة بيتنوعو ما بين اللي بيطير أو اللي بيختفي في الرمل أو اللي بيهاجمك بأعداد كبيرة. اللعبة بترمي كل اللي عندها من وحوش و Bosses في بدايتها و بعد كدة مفيش حاجة هتفاجئك.
بعض الـ Bosses هم مجرد نسخة أكبر من الوحوش العادية. في بعض الـ Bosses التانيين اللي كان فيهم أفكار مميزة و بتجبرك تغير أسلوب لعبك. ده تقريبًأ كان Boss واحد. بقيت الـ Bosses بتقاتلهم بنفس الطريقة. غير ان في Bosses كتير هتقابلهم في عالم اللعبة عادي و ده ينقلنا لنقطة توزيع الوحوش.
