عن الألعاب, مقالات

5 أسباب تخليني متحمس لـ Watch Dogs Legion

من بعد العرض الأخير بتاع واتش دوجز في مؤتمر يوبي سوفت الرقمي، أصبحت من كبار متابعين اللعبة لكذا سبب احنا هنا انهاردة عشان نتكلم عنهم، لكن قبل ما أكلمك عن أسبابي، لازم أديك نبذة عن سلسلة واتش دوجز عشان تعرف رحلتي معاها كانت ماشية إزاي.
الجزء الأول مع كل الجدل اللي كان حواليه عن الدوانجريد، واختلافه عن أول عرض له عجبني، وكان تجربة قوية بالنسبالي ومسلية إلي أبعد الحدود والشخصيات كانت مثيرة للاهتمام بشكل ملحوظ لكن بلا شيء ثوري لا علي الصعيد التقني، ولا القصصي ولا حتي الجيم بلاي، علي الرغم من كون الجيم بلاي مزيج هايل بين كل عناصر ألعاب يوبي سوفت الناجحة، زي SPLINTER CELL و ASSASSIN’S CREED مع إضافة فكرة الهاكينج والسواقة.
الجزء الأول بكل مميزاته دي حط نفسه للأسف في مقارنة مع لعبة عملاقة في مجال ألعاب العالم المفتوح وهي GTA v، وعشان كده كانت خطوة ذكية من يوبي سوفت إنها تحاول تخرج لعتبها من التصنيف ده، وتحاول تخليها شيء مستقل ماتقدرش تحطه في تصنيف معين، أو تقارنه بلعبة أنجح منه. وعشان كده الجزء التاني نزل بنبرة القصة شوية وخلاها شيء أكثر هزلية، لا يدرك البطل فيه عواقب أو وزن أفعاله أو جرايمه، ودايمًا في إحساس إنك في كرتون أو كوميك بوك، وده ظهر حتي في تصميم اللأسلحة اللي كان بيتم طباعتها من علي 3D Printer وسلاحك الأساسي في اللعبة كان الstun gun
كل ده مع الحفاظ علي تصميم الجيم بلاي الممتع، وإضافة طبقات أكتر له زي استخدام الdrone و RC jumper ودي عربية بيتم التحكم فيها عن بعد عن طريق الريموت كنترول، والاتنين دول كان ليهم استخدام كبير في حل الpuzzles واتمام المهمات، وده أضاف حرية كبيرة جدًا في المهمات خلاها -مع إنها نفس المضمون معظم الاحيان- ممتعة عشان فيه مليون طريقة تعمل بيها المهمة المطلوبة منك.
تقدر تعتبر إن اللي فات ده كله مقدمة طويلة كان لابد منها، لكن دلوقتي هنخش في موضوعنا الأساسي، وهو ليه أنا متحمس  للجزء  الجديد Legion وشايف إن هو التغيير الثوري المطلوب في السلسلة بل في عالم الألعاب

1-النظام ده ممكن يبقي بديل لنظام الcharacter customization اللي بيتم اتباعه في ألعاب الRPG

في لعبة Fallout 4 في ناس قدرت تعمل تغييرات علي شكل الشخصية اللي لعبوا بيها بشكل عميق كفاية عشان يقربوا شكلهم لشخصتين Joel من The last of us و Geralt من the witcher، وده كان شيء بيتضرب بيه المثل في مدي عمق وجمال أداة الcharacter customization، ولكن مع بداية اللعب بتلاقي إن الشخصية ملهاش معالم أوي، مبيتكلمش كتير، مفيش انفعالات واضحة، وكذلك أغلب ألعاب الأر بي جي، طيب ده حتي فول أوت 4 قدمت أداء صوتي للشخصية الرئيسية، في ألعاب مابتقدمش حتي ده، وبتتحول تجربتها لتجربة غير قابلة للاندماج فيها، فكرة watch dogs legion بإنها تقدملك مجموعة من الشخصيات اللي تختار بينهم، ويكون لكل واحد قصته، وأداءه الصوتي، وإمكانيات خاصة من حيث الجيم بلاي ممكن تبقي القفزة التطورية الجديدة اللي هتحل محل ألعاب الأر بي جي، أو فكرة الشخصية الcustomizable و في النهاية يتضح إنها بلا هوية.

في بداية الأعلان عن watch dogs legion تم التصريح إن اللعبة هتتيحلك تجند وتلعب “بأي حد يظهر قدامك علي الشاشة” وده الحقيقة وعد جريء جدًا وممكن نقول عليه طايش، وأشك في إمكانية تحقيقة -علي الأقل في الوقت الحالي-لكن اللي شوفناه في مؤتمر Ubisoft forward بعد سنة من الإعلان عن اللعبة، بيقول إن الفكرة بتدور حوالين 20 شخصية هتتمكن من تجنيدهم عن طريق أداء مهمات معينة لصالحهم، زي مثلًا شخصية كان بيتم ابتزازه بمعلومات عنه طلب منك إنك تمسح المعلومات دي من عند الحكومة، مقابل إنه ينضملك، والموضوع مش واضح هل هم 20 شخصية بس ب20 مؤدي صوتي، ولا أكتر، ولكن فلنفترض إنهم 20 فقط، ده هيكون شيء ممتاز هيقدر يخلي المطورين في المستقبل يطرحوا أكتر من رؤية ليهم من حيث كتابة الشخصيات وأسلوبهم، وكذلك ده هيأثر بشكل مباشر علي أسلوب اللعب، بدل ما بيسيبوا اللاعب يقوم بعمل تعديلات شكلية علي الشخصية بدون مضمون حقيقي.

من خلال تجربة دامت 3 ساعات خاضها يوتيوبرز كتير قالوا إن فعلًا في اختلاف ملموس بين كل شخصية والتانية، واحدة من الشخصيات كان تبتشتغل عاملة بناء، وكان مهمة بالفعل في مكان بناء، ولولا إن اللي بيلعب لعب بيها وجندها، ومكنش قدر يتسلل بسهولة للموقع ده، لإن طبعًا تسللك لموقع بناء شديد الحراسة بزي عامل في الموقع أسهل بكتير من تسللك بزي عادي أو بدلة مثلًا! كذلك ذكر صاحب قناة Skill up بعد تجربته للديمو، إن عاملة البناء دي كانت بتمتلك نوع من أنواع الdrones كقدرة خاصة، بتقدم بديل بقي للعربيات في التنقل، وحتي الأسانسير في الصعود لسطوح أي مبني، وإمكانية رؤية لندن من فوق طبعًا دي شخصيًا حاجة ماحبش ابدًا أفوتها. كمان ذكر إن في شخصية جاسوسة بتمتلك عربية فيها صواريخ! انت عارف ده معناه إيه؟ car combat! يعني game mechanic جديدة كليًا مع الشخصية دي بس، وهنا بتكمن عظمة الفكرة، حتي لو ماتمش تطبيقها بشكل مثالي المرة دي في Legion، فهي لاتزال فكرة ثورية لازم نقدرها.

 

2-حرية أكبر في اتمام المهمات

النقطة دي مترتبة علي النقطة اللي قبلها، وكمان جدير بالذكر إن الجزء التاني قدم حرية كبيرة في اتمام المهمات وذكاء في تصميمها، بحيث يكون دايمًا بإمكانك الاعتماد بشكل كامل علي الهاكينج في المهمات، في ظل وجود مجموعة أسلحة قادرة تخدم أسلوب لعب عنيف لو حبيت، مع تصميم بيئات بيساعد علي الاتنين لكن طبعًا بيكافيء علي الأسلوب الأصعب واللي طبعًا بيكون عدم استخدام العنف.

الحرية في الجزء الجديد هتتضمن إمكانيات لا محدودة من السيناريوهات اللي ممكن تحصل، بناءًا علي الشخصية اللي هتلعب بيها، وتصميم البيئات، الموضوع مكنش واضح إلي أنهي حد نجحت اللعبة في استغلاله ولكنه كفكرة علي الورق شيء ممتاز ومحمس للعبة.

3-قيمة إعادة أكبر

قيمة الإعادة دايمًا بتقوم علي فكرة الاختلافات بين كل مرة لعبت فيها والتانية،وعشان كده الموضوع مش سهل وجوده في ألعاب اليومين دول، لإن لعبة مثلًا زي Uncharted 4، مش هيكون في اختلاف في تجربتك التانية للعبة عن الأولي، وده لإن المطور حط مجهود كبير جدًا في تصميم تجربة واحدة يمر بيها كل اللاعبين، علي الجانب الآخر من النوعية دي من الألعاب في ألعاب الأر بي جي اللي بتتيحلك اختلافات مبنية علي اختياراتك لأفعالك، وده بيضمن إن اللعبة لو عجبتك، هترجع تلعب بأسلوب مختلف سعيًا إنك تشوف نتايج الاحتمالات التانية بنفسك، وهنا واتش دوجز ليجن بتعمل شيء مشابه، ولكن موجه كله للجيم بلاي، وهو بالتالي مزيج بين المدرستين اللي ذكرتهم، تصميم قصة واحدة متركز فيها المجهود كله بتاع المطور، وبالتالي بجودة كويسة، مع إعطاء اللاعب دافع إنه يرجع يلعب تاني عشان يشوف شخصيات جديدة، والامتيازات اللي ممكن يحصل عليها اللاعب من خلال كل شخصية، وتأثير كل ميزة علي الجيمبلاي..الموضوع يخليك متحمس بس بمجرد التفكير فيه.

4- لندن مدينة جميلة، وعالم واتش دوجز عالم مثير للاهتمام

لندن مدينة مابيتمش تجسيدها كتير في عالم الألعاب، وأنا بحب أشوفها، لان فيها اختلافات جوهرية عن المدن الأمريكية، أولها في فكرة التكدس المروري، شوارع لندن دايمًا ضيقة ومابتسمحش بالسواقة المجنونة اللي بنعملها في Gta مثلًا أو في الجزئين الفاتوا من واتش دوجز، وكمان لندن مختلفة بشكل كبير من حيث التكوين الاجتماعي عن المدن الامريكية، وده بيتيح فرصة للتعرف عليها عن قرب أكتر حتي ولو عن طريق عالم افتراضي، اللي عايز أقوله إن أكيد المدينة المرة دي هتبقي شيء مختلف شويتين عن اللي أحنا متوعدين عليه، والاحتمالات كتير للfactions والمجموعات اللي هتبقي موجودة في مدينة لندن، وطبعًا يوبي سوفت معروفة ببراعتها في تصميم العوالم الافتراضية.

5-إمكانية تغيير نبرة القصة عشان تناسبك

دي نقطة أشار ليها معظم اليوتيوبرز اللي جربوا اللعبة، إنك ممكن تلعب بشخصية جاسوس مثلًا، زي الشخصية اللي ظهرت في أول عرض واللي كانت راجل بيتكلم بلهجة بريطانية شبيه في الشكل للممثل جايسون ستاثام، وساعتها الحوارات بتكون مسجلة بصوت الشخصية دي، وبالتالي القصة بتاخد طابع جد شوية علي عكس لو لعبت بشخصية الGranny اللي ظهرت برضو في أول تريلر للعبة.
في واتش دوجز 2 عانيت مع شخصية ماركوس -البطل- أكتر من أي حاجة في القصة لإنه كان شخصية هزلية بدوافع غير واضحة، ومكنش باين عليه هو بيهزر ولا بيتكلم جد، وهل هو مدرك لإفعاله ولا بيعمل اللي مزاجه يجيبه له وخلاص، وده شيء أضعف من القصة شوية في الجزء التاني علي الرغم من كونها قصة كويسة ويجي منها أفضل من اللي اتعمل، يمكن لو كان البطل مختلف.

النقطة دي أقدر أفهمهالك بعمق أكتر لو فكرتك بلعبة Gta v، وهنا أنا مش بقارن بين اللعبين ولكن بقارن بفكرة التبديل بين الشخصيات، مع شخصية مايكل مهمات اللعبة كانت بتفكرنا شوية بأسلوب Gta III و Gta Liberty city stories، واللي كانت مهمات والحوارات اللي فيها جادة ومناسبة لشخصية سنه كبير نسبيًا وقديم في الإجرام، أما مهمات تريفور كان بيبقي فيها نبرة سخرية كبيرة من كل شيء، وDark Humor موجه ضد الإجرام والصورة النمطية له في عالم الأفلام والألعاب، وكذلك مهمات فرانكلين اللي كانت بتبقي شبيهة أكتر بلعبة Gta San andreas، أو بمعني آخر بتقربك أكتر للstreet gangs وعالمهم، وده شيء قدرت تعمله Gta v بتلات شخصيات فقط، إيه اللي تقدر تعمله Watch dogs legion أو مستقبلًا بقي أي لعبة تجرب الformula دي بشخصيات أكتر؟
الإمكانيات حقيقي مبهرة مجرد بس التفكير فيها، لكن المشكلة هل يوبي سوفت هتقدم شيء بجودة عالية؟ في كل الأحوال أنا عايز أجرب ومش قادر أستني.

عمومًا، في كذا مناسبة أثناء كتابتي، شددت علي نقطة إن حتي لو الأفكار دي ماتمش استغلالها بشكل كبير، لكن لازم أنا وانت نكون مدركين إنها أفكار “ثورية” علي الورق، ولازم نتحمس ليها لإنها ممكن تغير شكل عالم الجيمينج، وتعمل التجديد اللي بنطالب بيه بقالنا سنين، ولكن ده مامنعش إننا هنا عشان نتكلم عن watch dogs نفسها، وهنا هقولك إني متحمسلها جدًا بشكل رئيسي بسبب الأفكار دي، وحابب أشوف يوبي سوفت هتنفذها إزاي وإلي أي مدي هتحقق وعدها الجريء اللي وعدته، وكمان أشوف الهاينج في لندن عامل إزاي..!

Mostafa Argoun

About Mostafa Argoun

محرر في مجال الألعاب منذ عام 2012 بعتبر الألعاب فن، وبحب ألعاب القصة والأر بي جي بشكل رئيسي