الأسبوع الي فات إستوديو CD Projekt RED اتعرض لأكبر فضيحة في تاريخه وشوفنا أول التسريبات عن الجزء الجديد من سلسلة Battlefield وكمان إستوديو Naughty Dog بدأ الشغل على لعبته الجديدة. كل ده وأكتر هنعرفه النهاردة في ملخص أخبار الأسبوع المُنتهي بتاريخ 22 يناير 2021.
1- فضيحة إستوديو CD Projekt RED مع لعبة Cyberpunk 2077 والتأكيد على أن إستعراض 2018 كان مُفبرك :
نبدأ الأول بأهم خبر وهو إن الإعلامي جيسون شراير الشهير عمل لقاء مع مجموعة من المطورين من إستوديو CD Projekt RED واللقاء ده فضح الإستوديو. الإستوديو كان قال قبل كدة إن تطوير اللعبة بدأ في 2013 بس هو بدأ في 2016 وكمان اللعبة كان من المفترض إنها تكون لعبة منظور شخص ثالث بس قرروا يخلوها منظور شخص أول ولغوا كل الشغل الي اشتغلوه قبلها.
كمان فريق التطوير نفسه كان شايف إن اللعبة مينفعش تنزل قبل 2022 عشان تقدم أفضل تجربة للاعبين بس الإدارة قررت تنزلها بدري والهدف هو إنهم عايزين فلوس أكتر. المصيبة الأكبر بقى إن الإستعراض الي نزل للعبة في 2018 كان متفبرك عشان يخلوا شكل اللعبة حلو قدامنا وهي لا كدة ولا حاجة. حالياً الإستوديو شغال على تحسين اللعبة عشان يحاول يقدم تجربة ترضي الناس في النص التاني من 2021 ونتمنى ده يحصل.
2- إستوديو Naughty Dog يعمل على مشروع جديد ومن المحتمل أن يكون في العصور الوسطى :
إستوديو نوتي دوج فتح طلبات توظيف جديدة عشان هيبدأ شغله على مشروع جديد تماماً، لحد دلوقتي لسة مفيش أي تفاصيل عن المشروع وحتى كمان متسربش أي حاجة، في ناس بتتوقع إننا هنشوف Uncharted 5 وناس بتتوقع إننا هنشوف The Last of Us Part 3.
كمان انتشرت شوية شائعات كدة بإن الإستوديو ناوي يشتغل على مشروع جديد تماماً في العصور الوسطى وهتبقى لعبة بتقدم فكرة مختلفة ومميزة، على العموم احنا متحمسين نشوف الإستوديو ناوي يقدم إيه في المستقبل على PlayStation 5.
3- تسريب صورة لخريطة Assassin’s Creed القادمة تؤكد على أنها في الهند :
تسريب جديد انتشر بصورة جديدة بيوضح إن لعبة Assassin’s Creed الي جاية هتكون في الهند مع وجود أجزاء من بنجلاديش و باكستان في القرن الـ 17 والشخصية الرئيسية هي ست ومفيش إختيار لتغيير الشخصية، أتمنى تتقدم بشكل كويس زي كاسندرا . اللعبة هتتوفر على الجيل الجديد PlayStation 5 و Xbox Series X | S والحاسب الشخصي.
كمان في كلام على إن في لعبة Assassin’s Creed تانية في التطوير وهتكون في الشرق الأوسط.اللعبة الجاية من السلسلة هتكون من تطوير إستوديو Ubisoft Quebec الي قدم Odyssey وفي الصورة مكتوب إن الخريطة ديه تبع إستوديو Ubisoft Montreal الي قدم Valhalla والي لعبته الجاية مش هتنزل قبل 2023 مثلاً فا ممكن لعبة الشرق الأوسط هي الي تنزل الأول وهي الي هتكون من تطوير إستوديو يوبي سوفت كيوبيك
4- أولى تسريبات Battlefield 6 تؤكد أنها مستوحاة من Battlefield 3 وستصدر على الجيل القديم :
أخيراً الاسبوع الي فات شوفنا أول التسريبات عن الجزء الجديد من سلسلة Battlefield والي هيكون بعنوان Battlefield 6، على حسب اخر التسريبات فاللعبة هتكون مستوحاة بشكل كبير من Battlefield 3 وفكرة الحروب الحديثة الواقعية.
كمان التسريبات بتقول إن اللعبة هتنزل على الجيل القديم وهتدعم لحد 64 لاعب في الأونلاين إنما الجيل الجديد هيدعم لحد 128 لاعب وديه هتكون مباريات ضخمة جداً، اللعبة المفروض إنها هتنزل في أواخر 2021 على كل الاجهزة ومنتظرين نشوف الإعلان الرسمي عنها من إستوديو DICE.
5- إحتمال نشوف Wolfenstein 3 في 2021 وتكون حصرية على Xbox :
المُسرب Jez Cordan أكد إنه يعرف لعبتين تانيين هينزلوا بشكل حصري على منصات اكس بوكس خلال سنة 2021 ولسة متعلنش عنهم لحد دلوقتي.
لو حطينا كلام المُسرب مع التسريبات الي نزلت من فترة قبل كدة فا نقدر نتأكد من ان الألعاب ديه هتكون الجزء الخامس من سلسلة Forza Horizon و الجزء الثالث من سلسلة Wolfenstein، الحاجات ديه هتنضم لألعاب تانية عملاقة في 2021 على اكس بوكس زي The Medium و Halo Infinite و Crossfire X و Warhammer 40K Darktide. شكلها هتكون سنة ممتازة لمنصات اكس بوكس.
6- لعبة PUBG جديدة قادمة في 2021 أو 2022 :
رئيس شركة Krafton المسؤولة عن مطوري PUBG أكد إنهم شغالين حالياً على تجربة جديدة في عالم PUBG وهتنزل على الكمبيوتر وأجهزة الكونسول للجيل الجديد خلال سنة من دلوقتي.
للأسف رئيس الشركة مذكرش أي تفاصيل بس في إحتمالية إن كلامه ينطبق مع التسريب الي انتشر قبل كدة عن نية الإستوديو لإصدار جزء ثاني من PUBG هيقدم فيه تجربة باتل رويال بجرافيك أحسن وميكانيكس أفضل للجيم بلاي وكل حاجة.
