News, Preview

12 معلومة لازم تعرفهم قبل إصدار Watch dogs legion

blank

يوم 29 أكتوبر اللي جاي هيشهد رجوع سلسلة واتش دوجز، واللي كانت بالنسبالي شخصيًا واحدة من السلاسل اللي مترقب هتقدم إيه جديد خصوصًا من بعد الجزء التاني اللي جيه بشوية تغيير في النبرة، وتخفيف ليها بشكل أكتر كتير عن الجزء الأول، وبالتالي كنت عايز أشوف مرحلة ما بعد الجزء التاني شايلة إيه لسلسلة، وعشان كده النهاردة هقولك علي 12 معلومة مهمين تعرفهم قبل إصدار اللعبة.
blank

1- قصة

قصة اللعبة بتدور حوالين حدث تفجير إرهابي في لندن بتقوم بتنفيذه منظمة سرية اسمها Zero day وبتلفقها لمنظمة Dead sec واللي بيبقوا مطاردين في كل حتة، من شركة أمنية أسمها Albion بتسيطر علي لندن وبتطارد dead sec اللي بصفتك واحد منهم بتجند ناس تنضم لقضيتك، وتحاول تمنع خطة Albion وزعيمهم اللي طبعًا هتبقي هي سر القصة اللي هنعرفه لما نلعب اللعبة.

2-السيتينج

اللعبة بتاخدنا لأول مرة لمدينة لندن بعد شيكاجو في أول جزء، وسان فرانسيسكو في تاني جزء والاتنين كانوا مدن أمريكية عشان كده متشوقين نشوف لندن هتبقي عاملة إزاي وإيه مظاهر الحياة فيها، خصوصًا إن يوبي سوفت من أفضل الشركات في تصميم العوالم الافتراضية.
blank

من خلال الفيديوهات اللي شوفناها للعبة لاحظنا إن الشوارع في المدينة ضيقة وزحمة وده هيخلي السواقة أكتر حرص بطبيعة الحال، وبرضو الحركة بالعربيات مش هتبقي لمسافات طويلة زي الألعاب اللي فاتت، أو علي الأقل مش هتبقي الأوبشن المفضل للكل. في لعبة قديمة اسمها The Getaway Black Monday كانت السواقة في مدينة لندن وشوارعها الضيقة وسط عمارتها الواطية شيء جديد علي العين جدًا ومنتظر شوفه في واتش دوجز ليجن. كفاية إن الدركسيون علي اليمين اصلًا!

3-التصميمات الداخلية

مخرج اللعبة صرح من فترة إن في اهتمام كبير بنقل تجربة الحياة في لندن في الظروف دي كانت مهمة بالنسبالهم، واهتموا بالتصاميم الداخلية للأماكن بشكل كبير، وإن هيبقي في أماكن كتير تدخل ومراحل كتير بتتطلب التواجد في أماكن داخلية بتصاميم قوية ومختلفة عشان تحسس اللاعب بعمق العالم اللي هو فيه وده شيء مابيكونش موجود كتير في ألعاب العالم المفتوح

4- تقدر تلعب بأي شحصية

طبعًا المعلومة الأهم، والأشهر عن اللعبة هي الجيم ميكانك الجديدة واللي بتتيحلك تجند وتتحكم في أي حد في اللعبة، أي شخصية تشوفها قدامك تقدر تجندها بحد أقصي 6 شخصيات في وقت واحد ،عن طريق جمع المعلومات عنها وأداء مهمات لتجنيدها، وكل شخصية ليها مؤدي صوتي مختلف، وكمان لو شخصية منهم ماتت بتموت للأبد. للأسف ماحددوش تاثير ده علي الprogression system لكن الفكرة نفسها بتفتح احتمالات كتير أوي، لو مثلًا دخلت القصة بشخصية الجدة اللي شوفناها في أو عرض للعبة واللي كانت مختلفة عن أي شخصية تانية.
blank

5- كل شخصية ليها قدرات خاصة

لكل شخصية شيء بيمزها عن الشخصيات التانية، وهتفتحلك احتمالات في اللعب ماكنتش هتبقي موجودة لولا وجود الشخصية، مثلًا في أحد الإعلان شوفنا شخصية العميلة السرية اللي معاها عربية بتطلق صواريخ، ودي هتساعدك في المطاردات أكتر، وفي مهمة تانية شوفنا مهندسة في موقع بناء بتستخدم الزي بتاعها للتخفي وسط عمال البناء، عشان ماحدش يلاحظها، واتقال كمان إن في كمية من المميزات الحصرية لكل شخصية هتلعب بيها، في أحد الشخصيات اللي بيقدر ينوم الناس مغناطيسيًا، بس ده هيبقي ضمن محتوي الPost-launch الخاص باللعبة، لكن الفكرة نفسها موجودة في كل شخصيات اللعبة، والحقيقة علي قد ما الموضوع مُحمس لكن إلي أي مدي ممكن يتم استغلاله صح؟ ده اللي نسفنا نشوفه في اللعبة لما تنزل.
blank

6-كو أوب لحد 4 أفراد وأطوار اللعب الجماعي

ضمن محتوي ما بعد الإطلاق هيتم إضافة اللعب الجماعي لحد 4 لاعبين، هينزل يوم 1 ديسمبر، في شكل مهام يعملوها مع بعض، الموضوع ده كان موجود في الجزء التاني لكن كان بيتيح لاعبين بحد أقصي، لكن كانت مهمات الكو أوب من أمتع ما في اللعبة، المرة دي بيتم توسيع الموود عشان يبقي أقوي وأمتع، ونتمني فعلًا نشوف استمرارية لتصميم المهمات القوي بتاع الجزء التاني اللي كان بيتيح كل مهمة تتنفذ بشكل مختلف عن التانية، مع كمان فكرة اختلاف الشخصيات هيبقي الموضوع في تنوع ضخم.
blank

المهمات بتاعة المالتي بلاير مش مقتصرة علي كده. مهمات الInfiltration راجعة، ودي بتبقي مهمات بتقتحم فيها سرفر اللاعبين التانين وتهكرهم، وبيكون عليهم يلاقوك ويوقفوك، في كمان مهمات الSpider arena ودي عبارة عن زي مصارعة بين آلات علي شكل عناكب!!
في حاجة اسمها Dynamic Events برضو بتبقي عبارة عن معارك عشوائية أثناء التجول في العالم، من خلال مواقف بيتم توليدها عشوائًا بين مواطني لندن، وموظفي شركة الأمن Albion، ومع تقدمك في القصة سلوك الناس هيختلف ضد ألبيون وهيبقي أكتر عدائية ليك وممكن تلاقي الNPCS بيساعدوك في القتالات.

7- إيدن بيرس

شخصية إيدن بيرس راجعة من بعد الجزء الأول، من خلال DLC بعد الإطلاق هيبقي اسمه Watch Dogs Legion: Bloodline واللي هيتعاون فيه مع شخصية Trench من الجزء التاني.
إيدن بيرس ورينش هم اتنين بس من 4 شخصيات اسمهم الHero Characters هيتم تناول قصتهم في إضافات قصة منفصلة بعد الإطلاق. شخصيًا إيد بيرس بالنسبالي مكنش شخصية مميزة لكن عجبني أداءه الصوتي، وبشكل عام هو أحسن بكتير من ماركوس بطل الجزء التاني اللي كان حضورة مش مميز اوي.
blank

8- أول ربط رسمي مع سلسلة أساسينز كريد !!

أحد شخصيات الHero Characters شخصية اسمها Darcy وهي أحد أعضاء الأساسينز في العصر الحالي، وهيبقي معاها Hidden Blade نقدر نستخدمها في الاغتيالات الصامتة! ده يعتبر أو اعتراف رسمي بوجود الأساسينز في عالم واتش دوجز، وأول ربط بين السلسلتين اللي من أول ما بدأوا والناس بتطالب بالربط بينهم لإن بينهم تشابهات كتير، يمكن تبقي دي البداية؟

blank

9- نظام الNegative Trait

أحد الأفكار المميزة اللي تم الحديث عنها بخصوص اللعبة هي فكرة المميزات اللي بتقدمها كل شخصية، لكن الأجمد في الموضوع إن كل شخصية ليها صفات سلبية بتمنعها من التعامل مع معطيات عالم اللعبة زي أي شخصية تانية. مثال علي الموضوع ده هو شخصية الست العجوزة اللي ظهرت في أول عرض للعبة، بديهي إن مايكنش ليها نفس القدرة علي الحركة ولا نفس السرعة، وبرضو في شخصيات زي ما هيكون الdamage بتاعها عالي، هيكون تلقيها للdamage عالي برضو، في شخصيات بتخاف من المرتفعات!!

blank

10- أول لعبة من يوبي سوفت بتدعم الRay Tracing

watch dogs legion كانت أحد اللعاب الي تم استخداماه لاستعراض إمكانيات كروت RTX 30، وهتبقي أول لعبة ليوبي سوفت تدعم خاصية الRAY TRACING علي الجيل الجديد من كروت البي سي، والجيل الجديد من الكونسولز

11-Micro Transactions!!

للأسف، تم الإعلان عن إن هيبقي في متجر داخلي في اللعبة ممكن تشتري منها حاجات بفلوس حقيقية، الحاجات دي متمثلة في شخصيات قابلة للعب هيبقي فيهم مميزات خاصة، لكن حسب تصريحات مخرج اللعبة فمش هيكون في أي Gameplay Advantage للي يشتري من متجر اللعبة، لكنها هتقتصر علي “تنويعات أكتر”
علي الجانب التاني في وعود بشخصيات قابلة للعب، وDynamic events مجانية بشكل دوري بعد الإطلاق عشان يتم دعم ملاك النسخة العادية بشكل مُرضي.
blank

12-اللعبة بتدعم الSmart Delivery

أعلنت يوبي سوفت إن ملاك نسخة الجيل الحالي هيحصلوا علي نسخة الجيل الجديد مجانًا، وهيبقي معاها دعم خاصية الRay Tracing ده غير إن فايلات الSave هتتتنقل للجيل الجديد بدون مشاكل.
blank

في الآخر:

Watch Dogs Legion هي واحدة من الألعاب اللي هتفرق مع يوبي سوفت لو نجحت، خصوصًا إنها بتقدم أفكار جديدة، بنسبة ابتكار عالية جدًا، وجرأة في التصميم وأتمني بالفعل اللعبة تطلع زي ما بنسمع عها في الإعلانات، أو أفضل، لإن سلسلة واتش دوجز سلسلة قايمة علي فكرة جميلة ومبتكرة وهي الhacking

Mostafa Argoun

About Mostafa Argoun

محرر في مجال الألعاب منذ عام 2012 بعتبر الألعاب فن، وبحب ألعاب القصة والأر بي جي بشكل رئيسي