استعراضات, الأخبار, عن الألعاب, مقالات

إنطباعنا عن Microsoft Flight Simulator 2020

blank

لعبة Microsoft Flight Simulator تعتبر من أشهر ألعاب المحاكاة إطلاقا ،اللعبة كانت مسمعة جدا في فترة التسعينات وبداية الألفينيات لحد ما وقفت إصدارتها المتتالية بسنة 2006 وترجع بعدها ب14 سنة كاملة مع جزء جديد كان منتظر نزل من حوالي كم يوم وإحنا بدورنا قررنا نجربه ونعطيكم انطباع سريع ومبسط عنها

اللعبة مبدأيا هتاكل الهارد بتاعك حرفياً عايزاك تقريبا تفضي مساحة حوالي 150 جيجا بايت وتقريبا برده هتاخد باقة النت بتاعتك كلها لو انت في مصر زي حالاتي دي لو هتكمل يعني ومتضطرش تجدد فانا اشوف أوفرلك هاتلك إشتراك جيم باس ب1 دولار عليه خصم دلوقتي وحملها من ستور الويندوز 10 وعيش ولو عجبتك إشتريها أو جدد إشتراكك.

اللعبة بتقدم تجربة محاكاة بالدرجة الأولي ومش مجرد أي محاكاة زي بقية الالعاب ، فهي بتعلمك وبتعرفك كل حاجة عن الطيارة وقبل ما تبدأ تتجول في اللعبة بتلاقي منيو مخصص للتدريب وده أشبه بكورسات حوالي 8 بتعلمك عن طريق كل واحد حاجة معينة زي مثلا طريقة الاقلاع والهبوط وازاي تتعامل مع الطقس أثناء الرحلة و ايه لازمة مثلا العدادات اللي قدامك واللي مهم جدا يبقي عندك فكرة عنها لإن دي بتساعدك تحافظ علي وزنية الطيارة.

 فلو انت ملكش خالص في ألعاب المحاكاة أو ملعبتش لعبة طيارات قبل كده المطور عامل المود ده مخصوص عشانك لأنه بيعلمك واحدة واحدة كل حاجة بسهولة وبدون تعقيد وأنصحك بشدة متبدأش اللعبة من غير ما تدخل علي المود ده الأول وعلي الاقل تبقي عارف الأساسيات.

blank

اللعبة بتقدم معاها طور اللعب الاساسي واللي هي خريطة العالم نفسها واللي مأخوذة من خرائط مايكروسوفت bing maps مع تطبيقها ومحاكاتها بأشكال 3D مذهلة جوه اللعبة عن طريق سيرفرات ازور الخاصة بالشركة.

اللي حبيته في اللعبة أكتر من أي حاجة إنها فعلاً بتقدم تجربة إستكشاف في عالمنا اللي عايشين فيه بطريقة مش مسبوقة لأول مرة بتسافر لأغلب مدن العالم سفر شبه حقيقي مع تفاصيل واقعية لحاجات كتير زي المعالم المشهورة والمباني والجسور والغابات والجبال والأشجار والصحاري والثلوج .. اللعبة فعلا محتواها ضخم جدا وحرفياً بتخليك تستكشف أي حتة في العالم انت عايزها مع وجود مطارات صغيرة كتير وحوالي 30 مطار كبير مشهورين مأخذوين بحذافيرهم من شكلهم الحقيقي وأيوة من ضمنهم مطار القاهرة الدولي للي بيسأل وعادي ممكن تلف مصر كلها بالطيارة بتاعتك 😁 ده غير اللعبة بتديك حرية اختيار الطيارة اللي تناسبك سواء عن طريق شكلها او حجمها او نوعها عددهم كلهم حوالي 30 طيارة ، مثلاً في طيارات عادية و طيارات مدنية وطيارات خاصة بالمطارات ونقل الركاب وطيارات مروحية وطيارات نفاثة.

في طور تاني مهم في اللعبة واللي هو طور التحدي او ال Challenge وده بيبقي عبارة عن مثلا مرحلة هبوط معينة وعن طريق أداءك فيها بتاخد سكور في الآخر بتنافس فيه لاعبين تانيين حول العالم عن طريق ال leaderboard

blank
رسومات اللعبة وتفاصيل الطيارة بصراحة حاجة عاجزة عن الوصف ،اللعبة كأنها لوحة مجسمة من عالمنا الحقيقي بكل تفاصيله في كل حاجة أجواء الطقس المطر والثلج والرعد ودورة الليل والنهار وطريقة شروق الشمس وغروبها، أشكال المطارات واللي منسوخة طبق الأصل من المطارات الحقيقية وصعب تلاحظ اي اختلاف زي ما ذكرت، اللعبة أخيرا بتعيد تعريف هيبة جهاز الpc من جديد بأنه وحش رسومي مظلوم ومقيد بسبب قدرات أجهزة الكونسول المحدودة.
المطور كتر خيره يعني والله ضايفلنا ميزة Photo Mode عشان تستمتع بلقطات كتير حلوة من جوه اللعبة وكمان لقطات حية لان مود التصوير بيدعم ميزة Active Pause يعني ممكن توقف اللعبة لكن الحاجات اللي حوليك زي ما هي أكتيف وتاخد الصورة عادي ده غير ان في co pilot او مساعد طيار ممكن تسندله مهمة الطيران وتستمتع انت بالرحلة وتقضيها تصوير.

اللعبة مش هعملها تقييم او حاجة لإني لسه بلعب فيها وفي تحديات عايز أعملها وأماكن كتير لسه عايز أروحلها فحبيت بس أكتب إنطباع بسيط بحيث تاخدوا فكرة عنها خصوصاً إنها جابت معدل تقييمات كويس جدا ما زالت لحد دلوقتي مجموع تقييماتها فوق ال 90 وتستاهل لإن اللعبة ممتعة جدا أول ما تتعود علي تحكم الطيارة وتبدأ بإستكشاف العالم حوليك مدينة مدينة، وهي بكل تأكيد من أمتع العاب 2020 وهتكون نقطة إنطلاق لألعاب المحاكاة الأخري أنهم يبدؤا علي الأقل يتعلموا حاجة من شغل المطور Asobo Studio المتعوب عليه في اللعبة دي.

Hussein Osman

About Hussein Osman

محرر وكاتب علي باب الله ، بقدّر جداً هواية الفيديو جيمز ،ومن وأنا صغير هوايات كتير اتغيرت في حياتي إلا ألعاب الفيديو متغيرش حبي ليها بالعكس كان بيزيد مع مرور السنين .. بعشق جداً ألعاب الاربيجي سواء الغربية زي فال اوت وويتشر وايلدر سكرولز او اليابانية زي فاينال فانتسي وبيرسونا ودراجون كويست