رأينا في عملية استحواذ ميكروسوفت على أكتفيجين هل ده شيء كويس ولا وحش؟
اولا بس دي شوية معلومات عن Activision Blizzard، الشركة دي قديمة جدا من السبعينات، اول شركة العاب طرف تالت في التاريخ، وفي نفس الوقت اكبر شركة العاب طرف تالت من ناحية العائد السنوي، فبالتالي دي اغلى شركة العاب
لك أن تتخيل أن صفقة بيع أكتفيجين اغلى من صفقة بيع Warner Bros لشركة Discovery، يعني Call of Duty اللي بيتريق عليها البعض اغلى من Batmanو Superman وباقي الشلة، فالحصل ده مش حاجة بسيطة دي صفقة أسطورية
وعشان تحس بخطورة الموضوع، كل جزء من Call of Duty بيبيع في أغلب الوقت ما لا يقل عن 15 مليون نسخة على أجهزة البلايستيشن، وطبعا كل عملية بيع ستور سوني بياخد عليه 30% يعني كده كل سنة بيخش لسوني فقط من لعبة COD ما لا يقل عن 270 مليون دولار وهي حاطة رجل على رجل ده طبعا غير الميكروترازاكشنز والاضافات في كل جزء دي بتكسبها اكتر من حصرياتها اصلا، فتخيل معايا لو بقت حصرية للاكس بوكس؟ متخيل حجم الضربة لسوني؟ ده اعلان الاستحواذ نفسه خسر سوني 20 مليار دولار في قيمتها السوقية، فما بالك لو بقت سلسلة كود حصرية اكس بوكس
ثانيا: الشركة دي عندها اكتر من 9500 موظف يعني تقريبا ضعف عدد موظفي Xbox + Bethesda، ومن افضل المطورين والاستديوهات عن Activision Blizzard، للاسف أغلبهم بيعملوا اسم واحد COD بس، وكمان السلسلة في النازل، ده غير أن في مشاكل خطيرة في الشركة، تخص بيئة عمل الشركة، لدرجة أن الموظفين بقى يخبوا أنهم شغالين في الشركة بسبب العار بيطاردهم، ده في واحدة انتحرت عندهم بسبب التحرشات
طيب الشركة كان مستقبلها اسود، كان لازم حد ينقذها، وهنا كانت ميكروسوفت، طبعا ميكرو معروفة بجودة العمل عندها، والحرية اللي واخدينها المطورين عندها، فتخيل كده استوديوهات أكتفيجين لما تاخد الفرصة أنها تبدع؟ على فكرة زمان الشركة طلعت العاب عظيمة كتير ممكن اذكرها بعد
فتخيل معايا كده اكبر شركة العاب طرف تالت يفضل مستقبلها مظلم كده ولا تتحسن تختار ايه؟ اكيد هنختار أنها تبقى احسن عشان ده هيفدنا كلاعبين
ثالثا: بالنسبة لموضوع هل كود هتبقى حصرية؟
افتكروا معايا نفس الحوار اتكرر مع بثيسدا، قعدنا نقول نفس السؤال ده ومفيش حاجة رسمية، لحد ما الاستحواذ خلص، طيب فاحنا هنفضل على هذا المنوال لحد ما الاستحواذ يتم، ويطلع فيل سبنسر يفهمنا، طب الاستحواذ ده هيحصل امتى؟ لو الإجراءات القانونية هتعد نفس فترة بثيسدا، يبقى ممكن ابتداء ً من شهر 7 الجاي الاستحواذ يكون خلص، وسعتها هنعرف الوضع هيكون ايه، في ناس بتنادي بأن العاب أكتفيجين تنزل للبلايستيشن، ماشي بس في مقابل كده العاب سوني تنزل الاكس بوكس طالما سوني هتنزل العابها لميكرو، ده اللي انا شايفه fair
رابعا بقى والخاتمة، أن اجمل ما في الموضوع هو الجيم باص، ياجماعة الجيم باص بقى حاجة أسطورية، هو اسطوري لوحده اصلا، كتير منا مكنش عارف يلعب كود كل سنة بسبب غلوها ومفيش تخفيضات عليها، تخيل اخيرا هنلعبها كل سنة، ومع كامل العاب الشركة كل ألعابهم Day One 
!
ففي النهاية احنا شايفين أنها صفقة موفقة ومفيدة للصناعة ووللاعبين
