Marek Tymiński رئيس إستوديو CI Games نشر شوية تحديثات عن الإستوديو وعن شغلهم خلال الفترة الي جاية والي ناويين يقدموه.
الإستوديو أكد ان خطتهم اتغيرت بشكل كبير خلال السنين الي فاتت والموظفين زادوا في 2020 عشان يضمنوا تقديم أفضل جودة في ألعابهم الي جاية. الإستوديو أكد إن لعبة Sniper Ghost Warrior Contracts 2 الي هتنزل في 2021 هيكون سعرها متوسط، مش هتنزل بالسعر الكامل الي هو 60 دولار بل هتنزل بسعر 30 دولار بس زي الجزء الأول وديه حاجة ممتازة من وجهة نظري.
لعبة Lords of the Fallen 2 بقى هي الي هتكون متسعرة تسعير كامل يعني هتنزل بـ 60 دولار. الإستوديو بيوعد إنه هيقدم تجربة أفضل بكتير من تجربة الجزء الأول وهيحسن ميكانيكيات اللعب وكل حاجة فيها.
الجزء الأول كان تجربة مش بطالة للناس الي بتحب ألعاب السولز بس كانت لعبة بتفتقر لبعض المميزات، لو الإستوديو قدر يقدم حاجات اكتر فيها وبيئات منوعة وشخصيات ووحوش اكتر فا هتبقى تجربة عظيمة. اللعبة في التطوير حالياً للحاسب الشخصي و PlayStation 5 و Xbox Series X | S بس مفيش لسة أي معلومات عن ميعاد إصدار نهائي ليها.
promidoz
