يوبي سوفت أعلنت بشكل رسمي إن نسخة الحاسب الشخصي من لعبة Assassin’s Creed Valhalla هتتوفر بشكل حصري على متجر Epic Games Store. ده معناه إنك لو كنت حاطط أمل إنك تشتري اللعبة على متجر Steam فا ده للأسف مش هيحصل.
الموضوع مش مفاجئ بشكل عام لإن يوبي سوفت السنة الي فاتت مضت على عقد نشر مع شركة Epic Games ونشرت مجموعة من ألعابها على المتجر أهمهم Tom Clancy’s The Division 2 و Ghost Recon Wildlands. كل ألعاب يوبي سوفت المستقبلية هتتوفر على متجرين بس وهما uPlay و Epic Games Store ولحد ما العقد ده ينتهي مش هنشوف ألعاب من الشركة على متجر Steam أو غيره.
لعبة Assassin’s Creed Valhalla هتصدر على الحاسب الشخصي و PlayStation 5 و PlayStation 4 و Xbox One و Xbox Series X في موسم أعياد 2020. أول عرض لأسلوب اللعب من اللعبة هيتم بثه في حلقة Inside Xbox جديدة يوم الخميس الي جاي وهنشوف إستعراضات كتير من إستوديوهات طرف ثالث مختلفة لألعاب شغالة على منصة Xbox Series X.