ملخص حدث Xbox & Bethesda Showcase في E3 2021

ميكروسوفت قدمتلنا بث مباشر خرافي في حدث E3 2021 كان مليان مفاجآت مميزة جداً هتتوفر خلال سنة 2021 و 2022. أهلاً بيكم في ملخص سريع لأهم أخبار حدث Xbox and Bethesda Showcase في E3 2021.

خلونا بإختصار كدة نتكلم عن أهم الألعاب الي هتتوفر على خدمة Xbox Game Pass خلال الفترة الي جاية لإنهم كتير جداً، عندنا في شهر يوليو لعبتين وهما The Ascent و Microsoft flight simulator، كمان سلسلة Yakuza  كلها بقت متوفرة من النهاردة على الخدمة. نيجي نبص لشهر أغسطس هنلاقي 3 ألعاب كمان وهما Psychonauts 2 و Hades و Twelve Minutes.

واحدة من المفاجآت الحلوة في البث كانت لعبة A Plague Tale: Requiem وهي الجزء الثاني مُكمل أحداث الجزء الأول A Plague Tale Innocence، اللعبة هتتوفر في 2022 على البي سي و PlayStation 5 و Xbox Series X | S  وهتضاف للجيم باس يوم الإطلاق.

في شهر اكتوبر عندنا لعبة Back 4 Blood من الإستوديو الي طور سلسلة Left 4 Dead، اللعبة ديه كمان هتتوفر على الجيم باس في يوم إطلاقها.

أخيراً ولأول مرة شوفنا لعبة Starfield، اللعبة الضخمة الي جاية من إستوديو Bethesda Game وهتصدر في 11 نوفمبر 2022، وأيوة اللعبة هتكون حصرية بالكامل لمنصات Xbox  للجيل الجديد والبي سي وهتصدر للجيم باس في وقت إصدارها. توقعوا إستعراضات أضخم للعبة لما نقرب من ميعاد الإصدار خلال سنة 2022.

إستوديو 343 Industries إستعرض لعبة Halo Infinite بشكل مميز عن طريق نظرة جديدة على طور القصة بالإضافة إلى إستعراض مود الأونلاين مالتي بلاير، تجربة حماسية وأكشن عظيم خاصةً في الاونلاين الي هيرجع أمجاد سلسلة Halo مرة تانية.

لعبة Halo Infinite هتصدر في خريف 2021 على البي سي و Xbox Oneو Xbox Series X | S وشخصياً متحمس جداً اعيش تجربة أونلاين Halo الحماسية.

لعبة STALKER 2 ظهرت بشكل مميز في الحدث بإعلان مدته 5 دقائق ركز على أسلوب اللعب، إستوديو GSC Game World أبدع في إستعراض اللعبة وشكلنا قدام قصة قوية ومرعبة في مدينة Pripyat في أوكرانيا.

هتصدر STALKER 2 في 28 أبريل 2022 على البي سي و Xbox Series X | S  وهي كمان هتضاف لخدمة الجيم باس في يوم إصدارها زي باقي الألعاب.

لعبة Forza Horizon 5 ظهرت ولأول مرة بشكل رسمي خلال الحدث وبالفعل تم تأكيد إشاعة إن اللعبة هتكون في دولة المكسيك. أضخم عالم مفتوح صممه إستوديو Playground Games هتقدر تستكشفه قريب مع أصحابك في تجربة سباقات فريدة من نوعها كالعادة.

Forza Horizon 5 هتتوفر في 9 نوفمبر 2021 على البي سي و Xbox One و Xbox Series X |S، إستوديو Playgroundشغال حالياً على Fable كمان بس اللعبة مظهرتش في البث المباشر.

اللعبة المفاجأة والي أنهوا بيها العرض كانت Redfallوهي عنوان جديد كلياً من إستوديو Arkane الي قدملنا Dishonored و Prey، تجربة أكشن من منظور الشخص الأول هتقدر تلعبها لوحدك أو مع أصحابك وتقتلوا في أنواع مختلفة وكبيرة من مصاصين الدماء.

الإعلان كان سينمائي ومتحمس اعرف اكتر عنها لما نشوف جيم بلاي رسمي، هتصدر لعبة Redfall بشكل حصري على البي سي و Xbox Series X | S في صيف 2022.

وبس كدة، ده كان ملخص سريع لأهم العروض الي كانت موجودة في بث Xbox and Bethesda Showcase، نتمنى تكون التغطية عجبتكم. شاركونا رايكم في الكومنتات بأهم  العروض الي شوقتكم في بث Xbox.