زي التوقعات وزي كل سنة فا يوبي سوفت مش بتعرف تعمل بثوث مباشرة وبنضيع وقتنا على الفاضي بس كان في شوية إعلانات مش بطالة خلونا نتكلم عنها النهاردة.
اللعبة الأولى الي هنتكلم عليها هي Rainbow Six Extraction، جزء فرعي من Rainbow Six بتقدملنا شخصيات Rainbow Six Siege في تجربة PVE ضد زومبيز ووحوش مختلفة، اللعبة فيها قصة قائمة على المهمات الي هتخلصها مع اصحابك ولو حبيت Siege فا بنسبة 100% هتحب تجرب Extraction مع صحابك.
اللعبة هتصدر في 16 سبتمبر 2021 على PC و PlayStation 4 و PlayStation 5 و Xbox One و Xbox Series X و Series S وهتدعم اللعب المشترك بين كل المنصات وبكدة هتقدر تستمتع بالتجربة مع صحابك على كل الاجهزة.
اللعبة التانية هي Riders Republic، تجربة مميزة ومختلفة من يوبي سوفت بتدمج فيها مجموعة كبيرة من الرياضات في لعبة واحدة، هدفك في اللعبة انك تنهي مجموعة ضخمة من السباقات عشان تاخد Points وتعلي مستواك في الـ Leaderboards. لو حبيت Steep وألعاب السباقات التانية من يوبي سوفت فإحنا بننصحك تجرب Riders Republic.
هتصدر Riders Republic في 2 سبتمبر على البي سي و PS4 و Ps5و Xbox One و Xbox Series X و S ومتمش تأكيد دعمها للعب المشترك ولا لا.
واحدة من أكتر الألعاب الي الناس منتظراها خلال سنة 2021 هي لعبة Far Cry 6 والنهاردة تم إستعراضها بمقطع سينمائي بيوضحلنا بعض التفاصيل عن شخصية الشرير الرئيسية انطون كاستيو، كمان أعلنت يوبي سوفت عن الـ season pass والي هيضم مفاجآت رائعة لكل مُحبين الشخصية لإنك هتقدر تلعب بالشخصيات الشريرة الي كانت موجودة في الاجزاء الي فاتت زي Vaas و Pagan و Joseph. هتقدر تشتري السيزون باس او تاخده ضمن النسخة الجولد من اللعبة.
هتصدر Far Cry 6 على البي سي والجيل القديم والجديد من أجهزة الكونسول في 7 أكتوبر 2021. كدة احنا هنشوف 3 ألعاب من يوبي سوفت خلال شهر واحد بس السنة ديه وديه حاجة كبيرة.
اخر حاجة بقى وهي مفاجأة الحدث كانت لعبة Avatar: Frontiers of Pandora، اللعبة الي في التطوير بقالها سنين طويلة جداً أخيراً شوفناها بإستعراض خرافي، هتقدم اللعبة قصة مختلفة ومستقلة عن الفيلم الي صدر في 2009.
اللعبة من تطوير إستوديو Ubisoft Massive الي قدملنا سلسلة The Division وهتستخدم محرك Snowdrop وزي ما هو واضح فاللعبة بتقدم مستوى رسومي رهيب بصراحة. هتتوفر اللعبة على البي سي وPlayStation 5 و Xbox Series X و Series S خلال سنة 2022.
وبس كدة ، ديه كانت تغطية سريعة وخفيفة لأهم الألعاب الي كانت موجودة في بث Ubisoft Forward 2021، لو الفيديو عجبكم متنسوناش باللايك والشير والسبسكرايب وإنتظروا تغطيتنا لبث Xbox و Nintendo خلال الأيام الي جاية، كان معاكم شادي EGN من جيمزاوي واشوفكم الفيديو الجاي، سلام.
promidoz
