لما شفت إعلان “Sifu” حسيت إني لازم أجرب اللعبة دي في الوقت واللحظة اللي شفت فيها الإعلان. حسيت كده بنوستالجيا ونشوة مزجت بين ألعاب الـ Hack & Slash، وألعاب ال Beat em up، وأكيد ألعاب الـ Rougelike، وفعلًا، اللعبة ميخبتش أملي، وماكنتش أتوقع انها تطلع بالشكل الاحترافي ده على الإطلاق!
من تطوير Sloclap، وهو نفس الاستديو اللي قدملنا Absolver، في 2017، وبنفس التصميم والتوجه الفني تقريبًا، ولكن شتان بين Absolver وبين Sifu.. الأولى جيدة جدًا، ولكن Sifu ورتنا بشكل عملي التطور الرهيب اللي ممكن أي استديو انه يوصله بالشغل المستمر على نفسه، حتى لو هيحتفظ بنفس الـ Tone.
قصة Sifu
قصة اللعبة بتدور حول مجموعة من لاعبي الفنون القتالية المتمردين، وعددهم خمسة، لما بيقرروا يهجموا على مدرسة صينية لتعليم الفنون القتالية ويقتلوا الماستر أو المعلم أو السيفو بتاعها، والموضوع ده بيحصل أمام ابنه الصغير اللي بينجو بطريقة أو بأخرى، وبنعيش معاه أفضل اللحظات الحماسية في رحلة انتقام مليئة بالصعوبات.
وعلى ذكر الصعوبات؛ اللعبة مش صعبة بس، اللعبة ممكن تخليك تشد في شعرك من الصعوبة. بصوا، هو الموضوع مُعقد حبتين وبيفكرنا بلعبة Sekiro، واللي مكملتهاش صراحةً بسبب صعوبتها. ما علينا، نرجع لسيفو، واللي كنا بنقول انها هاتقرفك في عيشتك وصدقني لما أقولك انها مش هاترحمك. أي خطأ بسيط ممكن يجيب ربع أو حتى نص صحتك، وبالتالي ممكن يموتك، وبالتالي عمرك هيزيد. أكيد مش فاهم ازاي عمرك هيزيد لما تموت، وده هينقلنا لنظام التقدم في اللعبة..
نظام التقدم في اللعبة هنا مثير جدًا بس لازم تركز مع اللعبة ومعايا عشان تفهمه؛ لما بتيجي تموت لأول مرة، عمرك بيزيد سنة واحدة. انت بتبدأ وعمرك 20 سنة بالظبط، فلما تموت أول مرة هيبقى عمرك 21، لأنك مت مرة واحدة بس، ولكن لو مت تاني على طول بدون ما تعوض المرة دي، هتبقى كدة مت مرتين فعداد موتك هيزيد مرتين ويبقى عمرك الجديد 23 مش 22، ولو مت 3 مرات بدون ما تعوض هايبقى عمرك 26، وهكذا.
لو مركز هاتلاقيني قولت فوق “بدون ما تعوض”، وممكن تكون تساءلت: أعوض إيه؟ وأعوضه ازاي؟ بص، لما بتموت مرة بيكون عداد موتك 1 صح؟ ولو مت بعدها على طول هيبقى عداد موتك 2، وهكذا، بس بالطريقة دي هاتكبر بسرعة جدًا فعشان كده اللعبة بتنقص العداد ده كل ما تتغاشم على الأعداء وممكن تخليه 0 بحيث لما تموت تكبر سنة واحدة بس.
ممكن تتساءل تاني دلوقتي، وخلي بالك ان تساؤلاتك كترت J: فيها إيه يعني لما أموت وأكبر في العمر؟ واسمحلي أقولك ان فيها وفيها..
انت بتبدأ اللعبة بعمر 20 سنة زي ما قولنا، ومع كل موته بيزيد عمرك بالطريقة اللي اتكلمنا عنها فوق، ولو وصلت للسبعين أو عديتها بكام سنة، بتبقى آخر محاولة ليك وبعدها بتعيد المرحلة من الأول.
فيه 5 مراحل في اللعبة بالظبط مقسمين بطريقة روشة جدًا وفيهم من التنوع ما يسر ناظريك. حذارِ بس من المرحلة الثانية لأنك ممكن تفقد الشغف وتفقد الأمل في اللعبة وتكرهها وتكره عيشتك كمان وتولع في الجهاز بسببها. شخصيًا، عِدت المرحلة دي فوق الخمس مرات، وكل مرة كانت بتبقى أسوء من اللي قبلها لحد ما اتعلمت حاجة مهمة جدًا…
أسلوب اللعب
صراحةً، وبسبب الدخلة السينمائية للعبة، افتكرت في الأول ان Sifu هاتركز على القصة بشكل أكبر، ولكني كنت متيقن من اللي شفته في الإعلان إنها برضه هاتهتم بأسلوب اللعب أو الجيم بلاي، واللي اكتشفته بعد ربع ساعة بس تقريبًا ان اللعبة مش مركزة على القصة خالص أصلًا، اللعبة كلها جيم بلاي.
وبالرغم من بساطة الحركات وسهولة قتل الأعداء، إلا أن ميكانيكيات الموضوع مُعقدة وبصراحة الذكاء الاصطناعي في اللعبة دي فوق الوصف. المطورين عرفوا يمسكوا العصاية من النص. تخيل انهم كانوا يقدروا يخلوا اللعبة أكثر صعوبة، وكان ممكن جدًا يخلوا الأعداء يتكالبوا عليك، ولكنهم عرفوا يظبطوا العدد اللي بيهاجم ويخلوا الموضوع منظم.
ذكاءك.. سلاحك، ومتغركش البدايات!
لازم وحط ألف خط تحت لازم تتعلم تدافع في اللعبة دي. أصلًا في بداية اللعبة، ودي حوار لوحدها ومن أفضل البدايات اللي شفتها من فترة كبيرة، بتتدرب على الأساسيات عادي، ولكن بشكل تفاعلي، وركز من أول ثانية عشان تحفظ كل التكنيكات.
في البداية هاتلاقي ان العنف والطيش بيجيبوا نتيجة وبتعرف تهزم أعداءك ببساطة. كل اللي عليك تعمله هو انك تفضل تضغط على المثلث والمربع آكنك بتلعب Street fighter مثلًا، ولكن الموضوع مبيمشيش كده خالص غير في البدايات صدقني. وآه صحيح، كنت هانسى؛ في بداية الدور الأول هاتلاقي مشهد كده فيه قلب 2D مرة واحدة وكأنك بتتفرج على فيلم سينمائي، والحتة دي بالذات خلتني أعشق اللعبة وفكرتني بأحد مشاهدي المفضلة في مسلسل Daredevil.
ما علينا، هاتلاقي في الأول يعني ان اللعبة مش بالصعوبة دي، ولكن اتقل عشان الصعب لسا جاي. فيه أشخاص حجمهم ضخم كده بيفكروني بالثيران اللي في Sekiro، دول لما تيجي تضربهم هاتلاقيهم بيجروا عليك وبيشيلوك ويهبدوك مرة واحدة في الأرض يجيبوا نص صحتك تقريبًا، ودول حلهم الوحيد انك تعرف تدافع وتعرف هما بيضربوا امتى فتتصدى لهم وبعدين تاخد بثأرك!
كذلك في الزعيم بتاع المرحلة الثانية “The Club”، واللي بالمناسبة يُعتبر أكثر شخصية Badass في اللعبة، جنني الله يحرقه أكثر ما هو محروق! والحل الوحيد برضه انك تحفظ نمط حركاته، وتعرف امتى هيخبطك بالعصاية اللي معاه دي وبعدين ترد له الصاع صاعين، لأنك لو هجمت على طول، هاتزعل جامد.. صدقني هاتزعل.
وبالمناسبة، ممكن تخلص اللعبة كلها بنفس المهارات اللي بتكتسبها في البداية، ولكنك هاتعاني حبتين، فلازم تعرف تستخدم المهارات والأدوات اللي جوا اللعبة بطريقة صحيحة، واللي أنا شخصيًا شايف انها ما تمش توظيفها بالطريقة الصحيحة وكانت من العيوب بالنسبة لي؛ يعني أنا مش عارف بصراحة فايدتهم إيه غير لو انت هاتاخد اللعبة بشكل احترافي.
مميزات وعيوب Sifu
بالنسبة للميزات فهي كثيرة جدًا:
عندك مثلًا الجيم بلاي فوق الرائع والتركيز عليه وتوظيفه بشكل أساسي كان السبب الأكثر لإمتاعنا.
تصميم المراحل كان ممتاز، وكل مرحلة ادتني شعور مختلف وأنعشتني بطريقة تخليني شغوف باللعبة أكثر وأكثر.
نظام التقدم، وما أدراك ما نظام التقدم.
توظيف الذكاء الاصطناعي بشكل أكثر من رائع.
التوجه الفني وتصميم الشخصيات كان واقعي لأبعد الحدود.
أما عن العيوب، فهي قليلة جدًا..
القصة، كان المفروض تبقى أعمق من كده عشان تناسب جو اللعبة العام.
الهدايا والمهارات كانت المفروض تتوظف بشكل أحسن من كده برضه.
