من أول ما شوفت الإعلان الخاص بلعبة Maid of Sker وهي كانت جاذبة إنتباهي لإن كان واضح انها هتقدم أعداء شكلهم مميز بميكانيكيات لعب جديدة على عالم ألعاب الرعب، ولكن الحاجة الي جذبت إنتباهي أكثر كانت القصة لإنها مختلفة تماماً عن أي تجربة سابقة.
هل لعبة Maid of Sker قدرت فعلاً إنها تقدم تجربة مميزة وتبني لنفسها إسم بين عمالقة ألعاب الرعب ؟ ده الي هنعرفه النهاردة في مراجعتنا للعبة.
” نسخة المراجعة تم تقديمها من إستوديو Wales Interactive “
قصة لعبة Maid of Sker تُقام في فندق Sker الشهير بدولة Wales وهي مبنية على رواية بنفس الإسم من الكاتب R. D. Blackmore والي تم نشرها سنة 1872. اللعبة طبعاً مغيرة في بعض الأشياء البسيطة زي السنة، الرواية في القرن الثامن عشر ولكن اللعبة نفسها في أواخر القرن التاسع عشر ولكن ده مش بيأثر على أي حاجة في القصة. انت بتلعب بشخصية Thomas Evans وهو مُلحن وصلته رسالة من حبيبته Elizabeth Williams وهي بتطلب منه إنه يألف لحن مضاد للحن هي بعثتهوله في الرسالة بتاعتها.
أم Elizabeth مُغنية وزوجها ( الي هو والد Elizabeth ) بيستغل صوتها عشان تجذب عشرات الزبائن لفندق Sker وبقى مطلوب من Elizabeth إنها تقوم بنفس دور والدتها. ولما رفضت تقوم بالدور ده تم حبسها في الفندق وعشان كدة بعثت الرسالة لـ Thomas لإنقاذها.
القصة مش بتتشرح من بداية اللعبة بشكل واضح بل بتقدر تستكشف أرجاء الفندق للبحث عن جوابات بتحكي كل حاجة حصلت في المكان، بالإضافة لكدة فا في اللعبة نظام الحفاظ شبه Resident Evil عن طريق الات مُعينة، في Maid of Sker الآلة هي الـ Gramophone والي بتسمع عن طريقها كل تفاصيل الأحداث الي حصلت لإليزابيث وعمها قبل ما توصل للفندق.
في بدايات اللعبة القصة بتكون مملة إلى حدٍ ما لإن مش بيتم توضيح حاجات كتير ولكن القصة بتبدأ تاخد مجرى أحداث مميز جداً خاصةً في النصف الثاني من التجربة وبيتم الإفصاح عن كل حاجة ليك بطريقة ممتازة وبتتعرف على تاريخ الشخصيات اكثر. شوف مقدمة اللعبة من هنا.
أسلوب لعب Maid of Sker بيعتمد بشكل أساسي على التخفي والتسلل. الأعداء في اللعبة مش بيشوفوك ولكنهم مُصممين لتحديد مكانك بإعتمادهم على الصوت وده بيخلي التجربة أكثر رعباً وحماسية لإنك بتمشي من جنبهم وهما مش شايفينك وبتبقى خايف تعمل صوت ويكشفوا مكانك في أي لحظة. اللعبة بتاخد فكرة الإعتماد على الصوت لبُعد جديد بإنها بتجبرك على إنك تكتم أنفاسك في اللعبة وانت بتتحرك حوالين الأعداء لإنهم بيقدروا يكشفوا مكانك عن طريق صوت تنفسك ، ميكانيكيات اللعبة اتقدمت بشكل ممتاز جداً والإعتماد على التخفي في اللعبة كان مميز لأبعد الحدود. فكرة كتم الأنفاس أساسية في اللعبة لإنك هتعدي في بعض الأماكن الي فيها جو سام أو أتربة وهيبدأ البطل Thomas يكح ولو فضلت تكح من غير ما تكتم أنفاسك الأعداء كلهم هيتلموا عليك بسرعة.
زي ما قولت فالإعتماد الأساسي في اللعبة على التخفي والتسلل ولكن اللعبة بتقدم سلاح بتقدر تستخدمه وهو سلاح صوتي بيأثر على الأعداء وبيساعدك انك تهرب لو تمت الإحاطة بيك من الأعداء. السلاح بيتم إستخدامه مرة واحدة وبعدها بتشحنه عن طريق حاجات شبه البطاريات ومش بتلاقي منها كتير عشان كدة أنصحك متستخدمش السلاح الا في حالات الضرورة القصوى.
الأعداء نفسهم بسطاء جداً وتقريباً حوالي 60% من اللعبة هتواجه نفس نوعية الأعداء ولكن كل مرة عددهم بيزيد في كل مكان بتستكشفه، فكرتهم واحدة وبتقدر تتخفى حولهم بشكل سهل إلى حدٍ ما. النصف الثاني من اللعبة بيتقدم عدو جديد تماماً ونقدر نقول إنه شبه Nemesis أو Mr X من Resident Evil وهيفضل يطاردك طول النصف الثاني. الذكاء الإصطناعي الخاص بالأعداء مش ممتاز أوي وفي بعض الأحيان بيعاني من شوية مشاكل ولكنه يفي بالغرض في اللعبة بشكل عام.
في توضيحي للقصة ذكرت إن اللعبة في تشابه مع Resident Evil زي إنك عشان تحفظ لازم تلاقي آلة الـ Gramophone ، في الحقيقة ديه مش الحاجة الوحيدة الشبيهة بـ RE ، لازم في اللعبة تدور على مشروب وتاخده عشان تقدر تزود حياتك وديه شبيهة شوية بنظام RE7.
بتقدملك Maid of Sker مجموعة من الألغاز المميزة. للأسف زيها زي القصة فا في النصف الأول من اللعبة الالغاز بتكون سطحية وحلها سهل ومملة في بعض الأحيان، ولكن في النصف الثاني الألغاز أقل ما يقال عليها انها مميزة جداً وهتاخد منك وقت طويل في تفسيرها وحلها وكل لغز هتحله هتحس إنك عملت إنجاز مميز لإنها كانت فعلاً ألغاز صعبة ومعقدة جداً.
الاستمتاع بتجربة القصة الرئيسية هياخد منك حوالي 4 ساعات لو كان تركيزك على القصة بس، لو فكرت تستكشف كل ركن في اللعبة ممكن توصل معاك لـ 5 أو 6 ساعات ولكن الإستكشاف للأسف في اللعبة مش متقدم بشكل جيد. اللعبة بتقدملك اماكن كتير لإستكشافها ولكن في معظم الأحيان إستكشافك لتلك الأماكن مش بيفيدك بأي حاجة وهتحس انك ضيعت وقتك على الفاضي. في بعض الأحيان التانية إستكشافك بيكون مُكافئ ليك وبيديك حاجات تزود بيها حياتك أو بطاريات لسلاح الموجات الصوتية الي معاك فا بشكل عام الإستكشاف في اللعبة مش مثالي ومش متقدم بأفضل شكل ممكن.
Maid of Sker مبنية بالكامل على محرك Unity وبتقدم رسومات جيدة جداً، مش الأفضل في ألعاب الرعب ولكنها رسومات جيدة كفاية عشان تخليك مستمتع باللعبة. تصميم فندق Sker رائع وعلى الرغم من ان اللعبة كلها في مكان واحد الا ان الفندق ده متقسم لأدوار وكل دور فيهم بيقدم بيئة تقدر تقول انها مختلفة تماماً عن الأدوار الأخرى. ده طبعاً بالإضافة للغابة الخارجية المُحيطة بالفندق. تصميم رسومات الأعداء كانت مميزة جداً خاصةً العدو الجديد الي هيتقدم في النصف الثاني من اللعبة.
من الناحية التقنية فاللعبة بتواجه مشاكل. على الرغم من أن الدقة ممتازة على منصة PlayStation 4 ومعظم اللعبة هتبقى شغالة سلسة بدون مشاكل خاصةً في النصف الثاني إلا أن النصف الأول من اللعبة بيعاني من Frame Drops واضحة وصريحة خاصةً لما تقرب من أي مكان فيه نار. اللعبة بتنزل لـ 15 فريم مثلاً ولكنها بترجع تاني بسرعة للفريمات الطبيعية. الي بيخلي الموضوع مؤثر على التجربة هو إنه بيتكرر بعدد مرات ضخم في أول ساعتين في اللعبة.
للأسف البطل Thomas Evans مش بيتكلم ولكن حبيبته إليزابيث هي وعمها أدائهم التمثيلي ممتاز وبتقدر تستمتع بيه عن طريق الـ Gramophones الي بتعمل فيهم حفظ. كل Gramophone بتقدم نظرة مختلفة على القصة عن طريق حوارات بين الشخصيتين والمحادثات ديه كانت ممتازة وقدر إستوديو Wales Interactive إنه يقدم اللهجة القديمة بشكل رائع.
الموسيقى التصويرية هي كمان من اكثر الحاجات الي استمتعت بيها خاصةً إن معظم اللعبة هتبقى بتسمع موسيقى محيطية، مش صاخبة ولكنها بتختلف في كل بيئة لدرجة انها في بعض الأحيان لوحدها هتحسسك بالخوف وهتحس بإن في حد بيطاردك.
لو اللغة الإنجليزية هتكون مشكلة بالنسبالك فا متقلقش اللعبة مترجمة بالكامل ( نصوص وقوائم ) للعبة العربية وعلى الرغم من انها بتعاني من بعض المشاكل والترجمة مش أكتر حاجة مثالية الا انها هتفي بالغرض عشان تفهمك القصة والمطلوب منك وهتبقى مبسوط من التجربة.
الخلاصة :
لعبة Maid of Sker قدمت تجربة رعب جيدة جداً بقصة و Setting جديدان تماماً وأسلوب لعب مميز بيعتمد على الصوت بطريقة مميزة. بالإضافة لكدة فاللعبة هتقدملك تجربة رسومية جيدة مع موسيقى تصويرية وأداء تمثيلي هيخليك مستمتع بالتجربة، ولكن على الرغم من وجود المميزات ديه إلا انها بتعاني من الملل وتصميم سيء للألغاز ومشاكل تقنية في النصف الأول، ده ممكن يؤدي إلى تخلي ناس كتير عن التجربة بعد أول ساعتين.
لو أنت شخص حبيت تجارب زي سلسلة Outlast و Amnesia و SOMA والأشياء الشبيهة فأكيد هتحب تجربة Maid of Sker ، ولكنك لو شخص عايز حاجة زي Resident Evil فالتجربة ديه مش عشانك.
المميزات :
- قصة شيقة و Setting جديد كلياً
- أسلوب لعب ممتاز
- ميكانيكات مبتكرة وإعتماد مميز على الصوت
- تصميم رسومي وموسيقى تصويرية رائعة
- أداء تمثيلي خرافي خاصةً لشخصية Elizabeth
- ترجمة جيدة للغة العربية
العيوب :
- القصة مملة في النصف الأول مع وجود تكرار في الألغاز
- الإستكشاف مش مُكافئ دايماً
- الذكاء الإصطناعي بيعاني من مشاكل في بعض الأحيان
- مشاكل تقنية وسقوط في الفريمات
