لعبة “LEGO Horizon Adventures” بتمثل نقلة جديدة ومميزة في عالم ألعاب ليجو. بعد ما شفنا السلسلة دي بتتعامل مع عناوين كبيرة زي Star Wars و Marvel و DC وغيرهم كتير، المرة دي واخدانا في مغامرة مختلفة في عالم مستوحى من السلسلة المشهورة “Horizon” اللي بتدور حوالين صيد الديناصورات الروبوتية.

لو جينا نبص على تاريخ ألعاب LEGO، هنلاقي إنها دايمًا مرتبطة بالشخصيات والأكوان المعروفة، بدأت فكرتها من أول ما دمجت الليجو مع قصص الأفلام الكبيرة، وده اللي زود من شهرتها وجذب ليها لاعبين من كل الأعمار. رحلة ليجو مع عالم الألعاب بدأت من سنة 2005 مع أول إصدار للعبة LEGO Star Wars اللي قدمت تجربة جديدة وممتعة للأسرة كلها، باستخدام قطع الليجو الشهيرة لبناء الشخصيات والأحداث من عالم “حرب النجوم”. ومن بعدها طلعت ألعاب تانية كتير مقتبسة من أفلام ومسلسلات زي LEGO Marvel Super Heroes وLEGO Harry Potter وLEGO Lord of the Rings، وكلها حققت نجاحات كبيرة بفضل دمج الأكشن مع الكوميديا في أجواء مألوفة للجميع.

لكن المرة دي ليجو قررت توسع دايرة شغلها وتدخل في عوالم الألعاب نفسها، وده ظهر في ألعاب زي LEGO Sonic واللعبة الجديدة LEGO Horizon Adventures اللي مستوحاة من سلسلة “Horizon”. الخطوة دي بتوضح إن ليجو غيرت استراتيجيتها وبدأت تستلهم من ألعاب الفيديو المشهورة، مش بس الأفلام، وده بيخلي فيه فرص أكتر للشراكات مع عناوين كبيرة تانية ويضيف روح جديدة للسلسلة.

لعبة “LEGO Horizon Adventures” مش مجرد لعبة عادية من ألعاب ليجو اللي بنشوفها دايمًا مقتبسة من أفلام، لأ، هي بتعكس سحر عالم سوني المفتوح بس بشكل الليجو المعروف. اللعبة اتطورت جزئيًا بمشاركة مطورين من الفريق الأصلي لسلسلة Horizon، وده بيخلي المغامرة تكون مليانة بالتفاصيل اللي بتميزها، زي الأكشن والتجوال الحر ومواجهة الروبوتات. فا يلا نشوف الدنيا بتقول إيه!

قصة اللعبة

اللعبة بتبدأ تقريبًا من نفس نقطة البداية بتاعة Horizon Zero Dawn، لما بنشوف أصول البطلة إلوِي في عالم ما بعد الكارثة، اللي فيه الطبيعة رجعت تسيطر على الأرض بس في وجود كائنات ميكانيكية على شكل ديناصورات وحيوانات برية. إلوِي اتربت على يد شخص اسمه روست، وكانت منبوذة لإنها اتولدت من غير أم وفي مجتمع متشدد بيرفض التكنولوجيا. إلوِي كانت دايمًا بتحاول تعرف أصلها وهويتها وتفهم ليه الآلات بتمشي على الأرض وتكتشف أسرار الحضارات اللي كانت موجودة قبل كده.

لكن على عكس اللعبة الأصلية، LEGO Horizon Adventures بتضيف لمساتها الخاصة، زي إنك هتلاقي الكوميديا المعتادة من شخصيات ليجو موجودة من البداية، مع اختلافات في سير القصة بتدي طابع جديد. مثلًا، في المراحل الأولى هنلاقي إن تدريب روست لإلوِي بيحصل وسط جو مرح مع شخصيات ليجو اللي بتضيف حس الفكاهة، وده قبل ما تظهر مجموعة الطائفيين وتبدأ الأحداث الجد.

من الحاجات المميزة في اللعبة هو الوقت اللي هتقضيه في قرية نورا، اللي بتعتبر منطقة “محور” بترجع لها بين المراحل. القرية دي هتقدر تعيد بناءها وتزينها بعد الهجوم اللي بيحصل عليها، وده جزء من المهام الجانبية اللي هتستمتع بيها. هتلاقي نفسك بتبني مباني جديدة وتشتري ملابس لإلوِي ورفاقها اللي، على الرغم من إنهم شخصيات ليجو، بيحتفظوا بأصواتهم الحقيقية.

الجيم بلاي

أسلوب اللعب في LEGO Horizon Adventures ممتع ومتوازن، وبيجمع بين مغامرات ليجو وأسلوب القتال المميز لسلسلة Horizon. من أول اللعبة، هتلاقي نفسك بتستخدم القوس كسلاح أساسي، وده بيخلي عملية تصويب السهام سهلة ودقيقة حتى مع وجود الكاميرا الثابتة. اللعبة بتستعير بعض ميكانيكيات القتال اللي معروفة في Horizon، زي إنك لازم تضرب على نقاط ضعف الآلات الروبوتية علشان توقع منها أجزاء تقدر تستخدمها ضدهم.

تصميم المراحل خطي بس فيه مساحات للاستكشاف في عوالم مستوحاة من سلسلة Horizon. البيئات مليانة تفاصيل واللعبة هتخليك تحس إنك فعلًا في مغامرة LEGO مليانة حياة وحركة. في كل مرحلة، هتقدر تجمع عملات LEGO اللي هتستخدمها بعدين علشان تطور المخيم بتاعك وتبني هياكل أو مباني تفيدك في اللعبة. المباني دي بتديك مميزات إضافية زي موارد جديدة أو طرق للتقدم في اللعبة.

في آخر كل مرحلة، هتاخد مكعب ذهبي بيعبر عن إنجازاتك. المكعبات دي مش مجرد شكل جمالي، لأ، هي مهمة علشان تفتح بيها أزياء جديدة ومباني مختلفة وتستمر في التقدم.

اللعبة فيها لمسات كوميدية بتحببك فيها أكتر، زي لما تتخفى في العشب الطويل وتلاقي شخصيتك بقت قطع ليجو شبه العشب بجد، وده بيضيف جو مرح للعبة. روح الفكاهة دي مستوحاة من أفلام وألعاب LEGO التانية وبتدي للعبة طابع خفيف وظريف يجمع بين الكوميديا بتاعة Horizon وفكاهة ليجو.

اللعبة معمول حسابها تكون تعاونية من الدرجة الأولى، سواء بتلعب مع حد جنبك على نفس الشاشة أو مع حد أونلاين. هتقدر تلعب بأربع شخصيات وكل واحد عنده سلاحه الخاص. اللعب مع أصحابك بيضيف متعة أكبر، وبيخليكم تتعاونوا ضد الآلات العملاقة. كمان في اللعبة، فيه حاجة زي “النيران الصديقة” يعني ممكن السهام تصيب شريكك بس من غير ما تضرّه، وده بيضيف لمسة من الضحك والتحدي.

الجرافيكس 

كل حاجة في العالم معمولة من قطع LEGO، من أول الشخصيات والآلات لحد الطبيعة حواليك. المصممين هنا استخدموا قطع LEGO بشكل ذكي ومش عشوائي، عشان يخلقوا عالم يشبه تصميم Horizon الأصلي، لكن بطابع LEGO المرح. بدل الرسومات الواقعية اللي بنشوفها عادةً في الألعاب، اللعبة هنا استخدمت قطع LEGO بشكل مبتكر عشان تبني عالم مليان تفاصيل.

كمان التأثيرات البصرية في اللعبة جميلة جدًا، بتخلي العالم كأنه عايش فعلاً، من السماء الزرقا، للمناظر الطبيعية، للآلات العملاقة اللي تملأ الأفق، كل التفاصيل بتدي إحساس بعالم Horizon لكن بأسلوب LEGO الفريد. الحركات كمان معمولة بدقة، زي لما الآلات تتضرب وتتفكك أجزائها، وده بيزود متعة اللعب.

الجرافيكس عمومًا والتوجه الفني في اللعبة هما من أكتر الحاجات اللي بتشدك في اللعبة، لأنها بتجمع ما بين تفاصيل عالم Horizon الضخم وتفاصيل LEGO الممتعة، وده بيعكس إبداع المطورين في تقديم تجربة بصرية جديدة ومسلية.

التقييم النهائي 

9/10

لعبة LEGO Horizon Adventures بتقدم تجربة مميزة بدمج عالم الليجو مع عناصر عالم Horizon المليان بالإثارة. اللعبة متصممة بشكل مبتكر، مع تفاصيل دقيقة وجرافيك مبهر بيخلّي اللاعب يحس إنه في مغامرة فعلاً. الكوميديا واللمسات الفكاهية بتضيف للعبة طابع مرح مميز، وده بيخليها مناسبة لكل الأعمار. العيب الوحيد فيها هو مدتها الصغيرة، وده اللي هيخلي اللاعبين يتمنوا لو كانت أطول.