سوني الفترة الأخيرة بقت مركزة على إصدار نسخ محسنة ونسخ ريميك لبعض ألعابها الحصرية، وهدفها الأساسي إنها تستفيد من إمكانيات الجيل الجديد الـPS5. يعني مثلًا، ألعاب كتير مشهورة كانت شغالة على PS4، زي لعبة Horizon Zero Dawn، عملوا ليها نسخ محسنة علشان يقدموا تجربة أحسن من ناحية الجودة البصرية والأداء.
لكن مع إن النسخ المحسنة دي بيكون فيها تحسينات بصرية وبتخلي اللعبة شكلها أجمل وأنعم على الشاشات الحديثة، في ناس من اللاعبين شايفة إن الموضوع مجرد تجميلات سطحية مش بتأثر في التجربة الأساسية للعبة. يعني في الآخر هي نفس القصة ونفس أسلوب اللعب، ومش بيحسوا إن التحديثات دي تستاهل المبلغ الإضافي اللي بيتطلب منهم، حتى لو كانت بـ10 دولار زي حالة Horizon Zero Dawn. ده خلى الموضوع محل جدل، لكن هل فعلاً النسخ المحسنة دي تستاهل إن الواحد يدفع فيها وخصوصًا نسخة المحسنة من Horizon Zero Dawn، ولا هي بس وسيلة من سوني إنها تكسب من نجاح الألعاب دي من غير إضافة محتوى جديد؟
قصة اللعبة
اللعبة بتحصل في مستقبل بعيد بعد ما البشرية المعاصرة وقعت بسبب كارثة تكنولوجية ضخمة. القصة بتتكلم عن روبوتات كانت في الأساس معمولة لأغراض عسكرية، لكن فقدوا السيطرة عليها، وبقت الروبوتات دي بتستهلك المواد العضوية عشان تعيد إنتاج نفسها. البشر مقدروش يسيطروا على الروبوتات دي، اللي في النهاية دمرت الحياة على الأرض تقريبًا.
بمرور الوقت، الطبيعة بدأت تتعافى لكن بطرق مختلفة عن اللي نعرفها، والمكان بقى مليان مخلوقات آلية ضخمة وكائنات بتمشي في الأرض مع الناس اللي عايشين في قبائل بدائية. البطلة هنا هي “إلوي”، اللي كانت منبوذة من قبيلتها “النورا” من وهي صغيرة، لكن رجل اسمه “روست” اهتم بيها وربّاها على مهارات الصيد. إلوي بقت صيادة قوية وذكية، وبدأت تفتش عن ماضيها وتحاول تفهم ليه كانت منبوذة.
في رحلتها، بتكتشف جهاز قديم بيديها القدرة تشوف بيانات مخفية، وبيساعدها في معرفة أسرار عن الآلات اللي بتمشي في الأرض. ومن هنا، بتعرف عن مشروع قديم اسمه “GAIA”، اللي هو نظام ذكاء صناعي صُمم عشان يرجع الأرض لطبيعتها بعد الكارثة الكبيرة.
اللعبة بتتكلم عن تحدي الإنسان مع التكنولوجيا، وبتبين إزاي الطموح الزايد ممكن يتسبب في كوارث ضخمة. ده غير التركيز على إصرار البشر على النجاة والبحث عن الحقيقة، حتى لو في مواجهات خطرة ومشاكل كبيرة.
الجيم بلاي
بالنسبة لجيم بلاي، النسخة المحسنة من Horizon Zero Dawn ما غيرتش فيه حاجة أساسية، واللعبة لسه بتجمع بين القتال التكتيكي ومهارات استخدام الأدوات. اللاعب هنا بيلعب في عالم مفتوح مليان آليات عملاقة، وبيستخدم أسلحة زي القوس والرماح وأدوات تانية بيعملها من الموارد اللي بيجمعها من البيئة.
اللعبة فيها نظام “Focus”، اللي هو الجهاز اللي بتلاقيه إلوي وبتستخدمه عشان تشوف نقاط ضعف الآلات اللي بتقاتلها. كل آلة عندها نقاط قوة ونقاط ضعف، واللاعب لازم يستفيد من النقاط دي عشان يقدر يتغلب على الأعداء.
القتال كمان بيكون ممتع لأن إلوي عندها أدوات زي الفخاخ، اللي بتستخدمها عشان تضر الآلات أو تعطلها. يعني، اللاعب ممكن يحط سلك صعق أو لغم، ويستنى الآلات تيجي وتتحبس فيه. وده بيعطي مجال أكبر لاستراتيجيات مختلفة في المعارك.
كمان البيئة المحيطة مهمة، يعني ممكن اللاعب يتخبى في الأعشاب الطويلة عشان يتسلل من ورا الآلات، أو يستخدم التضاريس للهرب أو التغلب على الأعداء. غير كده، إلوي تقدر تتسلق الجبال والأماكن العالية، وتستعمل الحبال للوصول لأماكن صعبة أو للهروب.
استراتيجيات القتال في اللعبة متنوعة وتعتمد بشكل كبير على نوع العدو اللي بتواجهه. يعني لو بتقابل آلات كبيرة مثل “الثندرجو”، هتحتاج تخطيط ودقة عشان تتغلب عليها. الثندرجو مش مجرد عدو عادي؛ هو عملاق من الآلات، وعلشان تهزمه، لازم تستخدم استراتيجيات متعددة المراحل.
فيه كمان شجرة مهارات متنوعة، بحيث يقدر اللاعب يطور مهارات إلوي ويختار الحاجات اللي تناسب أسلوبه في اللعب، سواء كان بيفضل القتال المباشر أو التسلل.
الرسوميات
لما تيجي تتكلم عن الرسوميات في النسخة المحسنة، هتحس إن سوني فعلاً اشتغلت على تحسينها بطريقة تديك إحساس إنك في عالم جديد، وده كله بفضل إمكانيات جهاز PS5. اللعبة دلوقتي بقت مليانة تفاصيل واقعية، وده بيظهر بوضوح في البيئة، خصوصًا لو بنتكلم عن الأشجار، المياة، وحتى الإضاءة.
نظام الإضاءة اتحسن جدًا، وده خلى المشاهد شكلها مشرق وواقعي، حتى انعكاسات الشمس على الأسطح المعدنية في الآلات بقت أكتر دقة، وده بيدي عمق ووضوح أكتر للمشهد كله. وكمان تعبيرات وجوه الشخصيات بقت أحسن بكتير، بحيث تقدر تشوف أدق التفاصيل في وش إلوي أو باقي الشخصيات، وده بيخلي تجربة القصة أكتر حيوية.
التحسينات دي بتخلي اللاعب ينجذب لاكتشاف العالم المفتوح بتفاصيله، خصوصًا مع المشاهد الطبيعية اللي بقت جذابة جدًا. صحيح اللعبة لسه نفس القصة ونفس المهمات، لكن تقديمها بالجودة دي على PS5 يخليك تنبهر بالجرافيكس بشكل عام وتقول إنك بتلعب Horizon Forbidden West مش Zero Dawn خالص.
أداء اللعبة
أداء اللعبة على PS5 بتقدم فرق كبير بينها وبين النسخة الأصلية، النسخة المحسنة بتيجي بخيارين: خيار دقة 4K وخيار أداء 60 إطار في الثانية. اللعبة عمومًا مستقرة جدًا من غير أي مشاكل، وده بيدي فكرة عن قوة معالج الـPS5.
التقييم النهائي
10/10
لو انت حابب فعلاً تستمتع بتجربة Horizon Zero Dawn بشكل جديد، النسخة المحسنة دي تستاهل كل دولار فيها، خصوصًا إنها بـ10 دولار فقط! (في حالة لو إنت شاري اللعبة) الجرافيكس اتحسن بشكل كبير، وكل تفاصيل البيئة والأعداء بقت أفصل بطريقة مبهرة. الموضوع مش مجرد تحسينات بصرية، لكن اللعبة فعلاً بقت حاجة تانية مع إمكانيات PS5. صحيح القصة والمهمات هما هما، لكن الجودة دي بتخليك تحس كأنك بتعيش تجربة Horizon لأول مرة. فلو بتحب اللعبة أو أول مرة هتلعبها، فا رقي للنسخة وعيش المغامرة دي مع إلوي بشكل مختلف أو جديد، وما تفوتش الفرصة.
