لعبة Ara: History Untold هي لعبة استراتيجية من نوع 4X لو جديد في العاب الاستراتيجي ومش عارف النوع ده ، فهو ببساطة بيرمز لأربع حاجات وهما explore وexpand و exploit و exterminateفبإختصار انت بتتحكم بكل شئ في اللعبة زي الاقتصاد والعلاقات الدبلوماسية والقتالات والتوسع والبناء ، فهي عموما يعتبر النوع ده أعمق من الالعاب الاستراتيجي العادية.
اللعبة من تطوير استوديو جديد كلياً اسمه Oxide Studios اتأسس في 2013 على إيد أسماء سابقة ورئيسية من اللي اشتغلوا على لعبة Civilization V (بالمناسبة لعبتي المفضلة في السلسلة) واللي صدرت في 2010 عشان كده متستغربش لو حسيت ان اللعبة فيها شبه بينها وبين العاب سلسلة Civilization بس ده ميمنعش إننا نقول ان اللعبة مش مجرد استنساخ من Civilization، بل هي ممكن نقول امتداد ليها مع إضافة أشياء جديدة تميزها عن بقية العاب الجنرا وتديها عمق اكبر في الجيم بلاي وده اللي هنتكلم عنه بشكل مفصل في المراجعة .
المراجعة بشكل أساسي هتبقى تغطية شاملة للجيم بلاي فقط وده لان هيطول شرحه، و هنقسمه لحاجتين شرح فكرة ونظام اللعبة وشرح لميكانيكيات اللعب نفسه مع جزئية اخيرة لبعض الملاحظات على اللعبة .
فكرة اللعبة ببساطة قايمة على انك بتختار قائد لحضارة معينة وبتقود الحضارة دي من العصور القديمة زي العصور البدائية ما قبل الميلاد مرورا بالعصور الوسطى إلى اخيرا العصور الحديثة ، وده بتقدمه اللعبة من خلال 3 فصول chapters ، كل شابتر عبارة عن 4 حقبات من العصور دي، وعشان تتقدم بالحقبات الزمنية محتاج تطور الـ technology وهي إنك تفتح تقنيات بحث وتطوير جديدة ، وبتبدأ زي ما هو متعارف مع الاشياء البدائية الأساسية في العصور القديمة، ولكن من خلالها بتقدر توصل لاختراعات وابتكارات أفضل لما تتقدم أكثر في العصور الزمنية.
واللعبة عبارة عن turn based او نظام جولات مش real time، فإنت مثلا بتبني وليكن مزرعة لازم تستنى مثلا 4 جولات عشان يتم الانتهاء من بنائها ، وممكن نفس المزرعة تبنيها في مدينة تانية ليك تاخد مثلا 8 جولات عشان تنتهي من بنائها وده بيرجع لعدد السكان اللي فيها وقوة الايد العاملة واللي بتأثر بشكل كبير على الوقت المستغرق لانهاء المباني اللي انت محتاجها في مدينتك.
وبالنسبة للـleaders او الحكام اللي بتلعب بيهم هما عددهم حوالي 36 شخصية منهم شخصيات معروفة زي جنكيز خان وهارون الرشيد وغيرهم ، وكل قائد بيبقى ليه perks او مهارات معينة بتميزه عن غيره انا مثلاً اخترت الحضارة المصرية واللي كانت بتمثلها نفرتيتي زوجة اخناتون الفرعون الوحيد اللي غير الديانة المصرية اللي كانت من قديم الازل على عبادة امون إلى عبادة اتون الإله الواحد ، فمن مزايها مثلا انها بتزود نسبة الاكل على كل مزرعة بتبنيها في مدنك ، وبتزود سرعة انتشار الديانة اللي بتختارها الحضارة بتاعتك مش شرط ديانة أتون ، طبعاً الديانة مش بتبقى مفتوحة ليك من البداية لازم تبحث وتطور انشاء الديانة ودي بتلاقيها في شجرة الـ technology زي ما ذكرنا لما تتقدم شوية في البحث والتطوير ، اختيار الديانة وانتشارها بين حدود الحضارات وبعض خصوصا لو في طريق تجارة ما بينكم – واللي بتقدر تفتحه عن طريق اكتشاف التجارة – بيزود من الـ prestige وهو ده عامود اللعبة وأساسها ، لانه يعتبر زي السكور بتاعك كل ما قدرت تزوده كل ما كانت حضارتك هي الاعلى شأنا بين الحضارات اللي بتنزل معاك في اللعبة وكمان اللعبة بتقدم معاها نظام الـknock out او الاقصاء وهو مع كل فصل جديد من الفصول الثلاثة بيتعمل اقصاء للحضارات اللي عندها نقط prestige أقل من الباقي لحد ما تفوز الحضارة اللي عندها نقط prestige اكتر في النهاية ، طبعاً ممكن في الاعدادات تقفل الخاصية دي بحيث ميتعملش ليك اقصاء لو كان الخصوم اعلى منك في نقط الـ prestige ولكن مينفعش (لحد دلوقتي) تلغيها للـAI الذكاء الاصطناعي.
وكمان في نقطة حابب اذكرها هنا للي ناوي يجرب اللعبة أن الحضارة اللي بتبقى هيتعملها اقصاء قبل نهاية الشابتر بيجيلك اشعار ان الحضارة دي على وشك الانتهاء والانهيار فتقدر لو حضارتك قوية انك تحتلها بسهولة شوية ،عكس مثلا لو انهارت فبتتحول لقبائل همجية مع الوقت بيثوروا وبيروحوا على اقرب مدينة ليهم يهجموا عليها.
اللعبة فيها ايفنتات او احداث عشوائية بتظهر مع كل turn او جولة وانت بتستكشف الخريطة حوليك عن طريق الكشافة او الـscouts والايفنتات لما تشارك فيها ممكن تخسر فيها مثلا موارد اساسية باللعبة واللي بيظهروا على شاشة اللعبة من فوق زي الحديد او اللي بتسميه اللعبة matirals والخشب والأكل ولكن في المقابل ممكن تكسب ثروة أو الـ wealth (العملات الذهبية) مع بونص سواء في الـprestige اونقاط الـquality of life ودول عبارة عن عدادات او شريط لكذا حاجة بيحددوا مدى ازدهار كل مدينة عندك بتبنيها في حضارتك زي الصحة والأمن والسعادة والعلم ،وبالنسبة للكشافة فهما يعتبروا اول جنود باللعبة مع الـ settlers (اللي بتقدر بيهم تنشئ مدينة جديدة على أي مكان عايزه على الخريطة ) و بتبدأ بيهم لحد ما تطور شجرة التكنولوجيا ويبدأ يظهر ليك جنود جدد زي الرماه بالاسهم والسيافين والفرسان ، وكل جندي بيتحدد عن طريق حاجتين السرعة اللي بيقدر يتحرك بيها على الخريطة والقوة اللي بيقدر يواجه بيها الخصوم .
وهنا نتكلم عن نقطة القتالات او الـ combat باللعبة، و اللي اشوفه في رأيي أفضل من اللي تم تقديمه في العاب Civilization ،لانه عبارة عن قتال 3D حقيقي ، تحس فعلاً باجواء المعركة لما تعمل زوم على الخريطة وتشوف الجنود بيقاتلوا بعض ، كمان في مزايا بالكومبات باللعبة زي انك تقدر ترتب الجنود في تشكيلات معينة عشان تاخد في المقابل بونص على القتالات ، كمان تقدر تخلي القتال تكتيكي عن طريق انك تخلي الرماة او الجنود باسلحة بعيدة المدى يقربوا من المربعات او الاماكن اللي قريبة من ساحة المعركة من غير ما يلتحموا مع الاعداء ، ولكن عموماً في الاخر زي ما هو متعارف عليه في النوع ده من الالعاب برده اللي جيشه اكبر غالباً هو اللي بيكسب الجيش الاقل عدد، والقتال بيتقسم لكذا نوع ، القتال البري والبحري بالسفن والجوي وده بيتفتح في العصور المتقدمة ويعتبر زي الـend game كده، وحديثاً عن الـend game فاللعبة بتخلص لما بتوصل تقريباً 1200 جولة على كلام المطور ، بس الحقيقة انا موصلتش لعدد الجولات ده رغم لعبي لعدد ساعات كتير ، واتفهم ان المطور حاطط ليمت للجولات عشان يضيف تأثير اكبر على الجولة اللي بتلعبها والقرارات اللي بتاخدها فيها، وكمان بيخلي في قيمة اضافية اكبر لإعادة اللعبة وانك تعيد لعبها بأكتر من طريقة .
اللعبة كمان بتقدم معها إمكانية تغيير نظام الحكم بالحضارة بتاعتك ، وكل نظام حكم جديد بيجي معاه بونص مختلف عن اللي قبله مع نظام ضرائب (برده نظام الضرائب ده بيبقى ليه بونص وبيختلف بالسلب او الايجاب على حسب درجة فرض الضريبة مرتفعة ام منخفضة) وكمان نظام الحكم بيزود ليك الـcap او الحد الاقصى لعدد المدن اللي تقدر تنشئها ، واللي ممكن كمان تزودها عن طريق انك تنشئ مبنى معين زي القصور او الـpalace ، وكمان نظام الحكم بيكون معاه معاه حاجة اسمها policy أو سياسة زي مثلاً الصورة اللي فوق علطول انا مختار الـpolicy اني احاول استقطب شخصيات الـparagons وهي عبارة عن شخصيات تاريخية مشهورة مؤثرة لما بيظهروا في حضارتك تقدر تعينهم مسئولين بالحكومة ممكن يكون مسئول عن الثقافة في الحضارة عندك او العلاقات الدبلوماسية مع الحضارات التانية او مسئول عن الامور الحربية وكل حاجة من دي بيبقى ليها مزايا بتختلف من شخص مؤثر للتاني في مثلا paragon بيفيدك في العلاقات الدبلوماسية زي انه مثلا يزود عدد التجار اللي يقدروا يجيبوا بضائع من الحضارات التانية او مثلا خبير في الاقتصاد ويزود دخل النقود مع بداية كل جولة، وكمان ميزة كل paragon انه يقدر يصنع ليك تحفة فنية او الـ masterpiece ،ودي مع انها بتاخد وقت طويل ولكنها بتديك نقط prestige كبيرة جدا لما تخلص وكمان بتاخد عليها نقط prestige مستقبلاً لما توصل للعصور الحديثة وتقدر تنشئ متحف وتضيف التحف الفنية دي ليها ، وكمان عن طريق البحث والتطوير تقدر تفتح مباني masterpiece زي الاهرامات او الحدائق المعلقة ، نظام الحكومة ممكن يبان كبير ومعقد لكن لما تفهمه بيسهلك اللعبة بطريقة كبيرة وبيكون دخل موارد كبير للحضارة بتاعتك ، وبتقدر تفتح الانظمة الحكومية المختلفة سواء عن طريق البحث والتطوير في التكنولوجيا المتاحة في عصرك وتكتشف النظم الحكومية و القوانين بنفسك او عن طريق العلاقات الدبلوماسية مع جيرانك الحضارات الاخري واللي ممكن لو علاقتكم كويسة مع بعض يقدروا يعرضوا عليك نظام حكم خاص بيهم كان ممكن تحتاج كذا عصر عشان توصله زي ما حصل معايا مع الانجليز عرضوا عليا نظام الحكم الانتخابي ” repuplic” مقابل جزء من النقود المتاحة في حضاراتي.
وعلى صعيد العلاقات الدبلوماسية ، فهي بتتقسم إلى صنفين ، النوع الاول علاقات مع القبائل البدائية اللي بيقابلها الكشافين لما يستشكفوا الخريطة وبتقدر تحسن علاقتك معاهم عن طريق الاحداث العشوائية اللي اتكلمنا عنها فوق ولو شريط العلاقة وصل للون الازرق وجربت تنشئ مدينة جديدة على الحدود معاهم ، هينضموا تلقائي للمدينة بتاعتك ويتركوا حياة القبيلة البدائية وكمان بيضيفوا للمدينة بتاعتك مورادهم اللي كانت معاهم زي الخشب والاكل الخ ، النوع التاني وهو العلاقات اللي بتبنيها مع الحضارات اللي بتقع في طريقك على الخريطة وانت بتستكشف سواء عن طريق انك تقابل كشافين ليهم او انك تلاقي المدينة نفسها بتاعتهم وفي الاول بتكون العلاقة عادية ولكن عن طريق انك تبعت ليهم هدايا من البضائع اللي عندك في مدنك او عن طريق حدث عشوائي محتاجين منك مساعدة في مورد معين تقدر تزود عداد شريط العلاقة معاهم وتفتح الحدود وتبدأ التجارة معاهم وتكوَنوا طريق تجاري ما بينكم ، ولما تتقدم في العصور أكثر بيظهر ليك خيار زي التحالف و البحث العلمي المشترك بحيث لو وصلوا لاختراع معين تقدر انت كمان تحصل عليه حتى لو موصلتش ليه .
أخر حاجة عايز اذكرها في نقطة الجيم بلاي وهي حاجة جديدة كلياً بتقدمها اللعبة على الجنرا وهي الـcrafting او التصنيع ، ودي عبارة عن ادوات بتساعد من انتاج المباني اللي بتنشئها في مدينتك ، لو مثلاً بنيت workshop تقدر تصنع فيها كذا نوع من الادوات زي مثلا أداة الحرث ، واللي بدروها بتدمجها مع المزرعة عشان تحصد أكل اكتر ، او تصنع حبل واللي بتحتاجه سواء في صناعة مباني جديدة او تدمجه مع مبني وتزود من انتاجيته (بدل ما ينتج في 6 جولات ينتج في جولتين بس وهكذا) فعموما نظام الـcrafting كان ممتع وضاف عمق اكبر على اللعبة.
وبالنسبة للحاجات الجديدة اللي بتقدمها اللعبة هو ان مفيش نظام الـ hex او المربعات اللي أشبه بلوح الـboard المتعارف عليها في العاب Civilization واللي كانت بترسملك اتجاه محدد على الخريطة واللي كان لازم تستكشفها في الطرق المعينة بس اللي بتظهر على الخريطة ، لكن في Ara: History Untold تم التخلي عن النظام ده وتقدر تستشكف اي مكان في الخريطة بحرية كاملة دون قيود ، وكمان من الحاجات الجميلة اللي قدمتها اللعبة ان انت والخصوم بتبدوأ الجولة أو الـ turn مع بعض على عكس المتعارف عليه في العاب النوع ده من الجنرا وهو انك بتبدأ جولتك وتخلصها وبعد كده الخصم بيبدأ جولته وهكذا، وده بيخلق جيم بلاي اسرع عن المعتاد.
كمان اللعبة بتقدم طور اونلاين بجانب الطور الفردي وتقدر تلعب مع 35 لاعب عبر الانترنت في خريطة واحدة. لكن للاسف مكنش فيه فرصة اجربه لان اللعبة لسه متوفرتش بشكل رسمي!
واللعبة عموماً بتقدم شرح محترم لكل حاجة فيها لو انت مش فاهمها وتقدر تبدأ اللعبة بشكل مباشر مع تفعيل الـtutorial، ده بجانب الـ UI او واجهة المستخدم البسيطة والجذابة، وكمان الشروحات حتى مش معقدة او محتاجة دراسة وبحث زي بعض الالعاب الاستراتيجية.
عندي بعض الملاحظات على اللعبة ، مش هقدر اقول عيوب لانها ممكن تتحل في التحديثات اللي هتنزل مستقبلاً للعبة ، بعض الاخطاء التقنية في اللعبة هنا وهناك زي مثلا انك لو بدأت جولة جديدة، مرة واحدة بشكل عشوائي تتغير علاقتك للاسوأ مع الحضارات التانية وشريط العلاقة ينزل جامد في حين أنك ممكن تكون العلاقة وصلت للشريط الازرق والامور تمام ما بين الحضارتين ولكن هي غلطة تقنية الـAI سواء انت بتعامله كويس او وحش يقلب في علاقته عليك فجأة والحل هنا انك ترّجع save للجولة السابقة وتحاول تبعت أي gift ليهم وتكمل الجولة ولما تبدأ الجولة الجديدة هيفضل شريط العلاقة زي ما هو ميتأثرش بحاجة حتى لو رفضوا الجيفت اللي بعتها ليهم، لكن غير كده الاداء التقني للعبة ثابت مع بعض الجليتشات الخفيفة واللي اكيد هتتصلح مع التحديثات الجاية.
برده ملحوظة تانية على اللعبة ان مفيهاش لغة عربية ، انا عارف النوع ده من الالعاب مش مشهور عندنا ومش بيتعرب ، بس ايه اللي يمنع ان لعبة تدعم لغة حوالي 26 دولة منهم فيتنام وماليزيا ومفيش دعم للغة واحدة بيتكلم فيها تقريباً نفس عدد الدول دي زي اللغة العربية، غير كمان في شخصيات ظاهرة باللعبة في حضارات بالشرق الاوسط زي الحضارة المصرية الفرعونية والخلافة العباسية ببغداد في العراق ، فأتمنى اللعبة تضيف دعم للغة العربية مستقبلاً ، لعل وعسى يحصل اقبال عليها ويزيد شعبية النوع ده من الالعاب اكتر هنا في منطقتنا.
