مراجعة
Alan Wake II
استوديو Remedy بيرجعلنا تاني بلعبة مثيرة للجدل ودا مش شيء غريب على Remedy بس المرة دي الوضع مختلف احنا قدام تجربة مجنونة حتى اكتر من Control لعبة مابتخافش من تجربة افكار جديدة و في نفس الوقت بتقتبس الافكار الناجحة من اشهر العاب الرعب الخلطة دي مع بعض بتقدملك تجربة رعب و بقاء مع سرد قصصي و تجربة سينيمائية و رسومية هي الافضل بالتأكيد في الفترة الاخيرة على الاقل.
القصة
كلامي الجي لازم يبقى فيه حرق للجزء الاول فا لو ناوي تلعب الجزء الاول و الي بالمناسبة انصحك انك تعمل كدا بلاش تقرأ الجزء ده من المراجعة. القصة هنا بتدور احداثها بعد ١٣ سنة من احداث الجزء الاول الي صدر في ٢٠١٠ الي انتهى على ان الكاتب Alan Wake انقذ مراتة من الDark Place و ثمن ده انه يتحبس مكانها ضريبة اخراجها من المكان ده،لمدة ١٣ سنة Alan wake كان بيحاول يخرج من المكان اللعين ده عن طريق كتابة قصة و سيناريو يخرجه للواقع حاجة اشبه بأفلام Christopher Nolan خاصة فيلم زي Inception و هنا بنيجي لبطل القصة التاني Saga Anderson محققة الFBI الي بتحقق في جريمة قتل و الي ليها ارتباط عجيب بالقصة الي Alan wake بيكتبها في الDark Place، مهما حاولت اشرح القصة هنا مش هتفهم حاجة القصة معقدة ومجنونة و لو حسيت انك مش فاهم حاجة وانتا بتلعب دا مش معناه انك غبي او حاجة لا اللعبة فعلا معقدة جدا و مرتبطة بعالم Control و اكيد الجزء الاول من Alan wake الي انتا محتاج تدرسة مش مجرد تلعبة عشان تقدر تفهم نوعا ما أيه الي بيحصل.
طريقة اللعب و تصمييم المهمات
اللعبة هنا مختلفة عن الجزء الاول من حيث ان اللعبة اصبحت لعبة رعب و بقاء بموارد و اسلحة محدودة و حركة شخصيات مش سريعة طريقة اللعب هنا اشبه بحاجة زي Resident Evil 4 لكنها سوداوية و مافيهاش اكشن و ضربات بقدر الاخيرة بل بتواجه الاعداء الي عبارة عن بشر ملبوسين من ال dark Presence بكشاف و مسدس،حابب اذكر طبعا ان اللعبة مقسومة نصين نص بتلعب ب Alan و نص ب Saga و طريقة اللعب و الأسلحة و نظام التطور و حتى شكل المهمات مختلف بين الاتنين بشكل كبير حيث ان Alan مهماته في عالم خيالي من كتابتة اشبه بNew York و عنده القدرة على تغيير المشهد الي هوا فيه عن طريق الكتابة و عن طريق اداه عبارة عن لمبة و دا بيتم في ثواني بسيطة والي بيبين قدرات الجيل الجديد و الي بيحاول فيها Alan عمل سيناريو مناسب بحيث انه يخرج من الDark Place الي محبوس فيه،اما Saga فا هيا في الواقع في مدينة Water Falls المليئة بالاشجار و المناظر الجميلة الي بيحصل فيها احداث خارقة عن الطبيعة و راحت هناك في مهمة عمل حيث انها محققة مع الFBI بتحاول تحل قضية القتل الي حصلت من طرف مجموعة متطرفة هيا و مساعدها Alex الي بالمناسبة بيمثلو Sam lake المخرج بتاع اللعبة و بتحاولو تجمعو دلائل و اعترافات و الي بتواجه فيها الغاز على شكل Password او اقفال وحتى انها تدور على قطع معينة زي فيوز عشان ترجع الكهرباء للمكان او مفتاح لباب عشان تقدر توصل للحقائق والي للأسف بتزيد الطين بله او بتخلي الاحداث تتعقد اكتر، كمان Saga عندها قوى خارقة نوعا ما بتخليها تنفصل عن الواقع و تنتقل لغرفة جوا دماغها و تحل الالغاز و القضايا عن طريق معرفة كيفية تفكير الشخص ده و ربط الادلة مع بعض مع العلم ان احداث القصة الي بيكتبها Alan بتأثر على الواقع بسبب شيء شرير اسمه Dark Presence، و بعد وقت هتقدر تنتقل بين مهمات Alan و Saga بالترتيب الي تحبه و الي هيوصلك للأخر لوجود ربط عجيب بين احداث Saga و Alan.مهما اتكلم مش هقدر اوصف جنون المهمات خاصة مهمات Alan الي اشبه بSand Box لكتاباته و حتى مهمات Saga الي ممكن تكون تجربة رعب كلاسيكية شوية بس كانت ممتعة جدا في اماكنها و افكارها و الغازها.
الرسوميات و طريقة السرد
اول سؤال اكيد جي في بالك ايه علاقة الرسوميات بطريقة السرد الحقيقة اللعبة هنا بجانب الرسوميات الخرافية الي هتكلم عليها قدام هيا قدمت مشاهد Live Action كتير بتوصلك القصة بطريقة سينمائية بممثلين حقيقيين و ممكن تبقى مجرد اعلانات او يوميات لشخص او حتى مهمة كاملة عبارة عن اغنية كوميدية او كمان حتى ان في فيلم قصير حوالي ١٠ دقايق موجود جوا اللعبة المشاهد دي مجموعها ممكن يتعدى الساعة الا ربع و بتضيف جانب مميز للتجربة ماينفعش يتنسى و الحقيقة استوديو Remedy مش اول مرة يقدم مشاهد حقيقية في العابه زي كوانتم بريك الي قدمت مسلسل كامل بين حلقات اللعبة لكنه اختياري بينما في Alan wake 2 المشاهد هنا متناغمة و متجانسة مع اللعبة بشكل غريب مش قادر افسره غير انه عبقري،اما بجانب الرسوميات نفسها فا ياجماعة اهي دي الي يتقال عليها تجربة جيل جديد من وشوش الشخصيات الواقعية جدا لخامات الملابس الي تحسسك بأنهم لابسين لبس حقيقي مش مجرد جرافيك لتصاميم العوالم الاكثر من رائع كل مكان في الخريطة مهم وفيه تفاصيل معمولة مخصوص للمكان ده مافيش حاجة معمولة بعشوائية الغطاء الشجري او الخضري في اللعبة اتقدم بشكل لأول مرة يحدث في عالم الالعاب ان يتم تقديمة بالشكل ده من حركة الشجر و الزرع و الكثافة بتاعته كانت رائعة كمان عالم Alan الخيالي مع المباني و الاضائات و الامطار للجو العام بتاع المكان و اوراق الجرايد المتطايرة و وتفاصيل المباني من جوا الي بتتنوع من سينما لفندق لمترو انفاق تفاصيل تحسسك انك بتلعب جوا فيلم مش مجرد لعبة ،الرسوميات ببساطة هيا الافضل في السنة ولأول مرة احس بأن اجهزة الجيل الحالي غير قادرة على لعبة او مش مدايها حقها اللعبة دي بالتأكيد على الPC مع تتبع الاشعة و غلق خاصية زي الFSR كنا هنشوف شيء مش طبيعي، لكن احب اذكر ان اداء اللعبة على الاجهزة المنزلية مستقر لكن يعيبة للأسف ظهور عيوب الFSR بشكل مزعج شوية.
الصوتيات و الموسيقى
الصوتيات هنا كانت كويسة جدا وانصح لعب اللعبة دي بالسماعة لأنك هتحتاجها في تحديد اماكن الاعداء الي بيتحركو بسرعة و بيختفو من قدامك وماتبقاش عارف راحو فين فا السماعة هنا مهمة جدا الحقيقة،تاني حاجة لازم اتكلم عليها هوا ان الاستوديو عامل حوالي ١٠ اغاني جديدة للعبة بس والي هوا حاجة انا ماشفتهاش قبل كدا واهتمام الاستوديو بالجزء ده يجب ان الواحد يذكرة الحقيقة لأنه مش طبيعي. الخاتمة: لعبة Alan wake 2 قدمت تجربة رعب استثنائية و مختلفة حتى وان اقتبست بعض العناصر من اشهر العاب الرعب الا ان الجديد الي قدمتة يجعلها لعبة فريدة من نوعا تجربة مش زي اي تجربة جربتها قبل كدا في عالم الالعاب و انا فعلا بقلك المراجعات بشكل عام مش هتقدر توصلك الفكرة بشكل كامل لأن اللعبة دي لازم تخوض تجربتها بنفسك
التقييم النهائي
9/10
