في الفتره الاخيره الشركات بقت تعتمد علي عنصر الحنين للماضي كتير جدا في اعمالها اذا كان العاب افلام مسلسلات و غيره , و احينا ممكن المنتج بسبب النقطه دي ينجح تجاريا بشكل كبير جدا بسبب عشاق السلسله دي و اللي منتظرين اي حاجه جديده تنزل ليها حتي لو جودتها ممكن تكون مش احسن حاجه
و لكن برضو بيكون في امثلة علي اعمال اعتمدت بشكل كبير علي الجانب ده و لكن في نفس الوقت كانت برضو بتقدم مستوي كويس جدا زي مثلا spider man no way home و اللي كان عمل ناجح جدا بكل المقايس
او في عالم الالعاب بعض الremakes زي الremake الخاص بلعبه resident evil 2 و اللي كان ناجح تجاريا جدا بسبب استغلاله لنقطه الحنين للماضي و كمان كان قادر علي انه يكون لعبه ممتازة و يكسب جوايز
و بنيجي لمثال جديد بيحاول يمشي علي خطى من سبقه و هي لعبه UFO ROBOT GRENDIZER – The Feast of the Wolves
فهل يا تري هي نجحت في استغلال الجانب ده ولا كانت محاوله فاشله من المطور علشان يكسب فلوس بسبب العلامه التجارية ده اللي هنعرفوا في مراجعتنا.
القصة
طبعا في حاله انك متعرفش فاللعبة دي معمولة علي مسلسل كرتوني اتعرض زمان و لما بقول هنا زمان جدا و ده لأن المسلسل الاصلي و اللي كانه اسمه UFO Robot Grendizer فهو نزل سنة 1975 و فضل يتعرض لحد سنة 1977
و كان في بعض المحاولات لإحياء المسلسل تاني و لكن كلهم فشلوا تقريبا
و المسلسل الاصلي كان ناجح جدا في الوطن العربي و كان تقريبا مفيش طفل في الوقت ده مكنش بيتفرج عليه
وقصة اللعبة هنا بتحاول انها تقدم حاجه كويسه و انها تكون علي نفس الرتم و افكار المسلسل الاصلي و القصه بأختصار بتبتدي في اعماق الفضاء الشاسع و تحديدا في كوكب فليد و اللي كان كوكب متطور جدا و حصل اتفاقية بين فليد و امبراطورية اخرى معروفة بإسم فيجا ان أمير كوكب فليد يتزوج من روبينا ورثة عرش إمبراطورية فيجا
لكن بيحصل ما هو ليس متوقع و بتخون فيجا فليد و بتحاول انها تسيطر علي الكوكب و تحتله و هنا بيتدخل الأمير علشان يحمي مملكته من الاعداء فهل يا تري هينجح ولالا ؟
و زي ما انتم شايفين في القصة تعتبر بسيطه و لكنها مناسبة لأجواء المسلسل الاصلي و لو انت جيمر و كنت بتتفرج علي المسلسل ده و انت صغير فأنت هتستمتع جدا و انت بتشوف شخصياتك المفضلة و هي بترجع من تاني و بتعيش معاهم قصص جديدة.
و بس كده كفايه كلام عن القصه لان بصراحه مفيهاش حاجات كتير ممكن نتكلم عنها لانها بسيطة و متتوقعش مثلا حاجه جبارة و هي كلها تخلص تقريبا في حدود 5 ساعات لعب و لكن للاسف ممكن نعتبر انها عيب لانها قصه ضعيفه كلاشيه جدا مقدمتش حاجة جديده مجرد مغامره جديده في نهايتها بينتصر البطل و في نفس الوقت قصيره جدا على انها تكون لعبة ب40 دولار !
الجيمبلاي
هنا برضو مطورين اللعبه كانوا بيحاولوا انهم يقدموا حاجه و يعتبر فيه تنوع شويه يعني مثلا انت يعتبر الجانب الأساسي عندك هو انك تلعب بالروبوت العملاق بالمعروف باسم grendizer و اللي بيكون في تنوع في ضرباته يعني مثلا عندك الauto attack العادي وفيه ضربة شبه ال finish الخاص بالاندرتيكر
و بيكون عندك حاجه شبه الboomerang برضو ممكن ترميها على الأعداء و بعض الكومبوهات الخفيفة كده
و لكن احب افاجئك و اقولك ان الكلام ده كلوا ملوش اي لازمه
لان كل الاعداء تقريبا انت ممكن تخلص عليهم بأستخدام الauto attack العاديه و طول اللعبه تقريبا انا مشلتش ايدي من علي الزرار و كنت عمال ادوس عليه و بس
صحيح احيانا كنت بحتاج اني اضرب الوحوش بأسلحة تانيه لان بيكون فيه بعض الدروع اللي مش بتتكسر غير بأسلحة معينه و لكن اول ما الدرع يتكسر برجع تاني اضربهم auto attacks عادية و بس
و اللعبه مش بتستغل التنوع اللي حاولت تقدمه في ميكانكس الجيم بلاي اثناء فتره لعبها ومش كده وبس لا دي بتقدم للاعب كل افكارها في اول نص ساعه تقريبا و ده اللي بيخليها ممله جدا بعد مرور اول ساعه انت متخيل ؟
اصل اللعبه متمحورة على حاجه واحده بس انت بتروح تكلم شخص تاخد منه مهمه تركب الروبوت الضخم بتاعك و تضرب شويه روبوتات تانين و خلاص
و اه بالمناسبه اللعبه فيها boss fights و لكن زيها زي الوحوش العاديه لكن الhp bar بتاعها كبير شويه مش اكتر و افكارهم تقليديه جدا.
و اللعبه برضو بتقدم شويه upgrades ممكن تعملها لجريندايزر و اللي بتزود في ال damage اللي انت بتعمله مش اكتر مفيش نقله نوعيه مثلا ممكن تحصل لما تهتم بتطوير شخصيتك من عدمه مجرد ارقام بتزيد و بس.
و اه حاجه كمان لعبه نازله في 2023 و مفيهاش زرار للجري !
اه والله زي ما بقلك كده انت مش بتعرف تجري في اللعبة دي هي الشخصية ليها سرعه واحده و بس كده تفضل تمشي بقي لحد ما ربنا يفرجها و توصل للوجهه بتاعتك
اه و كمان اللعبة مفيهاش map انت بتخش العالم و تشوف بقي انت عايز تعمل ايه و لكن في map صغيره اوي كده للمناطق و اساميها و خلاص
و بمناسبه العالم فاللعبه تعتبر فيها عالم مفتوح على الضيق كده و لكن متتوقعش حاجه هو عبارة عن منطقة على شكل مربع محطوط فيها شويه نجيله علي كام نهر و بحر و كمان انت لو بتجري علي الأرض او في المياه مش فارقه نفس سرعه الحركه
و اللعبه بتحد حركه اللاعب احينا كتير بسبب الhidden walls اللي بتبقي موجوده في مناطق متباقش فاهم هي محطوطه ليه اصلا !
و الحمد الله خلصنا من جريندايزر لكن لسه في جانبين تانين في الgameplay و صحيح هم مخدوش جانب كبير زي جريندايزر و لكن لازم نتكلم عنهم برضو
الجانب الأول وهو لما بتبقي في الفضاء و بتلعب بسفينة فضائية اسمها spazer و لما بتلعب بيها الموضوع بيكون شبه chicken invaders و لكن اكتر ملل و المراحل بتطول اوي اوي بشكل مبالغ فيه
و اخيرا و انت بتلعب بالأمير نفسه و بتكون غالبا بتتجول بيه في منطقه معينة و بتتكلم مع ناس و الجانب ده ملوش اي لازمه غير تضيع شويه وقت فقط
و اظن كفايه كده كلام عن الجيمبلاي و خلينا نخش في الجانب اللي بعديه و هو الجانب الفني
الجرافكس
اللعبة قدمت جرافكس كويس بالنسبة للعالم اللعبة وأنها مبنية على مسلسل كرتوني و كان تصميم العالم كرتوني و ممكن يبقي شبه العمل الأصلي و تصاميم الشخصيات تعتبر نسخه طبق الاصل من ما تم تقديمه في العمل الاصلي وغير كده فالجرافكس مفيهوش كلام كتير بصراحه
الصوتيات
اللعبة قدمت موسيقى تعتبر هي هي اللي كانت في العمل الأصلي برضو من غير ما تقدم جديد يذكر و اللي كان حضورها ضعيف جدا في اللعبة لانها بتتكرر كتير جدا و احيانا كتير اصلا بتلاقيها مش شغاله لكن انت لو من عشاق المسلسل الاصلي فالموسيقي دي هترجع ليك ذكريات كتير اوي
و لكن علي الجانب الاخر في الاداء الصوتي للممثلين فالأداء العربي موجود و بصراحه اختيار الممثلين كان كويس جدا و اصواتهم لايقه على معظم الشخصيات و لكن في عيب قاتل في الدبلجه العربيه و هي ان الممثلين تحس انهم بيقروا جرائد و مفيش اي احساس ولا مشاعر في صوتهم, لكن وجود اللغه العربيه في اللعبه ميزه و خصوصا ان المسلسل الاصلي كتير من محبينه كانوا من العرب
الجانب التقني
و هنا بقي انت اي جليتش شوفته في حياتك و مهما كانت الالعاب السنه دي سيئه في الجانب التقني لكن لعبه النهارده في حته تانيه خالص
بص يا سيدي انت اي جلتش ممكن تتخيله غالبا هتلاقيه هنا
يعني انا هحكي عن تجربتي الشخصيه اثناء اللعب و ممكن لما تلعب اللعبه متقابلش كل ده و لكن انا لازم انقل تجربتي بشكل كامل
مثلا ممكن فجأة الشخصية تروح واقعة تحت الارض و علشان تطلع لازم تعمل restart و اللي هيضيع عليك تقدمك في اللعبة لان اللعبة في 2023 و مفيهاش checkpoints لازم تخلص المهمه كلها علشان تحفظ تقدمك !
أو ان مثلا احنا اللعبه بتعمل drop frame شنيع بلا سبب يذكر و ده غير اصلا ان متطلبات اللعبه علي اجهزة الpc عالية جدا من غير مبرر
أو الجانب الصوتي و اللي احيانا بيختفي من اللعبه كلها بلا سبب و لازم تقعد تقفل و تفتح في اللعبة كام مره كده لحد ما يقرر يشتغل من تاني
و كتير من الجليتشات اللي لو فضلت اتكلم عليها مش هنخلص انهارده و لكن هكتفي بعيب اخير هيوضحلك اللعبه دي فين بظبط في الجانب التقني
و العيب بكل أختصار ان لما بتفتح اللعبه المطورين بيقولوا ليك انت علشان تاخد احسن تجربه يفضل انك تلعب بالcontrollers و فعلا انا عملت كده و وصلت الcontroller بتاعي وابتديت العب و ياريتني ما عملت كده
لان من اول لحظة تبتدي تلعب فيها و الcontroller الخاص بيك لو بيدعم الفايبريشن هيبتدي يتهز بشكل جنوني
ضربت وحش هتاخد فيبريشن , اخدت damage برضو الcontroller هيعمل فيبريشن , بتمشي عادي في عالم اللعبه و قررت تنط مثلا الcontroller هيعمل فيبريشن , طيب اللعبه بتعلمك بعض الميكانكس و فتحت ليك tip علشان تقراها فا لسبب ما الcontroller هيعمل فيبريشن لحد ما تقفل الtip و الموضوع بقي مزعج اوي بصراحه
المشكله ان الفيبريشن بيبقي عنيف جدا انا بعد ما خلصت اللعبه حسيت ان جسمي بيرعش والله
و مش كده و بس انا قررت اني اوقف في نص اللعبه و اخد راحه من اللي بيحصل فيا ده و لكن وسط ما انا في الpush menu لقيت الدراع بيترعش برضو !
و قلت يمكن انا نحس و العيوب دي كلها عندي انا فقط فدخلت علي مراجعات الاعبين علي Steam و لقيت كوارث من ناس بتشتكي ان اللعبه بتعمل كراش في مناطق معينه و drop frame و مشاكل اكتر بكتير من اللي قابلتني انا
و انا مش شايف اي مبرر واضح لفريق التطوير علشان اللعبه تطلع بالشكل ده لانها لعبه صغيره اصلا و مفيهاش محتوي كبير علشان نقول اه معذورين و الموضوع هيتحل مع الوقت
و لكن برضو المشاكل دي كلها ممكن تخلص بتحديث واحد من المطور و ده هيرفع من قيمه اللعبه بشكل كبير
الخاتمة
لعبة UFO ROBOT GRENDIZER – The Feast of the Wolves كانت وفية جدا للمادة الأصلية و لعبت علي ناحيه الحنين للماضي بشكل كبير و يمكن دي الميزه الوحيده اللي موجوده لكن انت لو مستني قصة عميقه او جيمبلاي او حتي لعبه مستقره تقنيا فللأسف مش هتلاقي اللي إنت عايزه هنا و اللعبه دي ليس الا منتج مقدم بيلعب على نقطة الحنين للماضي بالنسبة لعشاق المسلسل الاصلي و بس
و بصراحة كتير ان يتدفع 40 دولار في لعبه زي دي انت لو حابب تلعبها تقدر تستنى اقرب عرض عليها
و اللعبه متوفره على أجهزة الجيل الحالي و الجيل القديم و الpc و السويتش
و اخيرا تقييمي النهائي للعبة هو
6/10
و تقدر تطلب اللعبة من خلال موقع جيمزاوي او اي لعبه تانيه تحبها و هتوصلك في اسرع وقت ممكن و بس كده اتمنى تكونوا استمتعتم بالمراجعة !
القصة
