الواقعية والتيكي تاكا..!
بدأت رحلتي مع فيفا من سنة 09 بعد ما كنت عاشق لسلسلة PES اللي كانت مسيطرة وقتها على مبيعات ألعاب كورة القدم في مصر والوطن العربي وقتها، PES 06 كانت واحدة من ألعابي المفضلة لكن اكتشافي لفيفا وقتها غير من تفضيلي الشخصي وخلاني أحس إن فيفا أكثر واقعية من حيث الفيزيائية والإصابات وحتى احتساب لمسات اليد!
فيفا 23 هي الجزء الأخير من السلسلة اللي هيكون بالمسمى ده، لإن العقد هيتفسخ بين شركة EA واتحاد كرة القدم (الفيفا) وبالتالي اللعبة هيتغير اسمها في المستقبل، وعشان كان يعتبر الجزء ده هو احتفاء بتاريخ السلسلة، وبيحمل على أكتافه تاريخ عريق من التميز محتاج إنه يحسن عليه، فهل نجح في ده؟ ده اللي هنعرفه في مراجعة فيفا 23 النهاردة.
اكيد إنت عارف إن اللعبة حصلها طفرة في الشعبية بعد ظهور مود الألتميت تيم، وبقى هو سبب شرائي وشراءك للعبة كل سنة حتى لو التحسينات بسيطة، وعشان كده كان من المتوقع إن التحسينات على المودات اللي كانت زمان مودات اللعبة الأكثر شعبية زي الكارير مود مثلًا تكون قليلة.
المرة دي الموضوع مش كده، بل بالعكس المودات كلها تقريبًا حصلت على تجديدات تحترم جدًا ومؤثرة من حيث الكم والمفعول، ده غير التغييرات التقنية اللي فرقت جدًا في اللعبة في تفاصيل صغيرة هنتكلم فيها في المراجعة.
التغييرات التقنية
أولًا تقنية الHypermotion 2 هي الجيل الجديد من تقنية إلتقاط الحركة الدقيقة اللي بدأ استخدامها من الإصدار اللي فات على منصتي الجيل الجديد، بدون الحاسب (pc) لكن السنة دي بينتقل استخدام التقنية لنسخ الحاسب كمان. التقنية دي ببساطة بتفرق جدًا في حركات أجساد اللاعبين يعني مثلًا لاعبين نفس البروفايل هتلاقي حركاتهم فرقت عن بعض زي مثلًا عثمان ديمبلي وفينيسيوس جونيور و كيليان امبابي. كل واحد فيهم أقرب لنسخته الواقعية من حيث حركة الجسم في كل تفاصيل المباريات وحتى الجري.
لو بتسأل ده هيفرق معاك كلاعب إزاي، فهو هيفرق في تقديم تجربة أقرب للواقعية في اللعبة بحيث لما تلعب بلاعب معين، تكون واخد كل المميزات اللي عنده في الحقيقة ومعاها كل العيوب، ولو هو لاعب عيوبه قليلة، فأنت هتكون محظوظ بإنك واخد مميزاته زي سرعته وسهولة المرواغة عنده إلخ.
وعلى ذكر الواقعية فالوشوش حصلت على تجديد برضو كل اللي كان وشه مش معمول بشكل واقعي في الفرق الكبيرة زي بيدري وجافي مثلا في برشلونة اتظبطوا بشكل عظيم وواقعي وتم إضافة حركات وشوش أكتر للاعبين كلهم عشان يقدروا يعبروا عن مشاعرهم خلال المباراة بشكل أكثر عمقًا.
أنظمة الضربات الثابتة أتغيرت بشكل يخليها أسهل وفي نفس الوقت محتاجة مهارة، على عكس النظام السابق اللي كان عشوائي بشكل كبير. وكمان اللعبة بقت أبطأ ومعتمدة أكتر على التمرير. يعني “أجوال الموظفين” اللي بتيجي من الباصات الكتير هتكون هي الأساس المرة دي، ودي مش حاجة وحشة بالعكس اللعبة كانت سريعة في بعض الأوقات بشكل مبالغ فيه كان بيخلي مباريات تنتهي بشكل مش منطقي بنتايج كبيرة المرة دي بناء اللعب بقى مهم وهتحتاج تعتمد عليه عشان تكسب في مباريات كتير، وداعًا لزمن الثروهات والإنفرادات !
الذكاء الإصطناعي حصل على تغيير شبه جذري بحيث بقى ذكي وبيعرف يتمركز كويس أوي في الهجوم والدفاع. أنا عن نفسي بحب نظام دفاع فيفا من زمان بس السنة دي الموضوع بقى أصعب شوية بسبب تحركات اللاعبين في الهجوم ومرواغاتهم في التمركزات.
بتستخدم فيفا تقنية اسمها التعلم الآلي بحيث بيتم استخدام حركات وتكتيكات أحرف لاعبين اللعبة ضد اللاعبين اللي بيلعب ضد الذكاء الإصطناعي، فلو كنت فاكر إنك خلاص حفظت كل حركاته فأنت غلطان وهتحتاج تغير من أسلوبك كتير السنة دي. مبقاش فيه حاجة سهلة يا صديقي!
حراس المرمى حصلوا على تعديلات بسيطة بس مؤثرة جدًا برضو زي معاملة أصابع الإيد بشكل منفرد واللي كان مش ممكن قبل كده بسبب البعد التقني لتصميم الشخصيات، دلوقتي ممكن الحارس يصد كورة بأطراف صوابعه أو صباع واحد حتى أو أضعف الإيمان يغير اتجاهها.
مودات الأوفلاين
أكتر مودات حصلت على تغييرات كانت الكارير مود اللي بقاله فترة مهمل بشكل مزعج الحقيقة، لكن لحسن الحظ المرة دي التغييرات كلها في صالحه وخلته هو النسخة الأفضل في السلسلة.
تقدر دلوقتي تلعب بالمدرب اللي تحبه بدل ما تعمل شخصية جديدة تلعب بيها، مع ميزة جديدة اسمها PLAYABLE HIGHLIGHTS ودي عبارة عن إنك بدل ما بتلعب المباريات كلها بتلعب الHIGHLIGHTS بتاعتها بس، يعني شبه اختيار إنك تعمل Simulation للمباراة بس بدل ما بتسيب كل حاجة للذكاء الإصطناعي بتلعب أنت الفرص واللحظات المهمة في الماتش وتقدر تغير النتيجة لو أنت مهارتك عالية.
كمدرب مخضرم دلوقتي بقى ليك الحق إنك تستثمر فلوس النادي في نشاطات مختلفة زي بيع التشيرتات أو إنشاء تطبيق للنادي أو حتى عمل فريق ألعاب إلكترونية باسم النادي وحاجات تانية كمان.
كارير اللاعب بقى أفضل من أي وقت فات بفضل نظام شخصية اللاعب اللي بيسمحلك تنمي شخصيتك في الملعب سواء كانت شخصية هجومية قائدة للفريق أو شخصية متعاونة مع الفريق أو شخصية بتعتمد على الحلول الفردية. الحاجات دي ممكن تبانلك على الورق مش تغييرات كبيرة لكن صدقني الموضوع ممتع وعميق لما بتقضي معاه موسم كامل أو أكتر جوة اللعبة.
الألتميت تيم
الألتميت تيم طبعًا هو أهم مود في اللعبة عشان كده سبته للآخر. المرة دي التغييرات فيه على جميع الأصعدة وأهمهم 3 تغييرات كبيرة هتأثر على اللعبة على مدار السنة.
1- نظام الchemistry الجديد
نظام الكيمستري قبل كده كان بيعتمد على إن توتال التناغم بين الفريق 100 نقطة بس دلوقتي بقوا 33 بس وتم إزالة الخطوط الحمرا والصفرا والخضرا، وبقا الاعتماد على مراكز اللاعيبة وقربهم من بعض في الدوري والفريق. يعني لو معاك مدافع ومهاجم من نفس النادي كيميا الفريق ككل هتتحسن وده المطلوب والأكثر منطقية الحقيقة.
نظام الكيميا الجديد معقد شوية في الأول بس هتلاقي نفسك فهمته وحبيته مع الوقت خصوصًا إنه بيخلي في حرية أكبر في بناء الفرق وتخصيصها واللعب بتشكيلات أوسع وأكثر تنوعية.
2- عملة النجوم الجديدة:
ودي بتقدر تشتري بيها لاعبين جداد سواء إعارة أو بشكل دائم من متجر جوة اللعبة وده بيخلي في جانب إدارة موارد تفضل تفكر فيه طول وقت لعبك. أشتري اللاعب المتوسط ده دلوقتي وأرفع مستوى الفريق بشكل دائم ولا أشتري لاعب عالي بشكل مؤقت؟ وهكذا
3- FUT Moments
ودي تحديات صغيرة بيتم تنفيذها على مدار السنة بشكل حر وبتكون سهلة وبتاخد مقابلها مكافآت كويسة تساعدك تبني فريقك والجميل هنا إنها إضافة مناسبة للناس اللي مش فاضية بشكل إسبوعي عشان الFUT challenges، وبتخلي شريحة اوسع من الناس تقدر تلعب اللعبة.
الجرافيك والصوتيات في اللعبة هم الأفضل على الإطلاق، تفاصيل الوشوش وحركاتها وتفاصيل الأجسام والتشيرتات والملاعب والأجواء وكل حاجة في اللعبة متعلقة بالصوت والشكل متقدمة بأعلى اشكال الإتقان، ده غير إن تم إضافة كم هائل من المقاطع السينيمائية لأجواء بعد وقبل وأثناء المباريات عشان تديك جو إنك بتتفرج على مباراة حقيقية فيها تنافسية والجماهير جزء مهم منها كأنها على قناة رياضية كبيرة. ودي أحد الجوانب اللي حبيتها في فيفا من زمان وهي الآن مستمرة وفي أفضل أحوالها.
في النهاية، فيفا 23 هي لعبة جيل جديد بحق، بنصحك تلعبها على الجيل الجديد لإن ده أفضل شكل تجربها بيه، و لإنها أفضل إصدار من السلسلة كلها على جميع الأصعدة، وحتى الناس اللي بتشتريها عشان تلعب الكارير مود والمودات الأوفلاين هتلاقي في الجزء ده أحسن كارير مود موجود، وبكده تستمر فيفا في تربعها على عرش ألعاب كرة القدم بدون منافسة تذكر..فمين يقدر يقوف الوحش؟
التقييم النهائي : 9.5/10
اشتريها وأنت مغمض
تم تزويدنا بنسخة المراجعة الرسمية من Electronic Arts
