توسعة Starfield: Shattered Space اللي لسة نازلة مؤخرًا كانت متوقع إنها هتكون حاجة خرافية للعبة بعد كام التحديثات اللي حصلت السنة اللي فاتت. اللعبة نفسها من شركة Bethesda معروفة إنها بتعمل ألعاب قوية زي Skyrim و Fallout، ولما عملت Starfield الناس كانت متحمسة جدًا لتجربة الفضاء واستكشاف الكواكب والمجرات.

لكن مع توسعة Shattered Space السؤال المهم: هل التوسعة فعلًا ضافت حاجة جديدة تخلي تجربة اللعب أحسن بكتير؟ ولا هي مجرد إضافة عادية مش مؤثرة؟ في المراجعة دي هنعرف مع بعض تفاصيل التوسعة ونشوف هل هي فعلاً رفعت مستوى اللعبة بشكل ملحوظ، ولا هي مجرد خطوة متوسطة ماجبتش حاجة مبتكرة جديدة.

القصة بدون حرق

أول حاجة لازم نتكلم عنها هي قصة التوسعة. توسعة Shattered Space بتاخدك لعمق جديد في عالم اللعبة، بالضبط في نظام اسمه Va’ruun’kai، واللي بيتميز بالغموض والطابع المختلف عن باقي الأماكن في اللعبة الأصلية. القصة بتبدأ بكارثة ضخمة بتحصل في مدينة اسمها Dazra، وده اللي بيحركك إنك تبدأ التحقيق في سبب الكارثة دي.

بتنزل على كوكب Va’ruun’kai، المكان اللي بيعيش فيه بيت فا’رون الغامض، اللي كانوا بيتعبدوا للأفاعي، والشخصيات اللي على الكوكب ده عايشين في حالة من الفوضى الكبيرة، واللي هتبدأ تكشفها مع تقدمك في القصة. الكوكب فيه مشاكل ضخمة زي تشوهات في الجاذبية وحاجات مرعبة بتهدد سكانه.

الموضوع بيدور حوالين تجربة سرية اتعملت على محرك الجاذبية اللي حصلت مشكلة فيه، واللي تسببت في كارثة تمزق في الزمان والمكان، وابتلع جزء كبير من المدينة. وهنا دورك بيكون إنك تحقق في التهديد ده وتساعد سكان الكوكب في إنهم يحلوا المشكلة الكبيرة دي.

التوسعة متركزة في منطقة Dazra، واللي تعتبر مختلفة عن باقي المدن في اللعبة الأساسية. بتتعرف على شخصيات جديدة زي Tane Salavea، قائد مجموعة من الناجين اللي بيحاولوا إعادة بناء مدينتهم بعد الكارثة؛ ومع تطور القصة، هتكتشف حقائق جديدة عن تاريخ النظام الديني والسياسي اللي بيحكم المكان.

هنا بيجي دورك في جمع الفصائل الثلاثة اللي على الكوكب عشان يحلوا الأزمة اللي حصلت. الشخصيات اللي بتقابلها كل واحدة فيهم عندها خلفيتها وقصتها، والتفاعل معاهم بيفتح لك اختيارات متعددة تؤدي لنهايات مختلفة.

الجيم بلاي

اللعبة بتعتمد بشكل كبير على نفس نظام اللعب المفتوح اللي كان موجود في Starfield، وده بيخليك تستكشف الفضاء بحرية وتطور مهاراتك. لكن التوسعة ضافت شوية عناصر جديدة، أهمهم أعداء جدد زي Vortex Horrors وVortex Phantoms.

للأسف، الأعداء دول مش بيختلفوا كتير عن الأعداء اللي شفتهم في اللعبة الأصلية. الـPhantoms بشر، أما الـHorrors فهما مخلوقات شبه الحشرات، والفكرة الوحيدة اللي تميزهم هي قدرتهم على التنقل أثناء القتال باستخدام طاقة الجاذبية، وده بيخليك دايمًا في حالة تأهب. القتال في اللعبة مزيج بين الأسلحة النارية والتكنولوجيا المتقدمة، وده بيخليك تستمتع بتجربة قتالية شاملة، سواء بالأسلحة البعيدة أو القريبة.

فيه كمان نظام تطوير مهارات شامل، تقدر من خلاله تحسن قدراتك في مجالات زي القتال واستكشاف الفضاء، وفتح مهارات جديدة كل ما تتقدم في اللعبة؛ ومن خلال التوسعة هتلاقي أدوات جديدة وأسلحة متقدمة تضيف لتجربتك في القتال والاستكشاف. كمان ممكن ترقية معداتك عشان تناسب أسلوب لعبك.

توسعة Shattered Space قدمت منطقة جديدة مليانة تحديات وعوالم مختلفة. منطقة Va’ruun’kai بتتميز بإنها مليانة فقاعات تشوه الجاذبية، وده بيضيف عنصر جديد للاستكشاف. تقدر تستخدم الفقاعات دي عشان تتحرك لأماكن مش هتقدر توصل لها بطرق تقليدية.

لكن في نقطة هنا، التوسعة دي مافيهاش  السفر بين الكواكب أو القتال الفضائي اللي كنا متعودين عليه في Starfield؛ وده معناه إن التركيز كله هنا على الكوكب واحد فقط لا غير وده بيقلل شوية من الإحساس بالمغامرة الفضائية اللي كانت اللعبة بتقدمه في البداية.

زي ما تعودنا من ألعاب Bethesda، هتلاقي في التوسعة دي تفاعلات كتير مع الشخصيات المختلفة، والتفاعلات دي مش بس كلام على الفاضي، ده ممكن ياخدك في مسارات جديدة ويغير نهايات اللعبة حسب اختياراتك.

بالإضافة للمهمات الرئيسية، فيه كمان شوية مهمات جانبية هتديك فرصة إنك تعرف أكتر عن العالم المحيط بيك وتكتشف أسرار جديدة عن الكوكب وسكانه.

الجرافيكس والأداء

التحسينات في الجرافيكس كانت واضحة في التوسعة دي. الجرافيكس بقى أحسن بكتير، وخصوصًا في تفاصيل البيئة والكواكب. منطقة Va’ruun’kai نفسها شكلها خرافي ومليانة تفاصيل دقيقة، وده بيخليك تحس فعلًا إنك في مكان غريب ومميز عن أي حاجة تانية في اللعبة. لكن الأداء مكنش احسن حاجة بشكل عام، كان فيه تقطيع في بعض الأحيان أو مشاكل تقنية زي اللي كانت بتواجه الناس في اللعبة الأصلية.

التقييم النهائي
7/10

في النهاية، توسعة Shattered Space قدمت تجربة جديدة وممتعة لعشاق Starfield، وخصوصًا اللي بيحبوا القصص العميقة والعوالم الغامضة. القصة فيها عنصر غموض وتشويق، والشخصيات الجديدة بتضيف أبعاد مختلفة للعبة. أسلوب اللعب لسه محتفظ بروحه، لكن في نفس الوقت ضاف شوية عناصر جديدة تحسن من التجربة. لكن في النهاية، لو كنت متوقع إن التوسعة هتقدم حاجة ثورية زي توسعة Phantom Liberty لـCyberpunk، ممكن تكون محبط شوية. لأن التوسعة هنا مركزة أكتر على قصة الكوكب الواحد، ومش بتضيف كتير لعالم الفضاء اللي كنا متعودين عليه في اللعبة الأصلية.

فلو إنت من محبي Starfield وتحب تستكشف أكتر عن الكواكب والعوالم الجديدة، هتلاقي إن التوسعة دي تستاهل تجربتها. أما لو كنت متوقع تغيير كبير في أسلوب اللعب أو تقديم تجربة فضائية جديدة بالكامل، ممكن تحس إنها مجرد خطوة عادية مش أكتر.