أخيرًا وصلت اللحظة المنتظرة، اللحظة اللي عشاق السولز بيعدولها الأيام والساعات والثواني من سنتين بحالهم
توسعة Shadow of the Erdtree للعبة Elden Ring

واللي جاية مع مفاجأة جامدة من الاستوديو وهي الترجمة العربية أخيرًا للعبة بالكامل، دا غير تحسينات تانية في اللعبة كلها، ونظام تلڤيل جديد خاص بالتوسعة، دا غير المحتوى الضخم اللي في التوسعة..
كالعادة، كل دا وأكتر هنتكلم عنه بالتفصيل النهاردة في المراجعة..

القصة

القصة بتاخدنا لمكان جديد تمامًا.. أرض الظلال
واللي بنروحلها عشان نمشي ورا خطوات ميكيلا
أخو ميلينيا التوأم و ابن ماريكا وراداجون..
لو متعرفش فـ ميكيلا مولود بلعنة إنه يفضل دايما شاب صغير
ومن كتر اعتراضه على اللي بيحصل في عالم إيلدن رينج والقمع والظلم من ال golden order
ميكيلا حاول يبني شجرة تانية تبقى بدل شجرة الـ erdtree وضحّى بنفسه عشان يكبرها
دا قبل ما يخطفه موهج، واحد من أهم بوصات إيلدن رينج .. واللي احتفظ بجثته عنده وبتقدر تشوفها وانت بتحارب موهج..
قصة التوسعة بتاخدنا في رحلة عشان نلاقي إجابات لأسئلة كتير
زي ميكيلا بيعمل إيه في أرض الظلال، و وصل هناك إزاي أصلًا،
طب أرض الظلال دي طبيعتها ايه بالظبط، يعني معزولة عن عالم اللعبة الأساسي ولا جزء منه ولا ايه
والأهم إيه هو تأثير كل دا على عالم إيلدن رينج من ناحية القصة والشخصيات..

شخصيات جديدة

كل شخصية ليها قصة وفيه كمان مهمات للشخصيات
واللي فيه شخصيات منهم بتقابلهم عند صليب ميكيلا اللي بتلاقيه في طريقك وانت بتستكشف
وشخصيات تانية بتقابلهم في العالم
طبعا كالعادة، الحوار مع الشخصيات دي بيأثر على الأحداث وكمان فيه منهم بيأثر على بوص فايتس..

بشكل عام القصة مرتبطة بشكل كبير بقصة اللعبة الأساسية
وبتضيف عليها وبتوضح أجزاء كتير منها
وفيها مفاجآت بردو ولحظات مش متوقعة..
بس طبعا كعادة ألعاب السولز، مش هتلاحظ دا إلا لو انت بتركز مع كل كلمة في كل حوار وبتقرأ وصف الحاجات اللي بتاخدها ومتابع كويس قصة إيلدن رينج بشكل عام
لأنه وبالرغم من الترجمة اللي بتفرق بشكل كبير بصراحة
فهم القصة بردو مش سهل والموضوع مش بسيط خالص إنك تتابع إيه اللي بيحصل خصوصا لو انت معندكش خلفية عن أحداث إيلدن رينج نفسها وشخصياتها وتاريخها
لكن زي ما قلت دا العادي في ألعاب فروم سوفتوير، وكدة كدة محدش مننا هيفهم حاجة غير لما نشوف شرح للقصة ع اليوتيوب بعد ما نخلص لعب (متقلقش أنت مش لوحدك)

العالم والاستكشاف

من أهم الحاجات اللي بتميز إيلدن رينج في الأساس هو العالم بتاعها والاستكشاف فيه
واللي بيعتمد بشكل أساسي على تصميم العالم والمناطق المختلفة وترابطهم ببعض بيتم إزاي..
في التوسعة الموضوع مش مختلف كتير، انت بتبدأ بخريطة صغيرة جدًا وبتكبر معاك كل ما تستكشف وتجمع أجزاء الخريطة، بالظبط زي اللعبة نفسها..
العالم بردو مفتوح وضخم ومليان بأسرار ومناطق كتير جدًا
لكنه هنا معقد أكتر، الاستكشاف فيه محتاج تركيز ونصاحة أكبر
وفيه تركيز واضح على المناطق اللي فوق بعض
يعني العالم هنا متقسم طبقات، كل منطقة مثلًا ممكن يبقى فيها 4 طبقات، وكل طبقة منهم بتديك مكان ضخم تستكشفه، بـ بوصاته بقى ولوته وأماكنه السرية
بمعنى أنه أكيد العالم هنا أصغر من عالم إيلدن رينج الأساسي، واللي هو أصلًا ضخم بطريقة مش طبيعية
بس الاختلاف إن العالم هنا مكثف أكتر واستكشافه أصعب

فـ اللعبة معتمدة على إنك واحد خلاص بقيت خبير فيها وفي أساليب الاستكشاف بتاعتها
فـ زي ما تقول كدة التحدي هنا بيزيد، والاستكشاف مبقاش مجرد إنك لما توصل لطريق متفرع مثلا تقول انا هروح استكشف يمين وبعد كدة أرجع اشوف فيه إيه شمال،
لأن زي ما قلتلك التصميم هنا أعقد من كدة بكتير
ولازم تدور على سلالم تنزلك من جزيرة لجزيرة تانية مثلًا أو كهف ينقلك لمنطقة تانية تمامًا، أو حتى حيطة سرية أو جسر مخفي عشان تقدر إنك تكمل..
كل دا موجود وبشكل كبير، ودا مش في المناطق الجانبية بس أو السرية، لا دا فيه بوصات رئيسية وأماكن ضرورية مش هتقدر توصلها إلا من طريق سري أو سلم مستخبي ولا حاجة..
يعني مثلًا، من غير حرق متقلقش..

فيه مكان في الخريطة زي قلعة كدة ميبانش إنه كبير، كان فيه بوص فايت رئيسي واستكشفته كله وخلاص تمام وسيبته ومشيت..
وبعد حوالي 10 ساعات لعب اكتشفت طريق تاني مستخبي بيوديك للمكان دا من اتجاه مختلف، والاتجاه دا بيتفرع لاتجاهات تانية.. الاتجاهات التانية دي بقى بتوديك على بوص رئيسي و2 بوصات جانبية..
يعني مكان واحد يعتبر مربع صغير على الخريطة طلع فيه 4 بوصات منهم 2 رئيسيين، وكمان منطقة سرية فيها حاجات مهمة جدًا
قيس على كدة بقى باقي الأماكن، وأنا متأكد إن فيه أماكن سرية فاتتني حتى بعد ما خلصت، والأكيد بردو إني هرجعلها تاني بعد المراجعة دي عشان أدور أكتر
عالم الإضافة فعلا ضخم ومكثف جدًا في كل الاتجاهات، وبعد 35 ساعة لعب خلصت فيهم الأماكن الرئيسية وأغلب المناطق الجانبية (أيوة لسة مخلصتش كل حاجة في الماب بعد 35 ساعة)

طبعا النقطة دي هيختلف عليها ناس كتير، يعني لو أنت من الناس اللي بتحب ألعاب السولز في العموم وإيلدن رينج بشكل خاص والاستكشاف والمغامرة بتاعتها، واللي أنا منهم بالمناسبة،
أكيد هتشوف حتة التعقيد والاستكشاف هنا ميزة كبيرة جدًا ومتعة مش طبيعية،
لكن لو أنت كاجوال أكتر ومبتحبش تتعب كتير في الاستكشاف، فـ بنسبة كبيرة مش هتعجبك التوسعة واحتمال متقدرش تكمل فيها بسبب النقطة دي..

لو بصينا بقى على العالم نفسه من حيث الجرافيك وهوية كل مكان، هنلاقي تنوع كبير وجميل جدًا
بعد مناطق اللعبة الأساسية الكتيرة وتنوع الاتجاه الفني فيها، صعب تصدق إن الإضافة فيها مناطق شكلها مختلف أكتر كمان وليها توجه فني خاص بيها مكانش موجود في اللعبة
ما بين مناطق كئيبة وتحس فيها ببقايا الحرايق والسواد اللي فيها، ومناطق تانية خضرا ومشبعة بالألوان الفاتحة تحسسك إنك بتلعب أنشارتد مثلًا
دا غير المناطق اللي تحت الأرض اللي فيها تنوع كبير بصريًا بردو، وغيرهم كتير

نظام المستويات الجديد

لو لسة متعرفش فـ التوسعة فيها نظام مستويات جديد خاص بيها ومش موجود في اللعبة الأساسية
النظام دا بيركز على إنه يزود قوة الهجوم بتاعتك، بطريقة شبيهة لنظام Sekiro كدة..
ببساطة أنت أثناء الاستكشاف بتلاقي حاجات كدة اسمها جزء شجرة سكادو
واللي كل ما بتجمع منها عدد معين بتقدر تزود المستوى بتاعك، واللي اسمه “مباركة شجرة سكادو”
فيه بردو مستوى جديد لـ”رماد الأرواح” أو الـ Spirit Ashes
واللي هي تبع ال mimic tear والكلاب والناس الجميلة دي اللي بتستدعيها في الفايت عشان تساعدك..
دول بتقدر تزود مستواهم بردو في النظام الجديد بتاع الإضافة، واللي بيكون من خلال عنصر اسمه “رماد الأرواح الجليل”
وبردو بتلاقيه وانت بتستكشف زي أجزاء شجرة سكادو كدة، وبتزود مستواه بنفس الطريقة..
الفكرة بقى هنا إن المستوى بتاعك قبل ما تخش الإضافة مبيفرقش كتير في قوة الضربات بتاعتك، لأن دي بتزودها من خلال اجزاء شجرة سكادو زي ما قولنا، واللي هي ملهاش تأثير غير في أرض الظلال

لكن خد بالك بردو إن مستواك بيفرق في حاجات تانية،
يعني مثلا ال vigor بتاعك هيفرق معاك، الـ endurance نفس الكلام،
لكن قوة الهجوم والدفاع كمان بيعتمدوا بشكل أكبر على مستوى مباركة شجرة سكادو بتاعك
علشان كدة الاستكشاف في التوسعة مهم جدًا، لأنك مش بس بتوصل لمناطق جديدة وتجمع لوت، لا انت كمان بتزود مستواك
وأكيد أنت عارف إن الأعداء هنا أصعب وعدوانيين أكتر، والبوصات بالذات أصعب حبتين تلاتة أربعة
فـ عشان كدة اعمل حسابك إنك تستكشف على قد ما تقدر وتزود مستوى مباركة شجرة سكادو عندك قبل ما تخش على بوص أو تتقدم في مناطق جديدة..

في البداية بتبدأ بـ لفل 1 في مباركة شجرة سكادو
وفي الأول بتحتاج جزء واحد عشان تطور كل لفل، وبعد كدة هتحتاج جزئين لكل مستوى، وبعدها هتحتاج 3 أجزاء للمستوى الواحد، ودي أقصى حاجة..

المحتوى

اتكلمنا عن ضخامة العالم وأد إيه الاستكشاف ضروري، وإنه معقد ومش لأي حد
تعالى بقى نتكلم عن محتوى العالم دا، وهل الاستكشاف دا يستحق أصلًا ولا لا..

مبدأيًا كدة لما تيجي تتكلم عن توسعة فـ أهم حاجة بتبصلها هي محتوى التوسعة دي
هل هتلاقي حاجات مكررة من اللعبة الأساسية؟ طب التوسعة بتقدم محتوى جديد خاص بيها مش هتلاقيه غير في عالمها؟
يسعدني أقولك يا عزيزي إن محتوى الإضافة هنا جديد لانج
المحتوى كله شاكب راكب بسلطاته وبابا غنوجه،
كل حاجة هنا لسة طالعة من الفرن طازة، وأنا قصدي كل حاجة فعليًا..
من أول السيوف والدروع والرماح والأقواس
والأعداء والبوصات..
البوصات هنا جامدة جدًا وفيه منها أصعب بكتير من اللعبة الأساسية
التوسعة فيها حوالي 7 بوصات رئيسية
وبوصات جانبية كتير

في خلال الـ35 ساعة لعب قابلت 18 بوص، بين الجانبي والرئيسي
وزي ما قلتلك انا لسة مخلصتش الخريطة 100%، فـ أكيد هقابل بوصات أكتر كمان
لحد دلوقتي مقابلنيش بوص مكرر، ما عدا بوص جانبي واحد بتقابله مرتين أو تلاتة في العالم، بس حتى في كل مكان بتقابله فيه بيبقى عنده حركات مختلفة شوية..
وحتى الحاجات اللي بتلاقيها ع الأرض، الحاجات العادية خالص زي الرون الذهبي أو مواد التصنيع،
كل دا متغير هنا وجديد، وفيه كتب وصفات كتير جدًا جديدة بتخليك تصنع حاجات جديدة بردو..
بالنسبة للأسلحة والدروع فـ فيه أنواع أسلحة كاملة جديدة،
زي الكاتانا الـ Greatsword والقوس الرشاش اللي بيضرب أسهم ورا بعض
وأنواع تانية من الفؤوس التقيلة مثلًا وغيرها.. كمان فيه تعاويذ جديدة لكل أنواع السحر، سواء اللي بتلاقيها وانت بتستكشف او اللي تقدر تاخدها من الذكرى بتاعت البوص لما تقتله..
الأعداء بردو جديدة وبتختلف من مكان للتاني،
باستثناء إن فيه أنواع أعداء تقدر تقول إنها مقتبسة من نوع موجود في اللعبة الأساسية.. مش هي هي نفس الأعداء، لا هي شبهها ومقتبسة منها..
غير كدة كمان عندك السراديب أو الـ Catacombs اللي تحت الأرض فيه منها أنواع جديدة، بـ بوصات مختلفة ومفيهاش تكرار

بشكل عام المحتوى ضخم جدًا والأهم إنه جديد،
وهيقضي معاك فوق ال40 ساعة مستريح لو مهتم بالمحتوى الجانبي
لو محتوى رئيسي بس، ممكن يبقى في حدود 20 – 25 ساعة
مع إني منصحش بكدة لأنك صدقني هتحتاج جدًا إنك تلفل وتزود مستوى مباركة شجرة سكادو، وبالتالي لازم تستكشف وتروح مناطق جانبية كتير

الترجمة

طبعًا الأهم من التوسعة نفسها هي الترجمة العربية اللي أخيرًا نزلت لإيلدن رينج كلها بعد أكتر من سنتين..

الترجمة هنا شاملة كل حاجة: حوارات، نصوص، قوائم، وحتى الرسايل اللي بتلاقيها ع الأرض بقت مترجمة كلها
والترجمة نضيفة ومحترمة جدًا بصراحة، يعني باستثناء شوية ملاحظات كدة هنتكلم عنها، الترجمة بشكل عام هتفرق معاك لو عايز تفهم العالم والحوارات، وحتى ترجمة أسامي الإحصائيات زي ال dex ترجمتها “البراعة” وال arcane “الغموض، وال poise “الثبات” وباقي الاسامي، مترجمة حلو وبشكل بسيط من غير مبالغة
لكن فيه غلطات بسيطة وغريبة في نفس الوقت
زي مثلًا اسم Mesmir اللي هو من أهم الشخصيات في التوسعة وشوفناه في التريلرز،
المفروض اسمه Mesmir The Impaler، يعني “ميسمر المخوزق” – بمعنى إن هو اللي بيعمل فعل الخوزقة في الناس
لكن الترجمة في اللعبة كانت “ميسمر المثقوب” ، فـ مش عارف بصراحة ازاي مثقوب وهو اللي بيثقب؟
دا غير غلطات صغيرة تانية ممكن متلاحظهاش لو انت مبتركزش في الحاجات دي..
لكن بشكل عام الترجمة كويسة جدًا وهتفرق معاك في التجربة

دي كانت كل النقاط اللي ممكن نتكلم فيها عن التوسعة، وكدة نكون وصلنا لوقت التقييم

التقييم النهائي

10\10

المميزات كتير اوي فعلا، أما العيوب فأنا مش شايف عيوب بصراحة، باستثناء شوية أخطاء بسيطة في الترجمة..

في النهاية، توسعة Shadow of The Erdtree هي واحدة من أفضل أعمال استوديو فروم سوفتوير، ومتقلش أبدًا عن اللعبة الأساسية، دي كمان بتتفوق عليها في كذا جانب
وبدون شك تستحق إنك تخوض التجربة دي و 40 دولار دا سعر مناسب جدًا عليها
احنا بنتكلم في 30 ساعة لعب على الأقل
أنا فعلًا مش فاهم ازاي دي متعملتش لعبة منفصلة ونزلت بـ 60 او 70 دولار كمان عادي جدًا، كانت هتتباع وتنجح وتترشح للجوتي كمان