مقالات, عن الألعاب

ما هي الـ Fall Guys

ما هي الـ Fall Guys

جربنا اللعبة الجديدة Fall Guys الكم يوم اللي فاتوا وحبيت أشارككم بإنبطاع مبسط عنها أكثر منه ريفيو رسمي ونعرفكم ليه اللعبة جامدة بل من أجمد ألعاب السنة دي مع إن شكلها ميوحيش بكده خالص

اللعبة فكرتها بسيطة جداً ولكنها ذكية في نفس الوقت ، بحيث إنها مقدمتش مجرد تجربة بلاتفورم مع التغلب علي العوائق ، بل دمجت معاها فكرة الباتل رويال وأنك مش هتتحدي العوائق لوحدك ، بل إنت هيتحط معاك ناس تانية كتير يبقي هما العائق بحد ذاتهم مش فكرة ذكية ولا 😀

ما هي الـ Fall Guys

اللعبة تتصنف لأسلوب الباتل رويال وبتدعم لحد 60 لاعب في بداية الجولة الأولي ، ولو هنتكلم عن الجولات فاللعبة بتقدم 5 جولات فنشهم صح واطلع الأول عشان تاخد التاج الذهبي .. طبعاً محدش يفتكر الخمس جولات هما نفسهم كل مرة ، اللعبة تقريباً فيها 24 مرحلة بيتم إختيارهم بشكل عشوائي في كل جولة من الخمسة. المراحل كتير ومتنوعة يعني مثلاً عندك مراحل بتبقي قدامك عوائق عليك تخطيها وتكون من ضمن أول  20 واحد يعدوا خط النهاية ممكن تقول عليها سباق يعني ده غير حط في بالك الشخصية اللي بتلعب بيها هي عائق في حد نفسها لأن التحكم فيه مش سهل خالص لأنه أشبه بكائن لزج أو Slime ، في مراحل تانية بتعتمد علي اللعب الجماعي أو الـ “Team Work” بحيث يحطك مع ناس تانية وبتبقوا 3 فرق ضد بعض وبتختلف من جولة لتانية مثلاً جولة بيطلب منك تخزن أكبر عدد من البيضات في الركن عندك ولو معاك بيضة ذهبية بيزيد إجمالي النقط. جولة تانية بتدحرج فيها كرة ضخمة وبيبقي مطلوب منك أنك توصلها بأسرع ما يمكن لخط النهاية وفي نفس الوقت تعطل الفريق التاني أنه ميوصلش الكرة قبليك تعمل اي حاجة بقي تبعد الكرة مثلاً وتقف في طريقها أو تشد الناس عن طريق R2 واللي بسميه زرار الخناق.. أخر شكل للمراحل والأمتع فيهم في نظري هي المراحل اللي بتحاول متقعش فيها  ،لإن فيهم تنويع شوية وأكتر مرحلة ممتعة فيهم هي المرحلة النهائية واللي بيحطلك فيها طبقات من ألوان مختلفة ولو دوست عليها بتتكسر سواء أنت بنفسك اللي دوست ونفس الكلام ينطبق علي غيرك فتفضل تحاول أنك تمشي علي طريق معين بالترتيب لحد ما كله يقع درجة ورا التانية لحد ما يبقاش فاضل غيرك وللأسف عمري ما فزت بيها دايماً بقع في شر أعمالي وأكسب غيري 😀

ما هي الـ Fall Guys

اللعبة فيها حاجة تانية مهمة لناس ولناس لاء بس في ناس كتير بتحبها وهي الـ Skins و الـ Customizations يعني ممكن تغير شكل الشخصية اللي بتلعب بيها زي مثلاً تغير لونه أو شكله يعني تخليه مخطط أو منقط حاجات كده وكمان ممكن تحطله إكسسوارات علي راسه و رجله وبتبدأ بشوية ألوان وإكسسورات خفيفة لما تفتح اللعبة أول مرة ، وكل مرة بترفع ليفلك بتاخد إكسسوار جديد أو عملة تاج ذهبي بتشتري بيه إكسسورات نادرة من ستور اللعبة واللي بينزل كل 24 ساعة إكسسورات جديدة عشان الناس تصرف عليها فلوس سواء فلوس حقيقية تقدر تشحنها للعبة أو عملات اللعبة نفسها اللي بتكسبها بعد كل مباراة بتخلصها سواء كسبت الجيم أو خسرته .. الشخصية ممكن تقعد تلفل فيها لحد ليفل 40 وده خاص تقريباً بالسيزون الأول يعني ممكن لما ينزل سيزون جديد الليفل هيتعمله ريسيت وتبدأ من جديد تاني أو ممكن تكمل علي ليفلك عادي ويرفعوا الـ Cap شويه لسه هنشوف محدش يعرف.

ما هي الـ Fall Guys

المهم دي كانت تجربتي مع اللعبة وأتمني تكون وصلت إنطباعي الشخصي اللي كنت عايز أقدمه من غير تطويل أو أعمل ريفيو رسمي وخلافه لأن اللعبة بسيطة خالص مش محتاجة ريفيو وتديها رقم معين أو سلبيات ومميزات والكلام ده .. كله يدوس في اللعبة لأنها ممتعة جداً ومن أمتع ألعاب السنة دي وتعجب أي حد هاردكور كاجوال كبير صغير طويل قصير بس كفاية 😀

اللعبة موجودة دلوقتي علي الستيم PC وفري علي الـ PS4 لو معك إشتراك Plus تقدر تنزلها وتحطها في حسابك وتلعبها الإ لو أنت من الناس المغضوب عليهم وأكونتك ستور سعودي فأقولك Good Luck و ربنا معاك.

author-avatar

About Hussein

محرر وكاتب، بحب جداً هواية الفيديو جيمز، هوايات كتير اتغيرت في حياتي إلا ألعاب الفيديو متغيرش شغفي ليها، بالعكس كان بيزيد مع مرور السنين .. بعشق ألعاب الاربيجي سواء الغربية زي فال اوت وويتشر وايلدر سكرولز او اليابانية زي فاينال فانتسي وبيرسونا ودراجون كويست