عايز تعرف ليه لعبة زي Elden Ring ناجحة ؟، أو العاب ال Souls جميعا ليه محبوبة؟احنا عندنا ليك الجواب، واللي هو بكل بساطة أن العاب السولز بتقدم لعبة مبنية على فلسفة صحيحة لمفهوم الالعاب
يعني ايه لعبة؟
يعني مجموعة قواعد بتنفذ بطريقة معينة بهدف ١- المتعة ٢- التنافس ٣-التعلم -٤- المعرفة ودي حاجة خاصة بالفيديو جيم
١- المتعة:
انت بتستمتع لسببين، الأول انك تبقى الفاعل والتاني انك تحقق إنجاز الفعل ده، فلما تيجي الالعاب السينمائية تخليك اغلب الوقت مجرد متفرج أو بتدوس على شوية زراير بتظهر على الشاشة فأنت كده مش المحرك الأساسي في اللعبة، كمان مش هتحس بإنجاز لانك مش انت الفاعل. الاحساس بالإنجاز هي احد اهم الرغبات اللي الإنسان عايزها، وبتحس بمتعة كبيرة وانت بتحقق اي انجاز في حياتك حتى لو كان تافه، فلما تتغلب على التحديات الموجودة في اللعبة بعد محاولات كثيرة وقتها هتشعر بالإنجاز وتستمتع جدا
٢- التنافس:
مينفعش يكون في تنافس بينك وبين خصومك في أي لعبة من غير توافر مجموعة قواعد للعب تحقق توازن. التوازن ده اللي احنا بقينا نسميه حاليا بصعوبة، في حقيقة الأمر هي مش صعوبة هي مجرد مسألة توازن بينك وبين الخصوم. بتخلي أي خصم في اللعبة ممكن يموتك عادي زي ما انت تقدر تموته عادي، انت بتقدر ترجع من الموت؟ طب الاعداء يقدروا يرجعوا من الموت عادي زيك، انت لما بتقتل الاعداء بتاخد souls ؟ طب لما الإعداء يموتوك بتخسر souls وهكذا. هنا بقى في فعلا تنافس حقيقي، فتحس فعلا انك مش بتهزم مجرد bots عديمي الخطر بل هم مصدر كل الخطر، وطبعا الكلام ده بيزود من جرعة التحدي وده معناه الاحساس بالإنجازية اكتر يعني متعة اكتر.
٣- التعلم:
التعلم: زي أي لعبة لا تعتمد على الحظ وقواعدها تسمح ليك انك تتعلمها ثم تحترفها دي كده بقت فعلا لعبة بتعتمد على المهارة، وهنا في Elden Ring أو العاب souls عموما نفس الكلام انت في أول اللعبة بتتعلم وتغلط بتتعلم وتغلط وفي آخر اللعبة بتلاقي نفسك بقيت محترف. ده بيخليك في النهاية لاعب ماهر وده خصوصا أن اللعبة بتوفر تنوع كتير من أساليب اللعب وتسيبك حر في اختيار الأسلوب اللي تحبه وتقضي على خصومك بكذا طريقة، وده من ضمن تحقيق الانجازية لأنك بقيت ماهر ولما تتحقق الإنجازية تتحقق المتعة.
٤-المعرفة:
ألعاب كتيرة للاسف بتهمل النوع ده، مع أن دي اكتر حاجة تميز الفيديو جيمز عن الالعاب التقليدية، المعرفة بتيجي من اربع عناصر وهم ١- حرية الاستكشاف لعالم اللعبة -٢- حرية الاطلاع على احداث اللعبة -٣- حرية تذوق الفن الموجود في اللعبة ٤- حرية العيش داخل أجواء خاصة مميزة لعالم اللعبة.
وفي العاب ال souls بيتوفر فيهم الحاجات دول (استكشاف وأحداث وفن وأجواء) دول كلهم كوليكشن لحاجة واحدة لما تنقص فيهم حاجة بتكون التجربة مش كاملة، ولاحظ اني كررت كلمة حرية في كل عنصر من عناصر المعرفة، عشان متكنش مجبور على حاجة، انت العايزة تعمله استكشف وعيش العالم ده برحتك، انت حر فيه
فلما نبقى في عصر ألعاب ال Cinematic Story طاغية على السوق، وتيجي لعبة ترجع قواعد اللعب الأساسية دي حاجة تخلينا نرفعلهم القبعة خصوصاً أن كل المطورين بقى يستلهموا من اللعبة دي.
أنا مش بهاجم الألعاب السينمائية أو الالعاب القصصية أو الالعاب اللي محركها هي القصة. كل انواع الالعاب فن، والفن بيموت من عدم التنوع، وفي أوقات كتير حسب المود بتكون عايزة لعبة قصصية بس وبسيطة. وكل واحد ليه تذوق خاص، بس انا بتكلم على فلسفة الالعاب، ايه هي العناصر الأساسية اللي لما تتوفر في لعبة تخلينا نقول دي لعبة متكاملة وهتاخد منها تجربة متكاملة.
طبعا مش العاب السولز فقط هي اللي بتقدم العناصر دي، في العاب كتير بتتشارك معها في نفس الفلسفة العاب، هنذكر بعض منها
Halo
Resident Evil
Bioshock
Fallout
The Elder Scrolls
Dishonored
Prey
Total War
Warcraft
Overwarch
Deus Ex
Ahmed Sami
