مقالات, عن الألعاب

ايه الجديد في مافيا 1 ريميك؟

ايه الجديد في مافيا 1 ريميك؟

امبارح شوفنا ريميك مافيا 1 أخيرًا من خلال استعراض شامل من المطور Hanger 13اللي مايعرفش Mafia هي الجزء الأفضل في عيون ناس كتير من محبي السلسلة دي، وهي اللي خلت ليها محبين من الأساس، بل وإن البعض بيوصفها بإنها أفضل من الجزء التاني.
مافيا 1 صدرت سنة 2002 علي منصات الجيل قبل اللي فات (بلايستشن 2 وإكسبوكس) وعلي الPC وحققت نجاح كبير نقدي وجماهيري، لكن مع مرور السلسلة بمرحلة حرجة مع الانتقادات الواسعة اللي نالها الجزء التالت، فكرة إعادة إحياء أقوي جزء في السلسلة بمقايس معاصرة من جرافيكس وجيم مياكنكس هي أفضل فكرة ممكنة لضمان رجوع السلسلة للمسار الصحيح، مع تجنب تكبد عناء كتابة قصة جديدة من الصفر.
النهاردة هنتكلم عن ايه الجديد اللي شوفناه في تريلر اللعبة الجديد اللي كان مدته ربع ساعة ونحلله مع بعض.

1- تم استخدام الMotion Capture في تصوير الحوارات بالكامل، مع إضافة بعض المقاطع السينيمائية و حوارات زيادة

 

في اللعبة الأصلية طبعًا المقاطع السينيمائية ضعيفة مقارنة بدلوقتي، فكان من البديهي إعادة تصوير الحوارات والمشاهد لكن الشيء المثير للاهتمام هو إن في حوارات ومشاهد زيادة مكانتش موجودة في اللعبة الأصلية، واتقال في التريلر إن ده غرضه استعراض بعض الشخصيات وتطوراتهم بشكل أعمق، لإن كل اللي لعب اللعبة الأصلية عارف كويس إنها مكانتش لعبة طويلة، وكان في بعض الجوانب اللي احتاجت شرح أكتر شوية.
شكل المشاهد الحقيقة في التريلر كان ممتاز وفيه استعمال للموسيقي الأصلية بشكل ممتاز، وكمان المشاهد فيها روح ومشاعر طالعة من كل شخصية بتقول حواراتها علي عكس مافيا3 اللي كانت فيها عيوب في أسلوب بعض الشخصيات زي كاسندرا مثلًا.

ايه الجديد في مافيا 1 ريميك؟
2- مؤديين صوتيين جدد مع إعادة تصميم شكل الشخصيات:

واحدة من أفضل الحاجات في اللعبة الأصلية كانت الحوارات، واللي كانت حتي أفضل من الجزء التاني، معمولة بطريقة تشبه فيلم Goodfellas، وللأسف طقم الممثلن الصوتين كله اتجدد، وده أنا معنديش معاه مشكلة لإن اللي شوفته من التريلر عجبني، لكن مشكلتي مع شخصية Paulie اللي علي قد ما إعادة تصميمه كانت رائعة شكلًا، لكن صوته كان غريب وماحستش إنه لايق علي شكل الشخصية.أما شخصية تومي ففكرني شوية بأسلوب كلام Robert de niro في goodfellas وده كان موجود مع الممثل الأول اللي مثل الشخصية في اللعبة الأصلية لكن المرة دي الموضوع زاد كمان.
إعادة تصميم أشكال الشخصيات تمت بشكل رائع، مليانين تفاصيل، وتعابير وشوشهم بتختلف من موقف للتاني خاصةً بولي، واللي كان بالمناسبة تصميم وشه Generic بشكل كبير لدرجة إن كان ممكن تتلخبط بينه وبين شخصية تانية في اللعبة عادي.

ايه الجديد في مافيا 1 ريميك؟3-نظام الcover والshooting

عمر نظام الshooting و الcover ما كانوا أفضل شيء في سلسلة مافيا، بل إن في ناس كانت مستاءة من التصويب في مافيا 2، لكن في الجزء التالت الموضوع اتحسن كتير، والريميك بيستعمل نفس منظومة التصويب تاعة الجزء التالت بجانب طبعًا تغيير الأسلحة بشكل يناسب العصر، لكن الريميك مكنش فيه نظام الcover، وده كان جزء من حلاوته إنك دايمًا مهدد، مش عارف هنا الموضوع هيبقي إضافة ولا تسهيل علي اللاعبين لكن هنشوف قريب.
في التريلر اتقال إن عشان تومي -البطل- مش جندي سابق زي ليكولن كلاي -بطل الجزء التالت- فهيبقي الشوتينج بالنسباله أصعب، وهيبقي أسهل إنه يموت، وماتوضحش يعني إيه أسهل، هل بعدد طلقت أقل؟ ولا تصويبه هيبقي أقل ضقة بشكل ملحوظ؟ في الحالتين نتوقع إن التصويب هيبقي أصعب من الجزء التالت.
ايه الجديد في مافيا 1 ريميك؟

4-إعادة إضافة الدراجات النارية

خلال عملية تطوير اللعبة الأصلية كان في خطة لإضافة الدراجات النارية كمركبات قابلة للقيادة في اللعبة، لكن تم إلغاء الmechanic دي لصعوبات تقنية بعد ما تم الانتهاء من نصها، لكن هنا تم إعادة تصميمها وإضافتها، وده شيء مكنش موجود في الجزءين اللي فاتوا عشان كده دي إضافة مش هينة أبدًا، وهتفرق كتير لو تم استغلالها في المطاردات.
للأسف ماتمش توضيح إذا كان نظام السواقة أصلًا متاخد من مافيا 3 ولا تم تحسينه، لكن لو هو هو بتاع الجزء التالت ففي مشاكل ممكن يتم تصلحها بسهولة زي نظام الاصطدامات، غير كده وزن العربيات، ومدي استجاباتهم في المنعطفات كانوا كويسين إلي حد كبير.
ايه الجديد في مافيا 1 ريميك؟

5-إضافة User Interface

صدق أو لا تصدق، في اللعبة الاصلية مكنش في أي شيء بيبقي قدامك علي الشاشة غير شريط حياة شخصيتك، مفيش أي حاجة تدلك تروح فين ولا تعمل إيه، غير جملة الobjective بتكون حاجة عامة ومبهمة إلي حد كبير، في مهمة trip to the country مثلا من اللعبة الأصلية ماكنش في حاجة بتعلملك علي المكان اللي مفروض تدور فيه أو تتجه له، كان قدامك المزرعة كلها عشان تدور فيها مع موسيقي هادية تبعث بالتوتر، وأجواء من المجهول كده فيها روح وأساس سلسلة مافيا اللي كنت بحبه، وفي مهمات الشوتينج وعمليات الاغتيال كان لازم تفكر وانت بتتحرك وده جزء من حياة رجل المافيا الحقيقي، فإضافة خريطة صغيرة وobjective marker علي قد ما هما حاجتين موجودين في كل الألعاب حاليًا، إلا إن في عشاق كتير لسلسلة مافيا هيفضلوا وجود خيار اخفاء الخريطة والماركر.
ايه الجديد في مافيا 1 ريميك؟

6-في تحسن رسومي واضح عن الجزء التالت

المطر في الجزء التالت كان شكله سيء، ومكنش له تاثير محسوس علي الأرض اللي بيتساقط عليها، في التريلر شوفنا المطر وهو بتساقط علي برك الماية والطين وتاثيره عليهم شكله ممتاز. إلا إنه جدير بالذكر إن كل التريلر كان في لحظات مطر وليل، وده طبعًا لإن معظم المهمات في الأوقات دي لكن لما هنشوف لحظات النهار أكتر هنقدر نحدد هل فعلًا في تحسن رسومي ملحوظ ولا لأ مقارنة بالجزء التالت.
ايه الجديد في مافيا 1 ريميك؟عمومًا أنا متحمس للعبة جدًا حتي ولو فيها عيوب لكن مافيا 1 قدمت قصة وشخصيات متشوق جدًا إني أشوفهم تاني متقدمين بشكل أحسن وعصري ليق بيهم، وأكيد هنعمل مراجعة للعبة علي جيمزاوي استنونا.
اللعبة هتنزل يوم 25 سبتمبر علي منصات الجيل الحالي والpc ومن المتوقع إن ينزلها نسخة للجيل الجديد بعد نزوله.

author-avatar

About Mostafa Argoun

محرر في مجال الألعاب منذ عام 2012 بعتبر الألعاب فن، وبحب ألعاب القصة والأر بي جي بشكل رئيسي