البث المباشر امبارح كان واحد من الأفضل خلال الفترة الي فاتت وفعلاً شركة سوني قدرت تخطف الأنظار، مش بس من تصميم الجهاز المُبهر لا ده بسبب الألعاب الرائعة الي استعرضتها والي هنتكلم عنها واحدة واحدة النهاردة مع التركيز على الحاجات المهمة بس.
إستوديو Insomniac Games بدأ البث المباشر بلعبتين، جزء جديد فرعي من لعبة Marvel’s Spider Man بإسم Miles Morales والي هتركز على شخصية Miles وانا شايف انها هتكون حاجة مختلفة لتجربة اللعبة من منظور شخص تاني غير Peter Parker. بعد كدة استعرض الاستوديو الجزء الجديد من سلسلة Ratchet and Clank تحت إسم Rift Apart، كواحد من مُحبي الجزء الأول جداً الي نزل في 2016 فأنا متحمس جداً اشوف الاستوديو هيقدم ايه في الجزء التاني وأتوقع اننا هنشوف تجربة خرافية. Spider Man هتصدر في أواخر السنة ولسة مفيش تفاصيل عن إصدار Ratchet and Clank.
بالنسبة للألعاب الي مش معروف عنها حاجات كتير فأولهم لعبة Project Athia من شركة Square Enix، مفيش تفاصيل عن اللعبة والعرض الأول موضحش حاجات كتير بس مستوى اللعبة الرسومي مُبهر جداً. عندنا برضو لعبة Returnal وهي عنوان جديد من إستوديو Housemarque، اللعبة بتتمحور فكرتها عن وجود Cycle البطلة محبوسة فيها ولازم تحاول انها تخرج منها.
شركة Bethesda شاركت بلعبتين في العرض، أولهم هي Ghostwire Tokyo الي اتعلن عنها في E3 2019 وبصراحة انا متفاجئ جداً من أسلوب اللعب لأنه جمع بشكل مميز بين عالم مبني على الرعب والأكشن ومتحمس أشوف الإستوديو هيقدم ايه لأن تجربتي مع العابه السابقة زي The Evil Within كانت خرافية. اللعبة التانية هي Deathloop والي اتعلن عنها برضو في E3 2019 ولكن المرة ديه شوفنا أول نظرة على أسلوب اللعب الأكشن الحماسي الشبيه جداً بـ Dishonored و Wolfenstein. لعبة Deathloop هتصدر في 2020.
طبعاً مينفعش يكون في حدث لبلايستيشن من غير ما شركة Capcom تشارك والمرة ديه شاركت بلعبتين، الأولى وهي الجزء الثامن من سلسلة Resident Evil والي بتكمل قصة الجزء السابع وشخصية Ethan من منظور الشخص الأول في تجربة جديدة ومختلفة، هتصدر اللعبة في 2021. اللعبة التانية هي Pragmata وفيها شبه كبير من عالم Death Stranding وانها بتقدم شكل غريب ومحدش فاهم حاجة بشكل عام. اللعبة هتصدر في 2022.
بالنسبة للألعاب الرياضية والسباقات فا تم الإعلان عن لعبتين، الجزء الجديد من سلسلة Gran Turismo تحت إسم Gran Turismo 7 من إستوديو Polyphony وهتصدر حصرية على الجهاز. اللعبة التانية هي NBA 2K21 ورسومات اللعبة حقيقي كانت مُبهرة من كتر التفاصيل الي على الشخصية، ديه هتصدر في اواخر السنة على كل الأجهزة.
الشركة ختمت البث المباشر بحصريتين كل الناس مستنياهم من سنين طويلة، الأهم بالنسبالي شخصياً هي ريميك Demon’s Souls، انا كواحد محب لسلسلة السولز وألعاب From Software كلها مجتليش الفرصة أجرب النسخة الأولى من Demon’s Souls على الـ PS3 ولكن الفرصة جت اهي مع منصة PlayStation 5 برسومات خرافية وأكيد طبعاً فريمات أعلى. الأخيرة هي Horizon Forbidden West وديه الجزء الثاني من التجربة الرائعة الي شوفناها في 2017 والي هتبني على قصة Aloy وعالم Horizon المُدمر.
وطبعاً هنيجي نتكلم عن قفلة البث الي مش محتاجة كلام والي كانت احلى مفاجأة، إستعراض منصة PlayStation 5 نفسها والي شكلها حرفياً تحس انه جاي من المستقبل في سنة 2100 ولا حاجة. تصميم عبقري ومذهل على الرغم من أنه كبير حبتين بس هيكون شكله خرافي. الجهاز في منه نسختين، نسخة عادية بتيجي بمدخل اسطوانات ونسخة تانية بتيجي Digital Only عشان الناس الي بتجيب اكونتات بس ومش بتشتري اسطوانات. تم الإعلان برضو عن Headset جديدة و Charging Dock و Media Remote وللأسف لسة مفيش تفاصيل عن سعر كل الحاجات ديه.
شخصياً شايف إن سوني قدرت تجذب الإنتباه ليها بشكل اكثر من ممتاز وفعلاً عرضت كمية ضخمة من الألعاب واستعرضت أسلوب لعب وحصريات قوية. متحمس اشوف الشركة هتقدم ايه تاني ومتحمس اكتر اعرف سعر النسختين من الجهاز.