Gaming News, News

مُلخص أخبار الأسبوع المُنتهي بتاريخ 5 فبراير 2021

الأسبوع الي فات سوني أعلنت عن التفاصيل الأولى الخاصة بمبيعات PlayStation 5 وإتأكدنا إن في لعبة Tomb Raider جديدة في التطوير ده غير شوية أخبار خاصة بإكس بوكس. أهلاً بيكم في ملخص أخبار الأسبوع

1- إكتمال تطوير لعبة Halo Infinite :

إستوديو 343 Industries أكد إن تطوير لعبة Halo Infinite إكتمل وكل حاجة خاصة باللعبة بقت متواجدة فيها حالياً، الإستوديو هيقضي حوالي 9 أو 10 شهور في إنه يحسن من اللعبة سواء رسومياً أو في حل المشاكل عشان تصدر بأفضل شكل ممكن للاعبين.

كمان الإستوديو أكد إنه شغال على تحسين أداء اللعبة على كل المنصات وإن اللعبة هتشتغل بشكل ممتاز حتى على منصة Xbox One القديمة.

2- منصة PlayStation 5 شحنت 4.5 مليون وحدة :

سوني أعلنت عن أولى تفاصيل شحنات منصة PlayStation 5 وأكدت إنها في الفترة بين 12 نوفمبر و 31 ديسمبر قدرت تشحن أكتر من 4.5 مليون وحدة عالمياً وده نفس عدد الشحنات الي حققته منصة PlayStation 4 لما نزلت في اواخر 2014 ويعتبر رقم ممتاز طبعاً. كمان أعلنت سوني عن مبيعات Spider Man Miles Morales والي وصلت 4.1 مليون نسخة في أول من شهرين.

3- مبيعات Nintendo Switch وصلت 80 مليون وحدة :

شركة Nintendo أصدرت تقرير مالي جديد إتكلمت فيه عن مبيعات جهاز السويتش خلال السنين الي فاتت والي اتأكد إنه وصل لـ 79.87 مليون وحدة وده رقم خرافي لجهاز محمول، بالرقم ده المنصة تتفوق على PlayStation 4 الي حققت 67 مليون وحدة في نفس الفترة الزمنية الي هي أقل من 4 سنين تقريباً.

كان في تفاصيل كتير منتشرة بتقول إننا هنشوف جهاز Nintendo Switch Pro أو Nintendo Super Switch بس الشركة أكدت إنها مش هتعلن عن حاجة جديدة حالياً.

4- لعبة Tomb Raider جديدة في التطوير :

إستوديو Crystal Dynamics أكد إنه شغال حالياً على لعبة Tomb Raider جديدة  هتحاول توفق بين الوقت الزمني بتاع الألعاب القديمة والثلاثية الجديدة الي بدأت في 2013 وإنتهت في 2018 بلعبة Shadow of The Tomb Raider.

الإستوديو أكد إن تطوير اللعبة هياخد وقت عشان يقدموا أفضل تجربة للفانز عشان كدة بيطلب منهم إنهم يصبروا شوية لحد مالإستوديو يعرف إزاي هيقدر يقدم تجربة جديدة تليق  بإسم Lara Croft و Tomb Raider.

5- دعم God of War على منصة PlayStation 5 :

إستوديو Sony Santa Monica أصدر تحديث جديد للعبة God of War على منصة PlayStation 5 عشان يشغل اللعبة بأداء أحسن واللعبة حالياً بقت شغالة بدقة 4K مع 60 إطار في الثانية، لو مجربتش God of War ومعاك PlayStation 5 فا ديه أنسب فرصة لتجربة اللعبة خاصةً إنها متوفرة بشكل مجاني على PlayStation Plus Collection ضمن إشتراكك.

6- جوجل تُغلق إستوديوهات تطوير الألعاب خاصتها :

شركة Google خلال السنة الي فاتت فتحت إستوديوهين لتطوير ألعاب بشكل حصري لخدمة البث السحابي Google Stadia وكانوا بيضموا أكتر من 150 موظف، الشركة من كام يوم أعلنت إنها قفلت الإستوديوهات ديه تماماً وإنها هتركز على إنها تنزل ألعاب لخدمة Stadia من مطورين خارجيين مش من مطورين شغالين تحت إيدهم.

طبعاً الموضوع ده أثر على الـ 150 موظف الي بقوا عاطلين فجأة عشان كدة مجموعة ضخمة من شركات الألعاب اكدت إنهم عندهم أماكن فاضية ويقدروا يقدموا فيها.

7- الإعلان عن Battlefield 6 قادم في الربيع :

شركة EA أكدت في التقرير المالي الأخير الخاص بيها إنها ناوية تعلن عن الجزء السادس من سلسلة Battlefield خلال ربيع 2021 يعني بين مارس ويونيو 2021 واللعبة نفسها هتصدر في خريف 2021 على الجيل الجديد من أجهزة الكونسول PlayStation 5 و Xbox Series X و Series S في اواخر 2021.

لعبة Battlefield 6 هتقدم تجربة عسكرية متكاملة مستوحاة من Battlefield 3 مع الإستفادة من أجهزة الجيل الجديد في تقديم خرائط أضخم مع عدد لاعبين بنسبة كبيرة هيوصل لـ 128 لاعب.

8- ميكروسوفت تطلب التصديق على إستحواذ Bethesda :

شركة Microsoft Xbox طلبت من منظمات الإحتكار في أوروبا التصديق على إستحواذهم على شركة Bethesda وده هيتم قبل 5 مارس 2021، ده مجرد إجراء روتيني أو قانوني لازم يتاخد بس بشكل عام الإستحواذ كدة كدة هيتم ومن الواضح إننا هنشوف كل حاجة خلصانة على شهر 3.

Ahmed Yousry

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.