Articles, Console News, Gaming News, News

ملخص أخبار الأسبوع المُنتهي في 8 يناير 2021

إجازة  الكريسماس فضلت مستمرة خلال الأسبوع الي فات وكوميونتي الجيمنج فضل مستمر في النوم بس على  الرغم من كدة فكان في مجموعة من الأخبار الشيقة والإشاعات الي انتشرت زي أول تسريب عن ميعاد إصدار الجزء الجديد من Assassin’s Creed  و إنتهاء تصوير فيلم Resident Evil. أهلاً بيكم في مقال جديد عن مخلص أخبار الأسبوع.

1- إنتهاء تصوير فيلم Resident Evil :

الخبر الأول معانا هو إن حساب Resident Evil على  تويتر اكد إن تصوير الفيلم الجديد إنتهى، الفيلم الجديد هيبدأ السلسلة من أولها ك Reboot لسلسلة الأفلام الي نزلت وهيضم كل الشخصيات الي حبيناها من الألعاب زي Leon  و Claire و Chirs Redfield.

لسة مفيش تفاصيل كتير عن الفيلم ومنزلهوش أي إعلانات بس ميعاد الإصدار اتسرب في بعض المواقع والي من المفترض هيكون خلال شهر سبتمبر 2021.

2- مجموعة ضخمة من اللاعبين في روسيا يعرضون أجهزة PS5 خاصتهم للبيع بعد تأكيد عدم إصدار STALKER 2 على المنصة:

إستوديو GSC Game World اكد على  Twitter إن لعبة Stalker 2 هتكون حصرية على الحاسب الشخصي والجيل الجديد من Xbox وإنهم معندهومش أي نية لإصدار  اللعبة على  منصة PlayStation 5 في اي وقت قريب.

التصريح ده خلى ناس كتير في روسيا وبعض دول أوروبا يعرضوا جهاز Playstation 5 بتاعهم للبيع أو للتبديل في مقابل Xbox Series X عشان يجربوا اللعبة أول ما تنزل ويدعموا الإستوديو المُطور. اللعبة من المفترض إنها هتنزل خلال سنة 2021 بس لسة مفيش ميعاد إصدار محدد.

3- مخرج God of War Ragnarok لا يريد الكشف عن ميعاد الإصدار مُبكراً:

Cory Barlog مخرج God of War Ragnarok أكد على  Twitter إن الإستوديو مش ناوي يكشف عن معاد إصدار اللعبة في أي وقت قريب.

على  حسب كلام المخرج فالإستوديو وشركة  Sony PlayStation مش هيكشفوا عن ميعاد إصدار الجزء الجديد من سلسلة God of War إلا لما يكونوا متأكدين من الميعاد. طبعاً من الواضح إن الإستوديو اتعلم من الغلطة الي وقع فيها إستوديو CD Projekt RED لما أجل إصدار Cyberpunk 2077  حوالي 3 مرات وسوني مش ناوية تقرر الغلطة دي ه في ألعابها.

God of War Ragnarok هتنزل على PlayStation 5 وإحتمال كمان تنزل على Playstation 4 في 2021 بس لسة ملهاش معاد نهائي.

4- بدء التحميل المُسبق لحصرية ميكروسوفت The Medium :

اخر الشهر هنشوف واحدة من الحصريات المنتظرة لأجهزة الجيل الجديد من Xbox وهي لعبة The Medium، اللعبة من تطوير إستوديو Bloober Team الي قدم سلسلة Layers of Fear و Blair Witch و Observer.

دلوقتي تقدر تحمل اللعبة مُسبقاً على  جهاز الكمبيوتر الخاص بيك أو على Xbox Series X و S عشان تجهز نفسك وتلعب اللعبة أول ما تنزل، حجم اللعبة هو 45 جيجا بايت على كل المنصات.

اللعبة هتتوفر في 28 يناير على البي سي والجيل الجديد من اكس بوكس بسعر 50 دولار أو تقدر تاخد اللعبة مقابل إشتراكك في خدمة  Xbox Game Pass من غير ما تدفع أي فلوس زيادة .

5- لعبة Red Dead Redemption 2 تفوز بجائزة لعبة العام بتصويت اللاعبين على متجر Steam :

متجر Steam  أعلن عن جوائز ألعاب سنة 2020 ولعبة  Red Dead Redemption 2 كسبت لعبة السنة بتصويت اللاعبين. طبعاً في ناس هتسأل، هي مش اللعبة نزلت في 2018 ؟ وده حقيقي  فعلاً بس لو تفتكروا هي نزلت الاول على الكونسول في 2018 بعد كدة نزلت على  Steam  في ديسمبر 2019 وده خلاها تترشح في جوائز السنة الي بعدها يعني في 2020.

اللعبة وقفت قدام العاب تانية قوية زي DOOM Eternal و Hades و Death Stranding و Fall Guys بس تصويت اللاعبين إتجه للعبة Red Dead Redemption 2.

6- سوني تعلن عن وقف تصنيع كل موديلات أجهزة PlayStation 4 ما عدا PlayStation 4 Slim نسخة الـ 500 جيجا بايت :

سوني أعلنت إنها هتوقف تصنيع كل موديلات الـ PlayStation 4 ما عدا Playstation 4 slim الي هو 500 جيجا بايت. طبعاً قرار منطقي من سوني لإنها أكيد مش هتصنع جهاز PS4 Pro وتبيعه بـ 400 دولار وفي جهاز PlayStation 5 Digital Edition بيتباع بنفس السعر.

كمان القرار ده هيساعد سوني إنها تركز بشكل أكبر على تصنيع كميات أكتر من أجهزة  PlayStation 5 عشان تقدر توفر مخزون أكبر في كل المتاجر خلال سنة 2021 لأن اكيد الطلب هيزيد على الجهاز في 2021 مع إصدار الحصريات الجديد ة زي God of War Ragnarok و Returnal و  Ratchet and Clank Rift apart.

7- إشاعة : الجزء الجديد من سلسلة Assassin’s Creed سيتوفر في 2022 وسيكون من تطوير إستوديو Ubisoft Sofia :

اخر خبر معانا النهاردة عن الجزء الجديد من Assassin’s Creed، في يوتيوبر فرنسي أكد إن الجزء الجديد من السلسلة هيصدر خلال سنة 2022 وهيكون من تطوير إستوديو Ubisoft Sofia الي اشتغل على  Assassin ‘s Creed Rogue و إضافات Assassin’s Creed Origins.

خلال سنة 2021 يوبي سوفت هتستمر في دعم Assassin’s Creed Valhalla بمحتويات إضافية سواء مجانية أو مدفوعة والمفروض إننا هنشوف إضافتين أو تلاتة  كبار للعبة هيضيفوا على القصة وهيقدموا تجارب مميزة أهمهم حصار الـ Vikings وهجومهم على  باريس في فرنسا.

وبس كدة، ديه كانت مجموعة  من أهم الاخبار الي نزلت خلال الأسبوع الي فات، شاركونا رأيكم في الكومنتات وقولولنا ايه اكتر خبر حمسكم لحاجة معينة.

Ahmed Yousry

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.