Articles, Console News, News, Reviews

مراجعة PlayStation 5

نزلنالكم من فترة مراجعتنا لأجهزة الجيل الجديد من اكس بوكس Series X و Series S وجه الوقت عشان نتكلم عن جهاز PlayStation 5 ونوضحلكم أهم المميزات والأسباب الي تخليكم تفكروا تشتروا الجهاز وهل فعلاً الجهاز يستحق الشراء حالياً ولا تستنوا شوية لحد 2021.

خلينا نبدأ الأول كلامنا من ناحية العتاد التقني عشان في كلام كتير غلط منتشر بيوضح ان اداء PlayStation 5 أضعف من Xbox Series X. بالنسبة لمواصفات الجهاز فهو مبني على معمارية  Zen 2  من AMD بتردد متغير بيوصل لحد 3.5 جيجا هرتز. الجهاز فيه 16 جيجا رام DDR6 مع قوة رسومية 10.3 تيرا فلوبس من نوعية RDNA 2.

على الورق أيوة الجهاز تقنياً أضعف من Xbox Series X بس ده مش باين خالص حالياً، كل الالعاب الي تم تجربتها على الجهاز بتبين ان الاداء متساوي تماماً بينهم وحرفياً مفيش فرق فا مش دايماً هنعتمد على المواصفات المكتوبة لأن تطوير الالعاب بيختلف.

الفرق في المواصفات ممكن يبان في المستقبل كمان كام سنة ونشوف العاب شغالة بشكل تقني أفضل على Xbox Series X بس لحد دلوقتي مفيش فرق. الـ PlayStation 5 كمان فيه هارد SSD بحجم 825 جيجا متاح ليك منهم 667 فقط. هيكون من الأفضل انك تجيب هارد خارجي للتخزين خلال السنين الي جاية عشان حجم الألعاب بقى ضخم خلال الفترة ديه ولعبة واحدة بس ممكن تاخد ربع الهارد تقريباً، على سبيل المثال Call of Duty Black Ops Cold War حجمها معدي الـ 130 جيجا.

الجهاز نازل منه نسختين، النسخة الأولى وهي النسخة العادية والي بيجي فيها مدخل أسطوانات Bluray ديه سعرها 500 دولار، في بقى نسخة تانية من الجهاز سعرها 400 دولار و ديه بتيجي من غير مدخل أسطوانات يعني لازم تعتمد على شراء أكونتات او ألعاب من الستور بشكل رقمي فقط.

نقطة التطور الضخمة الي عند PlayStation هي يد التحكم الجديدة Dualsense، أكيد كلنا عارفين إن يد تحكم Xbox الجديدة مقدمتش طفرة تقنية بل هما اخدوا نفس الدراع الي كان موجود مع Xbox وضافوا عليه زرار الـ Share الجديد مع تحسينات بسيطة لملمس الدراع.

سوني بقى قدمت عكس الكلام ده خلاص مع الدراع الجديد Dualsense، التغيير الضخم والاساسي هو ملمس الدراع والي بقى قريب اكتر من Xbox لأن معروف ان دراع الاكس بوكس دايماً كان أفضل في الملمس من دراع PlayStation.

مش بس كدة، ده كمان اتضاف في الجهاز نوع جديد من الإهتزاز إسمه Haptic Feedback، ديه لوحدها طفرة تقنية جديدة بتقدم احساس مختلف تماماً في تجربة الألعاب، إستخدامك للأسلحة هتحس بقوته في ايدك، لما الشخصية او العربية التي بتتحكم فيها تمشي على تلج ده هيديك احساس مختلف عن طريق عادي واحساس مختلف على طريق صحراوي. كل حاجة هتحس بيها في ايدك وحقيقي لازم تجرب الدراع بنفسك عشان تفهم قصدي.

كمان الدراع بيقدملك Adaptive Triggers وديه خاصية جديدة لـ R2 و L2، لما تكون ماسك قوس وسهم في اللعبة وتسحب السهم لورا هتحس بقوة السحبة، ضغتطك على الـ R2 بتكون مختلفة لما تضرب نار من أسلحة متنوعة وده ظهر بشكل ملحوظ في Black Ops Cold War. كل المميزات ديه لازم تجربها بنفسك عشان تحس بيها بس متتوقعش انها تبقى موجودة في كل الالعاب لأن ده بيعتمد على المطورين نفسهم، كمان مع وجود USB C فالشحن هيبقى اسرع وعمر البطارية أطول، الدراع فعلاً يستحق الـ 70 دولار الي هتدفعهم فيه.

من الحاجات الي شهدت تطور على منصة PlayStation 5 هي واجهة المستخدم، على عكس Xbox فا سوني قررت تعمل واجهة مستخدم جديدة تماماً لمنصة PlayStation 5 بيغلب عليها اللون الأسود والي شكله شيك جداً، واجهة المستخدم بتضيف شوية مميزات جديدة.

أول ميزة وهي الـ Cards وديه بتظهرلك لما تضغط على زرار الـ Home وبتوضحلك فاضلك اد ايه في مهمة معينة في اللعبة وكمان بتخليك تقدر تدخل مهمات معينة حتى وانت على الشاشة الرئيسية للجهاز من غير ما تحتاج تفتح اللعبة وتختار من جواها.

كمان في إمكانية انك تخلي اللعبة تساعدك، يعني مثلاً لو مش عارف تهزم Boss معين أو تخلص لغز فا بتخلي اللعبة تساعدك وتوضحلك تعمل ايه، المشكلة الوحيدة ان الخاصية ديه عشان تشتغل لازم تكون مشترك في خدمة PlayStation Plus.

منصة PlayStation  دايماً مشهورة بألعابها الحصرية وشوفنا كمية تجارب أقل ما يقال عليها مذهلة على PlayStation 4 زي God of War و Bloodborne و Ghost of Tsushima وغيرهم. بداية PlayStation 5 هي كمان كانت قوية بمجموعة من الحصريات التقيلة سواء من الطرف الأول أو التالت. من الطرف الأول شوفنا إصدار 3 ألعاب وهما Demon’s Souls و Spider Man Miles Morales و Sackboy A Big Adventure.

من الطرف التالت شوفنا لعبتين، Bugsnax و Godfall.  بس في نقطة لازم أوضحها، Spider Man و Bugsnax و Sackboy متوفرين على PlayStation 4، كمان Godfall متوفرة على البي سي وهينزل منها نسخة للاكس بوكس في شهر 5 الي جاي، ده معناه ان مفيش حصرية فعلية للمنصة إلا Demon’s Souls فا لو أنت من عشاق ألعاب From Software وسلسلة السولز أنصحك تجيب الجهاز وتجربها.

إنما لو انت مش مهتم بالألعاب ديه فا مفيش سبب حالياً يخليك تجيب  الجهاز وننصحك تستنى شوية لحد 2021 لما الحصريات القوية تنزل زي God of War Ragnarok و Returnal و Ratchet and Clank Rift Apart و Horizon 2 Forbidden West وطبعاً Gran Turismo، كل التجارب ديه تستحق شراء الجهاز بس ده هيكون في 2021 خاصةً في النص التاني منها .

بشكل عام بداية PlayStation 5 من ناحية الحصريات أقوى بكتير من منصات Xbox الي مشوفناش عليها أي حصريات قوية وقت الإصدار، حتى كمان Halo Infinite الي الكل كان مستنيها إتأجلت لأواخر 2021  لأنها مش جاهزة للإصدار وده بيدي أفضلية كبيرة لمنصة PlayStation 5 حالياً.

هل الجهاز فيه خدمات تستاهل الإشتراك فيها ؟ أكيد طبعاً، الخدمة الأولى والأساسية هي PlayStation Plus وديه لازم تشترك فيها لو حبيت تجرب ألعاب أونلاين. الخدمة كمان بتقدملك من لعبتين لـ 3 بشكل مجاني كل شهر واتضاف عليها Bugsnax شهر الإصدار، كمان في شهر 2 هنشوف إضافة واحدة من الحصريات عليها بشكل مجاني مقابل إشتراكك وهي Destruction All Stars. الخدمة ديه سعرها 60 دولار في السنة.

الجهاز كمان بيقدملك خدمة تانية وهي PlayStation Now، حالياً الخدمة فيها أكتر من 600 لعبة من ضمنهم ألعاب نزلت على PlayStation 3 وألعاب نزلت على PlayStation 4 مع وجود شوية حصريات زي Horizon Zero Dawn و Bloodborne و The Last of Us. كل شهر بنشوف إضافة أكتر من 5 ألعاب جديدة للخدمة، مجموعة منهم بتفضل مدى الحياة ومجموعة بتتشال بعد حوالي 6 شهور.

سعر الخدمة 60 دولار في السنة بس للأسف هي مش خدمة قوية و مينفعش نقارنها بـ Xbox Game Pass، خدمة Game Pass ستظل بتقدم التجربة الأفضل في عالم الألعاب مع إضافة كل الحصريات واكتر من 15 لعبة في الشهر من ضمنهم  ألعاب ضخمة، كمان الخدمة بقى متوفر عليها إشتراك EA Play من غير ما تدفع أي فلوس إضافية عن إشتراكك الأصلي. كل ده بـ 15 دولار في الشهر بس.

في حالياً شوية تلميحات وتسريبات بتقول إن PlayStation بتفكر تعمل خدمة جديدة شبه Xbox Game Pass تضيف عليها كل الحصريات أول بأول وتكون برضو بإشتراك شهري، الجيل لسة بيبدأ وأكيد هنشوف خطط مختلفة من الشركتين خلال السنين الي جاية.

في الاخر هل PlayStation 5 يستحق الشراء حالياً ؟ إجابة السؤال ده متوقفة عليك انت، لو انت من مُحبي ألعاب استوديو From Software ونفسك تجرب  Demon’s Souls وكمان لو عايز تاخد أداء أفضل في الألعاب الجديدة زي Cyberpunk 2077 و Assassin’s Creed Valhalla وتعيش تجربة أفضل فأه اكيد اشتري الجهاز دلوقتي وفلوسك هتتحط في محلها.

إنما لو انت مش مهتم بألعاب السولز وعادي ممكن تتأقلم مع الاداء على PlayStation 4 الي معاك فا منصحكش تشتري الجهاز حالياً خاصةً مع  وجوده  بأسعار ضخمة. استنى السنة الجاية يكون في حصريات اكتر نزلت وكمان السعر يقل شوية وتقدر تشتريه بسعر قريب من سعره الأصلي.

ديه كدة كانت مراجعة سريعة لجهاز PlayStation 5، لو معاك الجهاز قولنا رأيك فيه في ولو لسة مشترتش الجيل الجديد فا ناوي تشتري ايه PlayStation 5 ولا Xbox Series X ولا Series S، لو مشوفتش مراجعتنا لأجهزة اكس بوكس فا تقدر تشوفها من هنا وشاركنا برأيك وقولنا ناوي تشتري ايه.

Ahmed Yousry

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.