Articles, News, Reviews

مراجعة It Takes Two

فاكر وانت صغير لما كنت بتتجمع مع قرايبك أو صحابك وتفضلوا تجربوا لعب مع بعض وتضحكوا طول فترة اللعبة ؟ لعبة It Takes Two هترجعلك كل الذكريات ديه وأكتر كمان، انا مش فاكر اخر مرة إستمتعت فيها بلعبة بالشكل ده وفعلاً المخرج Josef Fares كان عنده حق لما قال إن مفيش حد هيحس بملل وهو بيجرب It Takes Two. اللعبة ديه قدرت تقدم تجربة تعاونية أقدر وبكل ثقة أقول إنها الأفضل لحد دلوقتي فا خلونا نتكلم عن اللعبة ونعرف ليه هي تستحق إنها تاخد اللقب ده مننا.

قصة It Takes Two بسيطة جداً، زوج وزوجة إسمهم Cody و May بيكون بينهم خلافات كبيرة جداً وبيقرروا إنهم ياخدوا خطوة الطلاق، بنتهم بتعرف إنهم ناويين على كدة وبتقرر إنها تستعين بكتاب لحل مشاكل العلاقات إسمه Dr.Hakim عشان يرجع الشغف والحب بين الزوجين تاني.

بنتهم Rose كانت عاملة دمى بالخشب والطين على شكل أبوها وأمها وبمساعدة الكتاب ده بيتم نقل عقلهم في الدمى  ومن هنا بتبدأ رحلتك مع صاحبك في عالم It Takes Two عشان تعرفوا تحلوا مشاكلكم فهل هتقدروا ترجعوا الشغف بينكم تاني ومتخسروش فكرة وجود عائلة ؟

قصة It Takes Two مش عملاقة، اللعبة مُقسمة لسبع فصول، كل فصل فيهم لو استعجلت فيه هتقدر تخلصه في حوالي ساعة ونص يعني اللعبة هتخلص معاك في حدود 10 ساعات لو كنت سريع، ولكن لو قررت تستكشف كل حاجة مع صاحبك وتدوروا في كل شبر في اللعبة فا ممكن توصل معاك لـ 15 أو 20 ساعة وده هيزود المتعة طبعاً. بس أحياناً كنت بحس إن في مط شوية في بعض الفصول وانها كان المفروض تخلص بدري، ولكن بشكل عام الموضوع مش بيأثر على التجربة الممتعة إطلاقاً وهتفضل مستمتع باللعبة.

نيجي للنقطة الأهم في لعبة It Takes Two وهي أسلوب اللعب، لعبة It Takes Two مبنية بشكل كامل على التجربة التعاونية وعشان كدة لازم يكون في حد يلعبها معاك، الموضوع هيكون سهل لو هتلعبها مع صحابك أو اخواتك في البيت لإنك هتوصل دراع تاني وخلاص ولكن لو حبيت تلعبها أونلاين مع صاحبك هل هضطروا تشتروا نسختين من اللعبة ؟ الإجابة ببساطة هي لا، ممكن واحد بس فيكوا يشتري اللعبة والشخص التاني يخش على متجر المنصة الي بيلعب عليها ويحمل حاجة إسمها It Takes Two Friend’s Pass وبكدة هيقدر إنه يجرب اللعبة معاك بدون ما يضطر إنه يشتريها، بإختصار كدة انت وصاحبك محتاجين نسخة واحدة بس من اللعبة عشان تستمتعوا بيها مع بعض وواحد فيكوا هيحملها مجاناً !

طب اسلوب اللعب هيقدملك إيه، بص انت هتستمتع بحاجة محتاجة ذكاء وتشغيل دماغ بشكل حلو، اساس اللعبة معتمد على حل الألغاز وبما إنها لعبة تعاونية فا أنت وصاحبك لازم هتساعدوا بعض عشان تخلصوا كل مرحلة من المراحل الي في اللعبة سواء عن طريق حل الألغاز أو مواجهة الأعداء وغيره. كل فصل من فصول اللعبة بيقدملك ميكانيكيات لعب جديدة ومختلفة تماماً عن الفصل الي قبله.

على سبيل المثال، في الفصل الأول اللعبة هتديك انت وصاحبك شاكوش ومسامير وعن طريقهم هتقدروا تتنقلوا وتحلوا الألغاز المختلفة، ولكن هتيجي للفصل التاني هتلاقي اللعبة قلبت لعبة شوتر وبتديك انت وصاحبك أسلحة مختلفة ولازم تساعدوا بعض في إستخدامها عشان تقضوا على الأعداء، قيس على كدة كل حاجة في اللعبة، كل فصل هيقدملك تجارب مختلفة ومنوعة مش بس من ناحية الميكانيكيات بل كمان بتصميم البيئات.

السبع فصول المتواجدين في اللعبة مختلفين تماماً عن بعض وكل فصل هيديك إحساس مختلف تماماً عن الفصل الي قبله، الموضوع ده بيساعد بشكل كبير بإنك متحسش بملل لإن مفيش تشابه في كل مرحلة ومفيش تشابه في الميكانيكيات الي بتتقدملك، إستوديو Hazelight إبتكر أفكار كتير مميزة للعبة ديه والمخرج كان عنده حق لما قال إن لو حد زهق من اللعبة فا هو هيديه 1000 دولار، وفعلياً انت مش هتزهق منها.

لعبة It Takes Two مفيهاش حاجات بتقدر تجمعها من البيئات زي الألعاب التانية بل فيها ما يُسمى بالـ Mini Games، الألعاب الصغيرة ديه هي حاجات جانبية ملهاش أي تأثير على قصة اللعبة الرئيسية ومش بتُستخدم في أي حاجة مهمة في اللعبة بل وجودها هدفه زيادة المتعة، الـ Mini Games هي عبارة عن منافسات بينك وبين صاحبك الي بيلعب معاك سواء بتخلصوا سباق أو بتلعبوا لعبة شد الحبل أو مواجهة للحصول على نقاط والي بيوصل لنقط أكثر بيكون هو الكسبان. في مجموعة ضخمة من الـ Mini Games سواء الي بتلاقيها قدامك أو بتكون مستخبية في مناطق جانبية عشان كدة دور كويس في كل مرحلة عشان تستكشف كل حاجة.

كل مرحلة من مراحل اللعبة بيكون فيها Boss Fight واحد أو أكتر وكل Boss فيهم بيتحداك إنك تستخدم الميكانيكيات الي بتديهالك اللعبة وحتى في مواجهات الزعماء لازم يكون في تعاون مع صديقك، كمان مع تقدمك في اللعبة هتحس بصعوبة أعلى في مواجهة الزعماء وده بيزود من التحدي، ولكن الأهم إنه بيزود من التعاون وإن يكون في تواصل مفهوم بينك وبين الي بيلعب معاك.

لعبة It Takes Two مبنية على محرك Unreal Engine 4 وهو نفس المحرك الي استخدمه إستوديو Hazelight في تطوير لعبته السابقة A Way Out. 3 سنين خبرة زيادة بتوضح مدى قوة الإستوديو في صناعة بيئات مُنوعة ليها طابع رسومي مميز.

زي ما شرحت فوق فا كل فصل من فصول اللعبة السبعة له شكل وطابع مختلف تماماً عن الفصول التانية وده معناه إن تصميم البيئات والرسومات بيختلف من فصل للتاني وكل مرة هتحس إنك دخلت في لعبة تانية تماماً، احنا جربنا اللعبة على منصة PlayStation 4 والرسومات كانت مُبهرة بالنسبالي من ناحية تصميم البيئات والإضاءة والخيالات والإنعكاسات وكل حاجة.

الأداء التقني كان ثابت معظم الوقت بس مكانش أحسن حاجة، لما بيكون في مشاهد أكشن كتير وإنفجارات أو حتى وجود دخان أو ضباب كان بيأثر على اللعبة وكان بيحصل frame drop واضح جداً، مش بيأثر على التجربة بشكل كبير ولكنه موجود وهتحس بيه في بعض المشاهد وهيضايقك. لو عايز تاخد أفضل تجربة للعبة It Takes Two فننصحك إنك تجربها على الجيل الجديد PlayStation 5 و Xbox Series X | S أو طبعاً تقدر تاخد التجربة المثالية على منصة الحاسب الشخصي سواء قررت تشتريها على Steam أو Origin.

الأداء الصوتي في اللعبة فعلاً ممتاز خاصةً للممثل Joseph Balderrama الي قدم دور البطل Cody وقدم كمان دور الكتاب Dr.Hakim وفعلياً انا مكنتش مصدق هو إزاي قدر يعمل الدورين بشكلين مختلفين كدة. المؤثرات الصوتية والموسيقى التصويرية كانت دايماً مرحة وليها طابع مغامرات كلاسيكي كدة هيحسسك بفرحة طول وقت اللعبة.

الخلاصة :

لعبة It Takes Two قدمتلي أفضل تجربة في سنة 2021 لحد دلوقتي، على الرغم من إن قصتها كانت بسيطة جداً ومش طويلة إلا إن أسلوب اللعب التعاوني ده مش بنشوفه كتير وكانت مفاجأة بالنسبالي إن اللعبة قدمت تحسينات ضخمة على أسلوب لعب A Way Out بأفكار أكثر تميزاً ومتعة. اللعبة مش خالية من العيوب زي المط في الأحداث وبعض المشاكل التقنية بس  زي ما قولت، ده مش هيأثر على الإستمتاع بالتجربة. كمان من أكتر الحاجات الإيجابية إنك لو اشتريت اللعبة فا تقدر تخلي صاحبك يعمل تحميل للـ Friend’s Pass وتعمله دعوة ويلعب معاك بدون ما يدفع أي أموال إضافية ( طبعاً لازم يكون على نفس المنصة ).

التقييم النهائي : 9/10

اشتري اللعبة على PlayStation من هنا

أو إشتريها على Xbox من هنا

Ahmed Yousry

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.