Articles, News, Reviews

مراجعة Hitman 3

انا للأسف مجتليش فرصة تجربة الجزء الأول أو التاني من Hitman وكنت دايماً شايفها ألعاب مش ممتعة أوي وكل الي بعمله فيها إني بخش أقتل أهداف مُعينة وخلاص بدون ما يكون في قصة أو أحداث تشدك، ولكن بعد تجربتي للعبة Hitman 3 أحب أقول إني اتأكدت إن كان فايتني حاجات كتير لإن Hitman 3 بالفعل قدمتلي واحدة من أفضل التجارب المميزة الي شوفتها خلال الفترة الي فاتت وقريب جداً ناوي أرجع ألعب الجزء الأول والتاني عشان اعيش المهمات العظيمة الي فاتتني ديه.

على حسب الي فهمته من القصة فهي بتكمل بعد أحداث المحتوى الإضافي الي نزل للعبة Hitman 2 بس بشكل عام انت مش محتاج تكون فاهم القصة أوي عشان تلعب Hitman 3 لإن في الأول وفي الاخر وجودك في اللعبة بيكون عشان تنهي حياة مجموعة من الاهداف.

القصة بتتكلم عن Agent 47 والعميل المساعد Lucas Grey والي بيكملوا رحلتهم في القضاء على بعض شخصيات منظمة Providence الي تعتبر العدو الرئيسي ليك في ثلاثية World of Assassination، الـ Providence هما مجتمع سري قديم بيتحكموا في كل شؤون العالم وليهم عملاء في كل أنحاء العالم. المنظمة ليها رئيس إسمه The Constant وبعض الشركاء الي هدفك الرئيسي في القصة القضاء عليهم عشان توصل لـ The Constant. القصة فيها مجموعة Plot Twists حلوة جداً والمشهد السينمائي الي بيظهر بعد نهاية اللعبة بيحمسنا للمستقبل الي ممكن يتقدم بشكل مختلف تماماً ومميز. كمان اللعبة فيها نهاية سرية ممكن توصل ليها بطريقة مش هحرقها عليك عشان تشوف هتعرف توصلها لوحدك ولا لا، لو معرفتش فإبحث عن Hitman 3 Secret Ending على يوتيوب وهتلاقيها وتقدر تقول عليها نهاية صادمة شوية.

النقطة الي بتتألق فيها Hitman 3 بقى هي أسلوب اللعب. طبعاً انا مجربتش الأجزاء الأولى فعشان كدة كل حاجة بتتقدم في Hitman 3 تعتبر جديدة تماماً بالنسبالي فخليني أكلمكم شوية عن أكتر الحاجات الي حببتني في أسلوب اللعب وخلتني متعلق باللعبة ومش عايز أقوم من عليها.

أول حاجة هي تصميم المهمات، كل مهمة من الستة محطوطة جوا Sandbox مقفول بس ليك الحرية في إنك تعمل حاجات كتير جداً، كل مهمة بيكون فيها قصص بتتحكى حواليك وبتقدر تستغلها في انك تعرف مكان حاجة معينة أو شخص مُعين من المفترض إنه هيقابل الهدف الرئيسي ليك فأنت بدورك بتروح تتقمص دور الشخص ده وبكدة بيكون ليك فرصة أكبر في إنك توصل للهدف بتاعك أسرع. في كمية طرق رهيبة لقتل الأهداف في اللعبة، اول نقطة ذكرتها هي تقمص دور حد قريب منه، ممكن تخش المهمة من أولها وأنت John Wick وتقتل كل شخص بيقف في طريقك وممكن تلعب المهمة كلها تخفي وتسلل.

اللعبة بتديك 3 صعوبات تختار منهم، الصعوبة الي جربتها شخصية هي Casual لإن ديه أول تجربة Hitman بالنسبالي وعلى الصعوبة ديه اللعبة بتكون متساهلة شوية معاك، مش بتتكشف بسرعة والأصوات الي بتعملها مش بتجذب الأعداء ليك والذكاء الإصطناعي بيكون أقل شوية بس على الرغم من كدة فاللعبة قدرت إنها تقدم تحدي في كل المهمات لإن ممكن تعمل غلطة متكونش واخد بالك منها تقلب المكان كله عليك ويبدأوا يطاردوك.

خلينا نتكلم شوية عن تصميم المهمات، في المهمة الأولى أنت بتكون في دبي تحديداً في برج الغزالي أطول برج في العالم ولازم تقتل هدفين رئيسين موجودين في حفلة إفتتاح البرج. تصميم البرج والطوابق الكتير الي فيه وكمية الفرص الي قدامك الي ممكن تقتل بيها الأهداف خرافية، انت ممكن تعمل مهمات جانبية جوا كل مهمة من المهمات الرئيسية عشان تعرف تفاصيل أكتر عن القصة والأهداف الي هتقتلها وده بيخلي لكل هدف فيهم شخصية مستقلة بذاتها ودور كبير في الأحداث بشكل عام. إستخدام تقنية الإنعكاسات Screen Space Reflections خلتني أفضل متمعن في جمال برج الغزالي الي صمموه لإنه مبني بشكل كبير من الزجاج والإنعكاسات الي فيه هتخليك تاخد صور كل كام ثانية ( هتكلم أكتر عن تقنية الإنعكاسات المستخدمة لاحقاً في المراجعة ).

في مهمة علقت معايا بشكل كبير وهي المهمة التانية تحت عنوان Death in the Family في بريطانيا. كالعادة فأنت ليك هدف رئيسي المفروض تقتله وكمان المرة ديه لازم تسرق ملف من خزنة موجودة في القصر الي أنت هتروحه. الي بيفاجئك بقى إن القصر أساساً فيه جريمة قتل حصلت وهما طلبوا مُحقق خاص عشان يعرفلهم سبب الجريمة ومين القاتل، هنا بقى انت بتقدر تقتل المُحقق الخاص وتاخد مكانه وتبدأ تحقق بنفسك في الجريمة عشان تعرف أسرارها وبالفعل بتقدر تكتشف كل حاجة وتحل الجريمة، الموضوع هياخد منك وقت شوية بس كمية التفاصيل المعقدة هتخليك فعلاً عايز تكمل وتوصل للنهاية.

من الحاجات اللطيفة في المهمة ديه كمان إن الملف الي انت مُوكل بسرقته محمي جوا خزنة وعشان تفتحها لازم تحل لغز في الغرفة الي انت فيها، حل اللغز كان لذيذ جداً وكانت إضافة مميزة للعبة. وأنت بتلعب المهمة بتلاقي سلالم وأبواب بتقدر انك تفتحها وديه بتكون عبارة عن Shortcuts أو أماكن دخول جديدة لما تقرر أنك تعيد المهمة تاني وده بيخلي اللعبة أكثر ديناميكية وبتحس إن العالم كله مترابط حواليك. كمان قبل كل مهمة بتقدر إنك تحدد إيه الي هتاخده معاك ولما تعيد المهمة تاني بيكون ليك الإمكانية انك تهرب سلاح أو أداة لمنطقة معينة في المهمة بتروح تاخدها بعد كدة عشان تساعدك في مهمتك.

اخر مهمة حبيت اتكلم عليها هي المهمة التالتة بعنوان Apex Predator وفيها بتدخل على نادي ليلي في برلين، ألمانيا في محاولة للعثور على خمسة أهداف وقتلهم. جو المهمة بشكل عام هيديك إحساس بإنك بتتفرج على الجزء الأول من فيلم John Wick تحديداً في لقطة Red Circle وتلقائي هتبدأ في انك تقتل كل الـ Security الي حواليك عشان توصل لأهدافك الرئيسية. كل مهمة من المهمات الرابعة والخامسة والسادسة ( خاصةً الأخيرة ) بتقدم تجربة مميزة جداً ومختلفة عن المهمة الي قبلها، كل مهمة فيها قصص جانبية صغيرة بجانب القصة الرئيسية بالإضافة لوجودها في مكان مختلف كمان أكثر جمالاً وروعة.

لو أنت شاري Hitman 1 و Hitman 2 تقدر تلعبهم عن طريق لعبة Hitman 3 وساعتها هتتمتع بمجموعة من التغييرات الي حصلت لبيئة مهمات الأجزاء الأولى مع إضافة بعض التحسينات الرسومية. الموضوع سهل جداً على منصة Xbox Series X | S ومفيهوش مشاكل بس عشان تنقل المهمات على PlayStation فالموضوع فيه مشاكل وبيشتغل بعد مجموعة محاولات أما على منصة الحاسب الشخصي فحالياً مينفعش تعمل كدة لإن اللعبة متوفرة على متجر Epic Games والأجزاء الأولى كانت متوفرة على متجر Steam، ولكن إستوديو IO Interactive  وعد إنه هيقدم حل في أقرب وقت ممكن.

كمان لو أنت معاك نظارة الواقع الإفتراضي PlayStation VR سواء على PlayStation 4 أو PlayStation 5 فحالياً تقدر تلعب الثلاثة أجزاء بالواقع الإفتراضي وهنا بقى انت فعلاً هتتقمص دور Agent 47. لازم أنوه على حاجة في النقطة ديه، لو أنت معاك PlayStation 5 فنظارة PlayStation VR مش مدعومة بشكل تلقائي على الجهاز وهتكون مضطر إنك تنزل نسخة الـ PlayStation 4 كمان من اللعبة عشان تقدر تلعب بالواقع الإفتراضي.

لعبة Hitman 3 مبنية على محرك Glacier Engine الخاص بإستوديو IO Interactive، أول ما هتبص على اللعبة هتحس إن مفيش فرق كبير بينها وبين Hitman 1 و 2 ولكن مع التركيز هتاخد بالك إنهم ضافوا Screen Space Refelctionsوcreen Space Refelctionsخد بالك إنهم ضافوا بير بينها وبين لحاجات الي فاتتني ديه.

 وديه تقنية بتستخدم في توضيح الإنعكاسات الخاصة باللعبة بأفضل شكل ممكن، هي اه مش بنفس قوة تقنية تتبع الأشعة بس تعتبر أقرب حاجة ليها وخلت شكل اللعبة أفضل بكتير من الأجزاء الأولى. اللعبة هيتضاف ليها تحديث لدعم تتبع الأشعة خلال سنة 2021 على الحاسب الشخصي والجيل الجديد ووقتها هنشوف رسوميات أفضل من كدة بكتير كمان.

الإستوديو مش بس مغير في تصميم المهمات من ناحية أسلوب اللعب بل من الناحية الرسومية كمان، كل مهمة ليها طابع خاص وشكل مميز هيخليك تحس إنك في مكان مختلف تماماً فعلاً. تصميم الشخصيات مش قد كدة بصراحة، يعني في المشاهد السينمائية الشخصيات بتظهر بشكل ممتاز ولكن أثناء تجربة اللعبة فعلاً الشخصيات شكلها مش واقعي أوي بس ديه حاجة نقدر نتغاضى عنها لإن كل مهمة فيها أعداد كبير من الـ NPCs.

بما إن ديه أول مرة أجرب فيها لعبة Hitman فأنا إتفاجئت جداً من تصميم الصوتيات في اللعبة، البيئة الي حواليك حرفياً بتوضحلك كل حاجة خاصةً لو عملت إعدادات الصوت على Dynamic في اللعبة فالتجربة بتكون واقعية اكتر وبتقدر تحدد مكان الأعداء لما تدمج الصوت  الي سامعه مع الي انت شايفه في الخريطة. التمثيل الصوتي كان كويس جداً للأعداء بالذات طبعاً لإن دول الي بيتكلموا أطول فترات اللعبة. البطل الرئيسي Agent 47 هو شخصية مميزة جداً، مش بيتكلم كتير وكلامه كله بيكون موجه لهدف مُعين وده حببني في الشخصية أكتر.

من ناحية الأداء التقني فأنا جربت اللعبة على منصة Xbox Series S واللعبة شغالة على الجهاز بدقة 1080pو60 فريم في الثانية على إعدادات High للـ Textures و Low للظلال. أداء اللعبة ممتاز واللعبة ثابتة على 60 فريم في الثانية طول الوقت ومفيهاش مشاكل إطلاقاً. لو عايز تاخد أفضل جرافيك على أجهزة الكونسول بأنصحك طبعاً تتوجه لمنصة Xbox Series X لإن اللعبة شغالة عليها بدقة Native 4K 2160p و60 فريم في الثانية على إعدادات Ultra للـ Textures و High للظلال وده أفضل من PlayStation 5 كمان.

الخلاصة :

الجزء الثالث من Hitman  نهى ثلاثية The World of Assassination بأفضل شكل ممكن وحتى لو مجربتش أول جزئين من السلسلة فأنصحك بتجربة الجزء الثالث فوراً لأنه بيقدم كمية رائعة من الأفكار المميزة وهيخليك تعيد كل مهمة من الست مهمات مرة واتنين وتلاتة عشان تشوف كل الإمكانيات والفرص لقتل هدفك، ومفيش مرة تجربتك هتكون زي التجربة الأولى لإنك دايماً هتعمل حاجات مختلفة، ولو أنت لعبت الجزئين الأول والتاني ولسة محتفظ بيهم على حسابك فتقدر تعيدهم في Hitman 3 مرة تالتة وتتمتع بكل التحسينات الي بتقدمها اللعبة.

التقييم النهائي : 9/10

لو حابب تشتري اللعبة على منصات بلايستيشن اضغط هنا

لو حابب تشتري اللعبة على منصات اكس بوكس اضغط هنا

Ahmed Yousry

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.