Reviews, مراجعات

مراجعة Guardians of the Galaxy

مراجعة Guardians of the Galaxy

المقدمة

اللعبة دي اكبر دليل على ان الدعاية مهمة جدا لأي مشروع، لان Guardians of the Galaxy كانت من أكبر مفاجآت 2021 فهي مش بس لعبة حلوة لا دي قدمت كمان تجربة ممتعة للغاية خلتني اتمنى انها متخلصش، على الرغم ان متعملش ليها دعاية بجنيه، وسوء التسويق ده خلاني انا وناس كتير ننسى اصلا ان في لعبة بالاسم ده نازلة السنادي
من اول ما تم الكشف عن اللعبة، وبعيدا انه كان شكل اللعبة سيء تقنيا جدا، مكنش ده السبب الوحيد اللي خلاني اقلق منها، لأن اولا دي لعبة من Square Enix اللي قدمت لينا واحدة من اسوأ العاب السوبر هيروز وهي Marvel’s Avengers وده خلاني اقول في نفسي اه دي لعبة بتستغل اسم مارفل عشان تلم فلوس وخلاص وبدون اي مجهود في تطوير اللعبة
ثانيا اصرار ان اللعبة تنزل السنادي مع وجود الدعاية الضعيفة دي وفي ظل وجود وباء كروونا اللي بيأثر على تطوير الالعاب فقولت لنفسي هتطلع فلوب كبير، بس كل الكلام ده طلع خاطيء تماما

القصة والعالم

اول حاجة عايزين ننوه عنها انك مش لازم تكون قرأت الكوميكس او شاهدت افلام Guardians of the Galaxy لأن اللعبة هنا بتقدم قصة اصلية جديدة، واللي معمول باتقان جميل جدا لدرجة تخليني اقول بكل ثقة ده افضل اقتباس حصل لأسم Guardians of the Galaxy يعني اه اللعبة قصتها احسن من الافلام، وعلى رغم انك بتلعب بشخصية واحدة بس من اعضاء الفريق المكون من خمس شخصيات او حراس كما يطلقون على نفسهم، الا ان كل شخصية اخذت حقها وكأنها الشخصية الرئيسية اللي بتلعب بيها.
قصة اللعبة بتدور احداثها على فرقة من ال Bounty Hunters في الفضاء، الفرقة دي مكونة من شخصيات لسة جداد على بعض، ورئيسهم هو بيتر بطل اللعبة، وبتبدأ رحلتهم في البحث عن وحش اسطوري معين عشان يصطادوه، بس منحنى القصة يتقلب 180 درجة وتحصل مشكلة تخلي اعضاء الفريق يبدأوا في رحلتهم الحقيقية، اللي من خلالها هتقوى علاقتهم ببعض وده احلى ما في القصة هو شخصيات اعضاء الفريق، اللي علاقتهم بتطور مع تقدمك في اللعبة بطريقة حلوة جدا
لو تعرف شخصيات Guardians of the Galaxy هتبقى عارف انهم كوميدين وحسهم الفكاهي عالي، وده طبعا موجود هنا، وفي مرات كتيرة ضحكت من قلبي، عندك بطل اللعبة بيتر الملقب بStar Lord ده الشخصية الcool اللي بتحب الكل، وعندك دراكس الشخصية الجادة جدا طوال الوقت لدرجة انه مش بيفهم النكت، وفي روكيت الشخصية الغاضبة على طول، وفي جمورا بنت ثانوس الغامضة، وفي جروت الشجرة اللي مش بيقول غير “انا جروت”
الشخصيات المختلفة دول والماضي بتاعهم، وتطور كل شخصية وعلاقتهم ببعض ده افضل ما في اللعبة، تقريبا على طول الشخصيات دي مش بتبطل كلام رغايين فعلا، بس كله كلام في المضون، ده حتى في المواقف الكوميدية تحس انهم بيهزروا فعلا كموقف حقيقي حصل، مش مجرد مهرج بيحاول يضحكك، وطبعا تعليقاتهم ديناميكية جدا، يعني مثلا لو مشيت في طريق غلط تلاقيهم بينبهوك ويتريقوا عليك، او حتى مثلا في القتال بيتكلموا بطريقة حلوة جدا فتحس كأنهم اصدقائك بيلعبوا معاك وداخلين بارتي شات معاك، وفي نفس الوقت في لحظات جادة كتير وكمان مؤثرة
طبعا كأغلب العاب السوبر هيروز فالابطال بيتجعوا عشان يحاربوا الشرير اللي بيحاول يضر العالم كله، وهنا في لعبتنا نفس الكلام بس الفكرة انه مطبق حلو مش مجرد سلق بيض عشان اللعبة تتعمل بسرعة ويستفادوا من اسم العنوان، ورحلة حراس المجرة معمولة باتقان بحيث انها بتعرض ليك دوافع كل شخصية، وليه هي بتعمل كده، وكلهم بيتفاعلوا مع بعض في اطار واحد وهي الرحلة المشتركة بينهم، كمان في شرح خلال مقتنيات بتعرفك كل حاجة بتحصل في العالم
بأختصار شديد، قصة اللعبة عرفت تقدم حكاية اصلية جديدة لعنوان Guardians of the Galaxy بحبكة معمولة باتقان شديد، ممكن العيب الوحيد في الموضوع هو يجب ان تجيد اللغة الانجليزية عشان تفهم كمية الرغي والكلام الكتير، وبالمناسبة في ترجمة عربي، بس اوعى تشغلها، لان دي اسوأ ترجمة شوفتها في حياتي، نص الجمل مش بتترجم، والترجمة بتتأخر وساعات بتعمل جليتش وتفضل موجود، ده غير اصلا الكلام بيترجم غلط، فبجد دي اسوا حاجة في اللعبة

اسلوب اللعب

اكتر حاجة عجبتني في اللعبة انها محاولتش تقلد غيرها، فمثلا لو قولنا ايه هي اشهر لعبة سوبر هيرو فبكل تأكيد هتكون سلسلة Batman Arkham هنلاقي العاب السوبر هيروز اللي جت بعدها بتقلدها زي ما حصل مع لعبة سوني Spider-Man لكن هنا الامر مختلف، انا اتفاجئت لما اكتشفت اللعبة خطية مش عالم مفتوح، كمان بتعمد على اسلوب لعبة ادارة الفريق مع اكشن جنوني خلال اسلوب Crowd Control
في البداية كنت محبط لما عرفت اني هلعب بس بشخصية ستار لورد، وكنت عايز العب بكل شخصية اقطع بسيف جامورا ولا اكسر بعضلات دراكس او افجر بقنابل روكيت او ادمر بأغصان جروت، بس اللعبة عوضت ده بأنهم كلهم بيقاتلوا معاك الكومبيوتر بيتحكم فيهم، مفيش اوبشن لعب اونلاين خالص هنا، بس في نفس اللحظة انت بتقدر تتحكم فيهم عن طريق تخليهم ينفذوا قدراتهم الخاصة دي امتى وفين وعلى مين، القدرات دي لما تتنفذ صح بوكس بمتعة كبيرة اوي وفعلا بتقلب المعركة لصفك
انت بتلعب بستار لورد اللي مزود بمسدسين خارقين بتطلق بهم النار على اعداءك، كما أنه مع الوقت يكتسب قدرات أخرى مثل الكهرباء او الثلج، قدرات مسدساتك مع قدرات باقي أعضاء الفريق بتعمل من خلالهم ميكس كومبو حلو جدا بتخلي القتال اسهل واسرع، فمثلا عن طريق جروت تقدر تخليه يربط ويثبت مجموعة الأعداء في حتة واحدة، بعدها تخلي روكيت يرمي عليهم قنابل بحيث كلهم ياخدوا ضرر، بعد كده تخلي دراكس ينزل ضرب فيهم كلهم
أو تلاقي عدو عليه درع ضعيف ضد الثلج تروح ضاربه بطلقاتك الثلجية، وبعدها تخلي جامورا تنزل عليه بالسيف تموته بضربة واحدة، وعلى فكرة انك عندك شجرة مهارات لشخصية ستار لورد تخليه اقوى بعيدا عن ترقيات السلاح، وشجرة المهارات دي صغير ممكن تفتحها كلها في Playthrough واحد
كمان اللعبة بتقدم خل الغاز بسيطة جدا عن طريق استخدام قدرات اصدقائك، فمثلا كروت ممكن يعمل كوبري، أو دراس يشيل صندوق عشان تطلع أو جامورا تساعدك في القفز وهكذا، بس بصراحة كانت الغاز سهلة اوي ومع الوقت بقت متكررة خلتني اقول ايه الزهق ده، بس مكنش ده العيب الوحيد، لان في كل مهمة قبل ما يبدأ الضرب، كان بيكون في حبة وقت تفضل تمشي فيهم مش بتعمل حاجة بتمشي وكل اللي عليك تسمع محادثات حراس المجرة، حاجة شبه العاب روكستار أو نوتي دوج، كان ممكن يختصروا الوقت ده كله لاني حسيت انه تمطيط ملوش داعي
اللعبة كمان بتحاول تكسر خطية اللعبة عن طريق أنها تقدملك مراحل بتصميم مختلف زي مثلا تقود سفينك الفضائية ميلانو وتطير وتحارب بيها أو مثلا تخش في سباق مع روكيت، أو مرحلة مطلوب منك تهرب وتحري فيها، كل ده حلو بس للاسف مكنش كتير
من الحاجات الجميلة في اللعبة هو كثرة تنوع الأعداء، واللي من خلالهم تخليك مجبر تدرس كل قدراتك وتستخدم بالشكل الصح، لان اللعبة خصوصا على مستويات الصعوبة العالية واللي بننصح بيها بتقدم تحديات صعبة، بس في النفس الوقت مش هتقف ادامك اللعبة طول ما انت بتدير فريقك صح وتستخدم قدراتهم وقدراتك في الوقت المناسب، بس للاسف الحلو مش بيكمل، لان تقريبا في الثلث الأخير من اللعبة مش هتلاقي تجديد في الأعداء، هما نفسهم اللي كنت بتحاربهم، يمكن بسبب وجود نظام قياس مهارتك في مواجهة حاجة كده زي بتاعت Devil May Cry دفعتني مهتمش اوي بالتكرار ده واركز اني اقضي عليهم بطريقة تخليني اخد سكور أعأعل
آخر حاجة هنتكلم عنها في أسلوب اللعب، هو نظام الحوارات، واللي كان معمول حلو اوي، لا هو عميق جدا زي العاب الRPG ولا هو خفيف بسيط، ولكنه مناسب جدا، لان في قرارات بتاخدها بتشوفها تأثيرها على المدى القريب والبعيد، وفي قرارات بتغير في تصميم المرحلة، مش هتلاقي مثلا القصة بتتغير في الاخر حسب اختياراتك، لا هي مش كده بس الفكرة أن ممكن مثلا تنهي مواجهة بالحوار أو المرحلة تبقى تخفي بدل ما تبقى ما تبقى صعبة برده باختيارتك. كمان في سفينة ميلانة بتلاقي أعضاء الفريق موجودين بيعملوا حاجات عشان تحس انهم أشخاص حقيقية، وينفع تروح تكلمهم وتحسن علاقتك معاهم قبل كل معركة

الأداء التقني

كلمة مبهر دي حاجة قليلة ممكن تتقال على جمال الرسوميات في اللعبة، بجد اعلانات اللعبة ظلمتها جامد، لان الجرافيكس من تفاصيل وإضاءة كان رهيب، التوجه الفني برده كان ممتاز، على الرغم أن أغلب المراحل بتقدم بيئات صناعية بس كل بيئة مختلفة بسبب انها على كوكب مختلف، وبتشوف مناظر واشكال تحسسك فعلا انك في مكان مختلف وشكله جميل في نفس الوقت
حركة الشفايف والوجوه كانت عظيمة وبتخليك تندمج اكتر، وطاقم فريق التمثيل اصلا أدى دوره بطريقة ممتازة، وطبعا مع كل الجمال ده موجود نظام تصوير تحفة الحقيقة وبيقدم اختيارات كتيرة
وكله كوم والأصوات والمازيكا في اللعبة كوم تاني، اللعبة بتقدم مجموعة من اغاني السبعينات زي الروك والبوب والميتال كان عظيم وبيديك حماس رهيب في المعركة، طبعا كان في موسيقى خاصة للعبة وبرده كانت عظيمة، واحلى حاجة انك تقدر تشغل ملوال playlist بتاعت كل اغاني اللعبة في سفينتك الفضائيه ميلانو وتعد وتستمتع
 

الحكم النهائي

لعبة Guardians of the Galaxy كانت اكبر مفاجآة ليا السنادي، الدعايا والتسويق من شركة سكوير انكس ظلمتها ظلم بين، لان اللعبة حقيقي ممتعة ولازم تتلعب سواء كنت ليك في السوبر هيروز أو لأ

التقييم النهائي 8/10