مراجعات

مراجعة Ghost Of Tsushima Director’s Cut

Ghost Of Tsushima هي لعبة السنة بالنسبة ليا في 2020، وكنت أكتر المتحمسين للإضافة الجديدة بتاعة IKI Island لما تم الإعلان عنها. ده معناه إني من المُستبعد إني أخرج من التجربة وأنا غير راضي عنها صح؟ الحقيقة أنا خرجت من التجربة محبط لكن ده مش لإن الاستوديو قصر مع اللعبة أو إن الإضافة وحشة أو اللعبة فيها مشاكل تقنية كتير. ده ببساطة لإن نظام التسعير بتاع الإضافة وسياسات سوني هدفها الفلوس بس! خلينا الأول نتكلم عن الإضافة والترقية وفي الآخر هنتكلم عن سبب إحباطي ده.
الإضافة بتدور احداثها بعد أحداث الفصل الأول من قصة اللعبة، يعني أثناء غزو المغول لليابان، ولكن المرة دي الخطر مختلف شوية. جزيرة إيكي عاملة زي جزيرة ناساو في عصر القراصنة الذهبي، جزيرة غير خاضعة تمامًا لسيطرة الحكومة المركزية الحاكمة لليابان، وبالتالي هي مهملة، وغير متحضرة، وبتشكل ملجأ وملاذ لكل المجرمين وقطاع الطرق، والهاربين من أحكام الأعدام. كل دول بتحكمهم زعيمة غامضة إسمها الإيجل (Eagle).

جين ساكاي (بطل اللعبة) بيسمع عن الخطر ده، وبيقرر يسافر لجزيرة إيكي ويوقف الخطر ده قبل ما يوصل جزيرة تسوشيما نفسها. القصة كسرد وأحداث، وتشويق فلحسن الحظ هي ماشية علي خطي اللعبة الأساسية. وتعتبر الإضافة دي من اكتر الإضافات اللي لعبتها في حياتي اللي جودتها القصصية قريبة جدًا من اللعبة الأساسية. زي مثلًا إضافة Burial At Sea في لعبة Bioshock أو left behind في the last of us 1.
القصة مليانة لحظات درامية مؤثرة، ولحظات أكشن، وشخصيات مثيرة للاهتمام، مهمات متصممة بشكل حلو، وهنا خلينا نتكلم عن الجيم بلاي شوية.
الإضافات مدراس، منها اللي بيقدم شيء جديد يغير فيه النمط اللي كان موجود في اللعبة الأساسية، ومثال علي كده إضافة حصار باريس الخاصة بأساسينز كريد فالهالا اللي قدمت مهمات اغتيال مفتوحة واللي ماكنتش موجودة في اللعبة الاساسية.
والنوع التاني، هو الإضافة اللي بتقدملك More of the same، ودي المدرسة اللي بتمشي عليها أغلب الإضافات اليومين دول. شرط إنك تحب إضافة من النوع ده إنك تكون حبيت اللعبة الأساسية، وبما إني حبيت اللعبة الأساسية، فأنا حبيت إضافة Iki island، لإنها بتقدملي المزيد من الجيم بلاي، بمزيد من الترقيات والاسلحة والأعداء، في القالب أو العالم اللي وقعت في حبه بشده. لكن خلي بالك، ده معناه إن الجديد في الجيم بلاي مش كتير، وهنا نسأل هل الإضافة دي تستحق سعر 20 دولار؟ هسيبلك إنت الحكم عليها.
بما إن جزيرة إيكي جزيرة مافيهاش مدن كبيرة بسبب طبيعتها الخارجة عن القانون، فالبيئات فيها اختلاف بشكل ملحوظ عن اللعبة الأساسية، أغلبها غابات وبيئات برية لكن علي قد ما ده بيديك تغير بصري باين في كل ركن، لكن بيديك برضو أماكن
أقل لاستكشافها.

إيه الجديد في الجيم بلاي؟

1-نوعين جداد من الأعداء
النوع الأول لو شافك بيفضل يغني كده ويصيح ويلم الناس عليك حرفيًا، وده بيخلي الجنود اللي حواليه يتحمسوا ويبقوا أعنف وأقوي، وحياتهم تبقي أطول. يعيني الوقت اللي هتاخده في قتالهم هيبقي أطول.
النوع التاني هو عدو بيقدر يغير من الأسلحة اللي معاه، وبالتالي بيجبرك تغير الstances بتاعتك كل شوية. النوعين كانوا تغير مرحب بيه جدًا، وفعلًا أضافوا بعد وتحدي جديد للمعارك اللي أصلا ماكنشت سهلة إطلاقًا، وبالتالي الجيم بلاي اتحسن في جانب المعارك. خصوصًا إن دلوقتي إنت ممكن تخش المعركة بالحصان بتاعك وتموت بيه الأعداء، ودي كانت أكتر نقطة حسنت من الكومبات كتير.

2-مهارات جديدة ممكن تتعلمها ونظام سمعة بيبدأ من الصفر
نظام السمعة هنا بيبدأ معاك من الصفر زي بداية اللعبة الأساسية، حتي لو إنت مخلص القصة. وفي مهارات جديدة شجرة المهارات تقدر تشتريها بالنقط اللي هتكسبها مع إداء المهمات والمجتوي الجانبي. وجود نظام ترقية مستمر شيء مهم عشان يحسسك إن شخصيتك لسا ممكن تتطور، ويخليك حاسس بقرق في بداية تجربتك عن أخرها.
3-تغيير علي النشاطات الجانبية القديمة، وتقديم شوية نشاطات جديدة
النشاطات الجانبية زي التدريب بالسيف علي اعواد البامبو، وتأليف الشعر، ونبوع الميا لسا موجودة، ولكن تم إضافة نشاطات جانبية شبهها لكن جديدة. زي تحدي السيوف، ودي بتبقي زي fight club كده بس بالسيوف الخشبية مع ناس من سكان المدينة المحلين، وتحدي القوس والسهم، وده بتاخد نقط اكتر فيه كل ما تنشن صح إلخ. وفي كمان نشاط جانبي بيخليك تعزف للحيوانات البرية وتجمعهم في مكان وتحوله لملاذ ليهم، وساعات كل المهمات دي بيبقي فيها مفاجأة او شيء غير متوقع، زي مهمات العزف للحيوانات دي ممكن تلاقي المغول عاملينلك في المكان كمين مثلًا، أو الأبراج اللي المفروض تقتل المغول اللي فيها تكون مهجورة، وتبقي مجرد تحدي platforming بسيط. يعين في تغير كل فترة كده عالماشي.

اللعبة فيها 9 مهمات أساسية، و7 مهمات فرعية خاصة بالشخصيات الجانبية، و 2 Mystic Tales أو أساطير، وده نوع رائع من المهمات كان موجود في اللعبة الأساسية بتتبع في اسطورة محلية لسكان الجزيرة، وبتلاقي في أخرها جايزة بتكون علي هيئة سلاح أو درع.

محتوي الإضافة بشكل عام خلاني أخرج مبسوط علي الرغم من إنها إضافة بعشرين دولار، وخلصت معايا القصة في 3 ساعات، والمهمات الجانبية كلها في 3 ساعات ونص وفي إضافات تانية بتقدم عمر أكبر من كده، وبسعر أقل.

الترقية الرسومية والتقنية:

إضافة إيكي بتيجي ضمن نسخة اسمها نسخة المخرج من اللعبة، واللي أصبحت زي موضة سوني متبعاها حاليًا، وهتحصل مع death stranding و في إشاعات بتقول إن في نسخة زي دي منHellblade كمان.

الحقيقة الترقية التقنية هنا علي بلايستيشن 4 تكاد تكون منعدمة،لكن علي الفايف الموضوع أحسن شوية، النسخة دي بتوصل بمعدل الإطارات ل60 إطار في الثانية بدل 30، والجودة بتترفع ل4K، ده غير إن الLoading Screens بتبقي شبه منعدمة، أو بمعني أصح الواحدة بتاخد 3-5 ثواني بالظبط.تم برضو تعديل التزامن الشفهي (Lip SYnc) بشكل ملحوظ عن وقت الإصدار عشان يحسنوا من التجربة سينيمائيًا والحقيقة علي الرغم من تقديري لل4k جدًا إلا إن دي كانت أحد أهم الإضافات في النسخة الجديدة بالنسبة لي

التحسين البصري رائع علي الجيل الجديد لكن بيرجعنا هنا لمشكلة التسعير. لو أنت عايز تلعب اللعبة الاساسية بس، فهي إتشالت من الستور الخاص بسوني وحاليًا مفيش غير النسخة الجديدة دي بسعر كامل 70 دولار، ولو عايز ترقي نسختك العادية علي الفور للنسخة الجديدة هتدفع 20 دولار، و20 تانين للإضافة، ولو عايز تنقل النسخة الأبجريد دي للفايف بقي لما تجيبه هتدفع 20 كمان! مبالغ كبيرة شوية علي حجم الترقية المتقدمة، في ظل غن ألعاب عظيمة بتقدم ترقياتها بشكل مجاني زي Metro Exodus و Bloodborne وأساسينز كريد فالهالا.

علي البلايستيشن 5 :

اللعبة بتستغل السماعات اللي في الدراع، وخاصية الHaptic Feedback والadaptive triggers بشكل ممتاز، لكن ماوصلش للامتياز بتاع لعبة returnal.
السيوف لما بتخبط في بعضها بتعكس الاصطدام ده في الدراع، وبيخرج الصوت من سماعات الدراع نفسه مش الhead set، اللعبة كمان فيها أجزاء فيها فلاشباك فالأجزاء دي بيبقي فيها أصوات في دماغك، وبرضو أصواتهم بتطلع من السماعات.
الAdaptive Triggers بتبان مع استخدام سلاح القوس والسهم.

في النهاية:

لعبة Ghost Of Tsushima وإضافتها متقدمين بجودة خرافية، وحاجة من الحاجات اللي تخليك تحب صناعة الألعاب كونها نوع من انواع الفن. اللعبة الاساسية بالنسبالي كانت 10 من 10، قصة وشخصيات وعالم، وموسيقي، وجرافيكس، حقيقي تحفة فنية متكاملة. لوحة فنية بدرجات مختلفة من الوان الجمال والإبداع، لكن مشكلتي مع الإضافة والترقية في تدخل سوني، وتسعيرتها المبالغ فيها. يبدو لي إن في إتجاه عام من سوني في توفير محتويات إضافية علي الجيل الجديد لألعابها الناجحة علي الجيل السابق عشان يعوضوا عدم وجود حصريات (بعد تأجيل هورايزن وGOW) السنة دي. ومش بعيد نشوف إضافة جديدة لحصرية من الحصريات في الشهور الجاية.

بالنسبالي، الإضافة لوحدها تستاهل 20 دولار نظرًا لجودتها، واللعبة ككل ممكن يتدفع فيها 70 دولار علي الجيل الجديد لو إنت أول مرة هتلعبها. لكن أسعار الترقية من النسخة العادية للكاملة وبعدها للجيل الجديد شيء سيء، وفي ألعاب ممتازة قدمته ببلاش أصلًا، وعشان كده هسيب الحكم النهائي ليك، بعد ما عرفتك سلبيات وإيجابيات تجربتي، لو معاك اللعبة الأساسية علي الفور، أنصحك بشدة تجيب الإضافة. ولو معاك بلايستيشن 5 وملعبتش اللعبة بنصحك تلعبها بالنسخة الجديدة.

 

الإيجابيات: 
1-مزيد من المحتوي الدسم والممتع من لعبة عظيمة
2-تحسين رسومي جيد ومعدل إطارات ثابت
3- أداء خرافي علي البلايستيشن 5
4- استغلال دراع التحكم بشكل ممتاز

:السلبيات
1-تسعير مبالغ فيه
2-الإضافة قصيرة

 

 التقييم النهائي: 8.5/10

 

Mostafa Argoun

About Mostafa Argoun

محرر في مجال الألعاب منذ عام 2012 بعتبر الألعاب فن، وبحب ألعاب القصة والأر بي جي بشكل رئيسي