Articles, News, Reviews

مراجعة DOOM Eternal: The Ancient Gods – Part One

blank

تجربة DOOM Eternal كانت واحدة من أحلى المفاجآت في 2020، تجربة مثالية مفيهاش غلطة من ناحية القصة وأسلوب اللعبة والجرافيك والأداء، إستوديو id Software موقفش عند كدة بل قرر إنه ينزلنا إضافة للعبة تحت عنوان The Ancient Gods Part 1 والنهاردة احنا هنشوف الإضافة ديه بتقدم ايه زيادة عن اللعبة الأساسية. لو مقرأتش مراجعتنا الأساسية للعبة DOOM Eternal فننصحك تقرأها قبل ما تقرأ مراجعة الإضافة عشان تعرف حاجات اكتر عن اللعبة. تقدر تقرأها من هنا.

قصة The Ancient Gods Part One بتكمل بعد قصة DOOM Eternal على طول، في قصة اللعبة الأساسية انت قدرت تقضي على الـ Icon of Sin وتنقي جزء كبير من الأرض من وجود الشياطين ولكن عشان تعمل كدة انت كسرت الختم الي كان موجود بين الجحيم والجنة الي هي Urdak. هدفك في Anicent Gods هو انك تصحي ملاك الـ Seraphim مرة تانية لأنه هيساعدك في حل كل المشاكل ديه.

blank

زي DOOM Eternal نفسها فا قصة The Ancient Gods بتتقدم عن طريق مجموعة من المشاهد السينمائية ولكن التركيز الرئيسي على القصة بيكون في الـ Codex الي تقدر تقرأها وتفهم اكتر الي بيحصل حواليك في اللعبة. الإضافة مش طويلة، هتاخد منك بين 4 لـ 5 ساعات عشان تخلصها، هو الوقت مش قليل بس شخصياً كنت اتمنى انه يكون أطول من كدة.

القصة فيها مجموعة Plot Twists رهيبة وهتسيبك في الاخر على Cliffhanger كدة هتخليك متحمس تعرف ايه الي هيحصل في Ancient Gods Part 2.

إضافة The Ancient Gods بتقدملك 3 مراحل رئيسية جديدة تقدر في القصة كل مرحلة ليها طابع خاص وأسلوب لعب مميز، في واحدة من المراحل كانت بتعتمد بشكل اساسي على حل الالغاز والباركور وفي مرحلة تانية كنت بتقيضها كلها قتل في كل الشياطين الي قدامك وبس، تنوع حلو في المراحل الجديدة وبيقدموا رسوميات مبتكرة على سلسلة DOOM.

blank

الإضافة بتقدملك 3 شياطين جدد، الشيطان الأول وده كان موجود في DOOM 2016 وهو Spirit، الشيطان بيقدر انه يخش في جسد الشياطين التانية ويديهم قوة ومستوى حياة مرتفع جداً، لازم تقتل الشيطان ده بسرعة قبل ما يخش في جسد شيطان تاني عشان تقدر تحمي نفسك.

كمان في شيطان جديد بإسم Turret  وهو عبارة عن عين صغيرة كدة بتقدر تقتلها بأسلحة معينة، هي بس هدفها انها تبوظ عليك متعة اللعبة وبتغلس كدة فا لازم تخلص منها بسرعة. اخر شيطان بقى هو Blood Maykr وده أصعب بكتير من الـ Maykrs العاديين وبياخد وقت عشان تقتله أو Headshot واحدة في رأسه بس.

إضافة The Ancient Gods أصعب بكتير من اللعبة الرئيسية ومستوى المراحل الي فيها محتاج منك تركيز على كل حركة انت هتاخدها لأن غلطة واحدة هتخسرك حياتك. كمان الشياطين بقوا بيظهروا بكمية أكبر ورا بعض وده هيخليك تحافظ على الموارد الي معاك.

الإضافة بتقدم Boss Fight واحد ومش هتكلم عنه عشان محرقش المفاجأة بس الـ Boss Fight ده هو الأصعب في سلسلة DOOM وبيستخدم كل حاجة اتقدم في الإضافة ضدك، لو انت متعود على أسلوب لعب Eternal وبتعيد في اللعبة دايماً فا هو مش هيكون عائق قدامك وهتقدر تموته بسرعة.

blank

زي اللعبة الاساسية فإضافة The Ancient Gods مبنية على محرك id tech 7 وكالعادة المحرك بيقدم رسومات ومجموعة تفاصيل مبهرة للعين، الـ 3 مراحل الجديدة فيهم تفاصيل مميزة وكل مرحلة بتختلف عن الاخرى وبيختلفوا عن اي حاجة اتقدمت سابقاً في اي جزء من DOOM.

الأداء التقني ممتاز واللعبة شغالة ثابتة على 60 فريم في الثانية على دقة 1080p، الكلام ده من تجربتي للعبة على جهاز PlayStation 4 Slim.

لو مش متابع الأخبار خلال الفترة الي فاتت فأحب اقولك ان الملحن Mick Gordon مش هو الي اشتغل على الإضافة بل اشتغل عليها ملحنين اتنين جداد وهما Andrew Hulshult و David Levy، الملحنين قدروا يستوعبوا الي قدموا Mick Gordon في جزء 2016 و Eternal وهما الاتنين قدموا موسيقى تصويرية رائعة تليق بإسم DOOM ومتحمس اشوف مستقبلهم مع الإضافة وباقي أجزاء السلسلة.

blank

الخلاصة :

إضافة DOOM Eternal The Ancient Gods Part 1 هي رسالة لكل المطورين الي بيعملوا إضافات للألعاب ومن وجهة نظري لازم يتعلموا من الجمال الي قدمته، الإضافة قدرت تاخد كل حاجة قدمتها اللعبة الأساسية ورفعتها لمستوى تاني من العظمة والصعوبة، الإضافة قدرت تكمل القصة بشكل مميز وسابتك في الاخر متحمس عشان تعرف ايه الي هيحصل في الجزء التاني منها. او انت واحد من الناس الي عجبتهم DOOM Eternal فا لازم تشتري الإضافة ديه فوراً.

سعر الإضافة هو 20 دولار لو قررت تشتريها بشكل مستقل بس تقدر تشتري الـ Season Pass وده بيضم الإضافة الأولى والتانية لما تنزل طبعاً وسعره 30 دولار فأنت كدة هتكون وفرت 10 دولار. لحد دلوقتي مفيش ميعاد إصدار للإضافة التانية بس نتوقع أنه هيكون في النصف الأول من 2021.

التقييم النهائي : 9.5/10

Ahmed Yousry

About Ahmed Yousry

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.