لعبة Biomutant كانت واحدة من الألعاب الي اتحمستلها بشكل كبير جداً من أول إستعراض نزل ليها في 2017، حطيت آمال كبيرة على إستوديو Experiment 101 إنه يقدملنا تجربة مميزة ومختلفة خاصةً إن شركة THQ Nordic هي الي دعمت الإستوديو ونشرت اللعبة، ولكن للأسف الإستوديو يعتبر نجح وفشل في نفس الوقت بتقديم تجربة غريبة ومش مفهومة !
قصة Biomutant بتتكلم عن إن العالم اتدمر والبشر انقرضوا ومبقاش عايش فيه غير مجموعة من الكائنات المتحولة والمخلوقات الغريبة، العالم كله مُهدد بالإنقراض بسبب 5 وحوش بيهاجموا شجرة الحياة وهدفك في اللعبة إنك تقضي على الوحوش ديه قبل ما يدمروا الشجرة وفي نفس الوقت اللعبة فيها قصة إنتقام خفيفة كدة من الكائن الي قتل عائلة البطل الي بتلعب بيه والي هو واحد من المخلوقات الغريبة الي فضلت عايشة على كوكب الأرض.
القصة مش كبيرة، لو ركزت على القصة نفسها بشكل أساسي فا هي هتاخد منك في حدود الـ 10 ساعات تقريباً ولو قررت تنهي مجموعة من المهام الجانبية فالتجربة ممكن توصل معاك لـ 15 أو 20 ساعة وديه أقل بكتير من الإستوديو ذكره لإن الإستوديو قال إن اللعبة ممكن توصل لـ 60 ساعة وديه حاجة انا شايفها مستحيلة إلا لو الي بيلعب كان سلحفة.
واحدة من مشاكل اللعبة الأساسية هي طريقة عرض القصة، شخصيات اللعبة كلها بتتكلم بلغات غير مفهومة وديه حاجة مش وحشة لإن كان ممكن كلامهم يتترجم وخلاص، لا انت بتكون مضطر إنك تسمع قصة اللعبة عن طريق الراوي الي بيحكيلك كل تفصيلة في العالم وكمان بيترجم كلام كل الشخصيات. خلينا نسيب النقطة ديه لما نيجي لكلامنا على الحوارات والأصوات في اللعبة عشان اوضحها بشكل اكبر.
Biomutant هي لعبة عالم مفتوح والعالم فعلاً كبير، بس المشكلة انه كبير زيادة عن اللزوم، العالم مليان اماكن كتير حلوة وتحب تستشكف فيها وتاخد صور مميزة بالـ Photo Mode ولكنه عالم فارغ، مفيهوش اي حاجة مميزة بتحصل حواليك ومفيش Npcs كتير هتقابلهم.
نظام الإستكشاف في اللعبة عبارة عن إنك بتروح مكان وتدور في كوم من القمامة أو في صناديق على حاجات وتاخدها، بس كدة خلاص، اللعبة كمان بتقدم ألغاز ولكنها أتفه ألغاز شوفتها في حياتي وبتطلب منك انك تخلي الالوان شبه بعض وخلاص، مفيهاش تفكير ومفيهاش عواقب بتأثر عليك على المدى البعيد لو غلطت ولا اي حاجة، هي موجودة عشان تعوق تقدمك لمدة كام ثانية لحد ما تخلص حل اللغز.
نيجي بقى للحاجة الحلوة الي بتقدمهالك Biomutant وهي نظام المواجهات، اللعبة بتدمج عناصر كتير في بعض زي إنها بتقدم تجربة Hack and Slash ولكنها في نفس الوقت تجربة Shooter كمان مع وجود عناصر RPG. اللعبة فيها ترسانة أسلحة كبيرة، على الاقل هتلاقي 5 أسلحة Melee زي سيف وايد حديدية، ده غير كمان الأسلحة بعيدة المدى زي البنادق والمسدسات. كل سلاح منهم هيفيدك في المواجهات بس انت ممكن من اول اللعبة لأخرها تستخدم نفس السلاح و خلاص وهتعرف تخلص كل المهمات فا وجود الكم ده من الاسلحة مش مفيد ليك بأي شكل.
في بداية اللعبة هتصمم شخصيتك والي بتقدر تظبط شكلها ولونها وكمان قدراتها الأولية زي الذكاء ومدى تحملها مثلاً للحرارة والتلوث وغيرها من الأخطار الطبيعية الموجودة في البيئة، إستكشافك في اللعبة وبحثك عن الموارد هيخليك تزود من مستواك وبكدة هتقدر تعلي من صحتك وقدرتك على المقاومة والركض بسرعة أكبار، كمان بتلاقي نقاط ذكاء بتقدر تفتح منها قدرات مختلفة بتساعدك في المواجهات زي إنك تعمل Dash سريع أو تصيب الاعداء بالنار والتلوث.
لما تقرأ الي انا قولته عن نظام المواجهات هتحس إنه فعلاً بيقدم تجربة مميزة ولكن للأسف ديه مش الحقيقة لإن الأعداء الي بتواجههم هما أكتر اعداء مملين في الكون. على الرغم من إن تصميم الأعداء مختلف ومميز ( هتكلم عن النقطة ديه اكتر كمان شوية ) إلا إنهم بيعانوا من التكرار والتشابه الكبير، بإختصار انت هتتعود على اسلوب مواجهات واحد وهتفضل تستخدمه في اللعبة من أولها لأخرها وده هيزود من الملل.
قيس على كدة كل حاجة في عالم ومهمات اللعبة، اللعبة بتتقسم لمهمات Fetch Quests أو الهجوم على مقر للأعداء أو مواجهة الزعماء، مواجهة الزعماء هي اكتر حاجة هتحسسك بالمتعة لإنهم بيقدموا تجربة صعبة نسبياً وكمان كل زعيم منهم له أسلوب مواجهة خاص ومميز. اللعبة فيها مجموعة كبيرة من القبائل ولما تتحد مع قبيلة مُعينة هتقدر تستخدم الإتحاد ده بإنك تهاجم على قبائل تانية وتستحوذ عليها وتقتل زعمائها أو انك تراضيهم بشكل طيب وتخليهم ينضموا ليك ويبقوا تحت سيطرتك.
اللعبة فيها Moral System وهو إن النهاية هتتأثر بأفعالك في اللعبة، لو عملت أفعال كتير مظلمة هتكون متجه أكتر لجانب الشر والظلام ولو عملت أفعال كتير طيبة هتتجه أكتر لجانب النور. الفكرة لذيذة ومعمولة بشكل حلو وفعلاً بتأثر على النهاية لإن اللعبة ليها نهايتين مختلفتين تماماً عن بعض على حسب توجهك لأنهي جانب منهم.
اللعبة بتستخدم محرك Unreal Engine 4 والرسومات هتشدك من أول نظرة، اللعبة بتاخد طابع كرتوني للرسومات وهتحس انه قريب من Fortnite شوية وديه حاجة مش وحشة إطلاقاً لإنها بتدي لـ Biomutant شكل مميز وطابع خاص بيها. تصميم البيئات المُنوعة ممتاز وتصميم الأعداء مختلف وبيخلي كل قبيلة وكل وحش هتقابله يظهر بشكل مميز وفريد من نوعه.
على الرغم من إن العالم هتحسه انه ممتاز رسومياً إلا انه مفيهوش تفاصيل، هتيجي تقرب من الحوائط والأرضيات هتلاقي ان الـ Textures ضعيفة جداً وبيحصل Pop in كتير. كمان الإستوديو اهتم اكتر بتصميم العالم الخارجي ونسى انه عامل كهوف ومهام تحت الأرض والي محصلتش على نفس الإهتمام ده عشان كدة في تفاوت ملحوظ في مستوى اللعبة الرسومي.
زي ما وضحت في كلامي عن القصة فاللعبة يعتبر مفيهاش تمثيل صوتي، كل الشخصيات المتواجدة في عالم اللعبة بتتكلم بلغات غير مفهومة والراوي الإنجليزي بيترجملك الكلام، خليني اقولكم ان الراجل ده هو اكتر حاجة مزعجة في اللعبة ولو الإستوديو معهوش ميزانية إنه يجيب ممثلين صوتيين كان ممكن يخلي الشخصيات تتكلم بالطريقة الغير مفهومة ديه ويحط ترجمة وخلاص بدل ما اكون مضطر اني افضل اسمع الحوارات مرتين عشان احاول افهم القصة. الموضوع ده كمان مخلي ان الشخصيات ملهاش شخصية بالمعنى الحرفي وكل NPC هتحسه شبه التاني بالظبط !
