Articles, News, Reviews

مراجعة سريعة للعبة Twelve Minutes

أنا مش من عشاق ألعاب الـ Point and Click بس لما اتعلن عن لعبة 12 Minutes اتحمستلها جدًا. فكرة الـ Time loop واعادة الوقت اتقدمت في ألعاب وافلام كتير قبل كدة بس حسيت ان 12 Minutes هتقدم حاجة مميزة خاصةً مع وجود طاقم تمثيل زي James McAvoy و Daisy Ridley وطبعًا الأعظم Williem Dafoe. وبصراحة اللعبة فاجئتني جدًا وفي خلال دقايق بسيطة هحاول اقولكم ليه المفروض تجربوا اللعبة ديه في أسرع وقت.

قصة اللعبة بتتكلم عن زوج بيرجع بيته من شغله وبيلاقي مراته مجهزاله أكلة حلوة في ليلة واضح انها هتكون ليلة سعيدة عليهم. الزوجة بتنقله خبر انها حامل وبيكونوا فرحانين وبيرقصوا، ولكن السعادة ديه بتتقطع لما يجي ظابط بوليس بيتهم الزوجة بانها قتلت أبوها. في محاولة لتوضيح ان ده مش حقيقة الزوج بيموت ومن هنا بتبدأ اللعبة تعيد نفسها من الأول، كل الشخصيات بتبقى كأنها لسة بتعيش الموقف لأول مرة ما عدا الزوج الي بيحس بكل موتة وكل بداية للحلقة الزمنية الي مش بتنتهي.

قصة اللعبة تقدر تخلصها في حدود 4 أو 5 ساعات تقريبًا بس لازم تبقى عارف انك كل 12 دقيقة هتعيد كل المواقف من أولها. في كل 12 دقيقة هتعيشها في الحلقة الزمنية هتحاول انك تجمع أدلة أكتر عشان تفهم ايه الي بيحصل، وازاي تخرج من الحلقة الزمنية الغير منتهية ديه.

قصة اللعبة ممتازة جدًا وفيها شوية Plot Twists حلوة في الاخر هتخليك قاعد مندهش من كم التفاصيل الي قدمها مُطور اللعبة Luis Antonio.

أسلوب اللعب مش بيقدملك كتير، اللعبة كلها بتعتمد على انك تشاور على مكان في الشاشة وتضغط عليه عشان تخلي الشخصية تتحرك أو تمسك حاجات بإيدك.

الموضوع هيحتاج منك شوية تعود في الأول بس هتلاقيه أسهل مع كل اعادة للحلقة الزمنية. فكرة استكشاف الادلة ومعرفة تفاصيل أكثر عن القصة عن طريق الجيم بلاي متصممة بشكل كويس جدًا وحقيقي طريقة العرض في اللعبة ديه اتقدمت بشكل يخليك متحمس انك تعيد اللعبة تاني على الرغم من انك هتحس بملل في بعض الأوقات.

اللعبة مفيهاش تركيز كبير أوي على انها تطلع البيئات بأفضل شكل ممكن ولكنها لا تزال ليها طابع رسومي قوي. بيتم استعراض كل أحداث اللعبة من كاميرا علوية وديه بتساعدك اكتر في التنقل عن طريق المشاورة على المكان زي ما ذكرت في كلامي عن أسلوب اللعب.

نيجي للنقطة الأكثر أهمية في اللعبة من وجهة نظري وهي التمثيل الصوتي والموسيقى. حقيقي مبتكر اللعبة قدر يختار cast ممثلين محترم جدًا ومشهور في أفلام كتير اتفرجنا عليها خلال السنين الي فاتت. طاقم الممثلين ده هو الي مدي قصة اللعبة قوة، فعلاً معنديش تعليق اقوله على الممثلين غير انهم ناس عظيمة نقلوا كمية مشاعر عملاقة خلال ساعات لعب قليلة.

الموسيقى التصويرية كمان كانت مميزة وفيها طابع الغموض، تحس انك بتلعب لعبة جرايم وتحقيق، ولو فكرنا فيها، فأنت فعلاً بتحقق في كل حاجة في اللعبة خلال الفترة الي هتقضيها فيها.

في النهاية، لعبة 12 Minutes هي تجربة مختلفة بتقدملك قصة قوية وشيقة بممثلين عظماء بيطلعوا مشاعر خرافية هتحسها في كل لحظة في اللعبة. على الرغم من انك احيانًا هتحس بملل فعلاً في بعض الاوقات، ولكن بشكل عام اللعبة بتقدملك نهاية تستحق كل ساعة هتقضيها فيها لأنك هتحس بصدمة لما توصل لشاشة الأسامي في الأخر.

ديه كانت نهاية مراجعتنا السريعة للعبة 12 Minutes، بنفكرك ان اللعبة مش لازم تشتريها وتقدر تاخدها ضمن اشتراكك في خدمة Xbox Game Pass على الـ PC والكونسول.

التقييم النهائي : 8/10

Ahmed Yousry

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.