عن الألعاب, مقالات

ليه متعلنش عن أسعار الجيل الجديد لحد دلوقتي مين مستني مين ؟؟

blank

في أغرب إطلاق لأي جيل الحقيقة علي حسب اللي عاصرته وعلي حسب اللي سمعته فالجيل التاسع اللي هو الجيل الجديد وعليكم خير هو اغرب إطلاق لجيل العاب لحد دلوقتي!

فتخيلوا عدينا النص الثاني من اغسطس وداخلين تقريبا علي موسم الاعياد الغربي وفاضل خلاص اقل من 3 شهور علي إصدار الجهازين وما زالت كل الأنباء متكتمة علي السعر سواء من سوني او مايكروسوفت فإيه اللي بيحصل ومين اللي مستني التاني يعلن الاول ؟

بس خلونا في الأول نعرف هل فعلا السعر عامل مهم في حسم شراء الجهاز من المستهلكين وتفضيله علي الجهاز التاني حتي لو كان أفضل منه في جوانب تانية..
انا شايف هو اه ولا في نفس الوقت 😃

يعني مثلا هو مش هيفرق اوي مع الناس الهاردكور أو المتابعة بمعني اصح اللي عايزة تجيب جهاز عشان لعبة حصرية معينة عليه أو عشان أداءه أو فيه مميزات أفضل وخلافه. ولكن من الناحية التانية فالشركات عموما بتبص للزباين العادية او اللي بنسميهم “الكاجولز” اللي بيبقوا عايزين مثلا يلعبوا فيفا او كول اوف ديوتي الجديدة علي جهاز جيل جديد بأقل سعر ويشتري معاه لعبة لعبتين وشكرا علي كده لا يهمه مميزات ولا عيوب وفعلا في ناس كتير كده في كل مناطق العالم.

فلو جينا نبص مثلا علي الجيل ده كان الاكسبوكس ون أغلي ب100 دولار من البلاي 4 فهل ده معناه انه مكانش بيتباع.. لا كان بيبيع بس مش بنفس وتيرة المنافس البلاي 4 لان الجهازين كان عليهم العاب كتير مشتركة ومكنش لسه في حصريات قوية ظهرت بشكل كبير فكان العامل الأساسي في تفوقهم علي بعض وقتها كانت ال 100 دولار دي بدون شك وبعدها بفترة مايكروسوفت رخصت السعر مع إلغاء الكينيكت الإجباري لكن بعد فوات الأوان..
برده الجيل اللي قبليه ال ps3 غير انه نزل متأخر كان اغلي من المنافس وكان ب600 دولار بحالهم الجهاز في اخر الجيل تفوق علي الاكسبوكس 360 بفارق 2 مليون تقريبا زيادة في المبيعات .. لكن لو جينا نبص في البداية فكانت وتيرة المبيعات اضعف بكتير من المنافس وغير انها كانت بتسبب خسارة كبيرة لسوني مع انتاج كل جهاز وكانت بشكل كبير هتؤدي الي افلاسها.
لو رجعنا شوية وبصينا علي جيل ال ps1 غير دعم الالعاب الكبير اللي حصل عليه لكن سعر الجهاز كان في متناول الجميع وكان ارخص من المنافس الرئيسي سيجا لأن نينتندو نزلت جهازها نينتندو 64 بعديه بسنة والجهاز نجح انه يوصل ل100 مليون وحدة مباعة منه بسهولة وكانت وتيرة مبيعاته طوال دورة حياته سلسة جدا ومتفوقة بأشواط كبيرة عن المنافسين.

فنستفيد من ده كله إن عامل السعر سواء كان بطريقة نسبية أو فرضية فهو أهم عامل تسويقي بلا شك وهيظل علي نفس الحال مهما نزلت اجيال جديدة.

لو هنتكلم عن سبب تكتم الشركتين لحد دلوقتي فانا اشوف سوني ما زلت بتدرس خطة السعر بشكل كويس قبل الإعلان الرسمي واللي اتوقع انه هيكون اخر شهر اغسطس ده خصوصا انها هتقدم جهاز واحد بشكل تقليدي عكس مايكروسوفت اللي في تأكيدات عدت مرحلة الاشاعات إن في جهاز تاني إقتصادي هتقدمه الشركة للجيل الجديد بجانب Series X اسمه بشكل كبير هيكون Series S وتسعيرته بشكل مؤكد هتكون في متناول الجميع يعني بنتكلم في 400 دولار وما تحته.

فلو بصينا لمايكروسوفت فهي جاهزة ومستعدة وهي كمان صرحت بكده من فترة بس برده ما زالت مستنية سوني تسعر الاول لان مايكروسوفت معندهاش حاجة تخسرها هي خسرت كتير الجيل ده وإتعلمت من غلطة السعر واستحالة جهازها الجديد هيكون اغلي من البلاي 5 حتي ولو علي حساب خسارتها الشخصية ، ده غير انها بتستثمر بشكل كبير في خدمة الجيم باس مع دعمها بالبث السحابي Xcloud فعندها حاجة تعوض حاجة ،عكس سوني اللي أكل عيشها بشكل رئيسي بيقوم علي مبيعات جهازها البلايستيشن فصعب تقدمه بسعر هي نفسها هتخسر فيه إلا لو عندها شئ تعوضه في المقابل زي إشتراكات البلس والناو أو المشتريات الداخلية من الألعاب علي الستور بتاعها واللي بتاخد منه نسبة مش بسيطة برده.

عموما لو عايزين نخرج من النقاش العقيم ده بحاجة فعلي الاقل نتوقع سعر الجهازين ياريت تتوقعوا معانا ..علي الاقل المقال مكتوب في الاول وفي الاخر ليكم 😁
انا شايف جهاز PS5 سعره 550 دولار
جهاز Xbox Series X سعره 500 دولار

Hussein Osman

About Hussein Osman

محرر وكاتب علي باب الله ، بقدّر جداً هواية الفيديو جيمز ،ومن وأنا صغير هوايات كتير اتغيرت في حياتي إلا ألعاب الفيديو متغيرش حبي ليها بالعكس كان بيزيد مع مرور السنين .. بعشق جداً ألعاب الاربيجي سواء الغربية زي فال اوت وويتشر وايلدر سكرولز او اليابانية زي فاينال فانتسي وبيرسونا ودراجون كويست